[align=center]أول شيء ودي أعتذر لأخوي أخو سعدى عن تقصيري في مضيفه ,, وعذري بصراحة إني مقصرة مع أغلب المضايف :) >>>> الله من زين العذر بعد :) بكحلها وعميتها :)
ثاني شيء ,, ودي أعترف بالحقوق الملكية الفكرية لهالموضوع ,, الصراحة ان هالموضوع فكرته ماهي لي :) الفكرة لعجوزن مثقفة وخطيرة ,, بس انها تعرف تقرا ولا تعرف تكتب :) عشان كذا قلت هذي فرصتي آخذ فكرتها وأكتبها عنها مادام انها ماتعرف تكتب :)
السالفة ومافيها ,, إن خالتنا هالعجيز فيها حساسية بالصدر ,,, يعني تقدرون تقولون ربو إلا ربع :)
بس انه مابعد صار مستفحل فيها يعني المرض موسمي بالنسبة لها :) >>> والله العجوز الكشخة :)
ماتتسلط عليها الحساسية إلا بين الفصول :)
يعني بين فصل الشتا والربيع :) >>>> الله واكبر يافصل الربيع إيطاليا على غفلة :)
أو بين فصل الصيف والخريف ,, يعني وقت الغبار والعجعجة :)
وباقي الأوقات مايجيها شيء ,,
المهم في عز هالشتا تسلطت عليها الحساسية بشكل رهيب لدرجة إنها طيحتها في فراشها >>> يعني صارت طريحة الفراش :)
المهم ماخلت مستشفى ولا مستوصف ماراحت له :) >>>> اذا سمعتوا بمبالغة الحريم في السواليف تراها كذا :)
وكلهم يقولون ياخالة عادي أنتي أصلا فيتس حساسية يعني شيء طبيعي انها تثور مع البرد :) >>> طلع مدفع ماهيب حساسية :)
هذا الدكتور السعودي ,, المصري عاد يقول : ياحقة ماتخافيش مافيهاش حاقة ,, الحساسية أول ماتيقي تكون خفيفة حبتين بعدين بتزيد ,, يعني ده شيء طبيعي :)
عاد عجوزنا مثقفة وراعية حمية :) ماطاعت تصدقهم وحست انهم ماعندهم سالفة :)
المهم راحت لأخصائي على حسابها ,, وبعد ماكشف عليها ,, سألها : أنتي ياخالة مستعملة دواء جديد ؟؟
قالت : ايه توهم صارفين لي حبوب للضغط ,,
قال : هو معك الحين عشان أشوفه ؟؟
قالت : ايه اصبر شوي :)
عجوزنا كشخة ماتروح لمشوار الا وشنطتها معها :)
المهم طلعت حبوب الضغط وأعطتها للدكتور قعد يقلب فيها شوي ,, بعدين قال :
ياخالة هذي الحبوب ماتناسب اللي فيهم الحساسية لأنها تزيدها ,, لاعاد تستعملينها وارجعي لدكتورك اللي صارفها لك وخليه يغيرها :)
هنا انفرجت أسارير الخالة وحست انها معها حق من أول شيء :) وصارت هي بطلة الموضوع :)
طبعا رجعت لحالتها الطبيعية بعد ماغيرت الحبوب والحين تحتري حساسية فصل الربيع :)
الزبدة ,,
كثير منا يهمل قراءة النشرة اللي مع الدواء بحجة إن الطبيب مايصرف الدواء إلا وهو عارف انه مناسب ,,
لكن أحيانا الطبيب يغفل عن أمراضك الثانية ويصرف لك علاج مناسب للمرض اللي اشتكيت منه بدون مايسألك عن أي مرض ثاني ,,
وهذا ممكن يسبب مشاكل مثل ماصار مع خالتنا :)
عشان كذا أهم شيء في النشرة هو دواعي الاستعمال وموانع الاستعمال ,, لازم المريض يلقي نظرة سريعة عليها عشان ما يتعرض لخطر لاقدر الله ,,
ودمتم سالمين :)[/align]
