نوعية من الشباب تشوفهم في البيت غير وعند الناس غير
نوعية من الشباب تشوفهم في البيت غير وعند الناس غير:
أبسط مثال يافلان قم ود اختك المستشفى تراها تعبانه
يقول هاه وش فيها مافيها الاا العافية
بس اذا واحد من اخوياه تعبان يقوم يطير طيران علشان يوديه المستشفى لا ويرافق معه
والا يافلان نبي خبز واللي يعافيك جب لنا
يقول ماعلي منكم عمركم مااكلتوا سوو ريجيم
وعند اخوياه يطبخ لهم لاا ويغسل المواعين بعد \n
الملابس
دولاب الملابس يشتكي من كثرها وما تشوفه الا بقميص واحد واتحداك يغيره ينام فيه ويقوم فيه ويصلي فيه ولايخلي أحد يغسله ،
واذا جاء يطلع للسوق شوفوووه ساعه عند المرايه يعدل شماغه
العجازين
وياكثرهم كثراه زي الرز ودي أشوف شاب يشيل عن اخته أو زوجته أو حتى أمه بعض الأغراض بالسوق الا تلاقيه مطير عيونه بالبنات والضعيفه وراه تسحب أكياسها الوحدة تشوف المصريه واللبنانيه تحسدها على الذوق اللي عند رجالهم ما يخلونهم يشيلون شي
اذا تبون تعرفون الشاب فوضوي والاا مرتب
هذ بسيطه شوفوا سيارته تجيك السيارة وصخه كلها غبار من يوم شراها ماغسلها لا ويقول هذي غبار الوكالة أمحق وكاله لاوكاله ولازفت الا عاجز يغسلها لا واذا شفتها من الداخل ماتدري وين تحط رجلك من هذي فروة تحت رجلك واسلاك وقراطيس وفصفص ومناديل وعلبة ببسي طاقها الشمس من سنة وهي في السيارة وثلاجات الشاهي لها سنه بالسيارة وبلاوي كل وصاخة الدنيا داخل السيارة والا ريحة الدخان اللي تدوخ الراس
لكن الشاب المرتب وهم قلة للأسف سيارته تبرق من النظافه تدخلها كأنك تدخل محل للعطور كلها نظافة وترتيب
راعي الحق والواجب r
مايخالف الحق والواجب لكن بحدود المعقول واحد يجيب لزوجته كل يوم ذبيحه ويالله اطبخي كل يوم طبخ ونفخ يعني الوحدة ودها تطلع مع زوجها وعيالها يتمشون وينبسطون وحتى اذا مااطلعوا يجلسون مع بعض يتناقشون ويتفاهمون مو كل يوم عزيمه والا الإستراحات رايح استراحة جاي من استراحه وبس هذي شغلتهم وياويلها اذا احتاجت شي ودقت على جواله تقطع عليه لعب الورق هذي مصيبه
الدلع
بنت تدلع معقوله تنبلع بس ولد يتدلع ووووووووووه قهر تشوف راسه ماتدري هو راس بنت والا ولد تسريحات مادري من وين يجيبونها اللي فالق راسه من انص تقل ثور واللي مسويلي تسريحة بطل التيتانيك وهو يحوم الكبد يطلع شكله تقل هندي مايدرون ان الشماغ والغترة أستر لهم والله ان وسامتهم وحلاوتهم بها الشماغ اللي يستر على بلاويهم
الشباب النصابيين
هذولا عد واغلط ياكثرهم يجيك الواحد يقول يووه سيارتي ) الفراري) اللي طالبها من برا تأخرت والله ماجت الى الحين اخاف ان عمارات نييورك طاحت عليها ..وهو زين ان معه ددسن ما شفتوا جوالي هذا جايبه من دبي والله ....وهو شاريه من الحراج ماتدرون اختاروني لاعب باالمنتخب بس اعتذرت لهم لأني مصاب والدكتور الزهراني يقوللاتلعب لمدة ستة أشهر .. والمشكله تلاقيه مايعرف ولا يشوت الكورة لا ويزيد النصب اذا كان الطرف الآخر بنت
المعصب
