ياراكب اللي به ضمان وبيما
آخر موديلات الخليجي وشاصي
من وارد اليابان به ونش سيما
تصميم منهم بالمواتر بخاصي
مافك جامه مامشى لو مليما
ولاعد بالكيلو امبيره نصاصي
اليا انحدر مع حومة كالظليما
تقول شحنة كهربٍ جاه ماصي
وقف من الميناء بصاله تميما
بأبو ضبي يفرق بسعر القفاصي
ساعة لفى حرك عليه الهميما
ضاري على قطع الفجاج القواصي
قطاوي لو هو بليل بهيما
ولا خاف قطاع الطرق واللصاصي
مندوب ما بين الجبل والقصيما
وخص المضيح دون داني وقاصي
متنحرٍ غوش لها الطيب سيما
وعلى المراجل همته والتواصي
يا جاء ذرى المظهود سقم الخصيما
بساعة والشلف مثل المحاصي
زبانهم عده بحد الحطيما
يأمن وعده يم الأركان ناصي
ينبيك -عصفر- والقديري كصيما
شبه بها شول العشاير مغاصي
قال إن هوش اللوح هوش العديما
وأركى على العدوان وبل الرصاصي
وفكوا بها دوجات شوف الغريما
وسماهم الزرعي بشقر النواصي
وسمراء ِأهل الروضه وصولة هتيما
صاروا عشا للذيب هو والنياصي
وإنشد ابن خربوش وش ذاق ضيما
قال الجبل دونه سباع عواصي
يا حضروا النشمان ستر الحريما
من ضربهم تشبع طيور خماصي
ناس لها بالمجد باع قديما
مواكره تفعل ولوهي صياصي
ومن بعدها أزكى عبير النسيما
وألذ من در البكار وخلاصي
من ضامر شفق مودن حميما
تهدى لكم كلن تخصه خصاصي
وصلوا على اللي بالخلايق رحيما
هو والصحابه هم طريق الخلاصي
مبارك الشوباش
