فهودي الشقي .....والمراهق العاشق !!

[ريم شمر]

السلام عليكم دكتور عبدالله ..



2 في 1 :)



كنت في مجلس نسائي


وكالعادة من اهم المواضيع الزوج ثم الابناء:)



كنت اتحدث عن ابني فهد واختلاف شخصيته تماما عن طلال


رغم انهم وجدوا بنفس البيئه وتلقوا نفس التربيه



فكيف يحصل هذا التناقض الصارخ



طلال هادئ جدا وسريع الحفظ والتعلم


فهد شقي وافضل هوايه عنده تخريب الاجهزه :3abrah:



مع انه ذكي بس يعاند بشكل واضح

رغم ان عمره سنه وتسع شهور فقط :(



اثناء حديثي قاطعتني احداهن لديها ابن في بداية سن المراهقه


قالت : احمدي ربك !!! ياحليلهم وهم صغار !! المشكله اذا كبروا


ماتدرين كيف تتعاملين معهم خصوصا في ظل انشغال الاب


وبدات بسرد مشكلتها



ابنها مراهق وفر له كل مايريد اي مراهق في هذا العصر


رغم ذلك يتعامل معها بعقلانيه وعدم تهور حتى الانترنت لايدخله الا امام والدته وتعرف كل مايتصفحه ويقرأه


وهو لايواجه مشاكل في دراسته فهو مجتهد كما انه مطيع لوالديه


وعاقل جدا واصحابه مثله


المشكله الوحيده انه عاشق :)



اكتشفت الام انه يحب ابنة خالته


الى الآن القضيه مجرد خواطر وكتابات وتلميحات طفوليه


لكن هي تخشي من التطورات خصوصا انها اكتشفت ان احد اصدقائه


يشجعه على الاتصال بها وهو كما يبدو يفكر بذلك



صراحه مشكلتها نستني مشكلتي مع فهودي فديته :d:



وفكرت اعرضها هنا خصوصا ان مثل هذه المشكله قد تواجه اي اسره



الولد مازال صغير وهو لايعلم ان امه تعلم
والام لاتعرف كيف تتصرف


ولايمكن ان تخبر الاب لأنه حسب قولها ( بيزيد الطينه بله:( )



أي اراء قد تساعد سوف اوصلها لصاحبة المشكله


.
.




وبطريقك يابو محمد شف لي سالفه فهد وكيف اتعامل مع شقاوته


وترى المشكله فيني انا مو فيه


هو طفل عادي من ضمن كثير من الاطفال الاشقياء


بس انا ماتعودت :(

ابيه يكون مثل طلال باي طريقه :)

ويبدو انه يقاوم رغبتي

[عجايب بنت الشايب]

لا تطالبين بالمستحيييل ياريم


هل انتي وخواتك نفس الشخصيات ؟



اذا نعم . ..انا وجارتي وزميلاتي لا



يعني الاغلبيه من الاسر فيها تفاااوت في السلوك بين افراداها بالرغم ان البير وااحد






احمدي ربك فمشكلة فهد ليست بالعظيمه ولا الغير طبيعيه .. ولا نفسيه فعليه





بحكم السن طبعا اقولها لك هي حركات وتصرفات طبيعيه 200 %



ولكن احذري


احذري



تقولين لفهد شووف طلال .. لأن طلال عاجبك ..



هو من نفسسسه سيحتذي حذوفه .. وسياخذ طلال من حركة فهد شوي


فتتساوى الكفتين .




وباذن الله باذن الله



سيخرج لنا من تحت يديك شباب .. رائعون :)



قولي امين



طحياتي

[السنعوووسيه]

8
8
خطيــــــــــــره ياعجوووووووبه الصراحه تعليق مميز



ريموووووو والله احب الاطفال الاشقيا تحسين الوقت معهم يمشي

الله يخليهم لتس يارب


عاطر ودي

[عجايب بنت الشايب]

8
8

أوسمتيني :)

[أبو رغد]

مع أني أرى المشكلتين شبه عاديات الا أني متابع لأرى وأستفيد من دكتورنا عبدالله


ألا فيه كلمة بالموضوع ولا بالردود جايه بغير محلها الي يلقاه له جائزة:)

سلام

[واحد شقردي]

