% مسلسل المضائف % ( الجزء الثاني )
[align=center]
كانت الحياة ماشيه على احسن مايكون
يعني
في قبيلة ابو عارف
كانوا كل ليلة يسهرون عند الشيخ يستمتعون بما تجود به قريحة الشاعر ابو طروق
وفي قبيلة الحريم اللي هي قبيلة عجايب
كل ليلة يسهرن عند الشيخه عجايب
ويتذكرن شيبانهن المرحومين
ويسرن عقب ما ياخذن جلسة مع البكاء والتهطم
اما الاخوان السلاتيح الاربعه شنقل وشلته كانوا كل يوم بديره
والغريب ان هالمجموعه كانوا مايملكون من الدنيا الا **** واحد
وكل شوين واحد يرتسبوه
الوكاد بيوم من الايام
كانوا الاربعه ( شنقل وريال فسحه والمطنوخ والشبث ) تايهين بالبران
وهم يجلسون يبون يستريحون شوي من التعب هم و****هم
قال شنقل ابو هيلاهب اصفر ياعيال انتم خلوكم هنا
وانا ابي انط هالحزوم ابشوف غديني اشوف عرب قريبين
قالوا خوياوه خلاص
راح شنقل يدور
وريال فسحه والمطنوخ يلعبون مرطاخ
وشبيثان المسكين قام يتلوا من الجوع
وعقب نص ساعه جاهم شنقل
قال ياعيال انتم ليه بس تلعبون ؟
ليه ماتراعون لهالهديفه الشبث اللي بس يتلوا ؟
شبيثان انت وش يبتسيك ؟
قال الشبث ابي اكل ميت من الجوع
قال شنقل
المطنوخ قم عطوه من البسكوت المالح حقك
خلنا نرتاح من صياحوه الله يزيلوه
وعقب المغرب قال شنقل يا عيال حنا ليا متى وحنا على هالحال
ليه مانغزي على هالقبايل ونعيش من صيدنا
قالوا تم يالله يا شنقل انت بس وجهنا وحنا نعجبك
( طبعاً اللي قالوا تم المطنوخ وريال فسحه اما الشبث مشغول بالبسكوت هو وال**** )
قال شنقل يالله يالمطنوخ قم ودور لنا قبيلة حولنا نبي نغزيه
وهو يقوم المطنوخ ويرتسب ال**** يبي يدور
وراح يوم والثاني والمطنوخ يدور بهالبران
وباليوم الثالث وصل لقبيلة الشيخ ابو عارف
ويالله حي ضيف الرحمن ياهلا ويا مرحبا
وانواع الترحيب بوه
ويجلس هكا اليوم عندهم ويسهر معهم على نغم الشاعر الكبير ابو طروق
ويجلسون يلعبون بلوت ليما جاء الفجر
المطنوخ اعجبوه الوضع وجلس يوم ثاني وثالث
وهم يطرون عليه خوياوه
ويستأذن من الشيخ ابو عارف ويمشي لخوياوه
ويوم جاهم عقب اسبوع ليمار غاديتن وجيههم صفر من البسكوت
وناشفيت من العطش
قال شنقل بصوت مبحوح يا طنخان حرام عليك هاللي تسويه فينا
وينك صار لك اسبوع
ياخي كلمه ولو جبر خاطر ولا سلام من بعيد
مررررره نسيت ان لك خويا
قال المطنوخ اعذرن يا شنقولة العربان
والله عجبن الوضع هناك ولا بغيت اجي
بس علشان البسكوت والملح اللي بيننا جيتكم
بس شفتلك القبيله وعرفت وش وضعهم كلوه
قال شنقل هاه بشر يعني نقدر نغزيهم ؟
وهو يلتفت المطنوخ للشبث وهو يقوم يهز راسوه
قال والله يا شنقل مدام ابو سعبوله الشبث معنا ماهقوتي انوه يبي يفرجه
الا اذا منت حاسبن عليه
قال شنقل ياخي خلك من الشبث وقلي هالقبيله وش وقعه
قال شف يا شنقولتي كلهم ماعندك احد الا واحد
قال شنقل منهو ؟
قال المطنوخ واحدن اسموه منصور الغايب
والله يا شنقل انوه رفع ضغطي
تسيف كلما شريت حكم قال اشكل !؟
قال شنقل الشرهه والله مهي عليك
والله الشرهه علي
ياخي انا اقولك نقدر نغزيهم وانت تقولي صن وحكم واشكل
ياخي بهم احد شديد بالغزو
قال المطنوخ والله مدري بس من جيتهم وحنا بس سهر
وننام وجه الفجر ولا نقوم الا العصر
تخيل يا شنقل القبيله كله كذا
وبهاللحظه هذي طنة فكره براس شنقل
قال اسمعوني يا عيال
نبي نغزي هالقبيله الضحى سند النهار
قالوا ياخي الغزو بالليل مهو بالنهار
قال اقول انت وياه مشرمينه بالغزو
