[align=center]زبدة الموضوع تعتمد عليكم بشكل كبير ,, وأنتم راح تكونون السبب في التأثير ,, الإيجابي بإذن الله ,,
عطوني من وقتكم دقيقتين بس ,, دقيقة عشان تقرون الموضوع ,, ودقيقة عشان تعطوني رأيكم من خلال الرد عليه :)
وإن شاء الله ماراح تندمون :) >>>>> كني ناوية أسوي عملية ارهابية :)
موضوعي يركز على مضمون هالآية الكريمة :
(( كنتم خير أمة أخرجت للناس تأمرون بالمعروف وتنهون عن المنكر ))
الخيرية الحاصلة لأمتنا مشروطة بهالشرط ,, وإذا انتفى الشرط انتفى المشروط ,, اللي هو الخيرية >>>> طلع درس في أصول الفقه :)
لازم أكون صريحة وواضحة وأبدأ بنفسي عشان تفهمون كلامي صح !!
بصراحة أنا عارفة إن الأمر بالمعروف والنهي عن المنكر شعيرة من شعائر الدين ,, والدين النصيحة ..
وترك القيام بهالشعيرة أمر خطير يستوجب العقاب والعذاب ,,
والتناصح مايختص بهيئة معينة بالعكس هو واجب على كل فرد من أفراد الأمة ,,
وهذا اللي مخليني أكتب عن هالموضوع ,,1/ الخوف من العقاب ,, 2/ وحب النصيحة,,
ماعندي مشكلة في تقبل النصيحة أياً كانت ,, ولو إني ممكن يكون عندي تحفظ على أسلوب النصح ,,
لكن المشكلة عندي في إسداء النصح ,, لأني يهمني أثر النصيحة أكثر من اهتمامي بإبراء ذمتي عن طريق إسدائها ,, وصرت للأسف مقصرة في هالجانب لهالسبب ,,
الناس يختلفون في شخصياتهم ,, واللي تنفع معه النصيحة المباشرة مايعني هذا إنها تنفع مع غيره ,,
عن نفسي ,, ماأقدر أستسيغ أسلوب النصح المباشر لأني بصراحة أحس إنه منفّر خصوصاً إنه غالباً مايكون قدام الناس وبأسلوب فيه استعلاء نوعاً ما ,,
يعني لما تجيني وحدة وتنصحني وأنا جالسة مع أهلي أو صديقاتي وتقول لي ترى شغلك هذا حرام أو مايجوز ,, مع إن المسألة ممكن تكون خلافية والأمر فيه سعة ,,
لكن ماأقدر أقول لها غير : جزاك الله خير وتسلمين على النصيحة ,, وأنا في قرارة نفسي متضايقة من أسلوبها ,,
وكوني تجاوبت معها وانتصحت بنصيحتها فما هو بسببها هي ,, لكن لأن فيه رادع يردعني هو ديني ,,
بس لو إنها نصحت وحدة ثانية ضعيفة إيمان أو ماتعرف من الأوامر والنواهي إلا شيء بسيط ,, هل ممكن تؤثر فيها !!؟
تسعين بالمية راح يكون الجواب :لأ ,, بالعكس يمكن تتسبب في إنها تخليها تنفر من مجالسة أهل الخير ,, لأنها تتوقع إنهم كلهم هذا أسلوبهم !!
أستغرب بقوة من بعض الأخوات لما تنصحني إني ماأجالس بعض البنات لأنهم ماعليهم سيما الصلاح ,,مع إنهم في داخلهم خير كثير ,, والمسألة محتاجة لوقت عشان نقدر نستثمر هالخير اللي فيهم ونخليه يطغى على بعض مساوئهم ,,
أحياناً كثيرة تكون القدوة الحسنة والمخالطة والمعاشرة ,, في غير المنكر طبعاً ,, تؤثر في الناس أكثر من تأثير النصيحة المباشرة مائة مرة ,,
لو جلست مع بنت تلبس البنطلون والقصير وعبايتها على الكتف وتسمع أغاني ووو... لكنها من معدن طيب وتحب الخير وإنسانة أخلاق وذوق وأدب ,, ماأتوقع إن مجالستي لها راح تؤثر علي سلباً إذا كنت فعلاً ملتزمة ومحافظة ,,
ليه مايكون العكس ,, يعني مجالستي لها تؤثر فيها أكثر ,, خصوصاً إنها عارفة في داخلهاإني على صواب وهي على خطأ ,,
وكل اللي تحتاجه مني هو مجرد دفعة معنوية عشان تقدر تنتقل من مرحلة لمرحلة معاكسة تماماً ,,
وإذا أنا أعطيتها الأمان وخليتها تحس فيه معي ,, ووثقت إن فيه ناس يساعدونها ويدعمونها في هالتحول ,, راح تتغير أوتوماتيكي ,, بدون أي كلمة مني ,,
أعتذر على صراحتي لكني أتكلم من واقع تجربة ,,لأن مجتمعنا صار أحزاب ,,
ناس لاهية وغافلة ,, وناس ملتزمة ومحافظة ,,
والحزب الثاني الملتزم للأسف فيه نسبة كبيرة يجهلون إسلوب النصيحة المؤثرة ,,وجلّ اهتمامهم ينصب على إبراء ذمتهم عن طريق النصيحة المباشرة بدون أي تعب أو جهد ,,
والمحصلة إنك تلقى الحزب الأول يستغرب لما يشوف ملتزم يضحك معهم وياخذ ويعطي بدون رسميات أو تكلف ,,
لأنهم يتوقعون إن الملتزمين ينظرون لهم نظرة ريبة وشك وكأنهم دنس ممكن يلوثهم !!
اللي أبيه منكم بعد هالمذكرات التاريخية :) إن كل واحد يذكر لنا إسلوب النصيحة اللي ممكن يتقبلها من الناصح كيف يحب يكون شكلها ؟؟
معليش :) أنا قلت ماأبي من وقتكم إلا دقيقتين :)
دقيقة لقراءة الموضوع ,,والدقيقة الثانية للرد عليه :)
بس الظاهر إني مع الحماس شطفت الدقيقتين كلهم للقراءة :) ,,عشان كذا ولأني تعديت على حقكم ,, خلاص مسامحتكم في الرد وعاذرتكم ,, بس أهم شيء تكونون قريتوه ,, مو تمرون عليه مرور الكرام في أقل من دقيقة :)
دعواتي الصادقة لي ولكم بالهداية وغفران الذنوب ,,
^
^
^
عاد عقب هالدعوة انسوا إني مسامحتكم في الرد وردوا :)[/align]