نصيحة عجائب حلوه يا ريم شمر لا تقارنين بينهم ولا تشيدين بحد دائمن قدم الاخر

بس انا بشوف وش ولد ام محمد مشكله العشق وخاصه بصغر

بالكبر قل متمرس هههههههههههههه

[أحمد]

مدام انهم مختلفين بالطباع قولي الحمد لله البلشه لو هم نفس الطباع كلهم هادين وينامون بنفس الوقت ويفضلون نفس الوجبات للاكل اكيد بتتورطين مثلاً اذا باتسر عطاكم الله طولة عمر وكبرو وبغيتي تروحين للسوق وش تسوين ؟؟؟؟؟

كلهم يسوقون بنفس الوقت ماتجي مشكلة صح !!!!!!


وش الحل هالحين <<<<<<< ياشيخ اقلب وجهك ههههههههه



الله يخليهم لتس سند ويصلح قلوبهم يارب


تري مكاسي

[ريم شمر]

هلا وغلا بعروسنا :d:


انا تقريباً اقنعت نفسي بأن المشكله عندي انا وليست عنده


أنا اللي مو متقبله طبايعه المختلفه تماما عن طلال

لكن باقي كيف اعود نفسي على التعامل معه باسلوب مختلف

والاهم تقبل اختلافه:(


ممتنه لمرورك يالغاليه

[ريم شمر]

هلا والله بالسنعوسيه


ماتبين ارسل لتس فهودي :)



من ناحية انه يوسع الصدر فهذا ماتبي لها كلام

بس بعد سعة هالصدر ينقلب البيت فوق تحت :)

اجهزه تخرب ومكياج يضيع وعطور تتكسر

هذا غير اني اخاف عليه خصوصا اذا قام يتعبث بالاجهزه :(



يسلم لي مرورك يالغاليه

[ريم شمر]

مع أني أرى المشكلتين شبه عاديات الا أني متابع لأرى وأستفيد من دكتورنا عبدالله


ألا فيه كلمة بالموضوع ولا بالردود جايه بغير محلها الي يلقاه له جائزة:)

سلام



ماعاد فيه كلمات بغير محلهم :)


حياك ابو رغد


وكل مشكله تحتاج لحل حتى لو كانت عاديه :qannaj:


بالنسبه لام المراهق كانت فعلا في حيره كبيره ولأنه اكبر ابناءها

فليس لديها خبره بالتعامل مع هذه المشاكل

خصوصا وانها عودها على انه مايسبب اي مشاكل طوال فترة طفولته ومراهقته

ومثل هذا ماينفع التعامل معه بمثل التعامل مع اي مراهق



شكرا لمرورك الكريم

[ريم شمر]

واحد شقردي


والله اني احيانا اخربها اذا قهرني هالجريبيع

اقوله طلول اشطر منك :)


تسلم اخوي على اهتمامك

[ريم شمر]

الجثري


حياك الله يالجثري وانت صادق مشكله لو هم متشابهين


مع اني احيانا ودي استنسخ طلال :)


ومايمنع بعد نسخه من هالشيطون :d:


<<<انتي وش تبين بالضبط:puzzled:

[العَـــروب]

فهودي مثل وسوفي :)

ريم تذكرين موضوعي التاريخي لما ضربت يوسف ؟ :)



انا انتظر جواب الدكتور .. ابي اشوف شنو ينفع مع وسوفي



الله يصلح لج اياهم يا رب

[بنت الجبل آخت القصيد]

سيم سيم انا قبل الشهر :hala1:

لدرجة وصلت معي انام بمزاجه واقوم بمزاجه

بس الحين مشتاقه لهم :(

ريمو تدرين الحين صار لنا شهر ماعندنا تلفزيون قسم القسمات :za3lan:
الرسيفر من ضحايا الجرابيع
وامي استانست وقالت مانبيه نبي نصير اوادم :)
الله يصلحهم لك يارب
اصعب مرحله للتربيه عمر السنه ونص لل3 سنوات << اتوقع من تجربتي :315r:

.
.

