ديربي الرياض ينتهي هلاليآ .. ويتأجل التتويج الى المباراه القادمه..

بسم الله الرحمن الرحيم


السلام عليكم ورحمة الله وبركاته



صباح / مساء.. البرود كـ مستوى الديربي..


التقى قبل قليل النـصر والهلال فـي اياب دوري زين
السعودي للمحترفين..


و انتهت بفوز الهلال بهدف نظيف من اقدآم الدوسري
بالدقيقه 39 من زمن شوط المباراه الاول..


المبآراه لم ترتقي للمستوى المطلوب وكان الرتم
بارد وبطئ << يمكن ياسر يأكد كلامي بعد تصريحه..



صرآحه توقعنا اثاره وحماس اكبـر .. لكن
ممكن نعذرهم على الظروف اللي قبل المباراه
خصوصآ ان كل الفريقين مشغولين بالمشآركه الاسيويه
غير ضغوطآت الدوري ..



الشي اللي كان مميز اعتقد تبديلات الهلال
كانت سليمه وكلها صح..
اما النصـر العكس كل تبديلاته كانت سبب بنزول
المستوى << بالذات الدوخي ولاكوره عملها صح..


اعجبني تصريحات لاعيبة الهلال بعد المباراه
وخصوصا تصريح الهوسآوي :thumb:

آما ياسر يبي اجازه ههههههههههههههههههه



آن شاءالله يعطونه اجازه :315r:




الجدير بالذكر : تأجل تتويج الهلال بالدوري الى المباراة القادمه وذلك بعد فوز الاتحاد اليوم..
الهلال يحتاج الى نقطه فقط حتى يتم تتويجه رسميآ..




الف مبروووك :mabrook:



وهآردلك النـصر..



احتراامي لكم

مباراة باردة جداً

المهم فيها النقاط الثلاث هلالية




.
.
.



حسين عبدالغني

تؤكد يوماً بعد يوم بأنك لاعب جميل ولكن بلا أخلاق






الله يعطيك العافيه أختي بسمه

^
^

حياك المهيني

الله يحفظك مانبي هالسوالف لان لو بندقق بنلاقي حركات كثير بلا اخلاق..

لكن يكفيك تصريح اسامه هوساوي لما قال قبل شوي اننا زملاء ونشتم ونسب بعض فمابالك بمتنافسين....!

لايمكن اننا نسكت ونضحك لازم نكون متحمسين وهالشي حاصل..!!




المطلوب منكم طال عمـرك بخصـوص وضعـك هنا بالمضآيف المسآنده لنا بإدآرة القسم..



والف مبروووك الفوز roooose

والف شكر على مرورك




احتراامي لك

الف مبروك للهلال فوزه.
حقيقة انا طلقت الرياضة منذ زمن
واحمد الله على هذا الطلاق كلما اشاهد حوار رياضي !.
الف شكر لك اختنا القديرة بسمة العز.

حياك اخوي عبدالرحمن



ههههههههههههه طلاق بالثلاث اجل :d:


والله بيني وبينك انت ريّحت راسك : )


الف شكر لك لحـضورك الكريـم ومع انك مطلقها الا انك حضرت
انا ابآرك لنـفسي حضـورك وتشريفك الغالي ..roooose



احتراامي لك

وه وا كبدي

جتكم غربتي مستعجلة

-----------
قال ايش قال النصر
ياعمي استريحوا بس

ذبحتوا بناديكم من اول الموسم حنا وحنا وحنا
وطلع ما عندك احد


اتناقش مع اخوي اللي ودي اتوطى ببطنه
قلت له قبل المباراة اصلا مابقى لكم شئ الا المباراة هذه لذلك انا متوقع يفوز النصر----كذا بس علشان ارفع من معنوياته
قال لا باقي لنا الاسوية وكاس الملك

قلت استريييييييييييح--- اخوي وامون عليه
الاسوية مالكم امل
وكاس الملك معكم الهلال والاتحاد اغسلوا يديكم


بجد مباراة باردة جدا
وتغييرات النصر قتلت المباراة
الدوخي شكله بدا يحن للهلال كل تمريراته فاشلة


شكرا بسمة
دمت بخير

اقتباس:

---

اتناقش مع اخوي اللي ودي اتوطى ببطنه

---

اخوك وودك تدوس ببطنه اجل غيره وش تسوي فيه !
شفت ان طلاقي للرياضة كان طلاق صائب !
طلق يابوفارس وتجوز القضية احسنلك:)

