السلام عليكم يالفلاويه خشه خشه
وجعل ربي مايصبحكم إلا بالخير :)
وللي نايم جعله نوم العوافي وجعل الغطا يرتفع وتطلع عقوبك وتثلج
المهم يالربع ابي اسولف لكم سالفتي بما اني توي قايم من النوم وقالبتن عيوني تقل عيون فلبيني من كثر النوم <_ ماك يبي موظفين هههههههههههههه
مبطي وانا ابي انزله بس مستحي خايفن مايعجبكم <_ هين ياوجه ابن فهره
السالفه يالربع بالعيد اللي فات بثاني عيد مسكت بروس وغدانا الا يروحون يتمشون ومافيه من الجذعان قاعد إلا أنا تخبرون ذيبن أمعط أنا
وهو يجيني عمي قال ياسطل لاتطلع لمكان ولاتروح فض نفسك العصير ابيك تمشي الوغدان
يالربع وبكل صدق علاقتي مع هالوغدان ماهي زينه سيئه حيل لدرجه ماتتخيلونه وعندي لي اخو يقاله عبدالرحمن أسميه طحيمر نسبتن لحمر شدوقه وكبرهن
ووغدن لعمي يقاله محمد ويصوتون له حبصي
ووغدن ثاني اسمه محمد يقاله حمدوش
ماتسنه اسماء عصابه ههههههههههههههههههه
هذولا الثلاثه بالعربي دم ضروسي واسعد شي عندهم بهالدنيا ان يوسف ينغث وتنتفخ مناخروه ويلحقهم والله مرات احس اني سفيه من كثر ماانا وراهم بهالحوشه والنعول تكرمون يمين ويسار
نرجع للسالفه وهو يعطيني عمي مفتاح السوبر بما ان سيارتي كابرس موديل 78 ومااداني عليه وماعمري ارتسبت أحد غير امي مااداني احد يركبه اعتبره حياتي وروحي بالعربي قصة حب انا وياه :)
المهم ونروح نصلي العصر واجي ناكس للبيت ادودل راسي شايل هم الوغدان وافكر بيني وبين نفسي وش يبي يسوون بي هالمره <_ مكسفين بي يالربع
ماامداني ارفع راسي الا طحيمر فوق السوبر يرقص وحول اربعين وغد موقف عند باب السوبر وللحين اموت واعرف شنوح كلهم عند الباب اللي ورا الايمن
دريت اني كليته وانا افتح لهم وهم يركبون معي وهو يطري علي شريطن لي بالكابرس ومااسمع إلأ هو من عرفت الدنيا <__ يتسمع لمزعل فرحان لحد ينقد
ويوم ركبو قلت ياولد حاول تكسب قلوب الوغدان الثلاثه لانهم هم الزبده مع ان اعمارهم صغيره بس حتى وغدانا الكبار مايقولون لهم لا :) طحيمر بخامس وحمدوش وحبصي بثاني ابتدائي :315r:
قلت عبدالرحمن وين تبونا نروح <_ شاورته عشان يغليني ومايدبل تسبدي بالخط ويسوي لي مصيبه :)
قال نبي العزيزيه أنا صراحه اول ماقاله اوجعتن تسبدي وزمات علي بعد لاني خابرهم مانروح هناك الا يسووون لي مصيبه
قلت ماتبونا نروح نتمشى بالنابيه هههههههههههههههههههههههه الا قولت واحدن منهم نبي العزيزيه نقولك ماتفهم انت <<<____ بزمره وينفخ قلت ابشر ياطويل العمر
يوم مسكت الخط الا عمتن لي تدق تقول تعال خذ وغدانا قلت عمه وقصمن بالله اللي معي حول الاربعين وغد بس عيال عمي كسرت خاطري تقول الوغدان متضايقين يبي يطلعون <__ صرت مربيه انا لهم حاليا احس اني فلبينيه
وارجع وارتسبهم معي ومن الزحمه يالربع لاصقتن بعض وجيه الوغدان بالقزاز يعني تطفون تشوف سعابيل بعضهم على القزاز
ونوصل هناك الا زحمه امت لا إله إلا الله الحين طلع براسي نخل ان نزلتهم بلشت شلون اجمعهم وان تمشيت بهم بالسياره الثلاثه اللي ورا مايخلوني بحالي <__ والله يالربع طاردين كل الوغدان قدام وهم متربعين ورا لحالهم مايبون أحد يضايقهم وانا مابيدي شي ابي السلامه بس <_ ياعيشت الشر والشرير ههههههههههههههههههه
واوقف عند الصعايده بناء على اوامر طحيمر وحمدوش وحبصي يبي يركبون واوقف وارتسب كل الوغدان اللي معي بثلاث عربات ولاكفنهم ههههههههه وانا وراهم بالسوبر متلطم ومشغلن مزعل بي البتسوه
تخبرون العربات اللي تجره خيل يشغلون اغاني والوغدان طلع بهم عرق عبيد قامو يتنكسون وكل من رم من جنبهم ذبحوه الضحك :)