اما الولد الملتاع
وين المشكله اذا كان يحب بصدق
يمكن يكون تفكيروه جدي ويخطط يبني مستقبل :3ajebni:

<< عاد حله عند د/ عبدالله
ننتظره نستفيد منه للجرابيع الكبار :d:
.
.
آحترامي
roooose

[يـــوسف]

ياأم طلال الحل عندي وانا ابو هندي :)





هالحاله يسمونه الهدر والحل طال عمرتس انكم تزوجونه ..

دبسوه بظهر له وحدتن يده كبر الجثري :)


والله يصير بس عيونن تلافت ولايسوي شي ويصير ثقل زي الشبث :)




الله يخليهم لك ياآم طلال وابد تري الولد اللي هلون يطلع ماهو بسيط لاكبر <_ لاياشيخ :)



<_ يسحب روحه مع ثوبه من ورا يطرد روحه :)







عن إذنكم :(

[بالمختصر..]

تبين نصيحتي ..؟

اقري كتاب ( علم نفس النمو , الطفوله و المراهقه ) لـ الدكتور / حامد زهران

حنا درسناه بـ الكليه .. أكثر من رائع هالكتاب ..

يعطيك مميزات و تفكير كل مرحله .. عشان تقدرين تتعاملين معه على هالأساس ..

بكل سهوله تلقينه عند جرير و العبيكان و أغلب المكتبات لأنه مقرر دراسي ..


..


المرحله اللي يمر به ولدتس فهد ( مرحلة الحضانه )


يقل في هذة الفترة اعتماد الإنسان على أمه تدريجيا، ويتعلم كيف يحافظ علي حياته بأن يأكل و يشرب و يجتهد في تنظيف نفسه و يستطيع كذلك أن يكون بعض المفاهيم البسيطة عن الحياة. و للوالدين في هذه المرحلة أهمية كبيرة في تكوين شخصية الطفل فعليهما أن لا يعاملاه على أنه مجرد صغير لا يصلح إلا للعب ولكن يعاملاه على أنه إنسان.


ترى توه صغير لا تحكمين على شخصيته من الحين ..! راح يكبر و يتعلم و يتغير ..




.
.

[روح حايل]

لا تنقلين هم بيتغير !



بس لا تركزين على سلبياته عشان ماترسخ بباله !




الله يخليهم لتس ويهديهم .....

[شام]

الله يخليهم لك أم طلال و يهديهم ويصلحهم
لكن عموماً الامر عادي جداً و طبيعي
أما أن تجعلي من فهودي نسخة من طلول
فهذا صعب ..
ولكن يمكنك اعطاء لكلٍ منهما احتياجاته
و لازلت معك انتظر رأي الدكتور عبدالله
لإفادتنا أكثر حول هذه النقطة ..
وبالتوفيق لكم جميعاً يا غالية
مودتي

[ريم شمر]

هلا بام يوسف وغلا


ايه اذكر :( والله يلوم اللي يلومك :)


نحتري الدكتور لعل وعسى يعطينا علاج اما انه يركدهم والا يصبرنا :puzzled:


نورتي يالغلا كله

[ريم شمر]

عطوره هلا بك ياقلبي

حملتي الهم وانتي توك :(


.
.
تدرين عاد وانا اكتب الحين فهودي مادن اصيبعاته ويضغط

وانا بس امسح وراه ويويلي لو اقول شي :d:


واما العاشق الولهان :)

ابي شي يطمن امه لأنها حامله هم ولاهي عارفه تتصرف

يعني تطنش

ولا تراقبه

والا تصك عليه

والا تحجز له البنت من الحين وتقوله اركد الين تكبر

والا وشو :)

[ريال الفسحه]

انا احل محل الاستاذ ابومحمد لين يجي ..


الحل سهل وبسيط ويحتاج لمجهود بسيط
وقليل جدا منك يا ام طلال ..



اعفطي وجهوه عفط يما يغدي مثل
اخوه




وبس:ezpi_blus

[ريال الفسحه]

اما بالنسبه للعاشق ..


