أنا وجراير عرس(أبو صلهامة)..الحلقة الأخيرة
ا[ALIGN=CENTER]لسلام عليكم ورحمة الله وبركاته:
يسعد صباح اللي مع الصبح دحدر
يم الغنم..دحدر...تزاقل علابيه
الحلقة(2) والأخيرة<<<<<<< صار مسلسل أردني..اللي مايمديهم بادين الاهم منتهين..
........................................................
المهم: وبعد الاتصال:بـ(أبو علابي)...ماأمدانن أسكر السماعة ألاوهو على راسي...
كبير العلابي:وش السالفة؟؟خير عشى ماسر؟
قلت: ألا الشر بعين وعلمه...نشقة خشمك!!أقصد..شوفة عينك!!الكفرين اللي ورى على الزيرو ولامعي سبير...
قال: وش الحل؟؟ وش السواة؟؟وشي الدبرة هالحين؟؟
قلت: يعني انا جايبك هالحين..وبهالوقت العصيب.:mad:.أبي أتفرج على مقرن علابيك!!!!أنا أبي منك الحل؟؟؟ أبي العون!!
وبعد تفكير.ن.دام حول ربع ساعة إلا ربع....أنتفض ( كبير العلابي)...
وقال: لقيته... وأنا أبو العلابي<<<< خوش منخاة....
قلت: هاه....هات ماعندك<<<< يحسبنن أبي أشحذه دراهم
قال: والله مامعي .. شين..أبو أعطانن لي خمسة العصر..وقال:هات ريالين خبز..والبادزي لك!!!
قلت: ملعون أبو التفكير لاجا من خبول!!! منهو اللي منشدك عن هالحتسي؟؟
قال: إنت تقول( هات ماعندك)....!!!!
قلت:يمال الفقر..أقول: الفكرة والحل وشو؟؟
قال: آآآآآه ..الحل<<<<< الله والعالم إن دابسه فول..أشوف إستيعابه بطيء
قلت: بساع..يابن الحلال..
قال:بما إن قصيرنا( أبو محالة) مهو بهالديرة..خلنا نجطل سويويرته..وننستر به الليلة..وياطلعنا من العرس ننكسه.. ويادار مادخلك شر....
قلت: ألا يادار دخلك الشر... وعشش بك تعشيش..يهالخبل: وشلون تبينا ننطل قصيرنا؟؟؟
قال: هذا اللي عندي..وبعدين ماهي نطلة..هذي إستعارة..وأضف إلى ذلك: إن الضرورات تبيح المحظورات<<<<< إخص يهالوليد..مهو بسيط..صاير.ن. مفتي..
قلت: تدري..ماحنا سارقين السيارة..بس نبي ناخذ منه كفرين..وبعد العرس نرجعهن..:D
قال: شورك وهداية الله<<<<< أي هداية الله ..والدعوى: سرقة!!!
وهو يجلس يراقب لي الشارع..وأنا أطبدز بالحوش.. وأفك الكفيرين وأحذفهن على أبو العلابي.
ويوم طلعت..قلت: هاه أبو العلابي..عسى ماشافنا أحد؟؟
قال:ولا إبن أمه...بعدين الناس يصلون صلاة العشاء بالمسجد..ولامن أحد بهالشارع..
قلت: يله بساع..خل نفك الكفيرين .. ونرتّسب هذولي بدالهن..وحط الكفيرات القديمات..بشنطة السيارة<<<<عشان نخفي آثار الجريمة
قال: إزهلهن...(آثاريه من هالدلاخة خذاهن وحطهن بالحوش)
وركبنا الكفيرات... وبدقايق..ياحنا قاضبين.ن. الخط الشردزي..نبي يم العرس...ويم أبعدنا ..
قلت: أبو العلابي: وش هالريح معك؟وشو هالعطر اللي إنت متعطر.ن. به؟؟
قال:..وهو يهز راسه..( هوجو)..وبعدين هذا عطري من خلقتي.<<<<< إعقب يالتسذوب|513|
المهم...قلت: يابو علابي..تشّوف لنا مسجد.ن. نبي نصلي به...
قال: هذاك هو..وقفّ.. وقفّ.. خذ يمين ..وإدخل مع اللفة هذي..
