للشعر يا اهل الشعر كيفه وجـوّه
السلام عليكم ورحمة الله وبركاته
بسم الله الرحمن الرحيم
للشعر يا اهل الشعر كيفه وجوّه
لا جاء مجاله إطلقه ما أكنّه
,,
والشاعر ليا صار ما هو مفوّه
نار السكوت افضل من الفين جنّه
,,
وانا لشعري يوم اصوّت وادوّه
تاتيني ابكار القصايد كأنّه
,,
أروام جدّي يوم غزوة عدوّه
في وقتها راعيه دوّه وجنّه
,,
أو كنّه دلاله على جال ضوّه
لا من حكرها بزود هيله وبنّه
,,
مع تمر حايل توّه مجيب توّه
تطرد عماس الراس لا ذقت منّه
,,
أقولها و للقول عندي جروّه
وآعقّب اللي قال ساعده جنّه
,,
من صلب فكري ما أجيب المشوّه
وكم شاعرٍ عسر القوافي حدنّه
,,
أفرض قصيدي طيب ما افرضه قوّه
تطربك كلماته ويعجبك فنّه
,,
إن سمعه الغضبان يرجع هدوّه
كن الحروف مسكنٍ عالجنّه
..
واللي تحاول بالغلا لي تنوّه
فهمت اشارتها بضحكات سنّه
,,
ما تدري ان الشعر مبطي وتوّه
وهو يحاول في وصوفه لكنّه
,,
في وصف خلي ينمرض ويتأوّه
ويونّ ويردف ونّته ألف ونّه
,,
يا ناس هذي من حلاها يتوّه
من دون مكياجٍ ومن دون حنّه
,,
لا شفتها آحس بحنان الأبوّه
وابني بيوت الحلم لانّي ولانّه
,,
أحلامنا اكبر من علاقه وخوّه
وان شفت غيري ناوي القرب منّه
,,
آغار ويجيني شعور الأخوّه
وافكّر شلون اقدر ابعده عنّه
,,
وختامها للمصطفى بالنبوّه
صلاةٍ و تسليم منّي يجنّه