تعفط وجهه اموه واذا ماتقدر توصف لي
محل مدرستوه وانا اعفط وجهه :)

[ريم شمر]

الله يخليهم لك ياآم طلال وابد تري الولد اللي هلون يطلع ماهو بسيط لاكبر <_


ايه ابوه يقول نفس الكلام :)


تسلم يوسف على حضورك وعسى ربي يرزقك الزوجه الصالحه والولد اللي مثل فهودي

يطلع عيونك وتجي تشتكي منه هنا:solh:

[ريم شمر]

هلا و غلا بالمختصر

تسلمين على المرور القيم والافاده


لاهنتِ

[ريم شمر]

حياتس ياروح ورأي الخبره لايعلى عليه :)

تسلمين يالغاليه وعسى ربي يخلي لتس عصافيرتس

[هايس الشمري]

عندي نظريه مدري هي صح ولا غلط..!


بس عاد اني مكتشفه..!



الشقي و هو صغير يصير هادي لا كبر..!


و الهادي و هو صغير يصير شقي لا كبر..!




<<<<<<<<< اتعب يا افلاطوون :)





و المراهق.. امره عاادي.. مرحله و تعدي.. :)





سلااااام

[ريال الفسحه]

هايس انت ونظريتك تعال خلن اعفط وجهك :)

[هايس الشمري]

^
^

تعفط كبر السلوقي :)

[ريم شمر]

هلا وغلا شامو


سعيده بمرورك وحياك ربي



وتابعي معنا فالفائده للجميع :)

[ابو ضاري]

اولا بدون عفط وجيه هايس انت وريال
الله يعطيهم العافيه ويممد بااعمارهم اللهم امين
اولا السعاده والشقاوه تختلف من شخص الى شخص اخر اما الشقي فيجب له معامله حسنه وليس الاعناد لان يزيد من الشقاوه ..
اما تكسير العابه هذا امر عادي بالعاده نهاوش من يكسر العابه وهذا خطى لماذ لا نتركه ماذا بعد التكسير
هل ياتي بطريقه او يخترع له شي فيها لا نظلمهم
نسال الله له الهدايه والصواب وان يبدل حاله الى سعاده

[ريم شمر]

انا احل محل الاستاذ ابومحمد لين يجي ..


جزاك الله خير :)



الحل سهل وبسيط ويحتاج لمجهود بسيط
وقليل جدا منك يا ام طلال ..

هاتوه :)



اعفطي وجهوه عفط يما يغدي مثل
اخوه

ليتنا من حجنا سالمين


وانت ماعندك الا عفط وصفط :a:


هونا نبي نحتري التختور الصدقي :)



حياك يالذيب :7ayyoh:

[ريم شمر]

حياك الله أخوي هايس


نظريتك تعور القلب n)


يعني طلال هالملاك بيصير اقشر الا منه كبر shlwee7



تسلم على هالحضور وابعد عن هاللي مشتهي يعفط وجيه العالم :)

[ريم شمر]

ياحياالله اخوي الضاري

شكرا لمرورك الكريم ولدعواتك الطيبه


لاهنت

[عبدالرحمن]

وانت ماعندك الا عفط وصفط :a:


الله يرج بليس العافط والمعفوط والصافط والمصفوط!
والله اني ضحتك وانا جالس وحدي ودشت ام العيال
واستحيت من الضحك وانعفط وجهي!
من ريال اللي ما عنده غير العفط ورد ام طلال اللي عفطوه!.
الحل عندي لكن السؤال موجه الى الاخ ابو محمد
فكعادتي لا اتعرض الى حلال غيري!.
يحفظك الرحمن انتي واسرتك.

[ريم شمر]

^
^
وهل ارفض نصيحه ورأي من استاذنا عبدالرحمن

بل اشتريها ولو بوزن فهد الماساً:)



انتظرك مع رأيك

والموضوع طرح لقضايا عامه اكثر منه مشاكل شخصيه

للحوار فيه مجال وأبداء الرأي حلال زلال


فعد الينا وبجعبتك جميل المقال



ولاعليك من ريال وعفطه وصفطه :)

[عبدالرحمن]

