0
السلام عليكم عددا عددا فردا فردا
الحريم مع باب الحريم والرجال مع باب الرجال !
يقولك بعلم النفس الانسان هو الانسان الى ان يثبت العكس :)
ويوم نشدو الالماني وليم فونت قال هالمقوله ماجت من فراغ لأنه تصنف على حسب القاعده اللي تقول ـــــــــــــــــــ المتهم برئ حتى تثبت ادانته :qannaj:
الوكاد ماني معلمكم وش قل سكنر عن هالجزئيه بالخصوص :tongue:
الوكاد انه مابي خير لله لله ـــــــــــــــــ وانا ماتعذر لروحي بس الله يعلم وش اللي كان مشغلن <<<< يعني ماهو لازم اعلمكم :)
الزبده اني واعدكم بصور حايل ــــــــــــــــــ ووالله ياجماعة الخير وانتم ماحلفتوني اني حاطهن بمجلد لحال وادري مالي عذر بهالتأخير !
وبأذن الله الليله او بكرا بالكثير قولو ان شاءالله ــــــــــــــــ لان بي كسل غير ادمي ناهيك عن مشاغل انطلقت علي:)
نرجع لوليم فونت :wallah_hoo: هالادمي قال حكمه قبل لايموت وماني معلمكم وشلون مات :( !
الوكاد وليم يقول لكل انسان خط سير الى ان يحدث له منعطف يحرف خط هالسير الى الافضل او الى الاسوأ !!
وانا الظاهر حصلي منعطف او ان صح التعبير منعطفين خلال اسبوع :puzzled:
يعني لو ينصفني قينيس وكتابه فيد الارقام القياسيه كان صرت من مشاهير العالم !
ولاهي بعيده انافس بوباما على امريكا :)
يالربع خلال اسبوع انقلبت مرتين :a:
الوكاد اكتشفت اللي ماكتشفه وليم الفلس !!
واجزم لو اقدم نظريتي الا تاخذ جايزة بوبل للسلام :)
اكتشفت يالربع ان للقراده عدة وجوه ــــــــــــــــ وان قرادتنا يمكن تقل او تزيد بحسب عوامل خارجيه لايملك الفرد السيطره عليه !!
بمعنى اكثر
بعض الناس مقرود والقراده تنبع منه !!
يعني وين مايروح مقرود وقرادته به !
النوع هذا يسمى مولد للقراده <<<<<مثل ماطور الكهرب :)
وفيه نوع ناقل او موصل :)
وهذا اشبه مايكون بالسلك اللي يوصل الكهرب للأجهزه !
يعني تمر به القراده وتعقبه للي بعده او لاقرب شخص :)
النوعين السابقين لهم ميزه الا وهي التخلص من القراده عن طريق توليده من المولد ــــــــــــــــــــ ويقوم الناقل او الموصل بتوصله للنوع الثالث !
اللي هو اسوأ شي بهالمعادله الصعبه :(
النوع الثالث المستقبل او المخزن سموه ماشئتم !!
وهالنوع اشبه مايكون ببطارية الجوال او حتى بطارية المحمول !!
يعني اذا وصلته القراده يحتفظ به ولا يستطيع التخلص منه الا عن طريق استهلاكه :(
وتصبح المعادله بالصوره النهائيه
المولد + الناقل = المخزن = الكارثه :477r:<<<<< يعني مثل هالصوره المولد صنع القراده الناقل جابه يركض به لابو كشره اللي يحسب روحه احظ واحد بالدنيا :)
انا كذا خلال اسبوع انقلبت مرتين !!
وكله بسبب هالمعادله الغير عادله :148r:
القلبة الولى ماتذكر ^_^
بس الثانيه جيناك نفتل من حدا الطعوس بحايل ولا ردنا الا حدا القعور بعد 9 او 8 قلبات بطعسن ماحولنا الوالي :(
والسبب يعود اني قبل لا امشي كنت جالس مع مولد وناقل لمدة ساعتين !!
قمت بعد الحادث مصيول جديد تسيف يالربع شفت الموت بعنوني :puzzled:
ومع اني ضيعت الجوال الا ان ابو ضاري "الضاري11" راعي حق ووليدة عرب تسيف يالربع يازين دعوات هالادمي :)
واتذكر اني واعدن روح حايل بالصور قلت بالله لو انا ميت وعلى هكالخشه وش موقفي من سناعيس ولا وين اودي وجهي من ابو خلوف :)
وبما ان موضوعي بواد وانا حول وادي الرمه ـــــــــــــــ ابي انكس له لعلى وعسى ان تجدو الرابط القوي بالعنوان والمضمون !
