أكبر مطب في حياتي

أكبر مطب في حياتي
عزمت الأسبوع الماضي خارج الرياض حول المجمعة

وانا سبق اني حلفت مااعتذر عن الدعوة بسبب واحد

اعتذرت منه لظروف قاهرة والى الآن مايكلمني اعوذ

بالله.

المهم اني يوم الخميس الصبح ركبت الددتسن

بعد ماتكشخت وركبت خط القصيم بعد ماعبيت بنصف

المصروف اليومي بنزين عاد سيارتي ماتروى من

البنزين عجزت ارد عليه كل محطة اعبي بعشر ريال

وعلى هالحال الى هالحين لكن تروني راعي سرعة
ماينزل العداد عن 140كم/ساعة

ويوم وصلت نقطة مركز الحسي ويوقفوني المركز.

أنا: هاه خير انشاء الله

الجندي: "رخصة واستمارة "

انا : خذ تفضل

الجندي :لبق على جنب

انا :ابشر على هالخشم

والله وانزل والياهم محررين هاكالقسيمة اللي على كيف

كيفك وهي مخالفة سرعة .

قلت بنفسي مالي حيلة الا اني ابلا لي ولد حمولة
اغديه يسنعن ويفك الله مصروف هالوغدان ومير

ابلى هاك الواحد واقوله تكفى ياخوي والله ماأقدر ادفع

هالمخالفة وانا كل مطة اعبي بعشرة ومافي دزداني الا ثمان وسبعين ريال .

قال : انت تستحق المخالفة ولا .لا.

قلت : بلى ونعم ويس وما خليت كلمة زينه ماقلته له

ابيه اغديه يسنعن ؟؟؟

قال لي : هذا النظام !! قلت تكفى، انت من حمولة طيبة

قال لي خذ بس هالقسيمة وتوكل

على الله المهم ماعلينا وصلت المجمعة والا الربع

بعضهم عند الباب يستقبل المعازيم وياهالسيارات اللي

ماشفت مثله جيوب وصالونات وشي ماعرفه قلت

وشلون انا اجي بهالدستن والله ان ماعندي سالفة ليه

مااستأجت لي لكسز ولا جيب ولا صالون أقل شي

وسترت وجهي دام المسألة مظاهر ويوم قربت للبوابه

وانا اتلطم وما التفت الا بعد ماتعديت الربع ولا اوقف

الى عند رابع استراحة على اليمين وانا اجيك مشي .

والله ويستقبلونا بالترحيب هلا يابو يزيد هلا يابو

يزيد تعال عندي على هالمركا وياوالله اللي على يميني

منسفين هالشمغ وكاشخين بهالنظارات الشمسية
ومسوينن على مايقولون زحمة .

واقوم اتلفت يميني ويساري ابي لي احد يفهمني يعني

بدوي يصلح لي وربك يجيب لي هالكالبدوي رفيقلي

راعي ددتسن مثلي وانا اراكيه ومن يوم جلست عنده

خذ مساك الله بالخير يابو يزيد ، مساك الله بالخير

يابو يزيد يمكن قالوها لي عشرين مرة حتى اني

شرقت بريقي من كثر مارديت عليهم .

انتهينا من قولة مساكم الله بالخير وهو كل واحد

يحط عيونه باللي جنبه ويلتفت يمين وشمال وخذ من

تمسيس هالمرازيم وهو يخيم علينا السكوت ، نبي
سالفة نبي شي يوسع الصدر نبي نفتح أي موضوع

لكن كل الناس ساكتين قلت انا افتح الموضوع وانا ابو

يزيد لكن منوين ابدا، وابدا اتنحح قلت افتح الموضع

بافغانستان وبعدين قلت لا وشوله افتح على نفسي

باب ودريشة ويدخل علي واحد ماصلى على النبي

ويقول لي انت مع امريكا ولا مع الإرهاب وانا أكيد ماني

مع الأثنين .