اعتقد ان الطفل الذي يميل الى تدمير الاشياء من حوله
كالاجهزة والاثاث .........الخ
هو طفل طبيعي! فهذا ليس تدمير وليس تخريب!
انما هو بدافع حب الاستطلاع ولفت النظر اليه
واذا لجأ الطفل الى تشويه الاشياء اوتمزيقها
او اي امر نراه نحن تخريب وازعاج وهو في حقيقته اثبات وجود!
فالطفل في الغالب يقوم بهذه الاعمال حتى يعكس رغبته!
في التعرف على الاشياء من حوله حتى يكشف ويكتشف العالم!
وهو كذلك ناتج عن طاقته الزائدة فالطفل لديه طاقة كبيرة جدا
ان لم يكن يعاني من اختلال في الغدد الصماء
فقد يكون خلل في الغدد هو من يجعل منه كثير الحركة
اما ظهور مشاعر الغيرة لدى بعض الاطفال هو
نتيجة الاهتمام بغيره من الاخوة!
فأنتبهي اخاف انك تظهرين حب واهتمام زائد بطلول امامه!
فشعور الطفل بان هناك من هو اهم منه تخلق منه طفل حاقد
وعدواني على من هو داخل دائرة الحب والاهتمام!
كذلك يجب توفير الالعاب البسيطة للطفل
التي يمكن له ان يلهو ويلعب بها دون ان تتلف او تجرحه.
الخلاصة امتصي طاقة فهودي بالاهتمام به
من غير اسراف في التوجية والنصح مع محاولة
امتصاص طاقته العبثية في اشياء يختارها هو لا انتي!.

مع دعواتي لك ولأسرتك بالصحة والسلامة
وعذرا على مشاركتي المتواضعة.

[ليلى بنت عبدالعزيز]

هاتيه عندنا ...حماده يعشق الوغدان الاشقياء
:
:
:

أصابع اليد مو سوى حبيبتي
عندي في البيت اشكال والوان
وسبحان الله البيت أشقى من الولد
اهم شي مايكون مافيه مقارنه بينهم

تقبل خربطتي هنا:)

[ريم شمر]

الخلاصة امتصي طاقة فهودي بالاهتمام به
من غير اسراف في التوجية والنصح مع محاولة
امتصاص طاقته العبثية في اشياء يختارها هو لا انتي!.

تسلم وماقصرت

لي فتره وانا احاول اغير اسلوبي معه ويبدو ان هنا نتيجه بالافق


ممتنه لمرورك استاذنا عبدالرحمن

[ريم شمر]

هلا وغلا بليالي

وعسى الله يخليهم لنا وش حنا بدونهم


يسلم لي هالمرور

[قمر اللــيل]

تري مشكله فهد عاديه يام طلال مادري ليه انتي خايفه



الله يحفظه لك قولي امين




وبعدين هذا شي طبيعي لانه صغير وفيه طاقه كبيره يبي يفرغ هالطاقه ولاهو لاقي شي سوا التخريب يعني فداه كل اللي يدمره




للعلم يام طلال تري ظهور ملامح فهد صغير( اقصد شخصيته وشقاوته ) راح تتعرفين على شخصيته وهو رجال كبيره



وقولي قمر ماقالت ؟؟





الله يحفظج ياام طلال انتي واعيالج

[أهداااب]

عندي نظريه مدري هي صح ولا غلط..!



بس عاد اني مكتشفه..!



الشقي و هو صغير يصير هادي لا كبر..!


و الهادي و هو صغير يصير شقي لا كبر..!




<<<<<<<<< اتعب يا افلاطوون :)





و المراهق.. امره عاادي.. مرحله و تعدي.. :)





سلااااام







أكاد أجزم أن هالنظرية صحيحة 100%


<< مكتشفتها قبلك ياحرامي :)




ولمست هالحقيقة بين أخواني ..


الكبير الهادي اللي كانوا الناس يحسدوا أمي على تربيته صار طايش ودايم زوجته تشتكي منه ومن طيشه


و الصغير اللي كان متمرد جريئ زوجته طااايره فيه وهو طاااير فيها

( عائلة مثالية فعلاً ) :)





أما بالنسبة لأبنك فهد ..


فأنا أشوف أن الطفل كثير الحركة ولدية حب الأكتشاف و العبث طفل

ذكري تحملية فأن للجمال ضريبة



و من الصعب جداّ أن تجعلي كل ابنائك استنساخ من بعض في الهدوء و التربية والتعليم

مهما تشابهت ظروف التنشئة و البيئة لبد من وجود الأختلاف بين الأخوة



ولا تستخدمي أسلوب المقارنة بين أبنائك بقول : شوف هذا أحسن منك .. أشطر .. أجمل .. أهدء

و أن كنت تحاولي أثارة روح التنافس و الحماس فيما بينهم لكن قد ينعكس ذلك عليهم سلباً بخلق نوع من الغيرة ..



