توبه مابعده نوبه [الأرشيف]

أخت رجال

05-12-2007, 16:57

عصيـرن بهـذا

وانا قاعدتن اراعي لي برنامجن

يحتسي عن الحياة الزوجية

ونوه لازم على الزوجين وخصوصا الزوجة لازم تحمية اعدي ل(للحياة الزوجية) من تسرب الملل والفتور

مهو الفطور اللي يوكل الصبح

لا فتـــــووووووووووووووور بالتاء

وانه لازم تجـــــدد بـــه وتعطيــــه بعض اللمســــــــات السحريـــــة ومن هاللمسات الاحتفال بذكـرى العـرس:d:

وهـــــــي والله تطخ براســــــي ,:thumb:

وانا ام عبد العزيز.ارا اخت الليـــــد اختــــه وليـــــه ما نحتفل به؟
وليه حنــا ناقصيــن عن خلق الله ؟

وانــــــا اتنهض واقوم احـــــوسب يمـــار باقين حوالي خمســــــــة تيـــــــــام

قلت اشوى مافاتتن

وانا اطير اشري لابو العيال اكالهديــــة وانا اجي طايرتن

والله يوم جاء اكاليـــــوم وانا اقعـــد احورف بعمـــــري يمين يســـــار :315r:وتمشـــيط بالشوشــــة وتزيين مـــــــــن عصري وانا اتولـــــم تقول رايحة لعرس احد.

والله يجي ابوعبد العزيزوهو يسلم بالخير يام عبد العزيز:)

وانا التفتلوه هلا ياعمري

يقالي مطبقة اللي شفته بالبرنامج

وهو يحول ينطن عويناته بي منخــــــرع مايدري وش بلاي متزينه ماله بالعاده يشوفن هالون :puzzled:

و انا اقوم اتبوسم له :315r:

لان المرة اللي بالبرنامج تقول لازم تبتسمين لرجلتس وهو جاي من برا وانا مطبقة الخطة نقطة بنقطة ,

وهو يقعد يراعـــــي لــــي ويرومش وانا ارومـــش مثلوه تقل تونــا نــشوف بعــــــــضنـــا:d:

قال لي: ام عبد العزيز تقل عندتس شينن ودتس تقولينه هو بنفستس شين؟ قولي لايردتس الا لسانتس

قلت بيني وبين نفسي مافي داعي اقوله الليلة ذكرى العرس وليه مانحتفلبوه كذا خبط لزق مايصلح لازم اصير رومنسية والمح لوه تلميح علشان هو يتذكر من حالوه ,

وانا اجي قلت ابوعبد العزيز : قال سمي قلتلوه :تدري الليلة كم التاريخ قال كم ؟قلت هالكثر من الشهر

وهو يشهق اكالشهقة اللي تخرع اللي ماينخرع

انتي متاكدة ؟قولي قسم قلت :قسم قال ليه ما ذكرتينن وهي ينطلق مثل الصاروخ

وانا استانس وانا اتشقق من الفرحة ياحظي اشوى انوه فطن من نفسوه

بس وين راح

ايه اكيد انوه راح يجيب الهدية اللي شارية لي بهالمناسبة او انه راح يصخن السيارة يبي يعشينن الليلة بالمطعم. :315r::315r:

يازين هالبرامج اللي توعينا لحياتنا الزوجية وتخلينا رومنصيين لا انا ....كود اتابع هالبرامج واتسثر منه والله انه زينه ومفيدة( اقولوه بيني وبين نفسي )

ومغمضتن عيوني وانا ابحر يمار هو قدامي وانا انز من الخرعة

وانا اراعيلوه يمار شاربه ابيض ويتمطق ويتمطق

قلت له وش عندك؟

قال اشوى قلت وشو اشوى؟

وش بلاك؟ وش نوحك ؟

قال شربت اللبن اللي بالثلاجة قبل ينتهي باتسر موعد انتهائوه :)

وهي تترزن العبرة والحمقة والعنز :148r:

وهن يجتمعن ثلاثتهن بي وانا اطمح بغرقة عبد العزيزولدي

وانا ابتسي وابتسي وهو يارم راسي

وهن يوجعنن عيوني

يماغدت الوحده كبر الفنجال

وهو يحتاس المكياج والكحل والتسريحة:solh:

وهو يجي عبد العزيز الله يصلحوه عاد انا ناقصتوه بكالوقت

قال:.ماما ماما قلت وش تبي؟

قال وشبلا وجهك يخرع ؟

ليش شعرك صار زي نخلة حوشنا؟

وانا ارعي بالمراي يمار صاج يخرع

وانا اقعد شوينن اضحك :solh:وشوينن ابتسي:cry:

هاللحين عشمانتن انوه يعشينن برا اويجيب لي هدية على الاقل وردة,roooose زهرة rooose2لوهي مقطوعتن من الشارع ميخالف عاد اسموه عبرن

