الرائعه الراحله عابرة سبيل
رحمة الله عليها
شاعره رحلت وبقيت ابيات قصائدها رغم قلتها تقارع عمالقة الشعر في وقتنا الحالي
صبحيّة العيد:
ليته درى صبحية العيد وش صار
ياهي جرت لي من عذابي هوايل
يوم العذارى بيحن بعض الأسرار
وجت السوالف بين قيلٍ وقايل
هاذي معايدها قبل وقت الأسحار
وهذيك صاحبها عطاها رسايل
وهاذي تقول انه لفا البيت زوار
وهذيك راحت له زيارة عوايل
وهاذي تفاخر في غلا الصاحب البار
تقول عايدها بكل الوسايل
وأنا أطالع فوق ويمين ويسار
بالعيد حتى ما مشطت الجدايل
========
ياصاحبي:
يا صاحبي.. بس تكفى، لا تجنني
ماعفت من ضرّني.. وشلون خلاني؟!
حتى الذي ضرني لا ضاق يحزنّي
ماعندي اعداء، كل الناس صدقاني
قلبي معاكم نظيف وصافيٍ ظني
لا ما يتغير غلاك إن صرت غلطاني
والله لا سامح الغلطة وانا اغني
من لا عذر صاحبه يعيش وحداني
وإن كان قلبي حقود، الله يلعنّي
وان كان مالي شرف، عساي للفاني
