طاااااط الفاضي يعود لكم باحد يومياته طاااااو

طااااااااااااااااااااااط

فضفض وصل

سلام عليهم

واخيرا وبعد انقطاع دام سنين يعود لكم الفاضي بيومياته الساخره الساخنه الي احر من بيتزا هت<<<<<<افطن بس

يسرنا ان نقدم لكم
اليوميه العاشره او الحاديه عشر والله مادري كم بس الوكاد ان عنوانه

برنامج الفاضي اليومي


الوكاد بدون الخرابيط الفاضيه الي فوق استلموا برنامجي اليومي الفكوووووووك


هذا يا طويلين العمر محاظراتي ما تبداء الا الساعه 8 واحيانا الساعه 10 يعني ماهن واحد طبعا الاربعاء اوووووف والثلاثاء يبداء دوامي العصر<<<<<<حشى دوام وزير هذا

الوكاد اني انسان مشالله علي نومي خييف مره مره
لدرجه اني احط منبه الجوال على الساعه 7 وكل ما يدق احطه على غفوه الى ان تجي الساعه ثمان الا ثلث

بعده اقوم كالغزال النشيط واشغل السياره طبعا التشغيل يكون قبل تغسيل الوجه عشان تسخن السياره
وبعد ما اغسل البس ثوبي وحوستي
وزي ما تعرفون حنا يالزقرت عكس البنات شغلنا سريع سريع ثوب وشماغ وقضينا وقضاه الله اما الحريم
تسيف الوحده تجلس عن المراه ساعتين لا وزين ان خلصت بعد
ايييييييييوه وين وصلنا
ايه وصلنا اني اكون الساعه ثمان الا ربع راكب السياره
احرك على بركت الله متوجه لكليه الفلس وطبعا فطوري مولمه من البارحه عشان ما اتاخر توقعوا فطوري وشو



























وين وين وين لا ماهو سندويشه وعصير
وش قالوا لكم وغد بالابتدائي انا الفاضي طول بعرض وطالب اقد الدنيا وتاليته سندويشه



هذا يا طويلين العمر علك اكسترا الاخضر<<<<<<لو انت على الاوله تسان اصرف لك
ليش مستغربين
عادي واحد يفطر على علك وش به
اصلا لي اكثر من 4 سنين فطوري علك خخخخخ

طبعا امشي ملايين للكليه بحكم اني متاخر
واكون الساعه 7.55 دقيقه بالكليه مالكم بالطويله الساعه ثمان الا دقيقه وانا بالقاعه هههههه
لاحظوا ان الدائري زحمه وبيتي بعيد عن الكليه وقدامي اكثر من 3 اشارات <<<<<ياحول انقهروا اهل الرياض خخخخخخ

بعد ما احضر المحاظره الاولى والي يتخللها <<<<<<يمديكم على يتخللها
هستره بالدكتور واستعباط
على اني ما اعرف بعض النقاط وهي واضحه زي وضوح الشمس

نطلع من المحاظره تقريبا 9 وربع ان طولنا 9 ونص
طبعا هالحين جاء وقت الفطور الدسم
اطلع يم قريتي
ايه قريتي
وهذي سلمكم الله بوفيه هنود بس قسم بالله ولا مطعم فايف ستار<<<<<يمديكم بعد على فايف
والله يا عندهم كبده طعمه بالراس
واطلب من عندهم صحين كبد وصحين كلاوي تحبهن قلوبكم
والخبيزات الله الله على الخبيزات
الخبيزات تشباتي
واضرب به بالخمس عندهم
طبعا عندي كوب عصير منجا وماهو أي عصير ثقييييييييييييييل ثقيييييييييييييييل ثقيييييييييل
يعني تلييص معده على الصبح
صبه افغانيه تصير ببطني ماهو فطور ههههههه

أي والله وارجع طبعا للكليه بس متاخر وبالتسذب على الدكتور واني مبنشر وبه حادث بالطريق بعد.