وهو جيدن بلبنوه ذالوه ينتهي

ارى ياحياة الشقا من حياة وش هالليلة عسا ماعادت من ذكرى

هذي كله بتسانن ببتسا.وانا اقوم واغسل وجهي وانا اعين من الله خير وانا اروح يموه ابعطيه الهدية اللي شريته له قلت خلونن اصير احسن منوه وانا اقعد قلت ابوعبد العزيز خذ هالهدية قال وش المناسبة قلت بدون مناسبة كذا ...تذكرتك بالسوق قلت اجيب لك حاجتن زينه

قال الله يعطيك العافية انا كم ام عبد العزيز عندي وهي تنهج صخلتي قصدي عنزي وانا اقعد اتبوسم :315r:

نسيت اللي صار

عاد انا ماتبطي العنز معي

وحنا نقعد نراعي للتلفزيون وانا اتذكر البرنامج اللي شفته اكالعصير اللي يحتسي عن الحياة الزوجية

وانا افطن للموضوع قلت يالله خلونن اذكره بعرسنا تذكريابو عبد العزيز يوم حنا بشهر العسل يوم حنا نروح لابها اكالسنة والطايف شفت البرد :cold:به

انا قلت البرد ويقعد يتبوسم اثريه دخل جو

قال الله يازين ايام اول قلت متى؟

قال اول يوم حنا صغار كنا ننام بجنب امي انا واخوتي وهي تغطينا بالبطانية وليامنوه جاء الصبح تصلح لنا حليب وناكل جمرية.

وهي تاصل معي اقصاه وانا اطمح نوبتن ثانية لغرفة عبد العزيزوانا اقوم ابتسي وابتسي وابتسي يما ورمت خشتي :cry:ا

ثرينن نمت مدريت لروحي يوم راعيت يمار الضحتس والكركرة بالبيت :):d:

وانا انز يمار حس مرتن تضحك وتسرتسر

وانا افتح الباب يمار الحس جاين من غرفتي وانا افتح باب الغرفة يمارالمرة قاعدتن على الكنب وهو بجنبه اعدي لابوعبد العزيزويمد له وردة حمراء roooose

وانا قبلي ركض يمه و تنتيفن بشوشته ومنين يوجعتس وتكفيخ وتشليخ وعض:0085: وكل مايطري على بالكم

وهي تقول لوه تكفى ياقلبي تكفى ياحبيبي فكن من هالمتوحشة وهويجي يبي يدافع عنه

وهويمسكن وهو يعطينن اكالمخمس

وانا التفت لوه بكالنظرة اللي كله حقد

قال وش بلاتس؟:148r:

وش بلاتس:148r: ؟

يصارخ على وش بلاتس :148r:؟

عطاتس الجنون

شوي شوي ذبحتي الوغد

وانا اراعي يمار وليدي شوين والا يفطس اثرينن حالمتن وهالتكفيخ كلوه بالوغد وانا اطير للوليد ابخموه ابعدل الوضع

وهو ينحاش عني يقول ماما وع ماما كبه صح بابا انا ما حبه هالحين انا منا بذكرى العرس

انا بلشانتن بوغدي وشلون اعالج نفسيتوه عسى ماعاده ولا جاده من برنامج توبة مابعدة نوبه.

المتوقد

05-12-2007, 17:58

وليامنوه جاء الصبح تصلح لنا حليب وناكل جمرية.

حسيت أنوووه أنااا

'
'

انتن الله يهديكن من تعرس الوحده تقفي مقفى ضبعه (محشومات،لكن مثل دارج ) واليااا خذتله سنه تذكرت أنوووه فيه (شئ) أسمووه زوج ثمن تبي بليله وحده تجمع كل الرومانسيات اللي موجوده بالدنيا <<< مايحصل هذا الشئ يابنات العرب !!

الرومانسيه ماهي سحابه تمطر

الرومانسيه سلوك وممارسه حياتيه وتحتاج تدريب وبناء نفسي وعاطفي

واستعداد لذلك

حتى تصبح الرومانسيه جزئ من السلوك وجزئ من شخصيتك

اللي سويتيه أنتي أسموووه تمثيل

عطي نفسك وقت وحاولي بعد معايشه حقيقيه

وجربي مره ثانيه

عجايب بنت الشايب

05-12-2007, 18:52

هههههههههههههههههههههههههههههههههههههههه هههه

هههههههههههههههههههههههههههههههههههههههه هههه

الله اكبــــــــــــــــــــــــــــــــــــر

اخت رجال اشهد أنتس اخت رجال

ياحيي أشهد انك جبتي نموذج حي .. لهالزقرت الي ماعندهم احساس أبد

لا وبعد يشرهون علي الحريم .. ليه ما يدلعونهم

انتم اول حسوا مثل البشريه بعدين اشرهوا

اما الطمحه لغرفة وليدتس شيءءء

اثرتس حليله صدق

ماانتي مثلي شغل فضائـــــــــح > :a::a: أهبي

أرحبي تراحيب المطر موضوعك جووونااااااااااااااااااااااااااااان ..

