و الأهل الله يخليهم مهم متعودين على بساسه هاديه او ناعمات
هالبسه كل ماشافت واحد راحت تركض لوه وتلمس رجلينه
وهم مستغربين بالعاده البسه تنحاش :)
انا شفت شكله دريت أنه من طبقة راقية وعرفت نوعيته << مولود بـأوكلاند
الوالده الله يطول بعمره تحلف انه ماتطب هالبيت لازم تكرشونه
تقولي ياوليدي مريضه شفه تاكل نفيش :a:
عمرك شفت بسه تاكل نفيش وأحيانا جرجير :solh:
لا والله ماشفت
البسه خبيله بيني وبينكم
كل ماتشوف زول انفلتت عليه
تحسب هالعالم يغلونه ماتدري انهم يفرون الحوشه فر يجغفون بني جلدته كل ليله بالنعول << وانتم بكرامه .
الوغدان ماصدقوا خبر يبون الاذن بالهجوم
فكل من مرت من جنبوه محطه اللي يشوته شوت
واللي يتودسه تودس
والبسه مستانسه :)
كل مايضربه واحد تروح لوه ماتنحاش
اطلع احيانا لغرف النوم القاه مرتبة فرش الوغدان :a:
ياخي بسه مش أي بسه
بس العجيز حلفت انه ماتطب البيت
بالفتره هذي الله جاب واحد من خوياي
من اهل الجهراء سابقا
ساكن برفحاء حاليا جار الخوال
يوم شاف البسه وهو ينجن
احلى ياحركات من وين لكم يالله
ولونه سكري بعد ماشاء الله
قلت لوه خذه تكسب فينا اجر
وماصدق خبر وشاله ..
بعد اسبوعين من هالسالفه شفت لي بسه بالشارع فتذكرت الشيرازية
كلمت خويي فسالته عن البسه << همزه سقطت سهوا :)
قال ماشاء الله عليه
تصدق يافلان انه تطلع لغرفة خواتي وتدق الباب قبل تدخل
وتدخل شوي شوي
وتجلس تشوف التلفزون
تصدق انه تروح للحمام بنفسه ... حسيت انه مزره :)
مرت السنون وجيت رفحاء قبل اسبوع
معزوم على مناسبه
واستانست برفحاء وطلعت لام العصافير
استغربت من العجز كل وحده معه محفار قلت معقوله في فقع
طلعن ياكلن رشاد
حرثن ام العصافير حرث :)
ورحت للعثيم
خخخخخخخخخخ
وقبل امشي سيرت على خويي
دخلت بالمجلس وتركت واحد بالحوش
قلت له من هو هذا
قال خالي
الله اعلم انه شاوي من شلة شنقل
يتعشى الصفره مشاوي وبصل
يالربع بحياتي كله ماشفت مثل خشمه
خشمه بادي من جبهته << بالله تخيل الخشم اللهم لا شماته
و اسأله عن البسه قال ماشاء الله ولدت وللحينه هاديه << شكيت ان فيه إن
طلعت برا لقيت البساسه متعلقات فوق الجدران
الشيرازية واللي نص شيرازية واللي بس خشمه شيرازي
بس كلهن مفترسات وناقزات على الجدران << احلى تحية لمندل
واصوت لهن مايجن ياولد وش المشكلة
وشوي وهي تجني بسه عجوز شكله شيرازية سابقا
بس لاعبتن به السنين متنتف شعره وضروسه طايحات << وش مشوفك لهن
واقوله
ميااااااااااوو
بزوووووووووووون
سنونو ينونو
كوكو كوكو
ومش عايزه تكوكو
تريليلي ليلي لا
قامت تراعيلي تقل ناقده وتمشي .
فاقتنعت ان أي كائن حي صعب انه يغير مجتمع كامل لوحده
إن لم يتطبع بطباعهم فلن يعيش ، فهالبسه هذي لو شافت نفسه على بساسة رفحاء
على ما اعتقد يومين وتتم عملية اغتياله لكنها رضخت للأمر الواقع واحسنت الاختيار بأن تلد وتتكاثر
حتى لو كانت بساسة رفحاء أقل منها مستوى مع احترامي وحبي لبساسة رفحاء... :)
والحمد لله انه ما قالت انا متذاكية أو ذكية أو من طبقة راقية ..
ورجاءا لاتستحقرون البسة لان العلم ليس حصرا على بني آدم
ولكل قاعدة شواذ
ناس تدس الهم بين الحنايا ... وناس وربي مادرت ويش صاير
على ما أعتقد ان البسه ...
نعم جار عليها الزمن لكن في الحلقة الاخيرة عرفت له :thumb:
دمتم بصحة وسلامة .
