يالله ياللي عليك الكون تدباره
ياسايق الخير يا جبآر ياعالي!!
يارب نفسي من الصكات محتآره
من ضيقتي جيت يمك مذنب وجالي!!
يارب ترحم خفوق عايش بناره
ترجع عليه الحيآ من عقب الامحالي!!
يارب ياللي تعرف الغيب واسراره
تكشف قلوب على الشيمآت تحتالي!!
الوقت غدار و(الهقوات غداره)!!
حتى الردي صار ذيب بوقتنا التالي..
الصاحب اللي بقلبي بان مقداره
راح وتركني عسى الله يرحم الحالي!!
يامن يطمن خفوقي بآخر اخباره
عساه عقب الطريق السرمدي سالي!!
خلوه يرجع وقلبي ظله وداره..!!
خلوه يبني مكانه بالحشآ خالي..!!
الناس في حبلي المشدود ثرثاره
ماتدري ان التوجد قطع حبالي ..!!ا
بذر له الصدر قدر وارجي اشجاره
تطول مير الظنون تبدل احوالي!!
لاجيت اهز الضلوع تموع من ناره ..
والمر لآمن قطفته تقطف الحالي!!
حسبي على اللي قتل حلمي ولآزاره..
مايدري انه حيآتي وآخر امآلي؟؟
(ثوب المحبه).. قطع بيدينه ازراره..
والكون دونه تقل ماكنّ به والي..!!
قدمت عذري ابي من يقبل اعذاره..
للغيم.. والورد.. والنسناس.. والعالي..!!
البارحه والرياض تفوح بازهاره..
مديت شعري وغنى الخرج موالي !!
الغربه اللي يدق الضيق مسماره ..
لو كنت سالي قسم ماكني السالي!!
مشتآق اشوف (الشمآل) وجمعة الحاره..
وللمجلس اللي له الاجواد مدهالي !!
وسط اللقايط تجيهم (ايمن القاره)..
حين تناقط بياض وطيب ورجالي!!
اصغرهم اللي يخالط بنه بهاره..
ولاناش درب الردا دقن ولاجلالي !!
واضعفهم الي يشيل الضيم عن جاره
وشعيل لامن برك للحمل شيالي !!
مشتاق للقاع.. للذعذاع.. لاحجاره..
للورد.. للبرد.. للشعبان.. للجالي..!!
للشارع الملتوي ..للبيت وجداره..
لاصوات الاطفال.. للشبات للغالي!!
للضحكة اللي تحرا مقبل اخباره ..
من رحت عنه وهو بقفاي وقبالي!!
مقبل الضوي ..!