طبعا بعد ما انزل من السياره افرك ثوبي وشماغي بالكفر عدي مبنشر صدز عشان يصدق خخخخخخ

و اجلس باخر القاعه مدلخخخخخخخخخخخخ متـنننننننننننننــك ما ادري وش يقول الدكتور اهم شي يحظرن وبسسس
تخبرون انتم الافعى اذا كلت تجلس مدلخه له 4 ساعات او 5 انا مثله
مليص هالمعده ومنتهي لو يصوت لي الدكتور ما رديت عليه

اصلا يحمد ربه اني حظرت المحاظره والا تسان مميل يم الاستراحه ومنبلط هناك اصرف لي

ونطلع من المحاظره وقد استرديت شيئا من قواي واذا عندي محاظره ثالثه حظرته والا توجهت للاستراحه وتكيت هناك
طبعا انتظر المحاظره الي بعده واغلبهن ما يبدن الا بعد العصر ما عندي شي الظهر
طبعا اذا جت حزت الغداء نوجهه انا وخويي علي طول للتراثي وما ادراك ما التراثي
هذا يا طويلين العمر يحكرون اطلق رزيزات على وجه الكره الارضيه هههههههه
نطلب اكالكبسه من عندهم لا ومعه لبن يحبه قلبك
قسم بالله تدلخ غصبن عليك

الوكاد اننا ننبلط هناك وما نقدر نتحرك يبي لنا اكثر من ساعه عشان بس نقوم ونغسل يدينا

واتجه بعده للمقبره قصدي الكليه احضر المحاظره طبعا وانا افكر بحبيب قلبي الفراش

لان المعادله الرياضيه تقول

كبسه × لبن = نوووووووووووووووووووم عميييييييييييييييييييق

بس مع هذا يحصل لي غطه بالمحاظره عشان اخذ قسط من الراحه بعد اليوم الطويل الشاق المليان بالتعب والكد والاجتهاد ههههههه

ونطلع من المحاظره بعد ما يحظرن الدكتور لان الهدف من حضوري هو التحضير والا الدرس بقريح اهم شي ما ينزل لي حرمان ههههههه

بعد ما نطلع اذا عندي محاظرات عقب المغرب حضرت والا انقلعت يم المامي حقتي واتقهوى عنده
واقول له عن الي صار لي اليوم من اعمال شاقه ومتعبه

وبعده اتوجه لحسين واتعشى عنده
طبعا حسين هذا هو ماكدونالدز بس انا احب ادلعه بالاسم هذا

وبعد حسين اطس للاستراحه عشان اهستر بعامل الاستراحه مصطفى

طبعا مصطفى هذا كان قبل يجينا هندي هادي وحليل ومؤدب وما يوذي احد
هالحين من هواياته لعب بلوت وكنكان ضبط اطلق كبسه للزقرت بالاضافه الى هوايته المفضله
(تسحت ومطاردت وتعذيب البساسه)<<<<<حتى الهنود دشروهم خخخخخ

ومتى ما جت حزه النومه حركت للبيت وحطيت راسي عشان اقوم بكرا بكل نشاط وحيويه<<<<<بالحيل حيويه

وهذا هو برنامجي الروتيني الممل هههههه

وتقبلوا تحياتي
خيكم فضفض
طااااااااااااااو

بغيت اطلع وغمضن هالمتسان الاول:)

لي نكسه لك ياخلفي مادري سلفي الوكاد

برب

اقتباس:

---

الفكوووووووك

---

ههههههههههههههه

اقتباس:

---

طبعا بعد ما انزل من السياره افرك ثوبي وشماغي بالكفر عدي مبنشر صدز عشان يصدق خخخخخخ

---

( يخرب عقلك يالفاضي اثريلك هلون :)

طيب المضايف ماهي من اليوميات وليييييييييييييه

في انتظار اليوميات الجايه ان شاءالله

الا صدز وش تخصصك :) )
,
,

لك

http://www.shmmr.net/vb/images/image...ge/mojrd11.gif

,

طاااااااااااط

انا وصلت

اقتباس:

---

برب

---

الله والعالم انك داخلن شات ماهو منتدى :) <<<<<انتبهوا الولد شري

حياك الله يابو طنخه ولا تطول يا حبي:p: :p:

-------------------
حيالله مجرد قلم

اقتباس:

---

طيب المضايف ماهي من اليوميات وليييييييييييييه

---

المضايف يالغالي يبي له روايه ما تكفيه يوميه وحده<<<<<قام يرفع:)

اقتباس:

---

الا صدز وش تخصصك

---

علم ذره:) :)
قصدي طب
تدري وشلون تخصصي جديد على الساحه وهو
الفضاوه
8
8
8
معنا الكلام الي فوق وش دخلك:) :)

اسمحلي يا مجرد قلم امي تقول لا تعلم احد عن تخصصك


تقبل اعنف واشرس التحيا الفاضيه:thumb:

