يــومين ع هالحـــــال...
يومين ع هالحال مع بدر
rooose2
يوميـن قاطعنـي ولاترحـم الـحـال
بالله قلـي كيـف ماهـزّك الشـوق؟!
انا ثملت مـن الولـه والجفـا طـال
وإلا انت ماكنك من البعد محـروق!!
تركتني بين الظمـا وأشهـب الـلال
مكسور / متضايق / وحاير / ومخنوق
حسبي عليك ان كان هديـت الآمـال
اللـي بنيتـه فيـك طابـوق طابـوق
وانا عشانـك جيـت ماعـد الاميـال
كن المسافه بيـن الاهـداب والمـوق
طفل ٍ يشوفك غير مـن بـد الاطفـال
حتى كبرت وصرت ياطفـل معشـوق
الله وأكـبـر لاتـذكـرت الاطــلال
اللي خذت من صورتـك دم وعـروق
ياكـم لعيونـك تحـديـت الاهــوال
أهيّـب العـذال وأطــاول حـلـوق
وياما وصلني من سواليـف وأقـوال
دفنتهـا تحتـك وحلقـت بـك فـوق
والـيـوم لاوالله يامشـغـل الـبـال
النوم من عيني لـه أيـام مسـروق
من غبت وأحزاني لها ألـف مدخـال
متى وصالك من بعد نومه يفـوق؟!!
وين الليال اللـي بهـا كنـت تختـال
في دفتر أشعاري على كـل طـاروق
لامن تباطيتـك يجـي منـك مرسـال
تشرح لي أحوالـك وتتعـذر بـذوق
ياصاحبي ضاقت على كـل الاحـوال
وأنت بغيابك راس الأحـلام مشنـوق
أن مت بيدينـك تـرى مـات رجـال
يبيع عمره بس على شـان مخلـوق
يومين .. صارت حال .. وأتبدلت حال
ماهزّك فراقـي ولاهـزّك الشـوق!!!
من روائع بدر الضبعان
