السلام عليكم ورحمة الله وبركاته
أسعد الله أوقات الجميع
نستكمل ما بدأناه بمسلسل التوهيقة و مع حلقة جديدة
ضيفنا في هالحلقة هو بنك الراجحي ( قبل يصير مصرف :) )
و هالسالفة صارت لمحدثكم قبل ما يقارب العشر سنوات يعني هالسالفة كبر التمرة :)
مرة من المرات دخلت فرع بنك الراجحي بالرياض بحي السلام تسان ما خاب ظني
و كنت ابعمل تحويل لحساب في بنك آخر بس الحساب ببنك الراجحي
( يمكن البعض يقول ليه الراجحي فأقول له شغلات لا يمكن للسعودي أن يجد لها بديل " الراجحي" الخطوط السعودية " الاتصالات السعودية ) :) <<<< على الهامش
المهم الموظف طلب مني بطاقة الأحوال
يوم عطيتوه بطاقة الأحوال
قام يتمقل بي و مطيّر عويناتوه تقل يبي يحفظ معالم وجهي
المهم قال عطن الرخصة
انا استغربت و حسيتوه يستهبل
بس اتضح ان الرجل ما عنده لعب
الوكاد عطيتوه الرخصة و قام يتمقل بي و يقارن بين الصورتين
المهم قال لي عطن بطاقة العمل
قلت له ما معي بطاقة عمل <<<< يتسذب :)
المهم وهو يروح لمدير العمليات و يقلبونها سالفة علي
و أشوفه يأشر علي بصبعه و الناس قامت تراعي
انا شكيت بوضعي قلت اكيد يحسب اني مزور :(
المهم جا مدير العمليات و يقولي شسمك
قلت لوه فلان الفلاني
قال كم رقم البطاقة الطويل
و انا حافظه و اعطيه اياه
المهم قام يحك راسوه :)
قال ياخوي بسألك سؤال
قلت سم
قال هالحين من أنت ؟ هل أنت اللي بصورة البطاقة و لا أنت اللي بالرخصة و لا أنت اللي قدامي
قلت لوه والله كلك نظر انت وش تشوف
قال انا اشوف ان اللي ببطاقة الاحوال غير اللي بالرخصة غير اللي واقف قدامي :)
و انا ازعل و اقول لوه ياخي فيه شي اسمه توقيع و صورة بطاقة الاحوال موجودة على الشاشة
ولو كنت بلعب عليكم هل بحط براسي احتمال انكم بتطلبون الرخصة ؟
قال خلاص خلاص
و يصوّت يا فلان تعرفّنا عليه :)
و انا احول و أقضي منهم الله لا يعيدها من سالفة
و تجيكم بعدها سالفتي مع الاحوال المدنية بس مهوب الحين
لانوه
توتا توتا قضن الحتوتات :)
و تصبحوا على خير
هالموضوع برعاية مجموعة الفراعنة
مع مجموعة الفراعنة مش حتقدر تنجضع :)
------------------
أبو فهد الهمزاني
