حاولت أنام وطيّـر النـوم كابـوس
والقلب من هجمات الأفكار حسـاس
طب القلوب اللي بها الهم محسوس
مشياً مع البيدا ليـا هـب نسنـاس
فجٍ خلا ماهو مـن النـاس مانـوس
فيه السراب لصورة الأرض عكـاس
يسوى من الدنيا عمـارات وفلـوس
وأخير من قربة غثيثاً مـن النـاس
قفر الأماني رد من دونـه عسـوس
لقى العطش واستصعب الأمر عساس
كان اللبيب ملجلجاً تقـل مضـروس
كيف الهبيل اللي بالأوهـام غطـاس
تاهت خطاوينا وهب الهـوا كـوس
وضاعت هقاوينا وردت بالأتعـاس
شفنا من الأيـام ميـلات وعكـوس
نصبر وننطح داعي الضيم بالبـاس
ناخذ من أخبار البشر عبر ودروس
ونشفق على علماً لنا فيـه نومـاس
كلاً على ما كان بالنفـس مغـروس
وكلاً على ميراث والعـرق دسـاس
بين النشاما بيرق الـلاش منكـوس
وبنكه من التقصير يعلـن بالإفـلاس
على جباه اهل الردى رسم هنـدوس
مثلـث الحقـران والبخـل واليـاس
الموت جوع بعز تحيـا بـه نفـوس
ولا شبعت الذلاّن ببيـوت الأنجـاس
لولا الغرور وشور بايس ومنحـوس
من زخرف القهوات بعيون جسـاس
للدير والرهبـان لمـات وطقـوس
وأشباههم حول الكنيسة والأجـراس
يا هاجسي غرّد ترا ما انت محبوس
حرّر خيالك ما على الفكر حـراس
وارسم مساراتك من القوس للقـوس
وازرع ورودك بالأمل بين الأقـواس
لا للنفـاق ولا لتطمينـة الــروس
موت الشجر واقف وهو شامخ الراس