وانا اتأخر عنهم شوين ماامداني التفت الا تطابقو الوغدان اللي باول عربه الا طحيمر صافقن الصعيدي بكل حيله مع الصلعه ههههههههههههههههههههههههههههههههههه
ويالله بالموت اترضا المصري وطحيمر موقفن بعيد مدخلن ثوبه بالسروال ويصوت للمصري يبي يضارب يقول تسانك رجال الحقني :) <_ يالربع وش اسوي بوه وماياخذ الا الاول بالمدرسه
وماصدقت على الله اني اقنعم بالرجعه للبيت
يوم انتصفنا بنص الطريق إلا علبة الماء من جنب راسي له وشيش
سكت الشكوى لله وش اسوي اوقف واتذابح معهم قدام هالعالم
وانا اغير بهالاف ام وتجي قناة قطر وحزت العصر يطلعون اغاني شعبيه ويصدف اغنيه لفهد عبدالمحسن سامريه وانا اتهيض واطق اللطمه واقوم اجنح يمين ويسار وهم يجون الثلاثه تحمسو نقزو من ورا ودبو اللي جنبي وخلوه ينكس ورا وحنا نتماسك تقل صف سامري ونقوم نلعب سامري :) اعجبوني بهاللحظه بس ولا غيره ودي اذبحهم بيديني :315r:
وحبصي يالربع تقل من وغدان افريقيا ضعيفن تقل عود اسنان وراسوه تسبير وهو يوقف ويستنزل ويقوم يلعب براسه يمين ويسار والثنين يصيحون له يبي يطنخونوه وهذا اللي صار انطخن :)
وهي تنتهي الاغنيه وليته ماانته.... ألا أرجعه يحسبوني انا مغيره ويخسون لي ويعقبون وانا احلف والله هي نيتي ذالن منهم
وامر الثقبه واشري لهم شريط سامريات حايل :) وهو يقوم لهم لعب وغدو وغدانن محترمين بس بهالحزه اول ماوصلنا البيت الا الله يكرمكم التفله بين عيوني
وماامداني امسكوه انحاش حمدوش السوري ابو شكيمه للحينه بقلبي قصمن بالله :148r:
وأنا أنزل ضايقتن بي الوسيعه شوين وابستي لو بس واحد يقولي وقته وش بلاك احط راسي على صدروه ويغذي لي جعير
على مادخلت إلا هذا ابوي موقفن بوجهي يبي يرسلن دريت من يوم ابتسم
قال عندنا عشاء ونبيك تروح تجيب مدري وشو وتروح تودي مدري وشو وخرابيطن كثر شعر راسي <_ :wallah_hoo: أبوي مقدر أقوله لا
المهم بختصر لكم يوم جا العشاء وانا استلم الشاهي والقهوه من زود ماني منطنخ هكا اليوم <_ ماهي لله ينذخ عند لوه شايب يبيه يزوجه
وجالسن جنبي وغدن مدري من هو ابوه من كثر اللي عندنا وماني فاضي اسئله وجنبه طحيمر باشا طاردتوه امي تسلط على الخدامات وابوي مهدده إذا ماعقل هاليوم ومدلعينه الشيبان بس شلون قالو له اعقل مدري شلون طلعت منهم قالي الولد اللي جنبي عطني جوالك قلت خذه الولد ماشاء الله عليه حليل عسا الله يخليه لاهله اللي مدري منهم للحين ههههههههه
واقوم اقهوي ابو نسب اللي كنت مخطط عليه بس للأسف طلع مزوجن بناتوه كلهن وانا عاشقن خيال ماحولي احد :) رجعت وخذيت جوالي وانكس مرتن اوخرى اقهوي وماسكن الدله ومعي حول عشر فناجيل وهو يدق جوالي تدرون وش مسوي طحيمر حاطن لي نغمه مروحه والله تفشل ماني قايل وشي...قبل يدق سبحان الله سكتو كل اللي بالملجس تقل يبي يسمعون نغمتي :148r: وانا افتشل على دخل ولد عمي واعطيه الدله يقهوي واروح ابي مفتاحي عند الدلال وابي اللحق طحيمر ابي ذبحته خلاص نويته وانا اقمز باللي ماهداني بسرعه عجل وهو ينشب ثوبي بالمنقل وانا انخمع وهو يعض فمي القاع
وهي تضيق بي الوسيعه مدري اقوم ولااسوي نفسي مغمى علي وهداني الله وقمت واركض واطلع من المجلس
ياولد دور طحيمر قالو دخل من ورا البيت وهالطريق يودي للمدخل للمطبخ وانا اغزي ابيه قلت يمكن القاه متغيب واتوحد بوه
وانا اعدي واوقف جنب الباب حق المطبخ هو مسكر ومدنق راسي وامسكه ابي افتحه الا على فتحت الباب من داخل