وقلمك نادر ورائع في الوصف

أتعب انا :d: مع هالنوعيه ...

لي عوده .. مع الردود ..

طحياتي .....,,rooose2rooose2rooose2rooose2rooose2 >> كلها لك ..:d:

عيون السروق

05-12-2007, 19:26

ومغمضتن عيوني وانا ابحر يمار هو قدامي وانا انز من الخرعة

هههههههههههههه

هههههههههههههههههههه

هههههههههههههههههههههههههه

هههههههههههههههههههههههههههههههه

ههههههههههههههههههههههههههههههههههههههه

هههههههههههههههههههههههههههههههههههههههه هههههه

هههههههههههههههههههههههههههههههههههههههه هههههههههههههه

هههههههههههههههههههههههههههههههههههههههه ههههههه

هههههههههههههههههههههههههههههههههههههههه

هههههههههههههههههههههههههههههههه

ههههههههههههههههههههههههه

هههههههههههههههههه

ههههههههههه

الله يقطع سوالفتس ويشلع غاربتس على هالسولافه :solh:

من اول ماقريته وانا اضحك وماذبحن الا اللي اقتبستوه فوق يوم تنزّين :)

تسلمين على هالسولافه ولاهنتي roooose

وسلمي لي على ابو عبدالعزيز عز الله مدزدي بتس :3ajeeb:

وبالنسبه لعبدالعزيز اذا انتي اموه مابوه الا العافيه يومين ويطيب :)

منصور الغايب

05-12-2007, 20:01

خخخخخخخخخخخخخخخ

الله يهديك انت وابو عبدالعزيز ...

بصراحة موضوعك :3ajebni:

ريال الفسحه

05-12-2007, 22:22

هههههههههههههههههههههههههههههههههههههههه هههههههههههههههه
هههههههههههههههههههههههههههههه
هههههههههههههههههههههههههههههههههههههههه ههههههههه

كله كوم وطمحتس بغرفة الليد كووم :goooood:

خخخخخخخخخخخخخخخخخخخخخخخخخخخ

ااما فطنت اللبين عليه لاينتهي خخخخخخخخخخخخخخخخخخخخخخخخخخخخخخخخ

مدزدي بتس :)

والله ياتسبدي تشققت من الضحك

مثبت :315r:

ليعلم الكل ان هنا كاتبه جديده
اسمه اخت رجال :mabrook:

لاتبطين بالموضوع الاخر:thumb:

أخت رجال

06-12-2007, 01:43

:7ayyoh:

وليامنوه جاء الصبح تصلح لنا حليب وناكل جمرية.

حسيت أنوووه أناااعزالله ماهمكم الا بطونكم وانتم وغدان وانتم شيبان

أخت رجال

06-12-2007, 01:49

أرحبي تراحيب المطر موضوعك جووونااااااااااااااااااااااااااااان ..

مشكورة اختي كلي بكم اعجاب على الترحيب :7ayyoh:

يـــوسف

06-12-2007, 06:56

أخت رجأل يعطيتس ألف عافيه :)
لاتتابعين هالبرامج هذي تخربكن مابه فايده :)

وانا افطن للموضوع قلت يالله خلونن اذكره بعرسنا تذكريابو عبد العزيز يوم حنا بشهر العسل يوم حنا نروح لابها اكالسنة والطايف شفت البرد به

انا قلت البرد ويقعد يتبوسم اثريه دخل جو

قال الله يازين ايام اول قلت متى؟

قال اول يوم حنا صغار كنا ننام بجنب امي انا واخوتي وهي تغطينا بالبطانية وليامنوه جاء الصبح تصلح لنا حليب وناكل جمرية.
^
^
^
الله يلوم اللي يلومتس يوم تطمحين ههههههههههههههههههههههههههههههههههه

الأصيل

06-12-2007, 11:45

ايا حياة الشقا :puzzled:

ياخاله ،، يقول المثل :

حلاة الثوب رقعتوه منوه وفيه:315r:

اتركي عنتس الرومانسية والفرساسيه:a:

( الرومانسيه : نسبه إلى الروم ، والفرساسيه ،، نسبه للفرس ):thumb:

وانا التفتلوه هلا ياعمري

أرجو حذف العباره ،، وين الرقابه؟؟ عندنا مراهقين:)

لان المرة اللي بالبرنامج تقول لازم تبتسمين لرجلتس وهو جاي من برا وانا مطبقة الخطة نقطة بنقطة ,

أخاف سنونتس صفر ،، هاللي انخرع:mabrook:

وانا استانس وانا اتشقق من الفرحة ياحظي اشوى انوه فطن من نفسوه

يافرحه ماتمتششششش:goooood:

قال شربت اللبن اللي بالثلاجة قبل ينتهي باتسر موعد انتهائوه :)

خخخخخخخخخخخخخخخخخخخخخخخخخخ

هههههههههههههههههههههههههههههههه

رووووووووووووووعه هالفقره:315r:

وهن يجتمعن ثلاثتهن بي وانا اطمح بغرقة عبد العزيزولدي

الله يخلي لتس غرفة عبدالعزيز ،، هاللي تقل مأوى المشردين:d:

انا قلت البرد ويقعد يتبوسم اثريه دخل جو

قال الله يازين ايام اول قلت متى؟

قال اول يوم حنا صغار كنا ننام بجنب امي انا واخوتي وهي تغطينا بالبطانية وليامنوه جاء الصبح تصلح لنا حليب وناكل جمرية.

