يروق العيد بقلوب و قلوبٍ عيدها ما راق
خذاه الحزن من أعيادنا في سكة طعونه
ألا ياعيد كل قلوب ناسك للفرح تشتاق
و لكنّ الظروف أحيان .. تاقف حاجزٍ دونه
فلا تعجب لعينٍ في نهارك دمعها دفَّاق
ترى يا عيد مو كل القلوب بضحك مسكونه
هناك قلوب فارقها.. حبيب .. و ما هو أي فراق
عزيزٍ في نهارك أصبحوا للموت ينعونه
غدا ما بينها و بينه من تراب القبور أطباق
قلوبٍ ربي يصبّر صدور اللي يشيلونه
و هناك قلوب غاليها عليه من الحديد وثاق
سجين و معْه دقات الفرح بالعيد مسجونه
إذا زاروه ضاحكهم .. و خبّى دمعه الخنَّاق
و إذا ما انتهى وقت الزياره فاضت عيونه
وهناك قلوب مذلوله عليها دين ما ينطاق
وديَّانه على بابه .. يهدد .. يطلب ديونه
أنا ما شفت مثل الدين (ذلٍ) يلوي الأعناق
و آخر ذلهم للسجن لو عجزوا يسدونه
و قلوبٍ أتعبت لجلْ التداوي من مرضها الساق
و على كثر التعب هي وين تلقى اللي يداوونه
و هنا قلوبٍ ضناها قاسي و ظالم .. جبان و عاق
رمى أمه و أبوه وهمْ بضعف العمر يرجونه
و هناك قلوب علّة أهلها بس إنهم عشاق
و لكنْ عشقهم ياناس .. بلوى لو تعرفونه
يعاف النوم واحدهم ولو يغفى دقيقه فاق
عسى ربي ما يبلاني بخفّ العشق و جنونه
و هناك قلوب و قلوبٍ ما تكفي وصفها الأوراق
تلاقي كل قلبٍ حاملٍ همه على متونه
تحاول في نهار العيد تكتم لاهبٍ حرَّاق
و تستر عن عيون الناس حزن العين بجفونه
ألا ياعيد سامح هالقلوب و زيدها إشراق
و رجّع فرحةٍ بأرض الألم يا عيد مدفونه
تبي شوفك ولو حوله من آهات الحزن أطواق
و تبقى عيدها اللي به تحارب غازي حزونه
.
.
هلا يا عيد لو تنزف قلوب أهلك من الأعماق
تظل بروعة حضورك أنيس الدرب و سكونه
و تبقى رغم أنف أحزاننا عيدٍ لنا و أشواق
و يبقى الحزن ـوإنْ طوَّل ـمصير الناس ينسونه
.
.
رسالة حب من قلبي لقلبٍ بالفرح ما راق
رسالة صدق من بنتٍ بهم الناس مسكونه
إذا لقلوبنا عهدٍ مَع الله دايم و ميثاق
فكلّ أيامنا عيدٍ تجدد خضرة غصونه
أفضل عيديّة على الإطلاااااااااااق
راااائعة
نقيّة كالفرااااات بل كالهتّاااااان بل كحروف ريوف
اسمحيلي اضع قلبي هنا وأهم بمراجعة ماااافي طيّات فااتنتك
قبل ذلك...!!
أنا على قائمة المعجبين بعقود الياسمين التي يزرعها قلم ريوف
طير سنجااااار