انا ناوي بصراحة يا ابو يوسف
بس لين النصر ينزل الدرجة الاولى ويطلع دوري المحترفين
بعدها راح اعلن اعتزالي

-----------------
مشكلة اخوي انه ولد امي وابوي وخايف على ذوقه

حاولت معه بس مو راضي يتراجع


اما غيره من تقصد انت بالضبط؟

ابوفارس لا مو بس النصـر الا الاهلي وبعدها اذا هبطو انت اعتزل عشان ترتاح نفسيآ هههههههه


شوف يآعبدالرحمن كونك اعتزلت فـ مانبغى نخسر عضو ثاني بمثل روح ابوفارس هههههههههههههههههه




ترا ها المخالفه ماجربتها على احد وودي اسوي بروفات لها : )



آبوفآرس..عبدالرحمن

الله يحفظكم اسعدتـوني جدآ بحوآركم roooose


احتراامي لكم

عاشت حكم الساحة بسمة---خايف منها


بسمة بسمة

هالحين اعتبر معي كرت اصفر مثلا؟

يعني المباراة الجاية ممكن اروح لابو زعبل؟

موعدنا بكرى مع الشباب والاهلي
يارباه على ناصر الشمراني وكماتشو

راح ياكلون الاهلي حبة حبة

ماهو لك يآحظي ههههههههه


هذا النصر اثر على راسك : )



شوف لاتجلس تتكلم على الاهلي والشباب هنا وتطلع برا الموضوع << عاد هنا تجيك المخالفه ههههههههه


يلا اكتب لك موضوع بماانك الشبابي بالمباراه .. استناك ولاتهرب ترا بنربطك ههههههههههه

أمّا عليكم ديربي يجيب الهم

مدري ليه كنت اشوف الملعب كبير على اللعيبة



يا عبدالرحمن يالحبيب تصدق لو لاعبين معهم كان لك قولين ولي قولين وشوته جنب الخشبه


|/
/
/

نرجع للأسباني أبرك

متعجب


احلى يا الكتلوني

اجل ماتعجبك مباراة الهلال والنصر؟


ايه مشكلتك ان نصر عمرك قضيته باسبانيا وزغد من الزيتون


خلك بقادسيتك وسالميتك

ابو فارس حتّه وحده !!

يا اخي

رأيت ديربي ,,ولم أر مباراة


وندمت ندامة الكسْعي

اقتباس:

---

المشاركة الأصلية كتبت بواسطة متعجب

أمّا عليكم ديربي يجيب الهم

مدري ليه كنت اشوف الملعب كبير على اللعيبة


هههههههههههههههه


يا عبدالرحمن يالحبيب تصدق لو لاعبين معهم كان لك قولين ولي قولين وشوته جنب الخشبه


|/
/
/

نرجع للأسباني أبرك

---

اسباني ومانشوفك هنا :a:


لا لا مالك حق وربي .. يعني ذووق عآلي بالمتابعه آكيد آحنا خسرنآك الفتره المآضيه..



حيآك متعجب .. شرفت الريآضي بحضـورك roooose


احتراامي لك

^
نعم لو لاعبين دخلنا اهداف بس حسافة اعتزلنا بعصرنا الذهبي:)
عذرا القديرة بسمة ماني عارف العدد المسموح به من المشاركات هنا>عنده ردود كثيرة :)

^
^

اخوي عبدالرحمن


خذ راحتك الموضوع والرياضي كله تحت امرك وزين بعد مريتنا هذا اكبر شرف لنا وخصوصا انك من العصر الذهبي

صراحه مستوى النصر بالشوط الأول كان أفضل


و لو سجّل سعود حمود الكرة كان كلام ثاني


و اعتقد ان الكرة اول المباراة فيها شك ضربة جزاء ( المرشدي مع سعود )


و مستوى متميز من الدوسري و عباس



و النتيجة المنطقية التعادل



و الشوط الثاني وضح انخفاض مستوى بدران و الزيلعي


و مدرب النصر أخطأ بتفييراته



على العموم فوز بأقل مجهوود




شكراا اختي بسمة

اهلا بأمير الهلاليين آخوي ( تـركي)


كلام وتحليل منطقي ورآئــع وآسجل اعجـآبي بفكرك العقلاني




شكرآ لحـضورك الممـيز roooose


احتراامي لك

اقتباس:

---

وخصوصا انك من العصر الذهبي

---

انتي بكلامك هذا راح تحيين فيني الروح الرياضية الميتة من زمن:)
واخاف ان حيت هذه الروح اذبح اقراني من رياضيين اليوم كمتعجب وابوفارس:)
تسلمين ااختي لقديرة بسمة والرياضي منور بوجودك وبقية الاعزاء.

