الرقابي ... والامير محمد ابن طلال
يقولون ان فهد المارك رحمه الله انه توجه لأحد شيبان حائل
وكان يبي ياخذ منه بعض الاخبار وهالشايب يدعى
(الرقابي)بتسكين الراء وفتح القاف وكسر الباء
وهو من اهالي قريه الروضه (80 كيلو عن حائل)
وهي ان فهد سأل الرقابي هل حضرت احد من الرشيد ..
قال نعم ياولدي وهو الامير محمد ابن طلال رحمه الله
انا كنت حاضر بحايل وكان الامير محمد يبي يغزي وتجمعت الناس
معه وانا صرت معهم وغزينا وانتصرنا على هالعرب اللي حنا نبيهم ..
الامير معه خوياه الخاصين كانو بمخيم لحالهم والناس برّا لحالهم ..
وكان الامير محمد متخالف هو وخوياه على لهم سالفه
وهي ان الامير محمد يقول ان فيه واحد من اهل الروضه
مسمي بنته بندر وخوياه يقولون ماهو صحيح بندر اسم رجال
ولا يطلق على الحريم ومستحيل هالشي يصير
والامير متأكد وسأل ان كان مع هالغزو اللي معه ناس
من اهل الروضه عشان يتأكدون قالو ان فيه واحد يقال له الرقابي ..
قال الامير هاتوه يقول الرقابي ويوم امسينا
وانا كنت جالس مع ناس من اهل الروضه
خارج مخيم الامير يوم جانا احد خويا الامير محمد.. قال وين الرقابي ؟
قال نعم ..قال الامير يبيك ..
يقول الرقابي رحت لم مخيم الامير وسألن الامير
عن فلان من اهالي الروضه انت تعرفه ؟ قلت هذا جاري ..
قال الامير هو له عيال وبنات ؟ قال نعم .. قال الامير عدّد عياله
.. يقول الرقابي وانا اعدّهم فلان وفلان وفلان ..
قال الامير وش اسماء البنات ؟ قال الرقابي مااعرفهن ..
زعل الامير محمد وقال اجل منت جار له وشلون
ماتعرف اسماء بناته وهو يطلع من المخيم الرقابي
والامير زعلان (في روايه انه رفض يقول اسم بنات جاره)..
طلع الرقابي من مخيم الامير ولحقه واحد من عائله السبهان
(ضيّعت اسمه) قال له ابن سبهان وش علمك يالرقابي ازعلت الامير ؟
قال الرقابي اما العيال وعديتهم له واما البنات هذولن
عوره ولاني معددهن قدام الرجال والله انه اسهل
على نفسي اذكر اسم بناتي قدامه ولا اقول
اسماء بنات جاري قدام خوياه.. قال ابن سبهان
يالرقابي فيه من بنات جارك وحده اسمه بندر ؟
قال الرقابي نعم وصحيح كلامك..
قال له يالرقابي انا فلان السبهان واصلي بالمسجد الفلاني
اذا نزلت للديره مره ثانيه ابيك تصلي معي لي حاجه بك ..
قال الرقابي خير ان شاء الله .. وبعد فتره نزل الرقابي لحايل
وواجه ابن سبهان وقال ابن سبهان ان فيه جار له موذيه كان مستأجر
ومن شده اذيته شرى ابن سبهان البيت وطلّعه منه
وقال هذا صك البيت والله مايستاهله الا انت واهداه عليه
ويقول الرقابي لفهد المارك وهذا البيت اللي
حنا به هو اللي اعطاني اياه ابن سبهان
هذا ماسمعته من والدي ومن بعض شيباننا الله يطول باعمارهم
نقلا عن فهد المارك
رحمه الله على الرقابي
ورحمه الله على ابن سبهان
ورحمه الله على الامير محمد بن طلال ال رشيد
وغفر الله لهم جميعا واسكنهم الله فسيح جناته ولهم الرحمه ولكم طول العمر
__________
*((..اذا احد الاخوان يتأكد لنا اذا القصه موجوده بكتاب من شيم العرب و اي من مؤلفات فهد المارك اكون له من الشاكرين.. ))