طاااااااااو

مشالله فاضين على اسمك :)

الا وش سالفة المواتر معك و الله اني اول ما لمحتك قلت هذا شريطي و لايهون صوت التريلا اللي اول ما تفتح الصفحة :)


اموت و اعرف وش جمع طااااااط ل طاااااو الا ان هالبواري صارت بالشكامين :)

اقتباس:

---

لبا قلب الهنود

---

<<<<< كيف التلفيقه معاك




تحياتي لك يا ملا العافية و إلى عدد قادم من طاااااو ( يوميات الفاضي ) و لك مني هالشعار :o:
أبد لان جا العدد القادم رز به :)






------------
تحياتي
أبو رشيد

ياوالله الديناصور صدق:)

من عرفت الدنيا وانت تكتب يومياتك

وليتها يوميات سنعه والا مفيده

الا كلها اكل ونوم وتسبده وفول ورز ولبن :puzzled:

بس ماتسنك نسيت التفحيط:tongue:
.
.
.
.
.
.
.
.
.
.
.

تدري عاد

للمضايف نكهه وطعم غير بعودة الفاضي

فارس من فوارس الفله المخضرمين :thumb:

تشكرااات يالفاضي ولاعاد تروح لحسين

[11]حنا مقاطعينه .[/11]
.

هالله الله

يوميات مهن يوميات بل قيتس:)

ماشاء الله ولا وجبه تاكلها بالبيت يا عند قريتي والا التراثي والا حسونه افندي :) حتى العليك تاكله بالسياره طيب ياخي كله بالبيت وقط القرطاسه بالحوش علشان تصير اكلت وجبه بالبيت بس نعمه انك تقهوا عند اهلك بك رجا :)








ذكرتن بسالفه على طاري النواد بالمحاظره هكاليوم يوم سبت انوووووووووود وانوووووود الاربعا والخميس والجمعه سهر وقل نوم والسبت طبعا ماله داعي المحاظره الاخيره رايحه فيها افكر اقول ابي اصلّي بالكليه علشان اذا وصلت البيت على طول احط راسي والدكتوره تعد الاسماء علشان الحضور وانا مع الناس ولاني معهم(افكر اخذ عباتي واصلي وبعدين اطلع ) قالت الدكتوره فلانه فلان الفلاني <<< اسمي انا ماسمعت الا ابوي وجدي ارتبشت وبدل ما اقول نعم قلت (اصلّي) الله لا يعيد هكاليوم طحت عند ناس شماته لهالحين ليا صوت لهم مايقلن هاه يقلن اصلي ::(


الوكااااااااااااااااد
كل ماهذا نزل لنا يومياتك نبي نشوف وشي مراحل نمو الضبان:tongue:


تسلم على الموضوع

والله احبكم موت وكثيرررررررررررررررررررررررررررررررررررر


ياشمر كثير


مع ان نصف الكلام مو فاهمتة

بس بعد احبكم


وشكرا لكم ولقصصكم الممتعة:hala1: :hala1:

طاط

اللي يشوفك بس تفحيط بالمضايف يحسب عندك zd ولا سيارة تفحيط

مايدري انه....!

هههههههههههههه
ياهلاااااااااااااااااااااااااا والله ومرحبا بـ أخونا الفاضي
يالله الدنيا الفاضي كبر واللحين بالكليه :)

يوميات ممتعه تشابه يومياتي وخاصة يوم تاخذ غفوه بالمحاضره تحس لها طعم يوم تصحى راح نصف الوقت :)


تحياتي لك
شموخ

^
يوم انتي تعرفينه وهو بالثانوي وغيد وهالحين عقب الكلية صار وغاد يعني هي هي الدعوا؟:)

مجرد قلم اتركك من استعباطوه هذا سلمك الله بكلية المعلمين ومخصخصينوه إدارة أعمال <--- ايبالله :)

الفاضي جدي وملي لاجديد بيومياتك لأن هذي يوميات سرابيت حايل كلهم ياهالسربوت:)
لكني مظطر الآن اضرب لك من الفرش اشكال والوان بما انك عزيز وغالي يعني ولاصرت الضهر تغدى بالتراثي يااااخي خذه سفري وجبه لاستراحتي مدامك تقول انك حولي الا على طاري حولي وش هالصدفة العجيبة؟!!
اول من سكن القدس انا وعقبي متفائل وعقبه ابوخليف وعقبه نايب المشرف العام كلهم جيراني باستراحاتهم وهالحين جيت انت تكمل الرصة !!
يعني كل هذا تلزز للشيوخ منكم ولا شلون؟:)