نرجع للموضوع والله واكسر ظهر السكوت بهكا السالفة

المسكتة وهي عن غزواتنا والأكوان اللي بيننا وبين

عتيبة وخذ من هالمدح بشمر" بغير قصور بعتيبة

يالربع تراهم يستاهلون"وراحت عن بالي اني اذكر شي

زين عن عتيبة وعلومهم الطيبة وانا والله يشهد ان أعز

هالقبيلة بشكل غير عدي رفيقي اللي بجنبي كل شوي

يهمزني بيده ويدفني وانا ماني عارف ولا جبت خبره

المهم اني ماخليت سالفة ماجبته "عاد الله واكبر ….من

كثر هالسوالف عندي "ويوم انتهت السالفة والله واللي

بجني يقرب لي ويحكي باذني ويقول ترى هاالعزيمة

نصفهم من عتيبة وكلهم شعار ورواة وعيال حمايل

وياوالله دورني ماتلقاني كنك صافقني بالوجه والله

واسكت ثواني واطلع بسالفة ثانية بنفسي سميته سالفة الترقيع .

قلت والله ياجماعة اني معجب بشاعر وفارس من عتيبة

وهو الشاعرسعد بن فاي الحافي من (الروقة) من

قبيلة عتيبة وانتم عارفين ليش سمي باليابس لخشونته

بالحرب والمعركة اللي صارت كانت بين عتيبة وشمر

لكن الشاعر الحافي وصف المعركة كأننا نشوفها وقال

كل ماشاف بالمعركة واعطى كل قبيلة حقها من المدح

ماهو مثلنا حنا ياهتالين ماغير الواحد يبي كل الطيب

لقبيلته ولو يعرف عن القبايل الثانية طيب وشجاعة

وقصيدن يدل عليها مايذكرها ""وابدأ اذب على نفسي

قلت اغديني ارقع لو شي من الشي "" اما القصيدة

يالربع فهي تعبر عن نفسها وهي :r

ملاحظة: قبلي في البيت الأول :تعبير عن اتجاه القبلة.

قبلي خشم نطاق لاطقه الحيا***شمال من العد الهماج حدور

طاحو به الفرسان منا ومنهم****وردوا هل العادة على الصابور

نطحنا العدا من يوم جتنا جموعهم****على سردهم والبيرق المنشور

وسقيناهم السم الذحاح وسقونا****مثل نمور صادمت لنمور

ياذيب ياللي بايمن النير وايسره****كل من مداس الخيل يامعثور

واكل من الصبيان والجيش والرمك****والياضميت اشرب من المنجور

كم صاح عقب الكون من زينة الحيا****حناها طناها حنية الباكور
r
كدوا علينا ثم رجعنا عليهم****واقفت بهم جرد المهار عبور

وردوا علينا ردتن في عزيمة ****وهج الحلال وزرفل المظهور

وأحاطوا بنا قوم تهاذب خيولهم ****ولجة حداويهم على المأمور

جنايز الظفران حافي وشمري****امسا بهاسبع الخلا مسرور
واستغفر الله قبل تكتب عليه****في كل عمري ماذكرت الزور

انتهت القصيدة وقلت انشاء الله اني رقعت سالفتي

الأوله بهالسالفة واطالع لوجيه هالرجال يمين ويسار وياوالله هكاالواحد يصوت لي ويقول وش اسمك بالخير يالأخو؟ قلت ابو يزيد الله يطول عمرك ويسلمك ويخليكلعيالك ويرحم والديك .

"عاد انا عرفت اني طبيت ولا سميت"

قالي الرجال ترا السالفة يابو يزيد ماتنترقع.

عاد بعد هالسالفة الله لايعيده هالحين انا مااقدر

اسولف صارت هالسالفة عقدة بلساني ولا عاد

اتعودها ماغير اكتب ورى هالشاشة .

تحياتي للجميع واتمنى اني استطعت ان اعبر عن هدفي

من هذه السالفة وارجو الا اكون قد اطلت عليكم .

اكرر اسفي ونلتقي على المحبة.

