بسم الله الرحمن الرحيم
حق الخوه بوقتنا هذا للخوي من الرجال بحيث انه مافيه خوة حريم
لكن بالوقت اللي مضى كانت المره تخاوي الرجل لمده طويله بدون شكه وبدون اي شي
وهذا تابع لنيتهم السليمه وترجع البنت لاهله معززه مكرمه
بعكس وقتنا هذا الا من رحم ربك
حدثني والدي يقول:
سنه من السنيين امحلت ديارنا هالشماليه وذلينا ان الحلال يموت وخاصه البل
يقول وهم يذكرون لنا ان سوريا ربيع وهم يجتمعون ربوعنا ويجمعون حلالهم
يقول ابوي وانا اتكفل بهن
اني اوديهن لسوريا واقعد بهن هناك ياما تربع ديارنا وارجع بهن
يقول وانا امشي بهن يوم قربت سوريا وان امر على الروله يوم تعديتهم يامار اكا الرويلي لاحقن قال وين تبي يالشمري
قلت سوريا قال ابي ارسل حلالي معك وهذي بنتي معاهن
يقول الوالد تخاوينا انا وياه لمدة شهر ورجعنا ولااعرف اسمه ولو تسألن عن ثوبه مادري وش لونوه
"طبعا هذي مهي سالفتنا ":)
لكن ضربت مثال ان البدو قديما عادي عندهم يأمنك على بنتوه دون شكه زي ماشفتو هالرويلي
امن هالشمري على بنتوه
سالفتنا يمكن سمعتو به وهي والله من السوالف المثمنه
لكن انا سمعت انه نسبة لابو زويد السنجاري
وبحكم ماسمعت من الشيبان انه ماهي لوه
صحيح ان سالفة الطيب ودك لو هي لشمري والطيّب ودك لوهو شمري
لكن الحق يقال
بطل سالفتنا هو من قبيلة حرب الكريمه وان كنت ماني مخطي ان اسمه الذويبي
وكانت لوه خويه من مطير طبعا معنى كلمة خويه
"ماهو زي ماهو متدارج عندنا اللحين":)
الخويه معناه انه خاوتوه بهالسفره وعقبه يتفرقون
المهم ان المطيريه حامل يوم انتهت خوتهم وهم راجعين حسة المره بالولاده
قالت يالذويبي قال اه
قالت تسهل الله يسهل عليك
قال العلم قالت انت ارجع لاهلك وماعليك مني
قال الذويبي ابد والله انت خويتن لي من مشينا الياما ارجعتس لاهلتس
قالت يالذويبي ارجع لاهلك انا ماقدر اتحرك ابي اجلس بهذا ياما الله يفرج لي وعقبه ارجع لاهلي
دري الذويبي مشكلة المطيريه
قال والله ماخليك ولو اضطريت اني اولدّك
وبالفعل يقولون ان الذويبي هو اللي ولدّه بيدوه
يمار طلع الوغد بيدوه اليمين ويوم فرج له الله وتيسرت لاهله
يقولون وهو يتنجس الذويبي من يدوه وهو يلفه بشماغ
المهم مشى لاهلوه يامار اكا الليله فيه عشاء عند
واحدن من شيوخ حرب
وهو يجي الذويبي يم واحدن من ربعوه ويعلموه بالسالفه وقال يامن الرجال حضرو العشاء
ماني قالط معاهم ويدي هالون
نهج اللي من جماعتوه وعلم شيخهم يقولون وهو يقوم الشيخ ويرسل للذويبي
وحضر الذويبي العشا يوم قلطو العشاء قال الشيخ اقلط يالذويبي قال الذويبي ياشيخ انا مصوبه يدي اليمين ومستحي اكل مع الرجال بيدي اليسار
"وكان الشيخ يدري وش سبب يد الذويبي"
وهو يقوم الشيخ ويفك الشماغ عن يد الذويبي يامار طاسة اللبن وهو يغط يد الذويبي باللبن
وهو يشربوه قدام الرجال
قال الشيخ يالذويبي يدك هذي تفتخربه ماتنجس منه والطيب هو اللي يكرم خويوه
......
هذي سالفة الذويبي مع خويتوه وفزعتوه معه
شلون لو هو حدينا كان ينحاش:)
انا عن نفسي ابي انحاش:)