وهذا مسوي فيها شخصيه يدخل ينفخ ويطلع ينفخ يدور المشاكل دواره يحسب ان باسلوبه هذا يخوف الناس مايدري ان النوعيه هذي يكون بداخله انسان ضعيف
الدلخ
هذا كل من هب ودب يضحك عليه
الا في شي دايم يصير يجيك الشاب وهذي دايما تصير باالمدارس والأسواق اذا شاف البنت تلفت وتدور اخوها أو ابوها وطاحت عينها بعينه كذا صدفه خلااااااااااااص حبتني
لا والا اذا حكمت الظروف واضطرت تسألأحد منهم سؤال دوره عاد يبدا وجهه يتقلب كل الألوان ويتخلبط وحالته حاله على باله ان البنت (وقعت بدباديبه) على قولة المصاريا والله بلشه مايدرون انهم بها الأسلوب يخوفون الناس منهم
المغرور
ماأدري بعضهم شايف نفسه على ايش شين وقوة عين وأغلب اللي كذا يحس باالنقص ومن زود احساسه بالنقص يحاول يرفع نفسه عن الناس وما يدري ان من تواضع لله رفعه
الضعيف
الضعيف ....... الضعيف والا اقول مافيه ولا واحد منهم ضعيف كلهم ...
راعي التفحيط
هذا اذا فتحنا راسه تلاقي مخه تقل جريش منكثر ما يفتر بها الشوارع لا يفهم ولا يدري وين ربي حاطه ماعنده ما عند جدتي
راعي الطرب
وهذا ما يجلس بدون مسجل في غرفته الاستريو يشتغل على أعلى صوت قمه في الازعاج واذا طلع بسيارته الله يعين المسجل لا ومركب سماعات اضافيه علشان يطلع الصوت صح اذا وقف عند الاشارة شوف ملامح وجهه متشقق من الفرحة كأنه مسوي انجاز
راعي الأرقام
هذولا ساكنين بالسوق مدري ماعندهم بيوت تضفهم 24 ساعة بالسوق وطابعين ارقامهم ماليين كرتون ويالله توزيع حتى بعضهم يذب الرقم على شغالات وهم مايدرون تروح توري كفيلها الرقمشوف شوف بابا هذا هديه
أبو راس يابس
) هذا ماتقدر عليه يموت بالعناد تجيه باللين يشوف نفسه تجيه بالعين الحمراء كسر راسك وهذا ينفع معه المثل ) ابعد عن الشر وغني له (
الحساس
وهذا واحد بالمليون تحتاج ميكروسكوب علشان تدور عليه بس اذا لقيته لا تفرط فيه لأنه ينشرى بالملايين
واااااااااخر نوع
من برا هله هله ومن جوه يعلم الله
هولاء هم اللى يأجر لك فياقرا ولا شبح ولا فكتوريا من سيارات الجخ وان وقفته
قال انا فلان بن فلان آل .. وهو تلقاه سلتوح مايدرين وين الله حاطه
لا إذا وقف عند الاشاره وانت جمبه رافع كتفه وتافخ نفسه وإذا كان اللى واقف جنبه جمس فيه بنيات محترمات ارقبته شوي وتنكسر وهو يناظر فيهم ويطلع هالمعروض (الرقم بس يكون بخط كبير) وحالته حاله ولا تلقاءه مأخذ سيارة خويه بطق العصي علشان المظهر وهو ماعنده ماعند جدتي فوطه
طبعاً يا اعزائى واخوانى هالموضوع للتسليه فقط لا غير يعنى مهوب بعد كم يوم ينط لى واحد ويقول مدري وشو لالالا الله يعافيكم بس وسعو صدوركم
................................................ مع تحياتي لكم بالناسة الدائمة........... اخوكم ........................ صالح المطلق ..... شبكة شمّر:D
نوعية من الشباب تشوفهم في البيت غير وعند الناس غير
شكراً اخوي ابـــو مـــرزوق مراقب المضيف العام واخوي ALSHGAWI على تعقيبكم الجميل............ وتسلمون.
.................................................اخوكم صالح المطلق:D
