% بخزاده وميرزا .. روايه في الأدب الشبيثاني %
في حكايه او قصه رواها لي اخوي الراشد راشد الراشد
تعود بداية احداث هالقصه الى منطقة بيشاور في باكستان
يحكى انه في احد البيون الفقيره في بيشاور الباكستانيه توجد ام وولديها
الام اسمها سوميرا
والولد الكبير اسمه بخزاده
والصغير اسمه ميرزا
كانت الام تعاني الامرين في سبيل توفير لقمة العيش لاولادها وتعليمهم
وبعد ان كبر الاولاد
وخلصوا مرحلة الثانويه
اجتمعت الام بأولادها
وقالت
يا عيالي ابيكم تساعدوني شوي على العيشه
وانا يا اميمتك خلااااص مااعاد اقدر اصبر اكثر
قال بخزاده يعني وش نسوي يا يمه بالله عليتس
هذا انا مخلص الثانويه ادبي ونسبتي زي وجهي ولا في لا شغله ولا عمله
واخوي ميرزا بعد خلص الثانويه علمي بس للاسف بالدور الثاني
يعني مافيه امل نكمل دراسه
وشغل مافيه شغل
قالت الام
يا عيالي
شوفوا عيال جارنا مشتاق الرحمن
ما شاء الله عليهم سافروا للسعوديه
وشغالين هناك
ويصرفون على اهلهم
وزوجهم ابوهم بهالفايت بنات عمهم مرتضى الرحمن
ليه ما تروحون تشتغلون بالسعوديه ولا بأي مكان
قال ولده يمه جليه بكيفنا
الفيز ما ناخذه الا بطلعت الروح
لكن ابشري نبي نحاول
ومرت سنه مالك على البال طاري :)
وبيوم من الايام
جاء ميرزا طااااير
يمه يمه يمه
قالت اموه لبيه يالحد الجنوووبي
قصدي لبيه يا ولدي
قال يمه ابشرتس لقيت فيز
قالت اموه احلف
قال والله يا يمه
ولا اخوه جالس بالمقلط يلعب بليستيشن
قال يا علك ما تجيب الفووود
انت منين طلعت لنا
قالت اموه خلاااص يا بخزاده
اسكت
وتوكلوا على الله واشتغلوا يا عيالي
ذبحنا القمل من الفقر
ويتجهزون للسفر الى السعوديه
ويسافرون بعد ما وادعوا امهم بالمطار
ويوصلون السعوديه
وبعد شهرين
يتصل ميرزا على اموه
اول مره
ماردت عليه
ثاني مره
ما ردت عليه
ثالث مره
ماردت عليه
ا
بداء يخاف ميرزا على اموه
ويتصل المره الرابعه
وترد
خيييييييييييييييررر
قال يمه انا ميرزا
قالت يااااهلا بوليدي
يابعد رجليني هالوجه
قال يمه ليش ما رديتي علي فضختي قلبي خفت عليتس يا بعيدي
قالت ياولدي ابلشن لي ساحرن سنغالي يتصل علي
وقمت ما ارد على الارقام الدوليه
قال العللهااابو هالعلابي يهالسنغالي
قالت ما علينا منوه
وش سويتوا يا عيالي
قال والله يا ميمتي ابشرتس اني هالحين اشتغل على دينا
اروح لديره ينقال له حايل
اشحن جح وابيعوه بالرياض
والحمد لله الخير واجد
وان شاء الله ابرسل لتس فليساتس باتسر
قالت واخوك وينهو
قال يا يمه اخوي هذا ناكسن للمرح
هذا هو بشقة عند زقرت باكستانيين لعب بلايستيشن 3
لا شغل ولا عمل
وشكلوه ما يبي الشغل
وهكا اليوم لقيت لوه شغل خباز تميس بس هو معيي ما يبي
قالت يا وليدي انتبه لوه
قال يا يمه هو الكبير وش اعمل بوه عاد
وبعد سنه
يتصل ميرزا على اموه
وترد
اخبارتس يا يمه
قال ابد انتم وشلونكم
قال والله ابد
تمااام ياربي لك الحمد
يمه ابي اقولتس شي
قالت وشو يا وليدي
قال يمه والله اني مستحي منتس
قال اخلص علي قل
قال يمه ابيتس تخطبين لي بنت عمي اكبر خان
قالت ايهن يا وليدي تخبر عندوه قطعت بنيوات
قال ابي بنتوه حسينه
قالت ولي يا وليدي ابرك ساعه
من باتسر اخطبه
ولياجيت ان شاء الله بعد سنتين نزوجك
قال زين
قالت طيب اخوك وش عمل
قال هذا هو متكي بهالشقه عند هالدشير لا يهش ولا ينش
قالت يا وليدي انتبه لوه
قال ابشري
قالت وش وقع دينتك اخبرك تقول مهي حيل بهالفايت
قال لاااا ابشرتس صلحت قماشاته وخرطت الهوب وهالحين على كيفتس
وبعد سنتين
يتصل ميرزا على امه
وترد
قالت اموه يالله حي العريس
قال اي عريس يمه
قالت افااا
العلم يا وليدي
قال يمه تورطنا
قالت افااا وش فيه
قال يمه الله العالم هالسنه مامن عرس ولامن اجازه
قالت ياوليدي وشبلاك لعنت جدفي علمن وش بلاك
قال يمه كفيلي مسافر لامريكا دوره
قالت طيب وخير يا طير
قال ما اقدر اطلع ليما يخرج لي هو خروج وعوده
قالت طيب ومامن احد يقدر يخرج لك
قال لا
قالت دوروا منا منا يمكن
قال يمه حاولت
ويضيق صدر العجيز
وبعد سنه
يتصل ميرزا على امه
وترد
هاااه يا وليدي بشر عسى كفيلك رجع
قال لا والله يا يمه
والمصيبه الارقام اللي اتصل عليه بهن اول مقفلات من زمان
يعني يمكن انوه مغيرن جولاتوه
يعني اننا قعدنابه ياميمتي
ويجلسون على هالحاله سنتين اضافيه
الى ان تم القبض عليهم بتهمة التخلف في نظام الافامه في البلد
وتم سجنهم بهذه التهمه مع غرامه ماليه بسبب كفيلهم المهمل
( كلكم راع وكلكم مسئول عن رعيته )
وتقلدوا تحيتي
