انكف من ضلوعي ثمانين خيّال
متلطمين ..وكسبهم لي فشيله !
عقيدهم مطعون من جيش صوّال
يبكي على فقد الفرس ..والدبيلة
شلفاه تجرح خافقه جرح قتّال
والخيل راحت مابقى الا صهيله
وش حيلة الفارس على كسر الاغلال
قلي دخيلك !.. هات لي اي حيلة!!
طاح الامل .. تكسرت كل الاقوال
لو قلت هانت .. زوّد الحظ ميله
لا تكسرين من البطا..عز رجال
وهذي مشاعر كل ابوها ذليله !
قلبي من فراقك ..تردّى به الحال
وعيني سحابه مايوقف هميله
لا تقول ليت اسمي من لسانك يشال
.تنشال روحي لو تمنيت ..شيله
يبقى على مر الليالي ..والاحوال
مثل العزاوي..والطنخ.. لـ القبيلة
اكبر جريمة تبني احلام وآمال
وتطييح قدامك..ولا فيك حيلة
والله لو همي على متن رجال
.كان انكسر كتفه وقرب رحيله
متني جمل ماطيّحه ثقل الاحمال
وليا هدر زم الحمول الثقيلة
منهو يعزي القلب .. والشعر.. والبال
ان مات حبين الاضلاع.. غيله
اوعدك لاعزف من بقاياك.. موّال
وكل ما ضوت لي بسمتك.. انحنيله !
واليا قطعت الدرب .. والوقت.. ترحال
لا تقطع حبال الرجا.. والوسيلة !