شكراً للظهير الايسر بسمة العز

والمضيف الرياضي بيتنا الأول

زمان عن الدوري السعودي واليوم قلت خل أتابع المباراة ودّي أعرف هالتعصّب اللي واصل لمستويات خطرة ليييه !!!

في شي يسوى ؟؟

ما لقيت إلاّ مباراة لا تُظاهيها رتابة إلاّ مباراة القادسية والعربي عندنا


/
/

عبدالرحمن بجد تبي نحترف بنادي العلمين...من قريب نتقهوى ونروح للتدريب

ا

الظاهر بنسوي ماراثون للشيبان هههههههه


بس شكل ابوفارس بيفوووووز لياقتة عالية

نآدي العلمين وين صآير.. :)


..


عبدالرحمن آمآ ذبح ههههههههههه

هي من غير ذبح والوضع متوتر هنا .. بس مثل ماقال متعجب الوضع فعلا مومستاهل هالتعصب لكن الدور الكبير للاعلام
اللي يحآول بكل وسيله رفع الشحن والاحتقاء الجماهيري بين المراهقين والشباب..



بصراحه ياليت لو يرجعون اهل العصر الذهبي بكل امانه الحوآر
والنقاش الرياضي ممتع معهم اكثر من جيلنا اللي مآدري ايش يبغى ههههههههههه

اقتباس:

---

المشاركة الأصلية كتبت بواسطة تــــركــــي

الظاهر بنسوي ماراثون للشيبان هههههههه

ههههههههههههههههههههههه

بس شكل ابوفارس بيفوووووز لياقتة عالية

---

بالعكس اللياقه مع عبدالرحمن اكثر خصوصآ الوزن افضل من بوفارس :315r:

سوا لنا اختبار حنّا الثلاثة

دبل كيك

اللي يجيبها صح


يفوز


وش قلتوا معاشر السكاريب

الله يصلحني


قعدت اضحك على تعليقي

كني اشوف عبدالرحمن ركبتوه ضاربه خشموه ويرعف

انا متحدي الجميع شيبانهم وشبابهم:)
لاني وان تركت اللعب بس لازلت امارس الرياضية
مو مثل اهل العيوش والكبسة والمكبوس:thumb:
وانت تدري ياسيد متعجب بكرا عندي
تتقييم لياقة لك ولابوفارس وعبدالله رويشد:)

كان الهلال ضاغط أغلب فترات المبارة حتى بعد الهدف؟!
عموماً المباراة كانت باردة جداً من كلا الطرفين ولم ترقى لمبارة ديربي العاصمة (أقوى دوري عربي)؟!

وين الهلال والنصر أيام زمان أيام يوسف الثنيان وسامي الجابر وفيصل أبوثنين في (الهلال)
وماجد عبدالله وفهد الهريفي ومحيسن الجمعان وصالح المطلق ويوسف خميس(خماسي الرعب في النصر) !؟
أقسم بالله أيامها كنت أضع يدي على قلبي أغلب فترات المباراة لإني أعرف نتيجتها مسبقاً وهي (هزيمة الفريق الذي أشجعه (الموج الأزرق) وحتى تنتهي المبارة وغالباً ماتنتهي نصراوية (حزن ومأساة بالنسبة لي) !؟
أذكر أني كنت أيامها أغسل يدي وأجففها بعد من إمكانية أن يفوز الهلال خاصة إذا شفت ماجد عبدالله والهريفي وصالح المطلق ومحيسن الجمعان في الملعب مجتمعين في مبارة ديربي العاصمة؟!

بسمة .. لن يتأخر تتويج الهلال بطلاً ورايح أذكرك بحول الله تعالى لإن الهلال ببساطة شديدة فريق كبير وقدر الكبار أن يضلوا كباراً :315r:

خلاص ان شاءالله بنسويلكم اختبار انتو الثلاثه هنا بالرياضي قريبآ .. الى الامام لارجوع قولو تم ههههههههه



الله يسعـدكم..roooose


احتراامي لكم

يا خوي انا على الاقل لاعب نادي سابق

بس انت ما تترقع كل ما ودّك تلعب كوره يجونك الشيبان يدورون شبّه << وراح عمرك شبّه ورا شبّه

معلش كابتن بسمه

حنا فلّيناها شوي << تذكرنا زمان مضى:za3lan:

اهلا بحضـورك آستآذنا الكبيـر مطلق الثنيان.. واكيد لكل زمان دوله ورجال..


