اغدينا ناخذ وسام من هالكريم:)
قلت آه من صبر صبرته على الكود
من ونتن للقلب جاحت وقدّت
ونّة عتب ؛ ونة غضب ؛ ما لها حدود
يا ليتها عن مغلق الصدر صدّت
لو هي بحيد ذوّبت كل جلمود
على الضماير بالهضايم تحدّت
قامت تعرض لي والايام والسود
ان قلت قفت عودت لي وردّت
ان قلت هانت بالحشا جابت الزود
وجاحت خفايا ضامري واستجدّت
وزادت جروح القلب بجروح ولهود
دنياي مالت عن سنعها ولدّت
والعين كن بنونها ملح بارود
على السهر كل الليالي تحدّت
تسهر وبعض الناس هجاع ورقود
وحي تبي فرقاه ما فيه لدّت
ونشدت يا تركي عن اللي بهم جود
وقالوا ضعون اهل المروات مدّت
العدل من شدوا مع الناس مفقود
وبأفعالهم عمسين الاريا تقدّت
منزالهم خالي تصافق به النود
من يوم عنه اسلاف الاجواد شدّت
اقفوا عن الدنيا هل الخيل والقود
اللي فضايلهم على الناس بدّت
اهل الفعول ولبسهم صنع داوود
واهل المهار اللي على الضد كدّت
عصمان الاريا مشرعت كل مجرود
ليت الليالي السود عنهم تعدّت
الناس بالايام طارد ومطرود
يا ليتها بأهل المروه تمدّت
وطير الفلاح اللي عن الصيد مردود
عقبه تبوعٍ علمت واستهدّت
اشوف ناس عندها الحقد ماجود
ونفوسهم عن كل عليا تردّت
العدل في ساحاتهم صار مفقود
وعن الفضيله جنبت واستردّت
ما يرفعون النفس عن كل منقود
ان ما تعشت عرضها له تغدّت
تعطي عن العليا محاريف وصدود
ووجيههم ما قيل بالجود ندّت
محمد الاحمد السديري
