هذه القصيده للشاعر
محمد مريبد العازمي
واتمنى ان تنال اعجابكم:thumb:
تعال ياسكـر نبـات العشـق ياملـح القصيـد
غيبتك لي مده وانـا اغنـي علـى طاروقهـا
قصيدة (ن) موالها تهتز لـه خضـر الجريـد
ترخي هماليل المـزون اللـي تلـوح بروقهـا
ماهي دراما او مسلسل تكتبـه فجـر السعيـد
مشاعر(ن) تليق بـي وانـا وغـلاك تلوقهـا
ناديت لك وانت القريب من المحانـي والبعيـد
وسقت القدم والا لغيـرك مستحيـل اسوقهـا
ومديت لك كف الرضا والعشق والعمر الزهيـد
ومدللـك مثـل الرجـال اللـي تدلـل نوقهـا
واصبحت تسري وسط شرياني وتسكن بالوريد
تقفي وتقبل وانت لي طعـم الحيـاة وذوقهـا
ياراس مالي يوم مالـي لاحسـاب ولارصيـد
فـالبنك والاسهم نمـوت ولا دخلنـا سوقهـا
تعال قربك عيـد والبعـد ضربـة مـن حديـد
يامن تشب النار بغيابي وانـا أوطـى فوقهـا
أشعلت بردي في دفاك وذابـت امـواج الجليـد
اللـي شواطيهـا تحـرى فيتـك وشروقـهـا
وكتبت فيك اغلى القصيـد يفيـد والا مايفيـد
ابيـات لاغنيتهـا تـروق لــي واروقـهـا
عامين احايل رفقتك والعمـر ينقـص مايزيـد
سنيـن ادور رفقـة اللـي رفقتـه مابوقـهـا
ارجع ولا ابغى لك عذر من دون شرط ودون قيد
ياول هوى نفسـي وتاليهـم وغايـة شوقهـا
تعـال وافعـل ماتبـي والله يفعـل مايـريـد
اترك كلام اللي علـى السيـرة تبـل حلوقهـا
