][!! آخَـرِ رِصَاصَةَ !!][
آخر رصاصة كنت أهدد بها الغول
طاحت وأخذها الغول وأخرج لسانه
وأصبحت لا محزم ولا سلاح مصقول
ولا ظهر يسند ولامن حصانة
أجسم خسارة وأكسرتني على طول
كسرة قهر ماهيب كسرة جبانة
صدمة وهزتني ورددت مذهول
أثر النوايا البيض جرم وإدانة
من كانت الدنيا فتية وعطبول
وكل شي له أصول ومقام ومكانة
حتى الخطا لا أخطيت تخطي على أصول
وإلا إنوصفت بنقص عقل وديانة
يامن خطاك يطول شرحه ولا أطول
عذر يوقف مكرة الأسطوانة
معقول جتني منك منك أنت معقول
يا صبر الأرض وهالزمن يا هوانه
وأنا أعتبرك أكبر اخواني ومسؤول
عني وأقول إني من أصغر اخوانه
وأصـد عن زلتك من حول لا حول
وأقول له عذر الغلا والميانة
وأسمح وأقول إن الخطا منك مقبول
إلا إذا وصلت حدود الإهانة
أنا خلاصة حرب وسيوف وخيول
وفعل البطل لا قال أنا أخو فلانة
ما سمح ولو كان الثمن فقدي لذول
والعذر شان القبح والقبح شانه
اسمع وأنا بناخيك للهرج مدلول
العار عار الصيت والصدق أمانة
أنا جبل على الرفاعات مجبول
ماني بشقة جيب وإلا خيانة
أنا إبن عم السيف لا صار مسلول
مع صيحة الفارس وصهلة حصانه
وإن رحت للمجهول مانيب مجهول
وأعرف أساليب الدجل والكهانة
وأصير بهلولين لا شفت بهلول
وأخطر مفاهيم الذكاء اللعانة
القاع تتزلزل ولا طاح أبا الهول
تباشروا بالخير يا أهل الكنانة
لذا يا ابن عمي ترى الباب مقفول
والبيت ثابت ما تزعزع كيانه
ماهي كذا يا محزمي لكن أقول
أقبل شكر مطلق وكثر امتنانه
وإعرف نتيجة قسمة الطول بالطول
وتكسب تجاريب الزمن وامتحانه
وأوصيك يا بن العم لا جاك مرسول
رّحب تري الترحيب ما فات أوانه
والحين أبا وادعك والبال مشغول
وقبل الوداع إخذ الشطر مع ضمانه
شطر لابن رشيد من بيت منقول
لو كان ماهذا الزمان بزمانه
قاله يوصي المسطـح حسين ويقول
ترى الخوي يا حسين مثل الأمانة
لِـ / الشَـاعَـرِ : مَطَلَقَ النَوِمَسَيِ