قلت: يله... حوّوول نبي نصلي..
ويوم نزلنا .. ودخلنا بالمسجد..
قلت:أنا أصلي بك... قال: لا .حامض على إفيمك..
تسلمة.ن. مني... وعشرة.ن. منه... وهي تقبس بالمسجد.. بيني وبينه.على من هو الامام ومنهو المأموم.. ومرة.ن. يرفس بي.. وساعة.ن. أرفعه فوق راسي ..وأضرب به القاع... وياما تليشنا وحنا على هالحال... وبعد حوسة.ن. ومداوس..:D
قلت: ياقليل الفود.. وش رايك نسوي قرعة..؟؟؟
قال: (( نو بربلوم))<<<< كبير علابي ويرطن إنقليزي
وأن آخذ طبادزة قلم( الباركر) وأحطه بيدي اليمنى..وأنا أحط يدي ورى ظهري..
قلت: إختر... يمال التخاترة.. اللي يشرحون بطنك..
قال: اليمنى<<<< تقول يشوفن..الله والعالم إن إذانه بعلباهو..
قلت: صل ..:mad:.عساهم يصلون عليك..
وصلينا.. ويوم جينا بالركعة الثالثة..ويفطن علي عرس ( أبو صلهامة)...وعلى ماسلمنا ..
قلت: قم..قامت عليك بقعاء... نسينا عرس الرجال!!!
وإجي طاير.ن. أبي أفتح باب الكابرس.. ياوالله مسكر..بسم الله منهو اللي سكره؟؟؟
قلت: يابو علابي..إنت لاعبن بحدى هالدقم اللي بالباب...؟؟
قال: من يوم مشينا..وأنا أطقطق بهن <<<< مابعمره شاف دقم توماتيك
قلت: يالاعبة.ن. بقطعك التسلابة... ماتخلي هاللقافة....!!!
وآنا آخذ هكالهوداة.. اللي كبر راس البعير.وأنكخ به القزاز يامودعه بذيذ..!! وحنا نرتسب نبي يم العرس..ونمشي ويوم أقبلنا على العرس..
قلت: أبو العلابي..عطن العطر اللي تحت المرتبة..
وهو يدس يده .. ويقوم يحوس بهالغرضان..
قال: مالقيت شين!! قلت: تسيف مالقيت شين؟؟ أنا حاطه عقب عيد الضحية تحت هالمرتبة
بس يمكن عمال هالمغسلة..سربتوه علي..يوم انا أغسله بأول هالفايت.. أقول: إرفع كراعك.. غدينن ألقاه... وأنا أولع اللنبمة<<<< يبي يعلمكم إن بالكابرس لنبمة...
ويوم دنقت..ياوالله ماتشوفون هالشوفة...
قلت: وش هالسروال.. اللي إنت لابس.. يابو العلابي..
قال: (الأصيل)....
قلت: أناماأنشدك..هو ( الأصيل)ولاّ (دروش)..أنا أقصد وش بلاه متنيل.ن. بـ345نيلة..
متى علمه بالغسل..(ياغاسلينك ميت).
وأنا ألّف الكابرس...وبساع لأقرب فرع لـ( دروش)...ويوم دخلت المحل...
قلت: ياووووولد ..... ياولله هكالمصري جاين.ن. يركض...
قلت: هو فيه سروال مقاس هالوليد؟؟
قال: آآآآآه ..موقود<<<< موجود.. قلت: قيبه<<<< جيبه
قلت: إلبس ..لالبستك العافية.. وبساع تجينن بالسيارة.. ترنا تأخرنا..
قال: يله... هالحين إجيك..
ويوووم وصلت السيارة.. ياهو جاي.ن. يقلد تقل زول دركتر...
قلت: إرتسب ...إرتسب........ بساع<<<< بسرعة يعني..
ونجيك طايرين..يم العرس.. ويوم دخلنا.. ويستقبلنا أبو (صلهامة)هكالاستقبال الحار..
وأنا أندلخ.. ومن الطفاقة..أبي أقول: منك المال ..ومنه العيال..
قلت: منك العيال.. ومنه المال.. قال: الله يسلمك<<< دريت إنه ماجاب خبر للسالفة.