خخخخخخخخخخخخخخخخخخخخخخخ

هههههههههههههههههههههههههههههه

مش معقووووووووووووووووووووووووووول

وش هالزوج ؟؟؟؟!!!!!!!!!!!!!!!!!!!!:315r::)

وهي تاصل معي اقصاه وانا اطمح نوبتن ثانية لغرفة عبد العزيزوانا اقوم ابتسي وابتسي وابتسي يما ورمت خشتي :cry:ا

ماتنلامين:za3lan:

انا بلشانتن بوغدي وشلون اعالج نفسيتوه عسى ماعاده ولا جاده من برنامج توبة مابعدة نوبه.

ياخاله

حياتس الله معنا في :

الجمعية التأسيسية للمقاريد:thumb::3ajeeb:

موضوع كذا:thumb:

أخت رجال

06-12-2007, 13:01

مدري متى انا رادة الظاهر على عيوني النوم اشوى اني ما قمت اخربط
المتوقد:7ayyoh:و:7ayyoh: مرتن ثانية

انتن الله يهديكن من تعرس الوحده تقفي مقفى ضبعه (محشومات،لكن مثل دارج

بسم الله حتى النملةتقرص محشوم اخوي ,مثل دارج خخخخخخخ

الرومانسيه سلوك وممارسه حياتيه وتحتاج تدريب وبناء نفسي وعاطفي
حشا وين رابحين نبي نسجل بالجيش ههههههههههههه

اللي سويتيه أنتي أسموووه تمثيل

لابله الا فتيت تسبدي ياشين بهلحتسي ,فت الله تسبد العدو

عطي نفسك وقت وحاولي بعد معايشه حقيقيه
ولله مهنا نوبتن الاتوبتن مابعدة نوبه الوغد بغا يفطس وانت تقول جربي

مشكور يامتوقد على هالمرور الغثيث :za3lan:

أخت رجال

06-12-2007, 13:10

اخت رجال اشهد أنتس اخت رجال
تسلمين يابعدي

ياحيي أشهد انك جبتي نموذج حي .. لهالزقرت الي ماعندهم احساس أبد

لا وبعد يشرهون علي الحريم .. ليه ما يدلعونهم

انتم اول حسوا مثل البشريه بعدين اشرهوا
ايولله الواحد ماهمه الا بطنه وش غدانا وش عشانا

اما الطمحه لغرفة وليدتس شيءءء
هالحين سميناه غرفة الطمحات

ماانتي مثلي شغل فضائـــــــــح > أهبي
سم الله على :315r:

اختي عجايب مشكورة على المرور يالغالية:7ayyoh:

حمـود

06-12-2007, 13:19

هههههههههههههه

هههههههههههههههههههه

هههههههههههههههههههههههههه

هههههههههههههههههههههههههههههههه

ههههههههههههههههههههههههههههههههههههههه

هههههههههههههههههههههههههههههههههههههههه هههههه

هههههههههههههههههههههههههههههههههههههههه هههههههههههههه

هههههههههههههههههههههههههههههههههههههههه ههههههه

هههههههههههههههههههههههههههههههههههههههه

هههههههههههههههههههههههههههههههه

ههههههههههههههههههههههههه

هههههههههههههههههه

ههههههههههه

حلوة غير المرة لا تعودينه

أخت رجال

06-12-2007, 13:22

ومغمضتن عيوني وانا ابحر يمار هو قدامي وانا انز من الخرعة
هههههههههههههه
من اول ماقريته وانا اضحك وماذبحن الا اللي اقتبستوه فوق يوم تنزّين اجل وش تقول لو تدري اني نزيت من شفت عيونك ياسرقان

وسلمي لي على ابو عبدالعزيز عز الله مدزدي بتس
وش قصدك وش معنى عناد منا موصلتن هالسلام ايولله حبوه للشماته ولوناسة على حساب خلق الله

وبالنسبه لعبدالعزيز اذا انتي اموه مابوه الا العافيه يومين ويطيب

وشو مابوه الا العافية كل شوين قايمن نص هاليول ذابحتوه الكوابيس
اخوي عيون السروق اشكر مرورك :7ayyoh:

أخت رجال

06-12-2007, 18:14

خخخخخخخخخخخخخخخ

الله يهديك انت وابو عبدالعزيز ...