هالقبيله اللي نبي نغزيه ينامون بالنهار ويقومون بالليل
ونبي نباغتهم وهم نيمين
وهو ينقز ابو العريف ريال فسحه
قال
بس يا شنقل تتوقع الاتحاد الدولي للمغازي مايقول ليه هاللون
قال شنقل انت بالذات عض القاع وتلايص ولا اسمع نفسك لا اخربط خشتك
وبعصبيه وهو يلتفت شنقل للشبث
قال مابادزي الا انت ماتبي تقول شين
قال الشبث والله لوريهم الملعونين
قال شنقل وهو يهز راسوه عزالله منت فرجه ياوجه العنز
الوكاد انهم صملوا على الغزو
وهم يسرون بالليل جهة قبيلة الشيخ ابو عارف
ويوم وصلوا لمضارب القبيلة وهم يتبطحون ( حتى ****هم منبطح معهم )
يراقبون القبيلة
ويوم جاء حول الفجر وهم يسرون الرجال من بيت الشيخ ابو عارف يبون بيوتهم
ويوم جاء الضحى وهو يقول شنقل يالله يا عيال عليهم
وهم يقومون
ويوم وصلوا نص الطريق وهو يعد شنقل خوياوه ليمار بس اربعه
هو والمطنوخ وريال فسحه وال****
قال وين الشبث
قالوا والله ماندري
ويوم رجعوا لمكانهم ليمار على انبطاحتوه ونيم ( بسم الله عليه )
وهم يقعدونوه ويكملون مغزاهم
ويدخلون القبيله ويرثعون به
هذا شنقل وريال فسحه واغاروا على بيت الشيخ وسيطروا على الوضع
وهذا المطنوخ غايلن الشاعر ابو طروق ويمردغوه
وهذا الشبث ماسكن عنز لشايب سناعيس ويمردغه
الوكاد ان القبيلة كلها قامت على هالمصيبه
ولا يقدرون يسوون شين
لان شنقل وريال فسحه غايلين الشيخ ابو عارف بشماغوه
ويهددون اي واحد يقرب منهم يغولون الشيخ ليما ينقزن عيونوه
وهم يجمعون القبيلة كله
قال شنقل اسمعوا انا مابي منكم الا حاجتن وحده
اذا عطيتوني هالحاجه اطلقت الشيخ ابو عارف
واذا ما عطيتوني هالحاجه ابغول شيخكم ليما يتدودلن عيونوه
قال كحل المحاجر هاه يا الاخوا وشهي حاجتك
قال شنقل اني اصير شيخن عليكم ولا فيه احد يتنفس علي
قال المطنوخ بالله يا شيخ شنقل ابي حاجه
قال شنقل وشهي
قال ابيك تجوزن بنت الشيخ حمراء موت
قال شنقل اشاور نفس وارد عليك
قال ريال فسحه وانا يا شيخ شنقل ابي حاجه
قال شنقل هاه يا ريالي وش تبي
قال ابيك تخلي ولد الشيخ اللي اسموه يوسف وهالشايب منصور الغايب
ياخذون حدا الغنم ويسوونه برستد لي لحالي
قال شنقل ابشر يا ريالي
الا خوينا الشبث
ويوم راعولوه ليمار لياهالحين ماسكن العنيزه ويمردغه ( يبي يطلع مرجلتوه عليه )
وبهاللحظات التاريخيه لشنقل وخوياوه كانت بنت الشيخ حمراء موت
تدور فرصه تبي تنقذ ابوه من هالغوله
والله وهي تاخذ قدر الطبخ الكبير
وتعدي من ورا شنقل
وهي تعجن راسوه بالقدر
وهي تقبس
وهم يمسكونهم
وانواع المردغه
هذا يوسف ومنصور الغايب مسكوا ريال فسحه
قال منصور الغايب
يا يوسف ياولدي الرجال يبي برستد
وهم يشيلونوه ويقعدونوه على النار ليما طبخة مختوه
وهذا كحل المحاجر وابو طروق مسكوا المطنوخ وانواع التشويت
وانواع التعذيب والبقوس وخربشة الوجه والسبلكس
اما شنقل فطاح بيد الشيخ ابو عارف وبنيتوه
وهو يبطحوه الشيخ ويخلي بنيتوه ترقص على ظهروه
طبعاً اخونا الشبث يوم شاف هالمصيبه اللي حلت بخويوه وهو يطلق العنز ويلوذ بالفرار
وبوجهوه طااااير ولا يلتفت
ويالله ينطلق شنقل وخوياوه منهم
ويهربون مع خويهم الشبث
وركض
وركض
وعندك عندك
ولا ياقفون الا عند قبيلة الشيخه عجايب
وهم يقعون ببيت الشعر عند العجز
وهو يراعي شنقل للشيخه عجايب قال
بوجهكم يا رجااااااااال
وهم يتصفرون هو وخوياوه
واسف على الاطاله
وبالجزء الجاي ان شاء الله نشوف وش يصير من كوارث على القبيلة
وتقلدوا تحيتي
[/align]