أما فيما يخص العاشق الولهان :)


لا تقلقوا بشأنه فهو طبيعاً جداً جداً


فالتعلق بأبنت الجيران أو بنت العم أو الخال في السنوات الأولى للمراهق عادي جداً


لأنها بأختصار أول بنت يصادفها وتقع عينه عليها


ستكون فيما بعد مجرد ذكرى



و أنا كانت تخشى أن يتصرف أي تصرف يسيء إلى البنت أو إلى نفسه

عليها أن تناقشه بهدوء و تخبره بشكل غير مباشر أنها تعرف كل شيء



و تحذره أيضاً بأسلوب غير مباشر من عواقب مثل هذه السلوكيات ..



فمازال صغير على موضوع الحب و الأرتباط :)




أتمنى أن يكون في وجودي هنا فائدة


لكِ الود .. rooose2

[ملامح شمري]

سالفه فهد وكيف اتعامل مع شقاوته






ابيه يكون مثل طلال باي طريقه :)










شوفي خية ريم


بالنسبة لوغدانك المهبل
بتكلم من واقع خبرتي بلعب كوماند اند كونكر و كال اوف ديوتي, اون لاين على
الانترنت بسيرفرات سعودية وسيرفر امريكي ..


ولدك طلال الهادئ اتوقع انه بيطلع راعي ادب و كتابة يعني يا راعي خواطر او راعي قصيد
ومن هالحين علميه لقولة صح لسانك وصح بدنك واعتلى شانك و قصيدة جزلة ...الخ الخ
واشتري له جمس ابو عبر حمر وصقر وخليه يربي شنب اطول من قامة ابوه < على الاقل
بيدخل موسوعة غينس عشانه , ان قصيده طلع من جنبها ..


اما المصرقع الصغير ..


اتوقع بنسبة 71.98% انه بيكون له مستقبل بالمطارح
يعني يا تلاقيه بكرى موقف او مسجون بسبب خنقة او لانه فالق له احد ..
واحتمال ضئيل يطلع مهندس اتصالات بما انه متسلط على جوالاتك وماغير يخربها
واحتمال اخر يكون له مستقبل بخفر السواحل لانه حسب كلام لك سابق
ياخذ جوالك ويغرقه بكوب ماء ويجيبه لك عشان يوريك وهو مبتسم و انتي منقهر
وبتصيحين , وهو اساسًا قصده يوريك عشان تعلمينه كيف ينقذها ويسوي لها تنفس
صناعي بس لانك مفهية ساعتها عشان جوالك خية ريم منتيب منتبه لهالنقطة
واد ددنت كروس يور مايند ..


ثواني اخت ريم ..


< يعدل نظارته الشمسية ماركة بوس..


ممتن لانتظارك اخت ريم..


ذا والله اعلم ..


تقدرين تدفعين قيمة الاستشارة عند سكرتيرتي الفلبينية العجوز سوسوكيوت
بتلقينها بحجز الجوازات , يقولون ماعندها اقامة الله يغربلها .

[ريال الفسحه]

8

منتهي من قلب :)


وينك من مبطي

[ريم شمر]

هلا وغلا بقمر مضايف شمر

نورت الموضوع بجد


وانا تقريبا بديت اتأقلم معه

مع اني ماودي اتعود على شقاوته بعدين اصير مثل بعض الامهات اللي ولدها يفلق ولد الجيران

وتجيك تضحك مستانسه وبكل بجاحه تقول ياحبيل وليدي هو وشقاوته

بينما ولد الجيران الضعّيف يتشحط بدمه :)

تسلمين ياقمرنا

[ريم شمر]

هلا وغلا بهدوبه

رأي يشار له بالبنان ومو غريبه على الاستاذه اهداب :thumb:


تسلمين يالغاليه وشكرا لمرورك الجميل

[ريم شمر]

الفيلسوف ملامح :)

صف مع طلال وفهد خل الدكتور عبدالله يكشف عليك :tongue:



ريال الفسحه


مثل ماقلت :055r:







بيكمل فهد سنتين وابو محمد ماطل علينا :(

[د. عبدالله بن دهيم]

السلام عليكم ورحمة الله وبركاته <<< هذي لأني توني دخلت

وعليكم السلام ورحمة الله وبركاته <<<< هذي للي سلمو قبلي عشان أكسب من صوبين


أم طلال أنا دخلت على الموضوع عشرطعش مرة وكتبت أكثر من رد بس موقعكم شايلن علي هاليومين وما يبي يسجل لي ولا شي (الله يستر ما يضع ذا الرد بعد بس للاحتياط كاتبه بورد).