خوش سالفة وبكرا تكبر وتصير مدرس أد الدنيا وتكفلن بجيب عند تايوتا ان شاءالله:)

طااااااااااااااااااااط


ديد ديد دربديد دربديد

فضفض وصل


يا ليل الليل من يبي يرد على كل هذولا:) <<<<<شاف نفيسته:)


حيالله خينا شقردي

اقتباس:

---

اموت و اعرف وش جمع طااااااط ل طاااااو

---

تصدق حتى انا:) :) :)


---------

احلا تحيه لريم شمر

يا حيالله ريم

اقتباس:

---

للمضايف نكهه وطعم غير بعودة الفاضي

فارس من فوارس الفله المخضرمين

---

ادري والله:tongue: :tongue: :tongue:

اقتباس:

---

تشكرااات يالفاضي ولاعاد تروح لحسين

---

والله كل واحد يتكلم عن نفسه :p:

انا صراحه مدمن عليهم وما اقدر افارقهم حاولت اتعالج منه بس ما قدرت:) <<< يتسذب جايزاتن له العاب الوغدان ويلعب بهن:) :)


نكست بلييييييييييييز
-------------------

حياتس الله يا ااااخر العنقود
انتي لهالحين تصلين

اقتباس:

---

ماشاء الله ولا وجبه تاكلها بالبيت يا عند قريتي والا التراثي والا حسونه افندي حتى العليك تاكله بالسياره طيب ياخي كله بالبيت وقط القرطاسه بالحوش علشان تصير اكلت وجبه بالبيت بس نعمه انك تقهوا عند اهلك بك رجا

---

تصدقين عاد انهم يعزمونن عزيمه على الغداء والعشاء:a: :) :)

اصلا المامي حقتي تقول يا وليدي انت الله والعالم انك اخذن البيت فندق ما نشوفك الا اذا بغيت تنام:) :)

وبالنسبه للقراطيس المشكله تسان غدا الحوش كله قراطيس :) :)

وبالنسبه للمواقف بالمحاظرات
عندنا حدى الدكاتره مصري شمااااااااااات
كل محاظرتين والا ثلاث استاذن منه
لا ووشو عذري اقوله به عشاء عندنا بالبيت:) :)

الوكاد انه هالحين اذا بغى يحضرن ما يقول اسمي يقول ((به عشاء)) وانا ما ارد عليه اقول حاظر اقول ((به))

اقتباس:

---

كل ماهذا نزل لنا يومياتك نبي نشوف وشي مراحل نمو الضبان

---

ماهي مشكله بس حنا لازم بعد نشوف مراحل نمو السحالي:) :)


نكسسسسسسست بليييييييز

----------------

اقتباس:

---

والله احبكم موت وكثيرررررررررررررررررررررررررررررررررررر


ياشمر كثير


مع ان نصف الكلام مو فاهمتة

بس بعد احبكم


وشكرا لكم ولقصصكم الممتعة

---

حبتس العافيه انشالله يا احزان الحجاز

اذا تبين انزل نفس اليوميه بس بالحجازي ماعندي مشكله:) :)
واذا تبين شرح بعد ماهي مشكله تخبرين فاضي لا شغل ولا مشغله

---------------------

يا هلا والله وغلا بعبودي

وش لونك وش الاخبار

والله يا زريت الموتر بثنين ياما يتفتف واعطيته ثالث يا شيخ الى باقصى السعوديه يسمع فحطته:) :) لا الشين لو اركب كفرات لبنه
لالا ماهي اللبنه الي توكل لالا هذي اسمه لوووووووبنه:) :) بعد حي
لا زد ولا غيره :) :thumb:

حياك يالعزوه

-------------

ياهلاااااااااااااااااااااااااا والله ومرحبا بـ اختنا شمخمخ:) :) <<<<<ما سوا نسخ ولصق نهائي:)

اقتباس:

---

يالله الدنيا الفاضي كبر واللحين بالكليه

---

تشوفين وشلون
مقيوله الدنيا دنيه:) :) :) :)

اقتباس:

