بالبدايه الف شكر لكل من صوت لي بمسابقة كاتب المضايف
ولشخص عزيز كان له الدور الكبير في الفوز وفي كتابة المقاله
واهدي هاللقب لهم جميع
ولكن في البدايه احب اني انزل مقالتي هنا لاني اعرف ان الغالبيه ما قروها
( عصر اذكا غبي )
بسم الله الرحمن الرحيم
في بداية الثمانينات الميلاديه كنت بعمر مايسمح لي بتمييز
التصرف او الفعل او ردة الفعل ، وكنت ممشي حياتي بالبركة
اقوم الصبح مع طلعة الشمس او قبله يعني عايش بسباق انا
والشمس مين فينا يسبق الثاني بالقومه ومين يسبق الثاني
بالنومه ، واذا جاء الصيف ما البس من الملابس الا الثوب
الابيض واذا جاء الشتاء البس ثوبين من لونين مختلفين
بعد ملابس داخليه تدفي بعير . هالملابس الصيفيه والشتويه
ماكنت البسه لكن امي هي اللي تلبسني اياه ...
وشوي شوي قمت ادخل بالجو العام واكون صداقات واطلع من
محيط الحارة الى الحارات القريبه . وكنت اشوف من الناس
الكثير . هذا يعجبني شكله وتصرفه ولبسه وهذا مايعجبني
واذا رجعت المغرب الى البيت علمت امي بكل اللي اشوفه
وتناقشت مع اخوي باللي شفته او اللي شفناه ...
وكان النقاش دايم يكون عن اللي مايعجبنا لانو كان يلفت
انتباهنا اكثر من اللي يعجبنا ، ممكن كانت بعض التصرفات
تعجبنا ولا تعجبنا ... مثل التدخين ممكن كان مايعجبنا واحنا
كان ودنا نجربه !
لاننا كنا نشوف اللي يدخن قوي ومحد يقدر يقرب له وعربجي.
وكبرت اكثر واكثر لين وصلت لهالعمر اللي انا فيه واللي اعتقد
اني اعقل مايدور حولي او بالعاميه فاهم الكفته .
وصرت اشوف الكثير واكثر من اللي كنت اشوفه زمان
لدرجة اني من كثر ما صرت فاهم الغيت سباقي مع الشمس
وصرت انام متى مابغيت واقوم متى مابغيت
وصرت اروح للاسواق واشوف مناظر يمكن تكون شوي غريبه
صرت اشوف بنات يلبسن بنطلونات وفي البدايه كان غلط
والحين صار صح ,,,
في بداية عمري شفت حاجه ورسخت فيني ونشبت بعقلي
ويوم كبرت لقيته راسخه في عقول الناس جلهم اذا مو كلهم
وهي اني كنت اشوف العمال الاسيويين واستحقرهم
واخواني العرب ولا اشوفهم شي ,,,
اما الاشقر
الاحمر
الغربي بوجه عام اذا شفناه نبتسم بوجهه ( ندور الأجر )
ونلوح بيدينا هلوووووو
او هاااااااااي
او قود مورننق ( لو بالليل ) عادي اهم شي نسلم عليه
ومشت السنوات وعدت واستدارة عجلة العمر وتوظفت
وشفت شي ماكنت اتوقعه وحتى عقلي رفض يقبله
لاني ومن المفترض اكون عقلت وفهمت
المهم اني شفت اثنين من الاخوان العرب ومن نفس الجنسية
بس واحد راتبه ثلاث الاف والثاني راتبه عشرين
والسبب ان واحد على نفس الجنسية الاصلية والثاني كندي
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟
بس ابي سؤال والكل يجاوب عنه :
العيب في من ؟
فينا كعرب ؟
او في تركيبة عقولنا ؟
او .... ماذا ؟
وعلى هالشي يقول الشاعر :
من يشتري دم العرب .. ويبيع لي دم اجنبي
واقول رايي ولا رجيت اطلق شنب
تعبت اشوف الناس تستنزف محارمهم سبي
واقول بكره ياغصون العز يطلع بك عنب
الاخره تبغى عمل ..لاشك والدنيا تبي
ياخوف قلبي نخسر الثنتين من جلسة كنب
نفاق..يمكن .. والاكيد انه نساء بلا عبي
مرت سنين ولا طلع ذيبً على رجمه قنب
احلامنا تركض .. ولكن واقع الحالة حبي
ليت الضمير الحي ماسكر عيونه واجتنب
ليت المؤرخ يكتب العنوان " عصر اذكى غبي "
والمرجع ..اقصاء الفكر..صفحةمن الواقع تنب
تبي تأكد حط لك مكتب ووظف اجنبي
ووظف معاه من العرب .. وتشوف من يطلع ذنب
.............
هذي هي المقاله كااامله مكمله
وللحق
اني ماكنت ناوي اشترك ....
لكن اخ عزيز كان موجود عندي وانااقراء موضوع المسابقه
وقالي الشبث ابيك تشترك
قلت ياخي انا وين والكتاب المميزين وين
المضايف فيها من الكتاب المميزين الكثير
قال انا ابي اعطيك قصيده من قصائدي تناقش كم ظاهره سيئه
قلت خلاص ابي اشترك علشان قصيدتك بس
ونزلت المقاله واضفت كم ظاهره اشوفها سيئه اضافه للموجود بالقصيده
والحمد لله جت النتيجه غير متوقعه اطلاقاً
وانا اعتبر الفايز بهالمسابقه هو الشاعر اللي كتب القصيده
وهو الشاعر الكبير ( ناجي طرقي الظفيري )
فله مني كل الشكر والتقدير
واذا فيه تميز فهو منه
والشكر موصول للجنه المنظمه
اختنا شام
واللي كانت مميزه بحق وحقيقه في اخراج هذه المسابقه باحلى حله
اختنا ريم شمر
واللي شكلت مع الاخت شام ثنائي مميز وضح فيه التفاهم
اخونا الشاهري العبيدي
واللي من الصعب تقييم دوره الخفي والاعمال اللي قام ويقوم بها للمضايف
اخونا الكبير والقدير سلمان النبهان
بصراحه يالربع انا ما اقدر اتكلم عن هالشخص
ولا اقدر احصي مميزاته اللي يتميز فيها
لكن اقدر اقول انه مشرف عام اخر رزقنا الله به
والف شكر لكل من صوت لي او لاخواني المميزين
والف شكر لاعضاء مضيف فلة الحجاج
اللي هم الداعمي لي في كل شي
حتى في الهوشات هههههههه
( معهم معهم عليهم عليهم )
والف شكر لاخواني الكتاب المميزين
ام نواف
ابو عارف
سلطانهم
خالد الشمري
عبدالله المهيني
حمراء الموت
قلم شمر
اهدااب
منصور الغايب
الضاري 11
الراميه
محمد الشمري
الف شكر لكم يا مميزين
ويعلم الله ان كل واحد منكم كاتب بااارع ومميز
ومثل ما شفتو الوضع الطبيعي لمقالتي ليست الاولى
والجاي افضل بأذن الله
نجتمع ان شاء الله في المسابقه القادمه
وبتحدي جديد
ومثل مايقول الشاعر
( الوعد هالحين وشوي بهوب اولاا )
هههههههه
الف شكر للقراء والمتابعين
لانهم هم من اضفى جو الحماس والمتعه على هالمسابقه
مميزه يا مضائفنا
وتقلدوا تحية اخوكم الشبث