وان لقيتو الرابط كزوه لي ترونن شبه مسطله يكفي عندي اختبار اليوم وساحبن عليه :(
لا والقهر وين من الاربعاء وانا اذاكر ياعله ماعادة :)
ترو موضوعي توه يبدا هههههه
يعني اللي وراه شي يروح ويمكن يلحق على السطر الاخير :)
اقولكم ماتسذب وليم ـــــــــــــــــــــــ عقب هالمنعطفين اللي صارن لي احس اني بصير سعد علوش الا اخوه عبدالله :) !
يالربع انا اخر شي التفت له هي القبليه ــــــــــــــــــ صحيح احب شمر بس ماكره اللي غيرهم !
وحنا بوقت اشوف القبليه رجعت وكأننا بالعصور الوسطى !
بس فيه عقليات لو لي سلطه على تدميره والله ماقصر !!
بمعنى كوني انتقص من القبيله الفلانيه هذا يعني ان قبيلتي افضل منه !
وهم اللي يطلق عليهم بمهايطية القبايل !!
لكن والحق يقال اني ماعرفت قدر شمر الا اذا طلعت برا حايل !
لاقلت شمري تحس اللي عندك يقدرونك غير عن اللي حولك ــــــــــــــــ وهذا كله بفضل الله ثم فضل اجدادنا اللي سيرتهم بيضاء واجبرو الكل على احترام هالقبيله اللي اعترف ان فيه ناس بمجرد انك تدري انه شمري تحس انتماءه عار على شمر !!
مثل سياره جيب قبل كم يوم بالقصيم كاتب ورا f16 وكاتب كلمه احترم ذائقتكم بعدم ذكرها !!
الغريب ان هذا وامثاله من اللي اعطاه الحق يرمز لشمر بـ f16 ؟؟
شمر اكبر من هالمسميات واكرم <<<< "شده على الراء" القبايل الثانيه عن باقي المسميات !!
لكن للأسف جهال ومهايطية القبايل بدو ينالون من شمر خلف اسماء مستعاره !!
مثل منتديات قبيله كاتبين عن امرأه حكمت حايل وشمر ؟؟
واخرى كاتبين ان لقب الجنازه يعود لقبيلة العوازم !!؟
والغريب ان قبيلة الرشايده يطلقون على انفسهم طنايا بني عبس !!
وقبيلة بني تميم اللي اعزهم واجلهم ولي منهم معارف كثر بدأ بعض المهايطيين يرددون ان حائل لتميم قبل شمر !!؟
اعتقد التاريخ محفوظ وقبل لانكون قبليين حنا مسلمين بس يجب اعادة الحق لاصحابه وعدم التقليل من شأن قبيله ولله الحمد كانت تحمل السياده بجزيرة العرب !
قبل كم اسبوع كنت بالقصيم انا وواحد من العيال نبي نمشي لحايل
مرينا الصرافه ونزل هو يصرف شوي الا وجاني واحد يشحذ !
بمعنى يطر :) قال انا محتاج وحالتي حاله ــــــــــــــــــ على جية رفيقي قلت انت منين قال انا شمري !!؟
وانا انتفض وهو يطير خويي عيونه شمري !!!!
من اي شمر ؟؟
قال انا عبدي ــــــــــــــــ خويي عبدي قال افاا ابن عم قالي مصيول رح اصرف الميه هذي عند البقاله نبي نعطيه نصه !
رحت ويوم رجعت الله لايوريك !!
لقيت خويي متعوتلن بحلقه وخذ تلزيخ !
فرقتهم ياولد شبلاكم عينو خير وش السالفه ــــــــــــــــــــ قال خويي سألته من اي عبده قالي من سنجاره :)
والله وانا احط الفلوس بمخباي وحنا ندقه جميع :)
طلعنا بطاقتة الا وقبلي بس مايعرق بشمر !!
الله يرحمك ياوليم ويرحم من بيجي بعدك من امثال مصيول :)
برايفت يوسف متى مغير اسمك ووين التمايم !؟
ويذكرون عندك مسابقه !؟
تسان عليكم قل جيابين كور ترونن ماقصر انخن وازود يالعطاوي :)