نجي لسالفة فهد وطلال

يذكروني بسالف توأم جيراننا اللي كتبت عنهم منذ مبطي ولكن لا أعرف إن كنت كتبت الموضوع هنا أم لا،

الناس أجناس فكل الشجر تشرب من نفس البير وبعضها يعطي حلو وبعضها يعطي مالح وبعضها ما يعطي ولا شي.

ومثل ما يقولون بعد لكل باب مفتاح ولكل قلب حيلة - المثل من تأليفي وإخراجي


طلال الهادي واللمّاح يحتاج نتكلم معه بطريقة كلها مشاعر وصوت منخفض ونحرص إننا نمسك يده أو نضع يدنا على كتفه ونحن نتحدث إليه، ولا تغفلين الأحضان مهما كبر تراه يموت عليها لو ما طلبها - انشدين عن هالشغلات

فهودي الله يحرسه - هذا النوع اللي أحب التعامل معه من الأولاد

قد يكون أكثر ذكاءاً وفطنه فهذه الصفات تقول لنا أننا أمام فتى يتميز بروح قيادية فطرية، ورغبة في الاكتشاف والمعرفة، ولكن يرفض تماماً أن يقال له ماذا يفعل وماذا لا يفعل بعكس الأول الذي يحتاج منا لتوجيهات مستمرة.

باختصار

فهد العبي معه ولا تأمرينه ودايماً قولي له وش رأيك لو تسوي كذا

طلال سولفي معه وأعطيه تعليمات مباشرة



نجي لسالفة أبو الشباب اللي مستعجل

الخطوة الأولى أمه لازم تتكلم معه وتبين له إنها عرفت بالسالفة

بعدها تختبر البنت وتشوف مدى تقبلها للموضوع (يعني هي عاجبها الولد وإلا لا)

هنا تبتدي القصة مع الولد وتبين له إن السالفة لسى بدري شوي عليها ويبي له يصبر وما يتسرع ويكلمها،

وعشان نخليه يقتنع بالمسألة بدون صراح وزعاق وغيره نقوله:

إذا أنت فعلاً شاريها وراغب فيها كزوجة لك لابد تنتبه إنك إذا كلمتها فأبوك وأبوها مستحيل يوافقون على زواجكم،

فإذا صدق تبيها لازم تصبر وإن شاء الله تكون من نصيبك.

إلا إذا كان قصدك تسوي مثل بعض العيال أو تقلد بعض المسلسلات بس عشان تجرب فأقول لك: ترضى واحد من عيال عمك أو عياك خالك يكلم أختك بعذر إنه يحبها ويبي يتزوجه؟؟


المهم إن كل هذا يتم بصفة ودية وبطريقة سوالف تقوي فيه شهامته وغيرته

[د. عبدالله بن دهيم]

لا تطالبين بالمستحيييل ياريم


هل انتي وخواتك نفس الشخصيات ؟



اذا نعم . ..انا وجارتي وزميلاتي لا



يعني الاغلبيه من الاسر فيها تفاااوت في السلوك بين افراداها بالرغم ان البير وااحد






احمدي ربك فمشكلة فهد ليست بالعظيمه ولا الغير طبيعيه .. ولا نفسيه فعليه





بحكم السن طبعا اقولها لك هي حركات وتصرفات طبيعيه 200 %



ولكن احذري


احذري



تقولين لفهد شووف طلال .. لأن طلال عاجبك ..



هو من نفسسسه سيحتذي حذوفه .. وسياخذ طلال من حركة فهد شوي


فتتساوى الكفتين .