ويوم تعشينا...وعرضوا... ولعبوا سامري.. وهو يغمز لي أبو صلهامة ..
قال: أبو مقرن..السيارة..تقطع..والنور مابه نور.والاسطبات الخلفية يخلف الله.وأنا عريس..
قلت:قل ماتوده وإطلبه لاتمناه..وأناأبو مقرن..آمر بس . وش تبي؟؟
قال: غديك تزفن على كابرسكم المصون..
قلت:### في نفسي###: ألين هذي البلشة..:confused:... متى أرجع الكفيرات لمتسانهن؟؟؟
قلت لابو صلهامة: أبشر بسعدك... يله مشينا... وأنا أصوت لابو علابي..
قلت: يله مشينا.... وهم يرتسبون معنا هكالوجيه اللي تخرع الذيابه..ولهم ريح.ن. تجدع الحايمات..
قلت: خير؟؟ وين؟؟ غديكم غادين يالربع؟؟
قالوا بصوت رجل.ن. واحد: حنا زملاء العريس<<<< خوش زملاء
قلت: أمري لولي العرش...إرتسبوا لاجابكم من جاب الغيث..
ويوووم مشى الموكب.. واللي يتكون من كابرسنا المصون فقط..
قال( عريس الغفلة):أبو مقرن.. د ورلنا شريط سامري..أخبر معك لك سامريات.ن. منا حلوهن..
قال(أبو علابي): إيه.. وبعدين إظهار الفرح من السنة..
قلت: أبو علابي.:mad:.إنثبر يامفتي الفقر.. لأحوس مرير جد.ن. عقبك...
ومن القرادة...ناقف عند هكالاشارة..ياولله راعي هـ(الفورد الحمر) بجنبنا.. وهو يفتح القزاز من يم عريس الغفلة..ويتهايق عليه...
قال:( راعي الفورد): يعني ( عريسنا):إنت ووجهك هاللي تقل مراغة هوشة..إقصر صوت هالمسجل..لأنزل أتوطأ بطنك.إنت وبشيتك..
قال: (العريس): وش تقول إنت وبراطمك هاللي تقل ربل سيارة..؟؟ وإذا ماقصرنا الصوت وش تبي تعمل يعني؟؟؟
وهوووووو يحووّول علينا... وحنا ننحاش.. ومن الخرعة.. نضيع طريق الفندق اللي نبي نزف به العريس... ولا نلقاه إلا قبل الفجر بشووووين..ويوم وصلنا..
قلت:حوووول..وياويلك لو تعرس نوبة .ن. أخرى.. والله لأرميك...
وبسااااااااع وأن أوزّع الوجيه الودرة اللي معي. .كل.ن. نزلته على مزبلته<<< بيته
وأنا أمشي رايح.ن. للبيت... وألقى هكالمسجد.. اللي ماعمري طبيته.. قلت: ياولد خلن. أصلي الفجر مع هالجماعة. وبعدين أرووّح لأهلي. ويوم دخلت ياولله هالجماعة كله شيبان<<<هم اللي يصلون الفجر ..ولاّ أكثر هالشباب مايركعونه_ والعياذ بالله_المهم: إني يوم دخلت ..قاموا يراعون لي ويتحاتسون بينهم.. ويتغامزون<<<<الظاهر غرّهم منظر أقلام( الباركر)اللي مايكتبن
ويو أقام المّذن الصلاة...
قالوا: صل...يابو أقلام..
قلت: لا.. الله يجزاكم بالخير... أصلي معكم..
قالوا: صل.. الله يغلبك بالهدى...
وأنا أقلط دزامهم... قلت: إستقيموا واعتــــــــدلوا........ اللــــــه أكبر...