بصراحة موضوعك :3ajebni:

مشكور يابوغايب على المرور المؤدب :goooood:

أخت رجال

06-12-2007, 18:23

مدزدي بتس
ياويل حالتس ويلاه يااخت رجال هالناس وش بلاهم عليتس

والله ياتسبدي تشققت من الضحك
انتبه بعدين نبلش مانقدر نخيطه لك خخخخخخخخ

مثبت

ياحظيshlwee7

ياحظي shlwee7

ياحظي shlwee7

اااااااااي

صبخت الجدار

ليعلم الكل ان هنا كاتبه جديده
اسمه اخت رجال

مشكور ياريال على المرور والتثبيت وارجوا ان اكون عند حسن الظن. بس لو انا سالمتن من صبخة هالجدار تسا ن بخير :315r::315r:

شامان

06-12-2007, 19:16

سلام

مرحبااا

بما ان ما حولي احد والناس مدري وينهم قلت اتصفح الانترنت واشوف احوال العالم يا مار ولا موقع

فتح معاي ( ولا موقع كويتي ) حكم الكوتته الديره مدري وش اخباره ولا بقاله هنا تبيع جريدة كويتية اخبر بقاله بعيده باقصى الرياض اخاف اروح اجيب جريده منهم ما ارجع والا اضيع ، المهم يوم المواقع عيت تفتح قلت خلني اتصفح سوالف الربع والربعااات واشوف علومهم واخبارهم وش صاير معهم . فريت وقريت لكن موضوعك يا اخت رجال استوقفني ( ركزي على استوقفني ترى مو اي واحد يقولها ) وبما اني ما عرف قص ولزق ( عيون السروق واعدني يعلمني ) صراحه ما عرف الا اقتباس ( على قولة ابو سهتل ) الاكيد قمت وحطيت خط تحت الكلمات الرئيسية ، اللي طبعا ( استوقفتني ) واحتمال تجي بالاختبار ( تأثير الدورة ) ومنها ما يلي :
ذكرى العرس = فتحت التقويم وطلع عندي باقي عليه 8 شهور وحطيت تنبيه .

ام عبدالعزيز = والله ونعم يا ام عزوز بحاول اخلي ولدي (عبودي الشرير) يتعرف على عزوز ويصيرون
اصدقاء (ربع بالكويتي ). صديق بالهندي

خمس تيام = اول ما قريتها احسبها خمس خيااام ، قلت ما شاء الله ما يمدي خيموا الشباب
الظاهر انا بديرة كلها شمس . .. في مشكله بالجمع عندك ( عندج ) بالكويتي
( عندتس ) بالشمري .. المفروض كاتبه يوم ويوم ويوم ويوم ويوم .. اشوا ما
قلتي 45 يوم مشكله معاي .

نقطه بنقطه = هذي اعجبتني الظاهر حقوق الطبع محفوظه عندك

يرومش وانا ارومش = ذكرتيني ( بعيون الميزونه ) حركة الرموش كنت اعلمها بنتي اقولها عيون
المزيونه عيون المزيونه ، هذا يسمونه كلام العيون المفروض تكون هناك في
ترجمه للرموش

ليه ما ذكرتينن = بيني وبين نفسي اقول هذي شلون قدرت تكتبها الظاهر الكلمه هذي بصمتيها
بصم اشوا لو فيه اختبار املاء يمكن اطلع الاخير ( بشهادة عيون السروق )
، على فكره القاها بقواميس اللغه والا لا .

يصخن السياره = عاد هنا ضربتي على الجرح ، اليوم وديت سيارتي للصناعية وما طلعت الا العصر
تنشدن جدتي ( الله يطول بعمرها ويعطيها الصحه والعافية ) وين سيارتك قلت
بالصناعية ، قالت وليه تعبانه مصخنه ، راسه يوجعه شين ما شيات ( خذتن
العبره ) قلت يا جده يمكن المزيونه مصكوكه بعين شايفينها بعرس ترقص
( تفحط بحاره) ( تقحص بساحه ) وصكوها بعين الخطاطيب ( الشريطية ) تقول
ليه ما بته احط عليااا زيت مقري . . هنا عاد بكيت :za3lan:

رومنصيين = الكلمه هذي عاد يوم قريتها قلت اتابع الفلم وش راح يصير اخر شي بالبطله ( حال عدوك ) ،، عقب ما اجتمعن ثلاثتهن .

اجتمعن ثلاثتهن = ودي اعرف ثلاثتهن متى يجتمعن علشان نقدر نتفادا ونفض مثل هذي الاجتماعات الغير مرغوبه . ما حلفتي عليهن يقعدن عاد .