---

يومياتي وخاصة يوم تاخذ غفوه بالمحاضره تحس لها طعم يوم تصحى راح نصف الوقت

---

انا اشهد :) :)
اصلا من زين النوم بالكليه ما انام بالبيت عشان اقدر انام بالكليه:thumb: :thumb:



الخبل الي بعده:) :)

--------------

افطن يابو صياح الي يسمعك يقول تاعي الهلالات انت ووجهك:) :) هالي تقل خبزه تميز محترقه:) :)

بعدين ما المشكله بالوغااااااااد
المشكله بالي يجيك شكله شكل رجل وعقله عقل وغيد لو هو وغد والا وغااااد اشوى
مثل حالتك يعني :thumb: :thumb:

اقتباس:

---

الفاضي جدي وملي لاجديد بيومياتك لأن هذي يوميات سرابيت حايل كلهم ياهالسربوت

---

افطن يالعاقل:) <<<<<وش نوحي معلقن على افطن:) :)

اصلا فيه فرق بيني وبين سرابيت حايل
هذولا يسربتووون على قل سنع ماهم مثلي اسربت على سنع:)


وبعدين خبيل انا اسكن حول استراحتكم :a: :a:

اصلا يوم دريت ان استراحتك بالقدس نقلنا من اليرموووووووووك خير شر
تنعااااااااف النقره الي به عزوز:) :)

بعدين من قال ان استراحتي حولك:a: :a:
لعنبوا حيك هالحين اذا بغيت اسير على حدى الزقرت بالنقره لازم اغير زيت وسيفون وافلل التانكيين
لا وبعد اخذ معي خبزه يابسه اتلهى به بالخط واذا جيت عند شارع الاستاد اصفط على جنب واريح لي شوين وبعدين اكمل مشواري:) :) <<<<<<الي يقرا هالسالفه يقول استراحته باقصى الارض ماهي بمغيضه عند سويدز الضبعه:thumb: :) :thumb:

اقتباس:

---

خوش سالفة وبكرا تكبر وتصير مدرس أد الدنيا وتكفلن بجيب عند تايوتا ان شاءالله

---

اقول والله لو اني شايلن عقلي بكيس اسمنت وامشي به بالشوارع ما كفلتك:)
سفيهن انا اكفلك
انت يالله عشره يكفلونك:) :)






افيييييييييييييه اخيرا خلصنا
لا احد يقولي تسان راد على كل واحد برد منفصل:g: :g: :g:
هالون اوفق وادغر واعمل:) :) بعدين الاسراف حرااااااااام
والمسرف بعدين ربي يحطه بالنار:) :)


تقبلوووووووووووا
تحياتي
فضفض
طااااااو

الا ياربي دخيلك

تسيف مخي ماهو معي

فويضي اصبر تر هذي ماهي نكستي مير والله اني احسب اني مثبت موضوعك ويوم راعيت اليا والله مفككات صواميلوه:)

8
8
8
8
ابد يالعزوه خذ راحتك لو ما تبي تجي الا عقب سنه اهم شي تجي :) :)
يعني افري تايم اني تايم ولكم حياك الله

وبالنسبه للتثبيت عادي ان بغيت تثبته بمسامير والا تربطه بحبل والا تلغفه بالدرج عندك كله واحد

انت تااااامر ااااااااااامر كم ابو طنخه عندنا

ومشكور على تعليزه الموضوع بالسقف:) :)

تقبل تحياتي ويا ويلك ما تنكس

طاااااااو

الله يعينك يالفاضي عزالله انك تتعب بحياتك اليوميه وحسبتك فالضي طلعت مليان

على صوت زئير الرعد وعواء الظلام وخرفشة الدياتسه وصفير المطر

يأتي ....طنخان وهو لابسن بالطو جلد والهواء مناطحه ويظهر فوهة الرشاش حدر بالطوه !!

ويجلس على كمبيوتره الوحشي بجلسه تنم على قسوة وتحجر بالقلب !! آآه يا آل باتشينو:)


الفاضي

يارجل يارجل وش هالجمله هذي...

