السلام عليكم يالربع و الربعات
هذا يالربع كنت ناوي أنزل موضوع بس المشكلة إني ما لقيت أحد أحطه بطلن لقصتي اللى بنزله ( اللي يبينن اعلمه السبب يمحط خمسماية ريال ويبشر بالخير :7ayyoh:) طبعا الا ريال لكني زعلااااااااان عليه وطنيااااااااااااااانن وحلفن اني ما كلمه الين يعلمن باسم الدهون اللى يفرك به صلعته اللى تقل زبده ابدلج به شدوقي الممشقات عندنا لنا عرس ابنذخ به >>>>>> يالله تغربله حتى شواربه يلمعن انتم بس راعو لهن
شفتوا اني صادز
المهم ندخل على القصة
هذا يالربع ولا يهنون الربعات بينما الشيخ شليويح مخوف العربان يتجول فى ربوع احدى جامعاتنا الحبيبة سمع الشباب يحتسون عن شينن اسمه ترافيان و مدهرين وكلن جايبن الطبلون .... عاد انا ما صدقت خبر اذبحتن الشفايه ... قلت :يالربع وشو ترافيان هو دهون والا اسم شماغن جديد ( مهتمن للعرس ) ؟؟:mabrook:
و هم يبخون يضحكون علي ....... وهي تجينن الطنية :148r:
قلت : لا بوكم لا بو قطاش هذى آخرة الصداقة ....
قالو : نمزح عليك >>>> عاد انا من الشفاية ما بغيت اتمتن فرضيت على طول :d: قلت : خلاص خلاص مسموحين ما صار شين بس علمونن وش هالترافيان ؟؟؟
قالو: هذى الله يسلمك لعبة وطريقته كيت وكيت ( عاد اللي يبي يعرف طريقته ينشد ملامح شمر تروه راعي فزعه ):goooood:
انا ما صدق خبر على طول جازت لى اللعبة ..... خصوصن يوم عرفت ان به نهب ونهيب وهجوم ومضارب .... وانا افرك المصباح السحري قوقل ... وهو يطلعه لى واسجل به ... وهم الاجواد ما يقصرون معي يعطونن قرية ...... ويخيرونن بين القبايل
قلت : ابي فرسان ما ينطحهم أحد shlwee7
قالو: مالك الا الجرمان
قلت :عز الطلب ..... و انا اختارهم و أعين من الله خير و أطق لي بيت شعر و اصف الدلال و المعاميل واحط رجل على رجل – قريتي وابكيفي – وكل من مر علي حلفت عليه الا يتقهوى معي فنجال قهوة – يا هي فلة ما هي فلتكم هذي قريتي -
وبينما الشيخ شليويح مستانس ومكيف وماعنده من الشيطان طاري ..... ما بحر الا حدى خوياه جايه يرثع فقال له : وش علمك خامدن خمدت ريح العدو... الناس مدهرتن نهب ومناهب وانت طاقن بيت الشعر تفنجل افا والله بس ما هقيتك هالون ...... وهو يقعد الشيخ شليويح يتطابخ كيف يجرؤ علي لكنه كتم غيظه :puzzled:
وقلت :وش اعمل ؟؟؟ علمن ياخوك ترن عليمي ما ادري وين الله حاطن
قال : يامال الغنيمه ابن لك جنود واهجم على العربان اللى حولك وانهب منهم تر هذا سنع اللعبة :3ajebni:
قلت : ارخو ابوي اثري هذا العلم ...... وانا ادهر يما صار عندي عشر جنود وهى تطول رقبتي بين العربان – لا تلومونن طلعت روحي يما قامت القريه على رجولها لا وبعد كونت جيش ما ينطح شكل لو عندي وغدان طاحت سنونهم وهي ما قامت القرية :a: - المهم هالحين ما بقى الا الهجوم ... وانا اقعد ادور على اقوى تحالف ..... وانصى اقوى واحدن به ...... و اهجم عليه بجيشي – ابي اثبت وجودي – وانهب منه ما ادري كم حطبه وكم خيشة تبن و خمس تنكات دبس :) – طلع هافن هو وجنوده ما ادري وينه مولي - واجنودي غربلهم الله ما شفت منهم الا اثنين – شكلهم درعو بالدبس عيال فقر ما شافو نعمه :qannaj: - وهو يرسل لي اللى هجمت عليه يهددن و يبينن اعتذر عن اللى صار وارجع اللى نهبته منه – يمال الفقر كله خيشتين تبن و لحسة دبس – :3ayyen_khair:
قلت : تعض الارض تبي مخوف العربان الشيخ شليويح يعتذر ما بقى الا هي والله لو تحلق ما اعتذرت :148r:
قال : ترن ابهجم عليك و اسحقك
قلت : وانا ارخمه ... ارسل عليك جنودي الجرمان يلعبون بحسبتك لعب
وهو يرسل لرئيس تحالفي يبيه يخلينن اعتذر
قلت للرئيس – طبعا لازم اغير الموجه اخاف يطردن عاد يفدعبي الاقشر :solh: -
قلت له : يالبناخي انا مسيكين ما عندي الا عشر جنود وهو ذبحهم ويبينن اعتذر دنا مظلووووووووووم ...... طلع الرجل نشمي
وقال : لا تخاف حنا معك على الحلوة و المرة .... انا سمعت هالكلام وانا ارسل للاقشر اللى يتوعدن قلت : شف يا ملعون الجدف والله لو تمر ممر من عند قريتي لأسحنك و اخلى جنودك كباب مشوي:thumb:
قال الاقشر : لي هالكلام ..... قلت : اكيد اجل لجدي .... قال : ابرسل عليك مقاليع .... قلت : قلعتن تقلعك ... لو ما الريس فيدنا ما سكن تسان سحنت قريتك سحن وساويته بالارض
و هو يرسل علي يالربع مية جندي وهم يهدون قريتي وينثرون اعفيشي اشوى اللى الجنود ماهم به ... ارسلتهم على واحدن بجنبي عليمن ما يدري وين الله حاطه .....
يوم فهت العاصفه وارجعو جنود الاقشر – طبعا ما لقو شينن ياخذونه – يمار هذولا جنودي ناكسين تومي روسهم ...... وانا ارسل للاقشر واحد فقط لا غير – اصل كلهم اثنين واحدن ممصعتن رجله - يوم دري الاقشر ويرسل لي يتوعد .... وانا اكز رسالته لريس تحالفنا
وهو يهجم ريسنا على الاقشر ويكسر راسه – بزعمه فازعن معى - وانا ارسل للاقشر قلت : شفت هالجندي اللى انت حاقره مسحك مسح – انا عارف ان اللي مسحه الريس بس ابا امقر تسبده :qannaj: –
وهو يرسل لي الاقشر قال : خلاص نبي نتعاهد انا وياك وابدخل معكم بالتحالف
قلت : هذى الساعة المباركة – احسبه خايفن مني – ما مداه دخل معنا الا التحالف طاردن – ما ادري وش لون فر روسهم حسبي الله عليه – و هو يفدع بي ويمسح قريتي مسح صارت مثل صلعت ريال >>>> ما تشفونن متعقد من الصلعة
وهذى سالفتي مع اول هجووووووووووووووم لي بالترافيان
تنبيه مهم : حطيت اسم الشبث بالعنوان لاني بحلت وما لقيت لي عنوان قلت يا ولد حط اسم مستشار الفلة عشان الناس تجيبه الشفاية