تذكرتك بالسوق = مشكلتنا السوق هذا نقطة الخلاف بيننا وبينكم ، الحين انتي شلون تبين تمشين السالفه على ابو عبدالعزيز ، ليت كل الحريم مثلك لا راحن للسوق يتذكرن رجالهن ، المشكله لا جن للبيت لو هي مريضه ما يخالف تروح السوق يعني تروح . ودك فيه سوق تتصل عليه يوصل الطلب للبيت ( فستان + عباية + احذية + ميك اب + ذهب + فروه + قدور + خضره + هيئة + شرطه ............. الخ ) والله خوش فكره سوق توصيل للمنازل .
كل اللي كتبته بصوووووب ========> ( مـــامــــا كبـــــــه ) بصووووووب
ليه يومنك على عبدالعزيز تضربينه يا شريره ( اخت رجال ) طلعتي شريره صج ( صدز= صدق ) هههههههههههههههههههههههههههههههههههههههه ههههههههههههههههههههههههههه
هههههههههههههههههههههههههههههههههههههههه ههههههههههههههههههههههه

شكلها طلعت من قلب عزوز ماما كبه

بالختام : الله يخليلك ابو عبدالعزيز وعبدالعزيز ولا يفرقكم يارب .
شكرا على التذكير بمناسبة ذكرى الزواج .
والسموحه على الإطاله وشكرا

ابو عارف

06-12-2007, 19:22

هذولا هم الشباب الله يصلحهم مايدلعون زوجاتهم بل بالعكس يتدلعون عليهن ، عليكن بالشيبان.

قصه ولا أروع.

شكراً اخت رجال

عيون السروق

06-12-2007, 19:32

كنت حاط سهم يأشر فوق على شاماان وطلع لي ابو عارف خرب علي :315r:

ارجع اعيد الضحكه :)

هههههههههههههههههههههههههههه

ههههههههههههههههههههههههههههههههه

شاماان انت وش تخربط :puzzled:

ما اعرفك ولا تعرفن ولاني معلمك ولا تعلمن :)

========================

اخت رجال اجل تقولين نزّيتي يوم شفتي عيوني shlwee7

شلون لو تشوفيني زولي وانا مقفي :3ajeeb:

يابعض العرب انهم يبتسون من الخرعه اليا منهم شافوا زولي مقفي وشلون لو انا مدزبل عليهم :solh:

انتبهي من شاماان تريه ياكثر مايشحذ ( يتعطّى) يموت بالقريشات :)

شامان

06-12-2007, 23:44

عيووووووون السروق يا السرووووق

اويحي ( على قولة ابو سهتل ) ، عيون السروق ترى اخلي ( عبودي الشرير ) يترفس بحوض بطنك لا تجحدني قدام الربع والربعات اوحي قعدتبه (وعلى قولة ابو سهتل )

الا اعرفك شلون تقول ما تعرفن :goooood:

مهو انت صاحب قصيدة الذيب اللي يفتر عند الخيمه :goooood:

المهم تعلمني القص واللزق غصبن عليك والا ابلغ الشرطه

اخت رجال : ما عليك منه ( بالله في احد ما يحب القريشاااات ) النقود بالعربي

أخت رجال

07-12-2007, 01:26

:7ayyoh:و:7ayyoh:مرتن ثانية

أخت رجأل يعطيتس ألف عافيه
لله يعافيك
ا

لاتتابعين هالبرامج هذي تخربكن مابه فايده
البلا مهو بالبرامج البلا بهالرجال اللي تقل تنك مايحسون

^
الله يلوم اللي يلومتس يوم تطمحين ههههههههههههههههههههههههههههههههههه
تقولوه صادز الله يجبر خاطرك على هالمرور يااخ يوسف

أخت رجال

07-12-2007, 01:35

ياخاله ،،
والله مادري من فينا خال الثاني تخلخلت عظام العدو

وانا التفتلوه هلا ياعمري

أرجو حذف العباره ،، وين الرقابه؟؟ عندنا مراهقين
هههههههههههههههههههههههههههههههههههههههه هههههههههههههههههه
:242r::242r::242r::242r:

أخاف سنونتس صفر ،، هاللي انخرع
هههههههههههههههههههههه صدق المثل المصري اللي يقول اسأل مجرب ولا تسألش طبيب هو انت منخرعن منلك احدن سنونه صفر هاليودعك تحتسب كل خرعتن خرعة سنونن صفر زومت تسبدي زامت تسبد العدو

ياخاله حياتس الله معنا في :الجمعية ا لتأسيسية للمقاريد

اهه رجع قال خالة يعني مالقيب كلمة غيره والله انك مانت بعيدن عن راعي اللبن والجمرية

موضوع كذا :thumb:

ومرورك كذا يالاصيل:thumb:

أخت رجال

07-12-2007, 01:44

أبوطروق

07-12-2007, 04:10

ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه

تقطعت جنوبي ههههههههههههههههههههههههههههههههههه
ههههههههههههههههههههههههههههههههههه

بالله عيدي السالفة مرة ثانية ههههههههههههههههههههههههههههههههههه

بس أحسن شي انه شرب اللبن قبل ينتهي->> إقتصادي أبوعزوز

أخت رجال (الله يخلي لتس عبدالعزيز وأبوه)

ثانكس

:

أجا

07-12-2007, 05:48

هههههههههههههههههههههههههههههههههه

ههههههههههههههههههههههه

غيري زوجك <<< لاتصدقين

هههههههههههههههههههههه

أخت رجال

اضحك سنك ..