وباذن الله باذن الله



سيخرج لنا من تحت يديك شباب .. رائعون :)



قولي امين



طحياتي





ما شاء الله تبارك الله

وأنا أركز على نقطة التحذير من المقارنة سواء بحضور الاثنين أو واحد (المقارنة أو قولة شف فلان مرفوضة تماماً)

[د. عبدالله بن دهيم]

لا تنقلين هم بيتغير !



بس لا تركزين على سلبياته عشان ماترسخ بباله !




الله يخليهم لتس ويهديهم .....


كلام سليم

تذكري أن مخترعي اليوم كانو الأكثر تخريباً بالأمس

العناد من صفة إيجابية لو نظرنا لها بطريقة صحيحة

[د. عبدالله بن دهيم]

اولا بدون عفط وجيه هايس انت وريال
الله يعطيهم العافيه ويممد بااعمارهم اللهم امين
اولا السعاده والشقاوه تختلف من شخص الى شخص اخر اما الشقي فيجب له معامله حسنه وليس الاعناد لان يزيد من الشقاوه ..
اما تكسير العابه هذا امر عادي بالعاده نهاوش من يكسر العابه وهذا خطى لماذ لا نتركه ماذا بعد التكسير
هل ياتي بطريقه او يخترع له شي فيها لا نظلمهم
نسال الله له الهدايه والصواب وان يبدل حاله الى سعاده


أقف هنا للتحية والتقدير لمن خطت أنامله هذه الكلمات النيرة

[ريم شمر]

هلا ومسهلا فيك استاذنا عبدالله

توجيهات وتنبيهات وحلول اعتقد انه تحتاج اليها كل ام وكل اب

استفدت كثيرا منها ومنذ كتابة الموضوع الى اليوم هناك كثير من التغييرات

في سلوك فهد نتيجة لهذه الوقفه والاستشاره

مهما كنا كامهات واباء نعتبر انفسنا فاهمين ونحسن التعامل مع ابنائنا

نحتاج مابين فتره واخرى الى اراء مختلفه ورؤيه جديده


لك الشكر والتقدير ابو محمد على اهتمامك


وشكرا لكل من مر من هنا ناصحا او متفاعلا

[المطنوخ]

حياكِ الله أختي ريم شمر وهذا أقل من الواجب

فما وُجد هذا القسم إلا لخدمتكم والسهر على راحتكم وتحمل مصائبكم

[عجايب بنت الشايب]

بن دهيم

شهاده فخريه اقتباسسك لردي ...

[ريم شمر]

المطنوخ

مشاء الله تواجد جميل وتفاعل متميز حضرة المشرف العام لاعدمنا هالحضور :)





عجايب roooose

[امير الغلا]

بالنسبه لفهودي يكبر ويعقل ولازوجوه

أما العاشق فيقول جدي عايض رحمه الله

الهوى قد ذبحله شمري
................. والدجيما على موته شهود

[أبو فهد]

السلام عليكم ورحمة الله وبركاته



والله مدري وش الموضوع لكن من قريت فهودي



قلت هلا و الله بالعنا و التعب


كل الناس يقولون مقولة مشهورة


انه لما تسمي ولدك فهد يطلع شقي و اسألوا مجرب



عندي واحد الله يصلحه مطلع براسي نخل


عبيط و مخرب و شقي و موذي و محد يسلم من شره


قولوا آمين الله يصلحه



انصح كل الشباب اللي مقدمين على تسمية اطفالهم بهالاسم


انهم يستثمرون و يوفرون اوقاتهم بتسمية أي اسم غير فهد




يانااااااااااااااااااااااس هالولد جنني شيّب بي وهي ابو سنة و نص



وش الدبرة معوه هالحين و انا اكتب لكم وهو يلعب باكسسوارات اللابتوب




----------------
أبو فهد الهمزاني

[ريم شمر]

أمير الغلا

حياك وشكرا لتفاعلك الطيب يالطيب ..لاهنت


شقردي

ايه قالوها لي غيري اسمه ويتعدل :)

بس انا مسميته على اخوي الله يرحمه

وهو من ينضرب فيه المثل بالدين الاخلاق والطيب كله من اقصاه لادناه

وواثقه انه بأذن الله بيطلع عليه بالنهايه ...


عسى الله يحفظ لك فهد وليدك ويقر عينك بصلاحه


تسلم على الحضور