رمضـــــآ ..
بسملة نزف روحي تستجير بـ افاه
ولافزع للحنايا كود شلفا غدر
خنجره وسط صدرً ماتوقع قفاه
لين شافت عيونه من رحيله هجر
واقعي حر رمضا وامنياتي حفاه
والدقايق ثواني واحتياجي دهر
دافي وضوء عمري ينتقض من جفاه
تبطل ايام صلت دمعتين الفجر
عايشً بي زمانً مات عنه شرفاه
يوم هز المراجل دم موتً حمر
الغلا ماتنقى عشرته وأصطفاه
في عناده تحدي ماله الا الصبر
شمع الاحلام والع رمش عيني طفاه
فجة النور تجهر مابقى من كدر
ليت دمع اغترابي علمه وش خفاه
ليت ياس القصايد بين عجز وصدر
يطلب الشعر طبً ماترجى شفاه
غير موت القصيده واحتضار الشطر
بالمحاني شعورً ضاميُ مااكتفاه
يوم شحت مزونه اعتراني فقر
يسألن عن غيابه حزن فاقد وفاه
والاجابه دموعً ممتليها قهر
ياحسافة شعورً بالمحاجر غفاه
وابجديات بوحً للبرايا ظهر
تنتظر هالمسامع كلمةً من شفاه
والضلوع تباشر بالحكايا مطر
انتظاري يبلل مابقى من دفاه
وتفقد ايام فرحي من غيابه عمر
يغرق بسيل هجره مابقى من رفاه
مل كثر الخطايا وانتقاص القدر
المسا من عيوني كل دمعً لفاه
وكل نجمً تحرى من طيوفه عذر
المعاني تصاغر لو نطقها بـ فاه
يوم زيف الاماني محتفل به سهر
باب ليل الغواني بالمجون احتفاه
والشبابيك ذنبً ماقفلها حذر
اسود الليل حقده موغلً ماكفاه
موت صبحً بياضه ممتلي به طهر
صدر الاحلام ضايق والليالي نفاه
والوسايد تحرا غفوتي من شهر