أخت رجال

07-12-2007, 20:27

سلام
وعليكم السلام

مرحبااا
مرحبتين

لكن موضوعك يا اخت رجال استوقفني ( ركزي على استوقفني ترى مو اي واحد يقولها ) وبما اني ما عرف قص ولزق ( عيون السروق واعدني يعلمني ) صراحه ما عرف الا اقتباس ( على قولة ابو سهتل ) الاكيد قمت وحطيت خط تحت الكلمات الرئيسية ، اللي طبعا ( استوقفتني ) واحتمال تجي بالاختبار ( تأثير الدورة ) ومنها ما يلي :
ذكرى العرس = فتحت التقويم وطلع عندي باقي عليه 8 شهور وحطيت تنبيه .
زين والله كسبنا اجر بام عبود اجل ذكرناك هه

ام عبدالعزيز = والله ونعم يا ام عزوز
ماعليك زود

خمس تيام = اول ما قريتها احسبها خمس خيااام ، قلت ما شاء الله ما يمدي خيموا الشباب
الظاهر انا بديرة كلها شمس . .. في مشكله بالجمع عندك ( عندج ) بالكويتي
( عندتس ) بالشمري .. المفروض كاتبه يوم ويوم ويوم ويوم ويوم .. اشوا ما
قلتي 45 يوم مشكله معاي .

هههههههههههههههههههههههههههههههه
ههههههههههههههههههههه
احد تساذبن عليك وقايلنلك ترنا حاطينك
معقب لغوي وبعدين
وشو يوم لوانت قايلن ايام اشوا لك حلوتن هذي تبينا نقول خمس يوم اوخمسة يوم حشا صرنا هنود وبعدين هذي ماهي خطا هذي لهجة محلية شمرية

نقطه بنقطه = هذي اعجبتني الظاهر حقوق الطبع محفوظه عندك
لابله مصدقن السالفة الخو لياهالحين هههههههههههههههههه

يرومش وانا ارومش = ذكرتيني ( بعيون الميزونه ) حركة الرموش كنت اعلمها بنتي اقولها عيون
المزيونه عيون المزيونه ، هذا يسمونه كلام العيون المفروض تكون هناك في
ترجمه للرموش
خلاص هذي ترجمته n)
ليه ما ذكرتينن = بيني وبين نفسي اقول هذي شلون قدرت تكتبها الظاهر الكلمه هذي بصمتيها
بصم اشوا لو فيه اختبار املاء يمكن اطلع الاخير ( بشهادة عيون السروق )
، على فكره القاها بقواميس اللغه والا لا .

وانت لياهلحين وانت مصدقن(سالفة المعقب اللغوي) لابعد مانت بحول نفسك تبي تبحث بعد بالقواميس امحق معقب خخخخخخخخخخخخخخ

يصخن السياره = عاد هنا ضربتي على الجرح
هههههههههههههههههههههه ليه ماقلت الوتر الحساس لغويا وبلاغيا افضل

كل اللي كتبته بصوووووب ========> ( مـــامــــا كبـــــــه ) بصووووووب
ليه يومنك على عبدالعزيز تضربينه يا شريره ( اخت رجال ) طلعتي شريره صج ( صدز= صدق ) هههههههههههههههههههههههههههههههههههههههه ههههههههههههههههههههههههههه
هههههههههههههههههههههههههههههههههههههههه ههههههههههههههههههههههه

شكلها طلعت من قلب عزوز ماما كبه

لا وانت الصادز من نن نن نن نن وسط وسط وسط وسط جوف جوف قلبوه

بالختام : الله يخليلك ابو عبدالعزيز وعبدالعزيز ولا يفرقكم يارب

امين ياربي بس لو انت مكملن هالدعوة وقايلن عساوه مايعرس عليتس.

شكرا على التذكير بمناسبة ذكرى الزواج .
عفوا

والسموحه على الإطاله وشكرا
مشكورن على التيييه يااخ شام +شام ثانية = شامااااان اثنان هههههههههههههه

بالمختصر..

08-12-2007, 01:56

:7ayyoh:

وانتي ياملا العافيه يومنوه شرب اللبن و خلص

تسان قايله يـووه غلطت بالتاريخ و مزودتن يوم عشان يطلع تسنوه منتهي :goooood:

خليه تمغصوه بطنوه شوين ..

غميضة دميعاتس :za3lan:

.
.

ريتاج

08-12-2007, 05:09

هههههههههههههههههههههههههههههههههههههههه ههههههههههههههههههههههههههههههههه

الله ياخذ ابليسك........ :solh::solh:
.....................لا نصيحه رجلك هذا ما ينفع مع هالحركات طبعه طبع شايب

الله يعين قلبك على هالبارد للي عندك.........

والله يصلح ولدك..............

مشكوووووره على الموضووووع المميز
..............بــــــــــــــاااااااااااايـــــ ـــــــــــــــااااات................

أخت رجال

08-12-2007, 16:58

هذولا هم الشباب الله يصلحهم مايدلعون زوجاتهم بل بالعكس يتدلعون عليهن ، عليكن بالشيبان.