والهلال اليوم اكثر فريق يتمتع بمستويات عاليه ويمكن ماابالغ لو قلت يعيش عصره الذهبي..



وانا على فكره باركت للهلاليين من قبل كذا جوله بالدوري يعني لاتتوقع بالعنوان حاجه ثانيه غير عمل آكشن فقط لااكثر :d:




حيآك الله نورت الرياضي بطلّتـك


احتراامي لك

ماشاءالله لاعب سابق .. بأي نآدي.. ؟

اقتباس:

---

المشاركة الأصلية كتبت بواسطة متعجب

معلش كابتن بسمه

حنا فلّيناها شوي << تذكرنا زمان مضى:za3lan:

---

وانتو فيها : )

بصرآحه اليوم كسبت حضورك الرآئع وانت وآخوآني عبدالرحمن وبوفارس وماشاءالله عليكم ثقآفتكم الرياضيه حلوه..


حيآكم الله بأي وقت والمكآن مكآنكم..

.
.
.

مبروك فوز الهلال

الصراحة ماشفت المباراة كانت عندي جمّعة بنات :)


تصدقين كنت متوقعة فوز النصر علشان كذا مااهتميّت بالمتابعة ..




يسلموا بسومة وكلك ذووق

بسمة
لو خسران الهلال بعشرة صفر
بتكون اهون علي من كلامك

اقتباس:

---

المشاركة الأصلية كتبت بواسطة بسمة العز

نآدي العلمين وين صآير.. :)

---

بعطيك مخالفة واحتمال باند
كيف تتجاهلين نادي العلمين العريق


هذا طال عمرك يقع في محافظة الخفجي
مدينة الهدوء والبترول
والصمود والتحدي
ومدينة الزهور
ودرة الخليج
ولؤلؤ الساحل
-------------------------
نادي فيه كل شئ الا الاعبين-- وش نسوي مالقينا الا متعجب وربعه


دمتم بخير

الف الف مبروك للزعماء

وهاردلك ياشبيثان

المباراه بااقل مستوى خاصه من الهلال نظرا للضغط المتواصل مع المشاركات



اهم شي بالمباراه انهم تبادلوا القمصان وهذا نادرا يحصل بين الفريقين



الزعيم زعيم



اما امير الهلاليين هنا بالمضايف بعد اذنكم هو منصور العطاوي

مع احترامي الشديد للاخ تركي الذي احترمه واقدره

انت تصبح شيخ الهلاليين

اهليين حبيبتي شمـوخ



والله جمعات البنات ماتتفوت:d:


الف مبرووك الفوز..


والف شكـر لك على الطــله الحلوه ياقمـر roooose



احتراامي لك

ابو فارس .. بالله عاد هذا اسم نادي (علمين) طيب مآدآم اسمه علمين اجل كيف بيكون شعار النادي : )


لا ومافيه لاعيبه وتبغى تعطيني باند عشان ماعرفته ..:3ajeeb:





والا عشانه من الخفجي صار نادي عريق :7ayyoh:

طيب مآدآم تعرفه نبغى منك معلومآت عشان نتعرف على هالنادي ^_^

اقتباس:

---

المشاركة الأصلية كتبت بواسطة ابو ضاري

الف الف مبروك للزعماء

وهاردلك ياشبيثان

المباراه بااقل مستوى خاصه من الهلال نظرا للضغط المتواصل مع المشاركات



اهم شي بالمباراه انهم تبادلوا القمصان وهذا نادرا يحصل بين الفريقين



الزعيم زعيم



اما امير الهلاليين هنا بالمضايف بعد اذنكم هو منصور العطاوي

مع احترامي الشديد للاخ تركي الذي احترمه واقدره

انت تصبح شيخ الهلاليين

---

حياك استآذي بوضاري

والف مبرووك الفوز .. وطبعآ كان في ضغط كبير
على الهلال لكن استطآع الفوز بأقل جهـد..


بالنسبه لتركي ومنـصور ..فهـم عيـنين في راس..
ويستآهلون الطيب..



آلف شكر لك آخوي بوضاري على حضـورك وتشريفك


احتراامي لك

الف مبروك للهلاليين الفوز بالديربي والثلاث نقاط ..

وهاردلك لجماهير النصر

إستنتاجي الشخصي يقول :

1- مباراة البارح بينت مدى قدرة الاداره الهلاليه على ضبط لاعبيها وبالاخص الرائع ميريل رادوي.

2- في النصر مواهب واعده من الضلم ان تبقى بلا مدرب يطورها.




تري مكاسي بسمة الرياضي