وهي تطلع بنت مدري منين تسلطت علي وبيده عصير بردغان مسويتن زحمه وهي تنشب العصير بوجهي وينكب على ثوبي والكوب صفقهن بالخشم :wallah_hoo:وهو يقوم له صياح حرامي حرامي هههههههههههههههههههههههههههههه واعض ثوبي وانحاش قلت وين اروح الحين كل العيال عندنا اللي يقربون لي وكل مادقيت على خوين لي قال انا معزوم ولا عندنا عزيمه وهو يطري علي ولد خالتن لي خابره مداوم 12 ساعه ويطلع وينام بالبيت وبيتهم فاضي وانا اغزيه على الكابرس عطيت الله :)
وادق عليه طول الطريق ومايرد دريت انوه نيم وماينام الا بالمجلس واهله عندنا وزي العاده كل مااروح له امون عليهم حيل اطبق من فوق الجدار جابرن لي طريق :)<_ ماهو سروق
واحط رجلي تكرمون على عداد الكرهب وانقز الا انا فوق الجدار المهم رجل داخل البيت ورجل برا جالسن على الجدار واطالع للحوش ابي اطب الا اللي ماسكن رجلي من جهة الشارع
وهو يطلع عسكري اتريه موقفن يراقبن من اليوم والكابرس شبهه<_ معيي يبيع الكابرس
وانا اسحب وهو يسحب يبي يطيحن وهذا اللي صار سحبن حيل الا انا خشتي تدق بالرصيف
وهو ييرتسبن واكلمه ياابن الحلال بيت خالتي وهو مايرد علي بس يقول اسكت ولاكلمه ياحرامي <_ يالربع فيد ذبح هالعسكري
وهو يوديني للشرطه وحنا ندخل عند الضابط وهو يقول هذا واحد قليل حياء لقيته يبي يطب في بيت ناس ويبي يسرق قلت ياولد عين خير ماله لازم هالكلام
الا طلع له ريش قدام الضابط وهو يصفقن على وجهي
وانا من العصر مندبلتن تسبدي وجاني هاللحجي وزاده وجنا على روحه وانا اصفقه بيديني على وجهه واقمز فوقه وتوطي والعسكر ترفس بي يبوني افكه :)
وهي تصير القضيه قضيتين الشروع بسرقه واعتداء على رجل أمن <_ قهر
وهم يقطوني بالتوقيف وليتن مادخلتوه
كل اللي بوه شبه اخف قضية خطف
وانا اجلس بجنب واحد يالربع لابس فانيله علاقي وسروال اخضر منين طلع هالموديل مدري
انا الحين افكر شلون ادق سحبو جوالي وعيا الضابط يخليني اكلم أحد
وهو يضربن بفخذي ويبتسم الا مركبن سن ذهب :) حرام بالله زي وجه بشير غنيم :315r:
وانا ادف يده مسوي زعلان واحط يدي عند وجهه قلت وش فيك هآه :)<_ يبي يخرعهم يعين مجرم زيكم
ويلتفت لخوين له قال الولد هذا شكله زاحف يصلح للشله :puzzled:<_ فكر وهلوس مايدري وش يبون :)
طلعت شلتهم سرق سيارات ويقصصونه ويبيعونه حديد واللي داخل بالتشليح :)
المهم مالكم بالطويله قمت عنه مابي انحرف لاني على الريح انحرف مخي مسوس
واروح بالزاويه الا بوه افغاني متغطي بشي مدري وشو للحين بس شي مروح
ومعطيني مقفاه ويصفق علي من الصواريخ وانا ادمنت مابي قرب اللي هناك :)
واقعد يومين وكل مااسئل عسكري يقولي ماعندي خبر بموضوعك ومدري شلون ادق واعفي غصبن عني من التعب الا قولت واحد وصوته ماهو غريب علي يوسف ولد قم ويضحك :puzzled: انا قلت حلم طق مخي من كثر التفكير والسهر إلأ صدق طلع ولد عمي يالربع والله قمزت بقمزه وحده إلا أنا متشبطن الباب وادنه خليليه <_ يعني بتسيت من الضيم والفرحه هههههههههههههههه تقل بابو غريب
قلت ابو راسين وينكم عني تكفون افزعو لي لاتخلوني <_ حس انه ذابح احد
قال ابشرك عمي عند الضابط وندري حنا بك بنفس الليله بس عمي يقول خلوه ينطق لحد يجيه <_ هنا مسك بريك مخي ونوا صدق يحرضني احرق بيت اهلي
وهم يطلعوني ابشركم بالسلامه واول ماوصلت البيت اركض ادور امي تقل فلم هندي هههههههههههههههههههههههههههههههههههههههه هههههههههه هي اللي تقدر المواهب اللي مثلي :)
وانتهت مأساة يوم العيد وللحين يالربع اعاني منهم ومن مصايبهم آخرتها العشاء يصحيني من النوم يقول يالمدمن قم ويحذف علي نعول تكرمون<__مدمن عشان جلستي على النت لحد يفهم غلط :)
* <_ يعني ملاحظه ههههههههههههه يالربع أبي حل ولا كل يوم ابي ابلشكم واشكي لكم معاناتي :)