اقتباس:

---

الوكاد اني انسان مشالله علي نومي خييف مره مره
لدرجه اني احط منبه الجوال على الساعه 7 وكل ما يدق احطه على غفوه الى ان تجي الساعه ثمان الا ثلث

---

قسم بالله لو مكمله انك بعد 6 او 7 غفوات تعطيها ايقاف المنبه وتسحب على ام الدوام تسان تصير توؤمي<-هي هاللون صح؟


اما غيره فا يومياتك يوميات واحد مستهتر ماتعرف مصلحتك ولهالشي هذا انت لازم تاخذ كورسات عند اشهر اربع دكاتره بالعالم واللي على يديهم تتلمذوا العديد من خريجي السجون وأدى تعليمنا اياهم الى تسريع حكمهم بالاعدام لعدم صلاحية حياتهم

وهم:
1-أبوخليف (زميل الاكاديميه الملكيه البريطانيه للدراسات النفسيه)

2-ابوجعيثن(معيد في جامعة هارفرد لسيكولوجية الانسان)

3-العزي (مريض نفسي سابق وصاحب خبرة):)

4-طنخان (خريج جامعة اكسفورد لعلم الجينات الوراثيه )


صدقني على يدينا تشافوا كثير ....سارع بالتسجيل:)


تحياتي الطنخانيه

طاااااااااااااااااط


نكسنااااااااااا

قصدي عدناااااااا:) :)


ياهلا والله وغلا باخوي محمد الزبيلي

الله يجزاك خير
تشوف وش كثر يتعب ابن ادم
سبحان الله يقولك ابن ادم زي الانسان لو تدعسه تريله ومحمله برسيم يموت:) :) :)


---------
وخرووووووووووووووووووووااااااااااااااااا ااااااا


الشيخ ابو طنخه وصل:7ayyoh:

يا حيالله الشيخ

تفضل بصدر المجلس قصدي بصدر الموضوع:) :)

اقتباس:

---

قسم بالله لو مكمله انك بعد 6 او 7 غفوات تعطيها ايقاف المنبه وتسحب على ام الدوام تسان تصير توؤمي

---

تر احيانا يصير نفس الي تقول
يعني تقدر تقول ثلاث ارباع توؤمك:) <<<<<هي تكتب هالون:)

اقتباس:

---

اما غيره فا يومياتك يوميات واحد مستهتر ماتعرف مصلحتك ولهالشي هذا انت لازم تاخذ كورسات عند اشهر اربع دكاتره بالعالم واللي على يديهم تتلمذوا العديد من خريجي السجون وأدى تعليمنا اياهم الى تسريع حكمهم بالاعدام لعدم صلاحية حياتهم

وهم:
1-أبوخليف (زميل الاكاديميه الملكيه البريطانيه للدراسات النفسيه)

2-ابوجعيثن(معيد في جامعة هارفرد لسيكولوجية الانسان)

3-العزي (مريض نفسي سابق وصاحب خبرة)

4-طنخان (خريج جامعة اكسفورد لعلم الجينات الوراثيه )

---

افاااااااااااا يابو طنخه ما هقيته منك والله

لعنبوا حيك لي اكثر من اربع سنين افحط عشان اقدم دكتوراتي بالفضاوه والمذرحه وطرد البساسه بالشوارع

وتقول لي ادرس :a: :a: :a:
والله قويه قويه قويه((وجه واحد منصدم وحاط يده على وجهه)):) :)

الله يسامحك يابو طنخه كصمت و بغزت مشاعري:) :)


طااااااااااو

وتظل تملك اعى درجات التنسيم مع مرتبه الشرف

:)

تدري ضحكتني بقوه خصوصا عصير المنجا وفطورك الصباحي الدسم

باي

طااااااااااااااااااااط

الفاضي هنا
يالله حيه
وش نونتس:)

اقتباس:

---

وتظل تملك اعى درجات التنسيم مع مرتبه الشرف

---

الله مير يسلمتس ويخليتس لعينن ترجيتس
هذي قلاده اتقلده على صدري:) <<<<<تسني من راعين الخواطر

اقتباس:

---

تدري ضحكتني بقوه خصوصا عصير المنجا وفطورك الصباحي الدسم

---

انتي ما تدرين بالسر
عصير المانجا هذا له تاثير عجيييييييييب على خلايا المخ
لانه يدوخ ويخلي الواحد داااااايم مفهي وتااااااااش:thumb: بقووووووووه:thumb: :thumb:

اقتباس:

---

باي

---

طااااااااااااااو

هههه
يوميات ولا اروع
وربي قصه فلم هندي :)

انا بنتظار اليوميات الجديده :goooood:

^
^
لا بعد ما سمعتي قصه الفلم البنقالي :) والصيني :) والموزنبيقي:)

للمعلوميه القصه هذي واقعيه 100%:7ayyoh:

طااااااو