قصه ولا أروع.

شكراً اخت رجال

إيًه خوش نصيحة وبعدين تعالي فلينن وتعالي همزينن وتعالي توطي رجليي ونص الليول مشتهي من يدينك مرقوق
مشكور يابوعارف ولاهنت

ابو عارف

08-12-2007, 21:48

أوخذ ياهالشايب المقرود وين ماراح يمار طايح سوقه:3ajeeb: shlwee7shlwee7، لكن كلامك واقعي ولافيك حيله وأنتي خير من تمثلهن وتستأهلين المليون.:3ajebni::3ajebni:

أخت رجال

09-12-2007, 15:13

المشاركة بواسطة عيون السروق:
شاماان انت وش تخربط
ما اعرفك ولا تعرفن ولاني معلمك ولا تعلمن

الله ياكبره عند الله وخلقة عز الله ضربه في الصميم

المشاركة بواسطة شامان:
عيووووووون السروق يا السرووووق
بدينا بالمعايير ريلاكس ريلاكس ياشامان

اويحي ( على قولة ابو سهتل ) ، عيون السروق ترى اخلي ( عبودي الشرير ) يترفس بحوض بطنك لا تجحدني قدام الربع والربعات اوحي قعدتبه
الا اعرفك شلون تقول ما تعرفن
ندري ندري بس لا تذبح عمرك قال ماشفناهم وهم يسرقون قال شفناهم وهم يتحاسبون

المشاركة بواسطة عيون السروق:
انتبهي من شاماان تريه ياكثر مايشحذ ( يتعطّى) يموت بالقريشات

المشاركة بواسطة شامان:
اخت رجال : ما عليك منه ( بالله في احد ما يحب القريشاااات ) النقود بالعربي

احد قايلن لكم عندي بنك بروحي ذابحتن الديون ماعندي الا جبل عمر واببعهن واحج بهن

يالله مشكورين على التواجد للمرة الثانية

أخت رجال

09-12-2007, 15:16

ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه
ههههههههههههههههههههههههههههههههههه

تقطعت جنوبي ههههههههههههههههههههههههههههههههههه
ههههههههههههههههههههههههههههههههههه

بالله عيدي السالفة مرة ثانية ههههههههههههههههههههههههههههههههههه

بس أحسن شي انه شرب اللبن قبل ينتهي->> إقتصادي أبوعزوز
مشكور يابوطروق على المرور

أخت رجال

09-12-2007, 15:28

المشاركة الاصلية بواسطة :اجا
ههههههههههههههههههههههه

غيري زوجك <<< لاتصدقين
فال الله ولا فالك
هههههههههههههههههههههه
أخت رجال

اضحك سنك ..
نفسي اعرف وش معني هالجملة

أخت رجال (الله يخلي لتس عبدالعزيز وأبوه)
امين يارب العالمين

ثانكس
يو ار ولكم

أخت رجال

09-12-2007, 15:30

:
المشاركة بواسطة بالمختصر:
وانتي ياملا العافيه يومنوه شرب اللبن و خلص تسان قايله يـووه غلطت بالتاريخ ومزودتن يوم عشان يطلع تسنوه منتهي

خليه تمغصوه بطنوه شوين ..

والله فاتتن انااشهد انتس وليدتن بنت وليده بس ياخيتي اكالحزة ابتنيذل عجزت و الارض زودن على هذا قامت تمرح بي يمين شمال, شمال يمين.و الله يماتزبنت دار الليد والاتسان صايرن شينن اكود من هذا

غميضة دميعاتس
مشكورتن يالمختصر على هالشعور النبيل

أخت رجال

09-12-2007, 15:34

الله ياخذ ابليسك........
.....................لا نصيحه رجلك هذا ما ينفع مع هالحركات طبعه طبع شايب

الله يعين قلبك على هالبارد للي عندك.........
توتس وغدتن على هالسوالف ياربي وش معرفتس لهن والا هالجيل ماهنا وغدان حنا يلعبون بنا هالوغدان

والله يصلح ولدك..............
امين ياربي

مشكوووووره على الموضووووع المميز
..............بــــــــــــــاااااااااااايـــــ ـــــــــــــــااااات............ ....

وانتي بعد مشكووووووووووووة على المرور وتسلمين ياجنينتي

أخت رجال

09-12-2007, 15:36

المشاركة بواسطة ابو عارف
أوخذ ياهالشايب المقرود وين ماراح يمار طايح سوقه ، لكن كلامك واقعي ولافيك حيله وأنتي خير من تمثلهن وتستأهلين المليون

قايلتن لك من الاول تذكرن باسرع رجل في العالم يمال الصلاح اللي يصلحك مارمايمدي الواحد يبي يحتسي الا انت لوه الظاهر انك لاصقن على هالكمبيوتر ليل نهارو نهار ليل وكل مشاركتن الا ناطن به بسم الله الرحمن الرحيم اقر اقر على روحك ليصكونك عين
ورغم ذلك فان مشاركاتك تبقى ذات نكهة خاصة