من زمان كان ودي أتكلم عن هالموضوع ,, بس كنت حابة أكتب عنه بأسلوب يتناسب مع نمط طرح مواضيع القسم ورصانته :)
لكن اكتشفت إني بأسلوبي الطبيعي أقدر أعبر عن الفكرة بشكل أوضح لي ويمكن للقراء :)
في الحياة العامة نلتقي بأشخاص ونعيش مع أشخاص ونتواصل مع أشخاص نادر مايصادف إنهم يكونون مشابهين لنا في طباعنا ونفسياتنا ,,
بعضهم تتعايش معهم بكل بساطة بالرغم من اختلافهم عنك وبعضهم تنفر منهم بشكل يدفعك لتحاشيهم حتى لو ماوصلك منهم شر ,,
طريقة تفكيرهم ونظرتهم للحياة وللي حولهم تعتبر بالنسبة لك غريبة وما تتناسب معك ,, وفي المقابل فيه ناس يعجبهم هالنمط وينجذبون له ويحبونه ,,
(( الأرواح جنود مجندة ماتعارف منها ائتلف وما تناكر منها اختلف ))
وفي العلم الحديث صار فيه دراسات على الشخصيات وتقسيمها بناء على صفاتها الأولية ,,
بعضهم يقسمها تقسيم البوصلة ,,شمالي وجنوبي شرقي وغربي وتفريعات الجهات :)
وبعضهم يقسمها تقسيم وصفي ,, تحليلي وتعبيري وودي ومتفرد ,,
وبعضهم يقسمها تقسيم تمثيلي ,, بصري وسمعي وحسي ,,
وكلها في النهاية تصب في خانة تحليل الشخصية ,,
واللي يحلل شخصيته صح يطلع بنتيجة صحيحة ,,ويعرف نفسه ويعرف غيره ,,
الكلام مو على الأنماط لأنه سبق وتكلموا فيه ناس بكثرة ,,
لكن الهدف هو الاستفادة من معرفة الأنماط ,,
وش الفايدة لما أعرف إني أنا مثلا جنوبية وأمي أو أبوي أو أختي أو صديقتي أو حتى مديرتي في العمل شمالية !!؟
كيف أستفيد من هالمعلومة ولصالح مين راح تكون الفايدة !!؟
كيف أستغل هالعلم في تواصلي مع الآخرين بحيث أكسب أكثر قدر من العلاقات الجيدة وأترك انطباع جيد عني وفي نفس الوقت ما أتضايق من تصرفاتهم واختلافهم عني ,,
بصراحة أنا أتمنى لو كان هالعلم منهج يدرس في المدارس من المرحلة المتوسطة فما فوق ,, لأنه علم يساعدنا في التقدم للأمام <<< أجل للوراء :)
يساعدنا في فهم بعضنا والإعذار لغيرنا ويساعدنا في توصيل أفكارنا ومعتقداتنا بالأسلوب اللي يناسب المتلقي ,, بعد مانعرف نمطه ,,
الكلام كثير وما راح يخلص خصوصا إني منضمة حديثاً لقروب هذرولوجيا :) <<< أبو فارس ترى هالدعاية لها ثمن :)
أكيد كثير منكم عارفين هالمعلومات بس من فيكم استفاد منها في حياته العملية ,, خلونا نقرأ تجاربكم
