السلام عليكم ورحمة الله وبركاته
مساكم الله بالأدب والذوق والشعر الجزيل ...
بعد شهور عجاف ...
امتلأت فيها أنوفنا .. وآذاننا ... وحتى جيوبنا ... بالغبار :)
بدأت حبات المطر تتساقط ...
فرحنا مثل باقي خلق الله ...
مطر ونزل .. يعني وش نبي نسوي أكيد نفرح .. وننبسط .. :)
يوم كامل متواصل والمطر يتساقط ... والفرح يتزايد ..
لكن ... وآآآه من لكن ...
بعض هالشباب الله يهديهم..
يخربون عليك فرحة المطر ..
عسى ما شافو القاع مبللة ..
طلعت هالسيارات ... وهات يا تفحيط ...
ما ذقنا النوم ليلة البارح ... من صوت التفحيط ...
حنا على بعد كيلو من السيارة وروسنا تبي تنفجر ..
شلون اللي داخل السيارة ... الله يعينه :)
يكسرون سياراتهم ..
ويخربونه ... على شنو ؟! ماني عارف ..
واحد منهم يقول البارحة فجرت تايرين لعيون الحارة :)
ياخبل محد درى عنك ...
والثاني يقول ياخي لاشفت العيال متجمعين عند الدوار ويصفقون ما امسك نفسي .. لا يكون سامي الجابر على هالتشجيع :)
والله يخوفي ... يجينا وقت ندعي الله انه ما ينزل المطر ... والسبب هالاشكال ...
ويخوفي يجي يوم لا نزل المطر .. ما نقول اللهم صيبا نافعا .. الا نقول .. اللهم حوالينا ولا علينا ..
شكرا لكم ..