ابو يزيد

ونستنا الله يجزاك خير

بس لو حطيت الربع اللي خالفوك مطب

تراهم ما يلحقون سياراتهم داجه

وعلى المحبه

الأخ ابو علي
تشكر على التقيب
والله يجبر بخاطرك
جبرت بخاطري
بالنسبة للربع اللي خالفوني
انا سيارتي ددسن ومعبية بعشر ريال وقلت تصرف بانزين
والله ماآصل استراحة ساسكو اللي عند المجمعة الا وهم جايبين خبري
وبعدين انت شكلك بتوهقني بالمرات الجايه .
تشكر على التواصل
ولك الف تحية.

ابو يزيد

والله خوش مطب الحمد لله على السلامه

تعيش وتخذ غيرها











انتبه!!!






مو كل مره تسلم الجره




بالتوفيق ،،

انت رائع يا ابو يزيد


اخوكم

الأخت /عبرة^^الغالي
شكرا للتعقيب
والله يسلمك عقب ماسلمت من المطب
وعلى فكرة تري الجره ماسلمت
الى هالحين وانا ادور بعض عفشي اللي طاح عقب ماضربته
اكرر شكري للمشاركة.

الأخ/ابو خالد الجربا
تشكر على الإطراء
ولا تخليني من وجهة نظرك
عسى الله يحفظك
تحياتي.

ياكبر هاالمطلب ...


يعطيك العافية ( ابو يزيد )
الله يزيدك من خيره ...




وعلى المحبة ,,,

اخوي /العذب
صحيح المطب كبير
والى الآن وأنا ابحث عن العفش
اللي نثرته بها القصة ؟؟؟؟؟؟؟؟؟
لك مني خالص الشكر يالعذب على التعقيب
ولا تخليني من ملاحظاتك الهادفة
فهدفنا في الشبكة واحد
وعلى المحبة نلتقي.

الاخ الفاضل ابو يزيد حفظه الله

السلام عليكم ورحمة الله وبركاته

تسلم ، ونستن وأضحكتن يالخال بهذه السالفة الجميلة

ولا تخلينا من مثل هاالسوالف

مع شكري وتقديري لمشرف منتدى قصة وقصيدة

اخوي الشاعر ابو خالد

اخوكم عبدالله الواكد

مشرف المضايف الاسلامية

الأخ /الشيخ عبدالله الواكد
وعليكم السلام ورحمة الله وبركاته
هاذي الساعة المباركة انك تونست
وهذا ايضا يونسني
وتشكر على التعقيب
لكن قلت لي يالخال
والله عاد ماادري وشلون صرت خال وعرفتني
يعني انت من الهاكرز ودخلت على ملفي ولا وشلون
"لاتصدق ترى امزح "
الا كان شمر خوالك يمكن اني اصبت
تحياتي ولا تخليني من رأيك ايا كان
معي ولا ضدي
اكرر شكري
والسلام

هلا اخوي ابو يزيد
الحمدلله على السلامه
وشكرا على الاسلوب الرائع في نقل القصة التي جرت لك وان شاء الله ماتجري لصديق .

شكرا لك مره ومراات عديدة
ولا تحرمنا من المواقف الطريفة

تقبل تحيااات اخوووك الصغيررر

بشير اللويش

الأخ/بشير اللويش

الف مرحبا فيك وفي تعقيبك وبطلتك
ويسعدني ابداء وجهة نظرك حول اسلوب الطرح
وهي شهادة اعتز بها كثيرا
خاصة وانها من شاعر مثلك
اكرر شكري ولا تخليني من ملاحظاتك
وتقبل تحيات اخوك
ابو يزيد

ابويزيد

قصة في غاية الروعة والجمال ..

تنظيم رائع واشكرك على هذه القصة..

ولا تحرمنا من مشاركاتك ..

مع تحيات اخوكم / الفيصـــــــــــــــــل..

العزيز /الفيصل

شكرا للإطراء

وان شاء الله المشاركة القادمة

سأطرحها

ليلة العيد

هذا وتقبل تحياتي