بالله ياروح الحياه اذكريني
بالله يا روح الحياه إذكريني
................... حتى ولو عدا على فراقي أعوام
أنا عجزت أنساك ما عاد فيني
................... وما لي سوا الشكوى على الله مادام
مكتوب أفارق وأبتعد عن ضنيني
................... وبعده ثمان سنين مشتاق وأنضام
أذكر وداعك وأكتم اللي يجيني
................... عبره وضيقة صدر والموت قدام
والله من فكت يدينك يديني
................... وأقفيتي.. وعيني بها حزن الإيتام
سجنت دمعي يوم غمضت عيني
................... و صوت الرياح يقول راحت ياسطام
حاولت انبسى وقت بينك وبيني
................... ويأست من تعويض هذيك الأيام
أنساك ثم أذكرك وأمسك جبيني
................... أنساك ساعة وأذكرك باقي العام
مشتاق لك..الا عثى الشوق فيني
................... ياكم دعيت الله أشوفك بالأحلام
طيفك وهو طيفك!! تكاثر يجيني
................... وأنا أتوق لشوفته قبل ما انام
بقلبي سؤالن حاير و جاوبيني
................... يجري بدم القلب صمام صمام
أموت وأعرف هو حنينك حنيني
................... وإلا غدى سطام مثل أي سطام ؟؟
