واحمس لنا بنن تغذى علـى السيـل=اشقر كما الياقوت في كـف بحـار
ريحه يصوت للرجـال الحلاحيـل=والضيف والطرقي والاجناب والجار
وازعج دنين اللي شلق عارض الليل=يجاوبـك ذيبـن يشاديـك بالكـار
بهـر معاميلـك وكثـر بـه الهيـل=كيفن يداوي اوسط الـراس لانـدار
ومن بعد هذا طاب خـط التماثيـل=والشعر في فعل الزحازيـح سنـار
يفخر بي الشعر المنزه عـن الميـل=وانا افتخر في مدح وافين الاشبـار
اللي كمـا مـزن تثقيـل المخاييـل=يدبر بنـوارِ .. ويقبـل بالامطـار
هل المـروه والرجـال المشاكيـل=عز الضعيف اللي عليه الزمن جـار
نمصان فـوق النايفـات المشاويـل=نمصان ضلعن كنه الحيـد سنجـار
هل الشلافي والسيوف وهل الخيـل=ياصاح صياح الوغى والدخن ثـار
وياكربت وسـط المحـازم شماليـل=تاخذ على العـدوان وردِ ومصـدار
وياهللـن امعكرشـات المجـاديـل=رديهـم ينطـح ثمانيـن بيـطـار
شربوا حياض الموت شرب الشهاليل=وتاريخهم مايقبـل جحـود وانكـار
بحد السيوف المرهفـات المصاقيـل=حطو لهم في صفحة المجـد تذكـار
متوارثين الطيب جيلن بثـر جيـل=في دارهم جودَ وفـي جودهـم دار
هل الصخى وللضيف ذباحة الحيـل=لاتسكـر ابـواب ولاتبـدي اعـذار
وخويهـم لـو غيبـتـه المقابـيـل=يبقى على حشمه وشيمـه ومقـدار
يقلط على ريـح الهـلا والتعاليـل=وصحون يزهاه الشحم جل واكبـار
مامـل سمحيـن الجنايـب فناجيـل=ولامل طلقيـن الحجاجيـن خطـار
وعقيدهم شيخن مثل هامـة سهيـل=حر كريم احرار من نسل الاحـرار
والمدح مـازاد النشامـى تفاصيـل=في مدحهم زادت مقامات الاشعـار