وانا أقرأ بهم سورة الفاتحة.. وأقرأ سورة البروج.. ويوم جيت تالي هالسورة.. وأنا إلحقه بله كم آية.ن. من سورة الغاشية<<<< مهو حافظهن وقام يــــرقعّ
وأسمع كم واحد يتنحنح.... يعني .. مثل قولة.ن.( ماعندك سالفة).... ويوم قمت للركعة الثانية وأنا أخشع ..وأقرأبهم سورة النازعات.. ويوم توسطت من السورة.. ويغدي عني باقيه.. وأنا أحول من النازعات.. على الفلق... ومن الفلق..أطبق على قريش... وهي تحتاس الدعوى وتختبص الأمور
ياولله كثرووا اللي يتنحنحون... قلت: ياولد.. اللله والعالم إني حستهم.. مار خلن أتماكن روحي وإنحاش
وخليتهم.. ياما سجدووا..وأنا أعض شليلي..وإنحاش مع الباب اللي يدخل معه خطيب الجمعة.. وبوجهي للسيارة....وأنا أشغل وإنحاش.. وعيونك ماتشوف إلا غبرتي..وعلى وقفتي عند البيت ياهذا الشايب(أبوي)..توه طالع.ن. من المسجد...
قال: إنت صليت... قلت: إيه ..صليت بلي مسجد.ن. هناك...
قال: تعال.. خلك تدزهوي الرجال...( هو دايم عنده شبة الشيبان الصبح.. وكلهم متقاعدين.. يعني مالهم سالفة إلا الحشّ بهالعالمين.. ونوب يتناولون بعض القضايا السياسية..من خلال تحليل ماتبثه إذاعة لندن... وخذ من حووووووووس)
المهم: إني قمت أقهوي هم.وياهذا (أبو مطير)<<إسألوا أبو غازي عنه..تروه يعرفه:D:p;)
قال: (أبو مطير):صلى معنا اليوم ( أبو محالة).. ويسلم عليكم.. ويقول .. ماأحد شاف كفيرات سيارته؟؟..يقول: إنه يوم جاء حول وجه هالصبح من السفر... ياولله الكفرات بس متسانهن:confused:
واللي مخليه يستغرب: إن هالحرامي..آخذ.ن. ثنين ..ومخلي : ثنين؟؟؟؟
قلت في نفسي: الله يلعنك ياإبليس.....نسيت الملويات...
وأضاف أبو مطير: ماعينتهن..يابو مقرن..؟؟؟؟
قلت: لا ... والله... أنا بلي عرس.. ولاطبيت الحارة البارح..
قال:أجل..وش هالكفيرات اللي بحويشكم...؟؟؟
قلت: يمكن هالحرامي.. حس بذنبه.. وبغى يرجعهن للبيت اللي سرقهن منه ..بس ضيع العنوان.
قال: جاااااااااااايز<<<< تقل حاس.ن. إنه أنا اللي سارقهن:rolleyes:..
وعلى ماجيت أبي أقوم..ألاّ أبي أنحاش.... ياهذا هالشويب اللي ماعمري شفته...دخل علينا..
الشويب: السلام عليكم.. صبحكم الله بالخير..
الشيبان: وهم يقومون يسلمون عليه.. ويحبونه... دريت إنهم يعرفونه..
وأنا..أسلم عليه.. وأحب راسه..
قال الشويب: الله يصلحك.... يعلك بعد هالشباب اللي تسوري توالي هالليول...
وتسيف ياإخواني..:mad: حتى المساجد ماسلمن من شرهم..اليوم صلى بنا لنا واحد.. وهو يقوم يحوس ويشرق ويغرب بهالقران.. وليته على هلون بس: الا خلانا يما سجدنا ..وهو ينحاش..
أنــــــا<<<<<<<< وجهي صار كوكتيل.أحمر.. أصفر.. برقداني..:o
وأنا أقوووم قلت: تبون شين.......
قالوا: سلامتك..
ويوم أقفيت من عندهم... وهو يصوت الشويب...( اللي حست به الصلاة)
قال الشويب: إنت يالوليد... اللي صلى بنا اليوم.. مثل زولك.. ونفس مقفاك.. وحتى هالاقلام نفسهن..
وهالشميغ.. تقل هو...............
غديه إنت اللي صليت بنا اليوووووووووم؟؟؟؟؟؟
أنا: لا.. لا.. أنا إلى هالحين ماصليت.......:confused::rolleyes:
وأنا إنحااااااااااااااش... وبوجهي للغريفة....ولا أدري وش صار عقبي....
.................................
الحمد لله على السلامة........... للي وصل نهاية الموضوع... [/ALIGN]بس دايم الحلقة الاخيرة هلووووووووون
