ميدان مسابقة شاعر المضائف ..

[أم نــــــــــواف]

بسم الله الرحمن الرحيم

" ميدان خاص بالمتسابقين "

(ريال الفسحة)(شامان)(مستر كشخة)(صدى الشمال)(هواوي نجد)(الإسم المستعار)(غربة)
(كحيل العين)(الوهم)(قلم شمر)(النجلا)(اخيذة ضحى)(أعماق الشمري)(أياد السخني)(صلفيق ابو قناة)


مسابقة شاعر المضائف تهدف إلى أمور جمّه

أهمّها الإخاء

ومن ثمّ كشف اللثام عن مواهب شعرية دفينه

ومثابرة وجد الشعراء بالقراءة والإطلاع والتدقيق بحثا عن التميّز وإثبات الذات الشعرية

ويأتي بعد ذلك روح التنافس الشريف والتي لها دور كبير في الإرتقاء سويّاً .. فإلى الأمام بإذن الله


البيت المشدّ للمتسابقين والذي سيبنون قصائدهم عليه جاء على البحر البسيط وهو التالي :


الليل تــوّه ونظم الشعر بي تــوّه = وحبال الأفكار ماترحم ولا تاوي


الشروط التنظيمية للمتسابقين :

1- كل متسابق من متسابقينا سيقوم بإدراج قصيدته التي سيشارك بها في هذا الميدان كتعقيب هنا في هذه المشاركه .

2- يبدأ المتسابق قصيدته بالبيت المشد ثم يكملها بأبيات بشرط ضروري وهو أن لاتقل عن سبع أبيات ويُفضّل أن لاتزيد عن عشرة .

3- المدة التي ستُمنح للمتسابقين كي ينظموا قصائدهم هي إسبوع كامل بدأً من اليوم الأحد ففي يوم الأحد القادم 14/2/1428هـ سيتم غلق هذه المشاركة بما فيها من قصائد ..

4- الإلتزام ببحر البيت المشد وهو البسيط .

5- تصويت المشرفين وبعض شعراء المضائف البارزين سيكون بعد إنتهاء المهلة المحدده للمشاركين .




إلماحات للمتسابق الراغب بالتميّز :

1- لاحظ أن الشطر الأول ينتهي بواو مشدّده فهــاء ( وَّه ) ... والشطر الثاني بــ بحرف ممدود بالألف فواو وياء ( ـــاوي ) .

2- لاحظ أننا منحناك بيتاً مفتوحا كمشد كي لانقيّدك بفكرة معينّه ولنا هدفين من ذلك فالأول هو التسهيل عليك وعدم تقييدك والآخر هو ترك المجال لك لتبدع بالفكرة .

3- لاتنسى بأن فكرة القصيدة هي قلبها النابض فأبدع في فكرة قصيدتك .

4- حاول أن تغنّي البيت المشد بلحن متّزن وموسيقى إنسيابيه بعدها أكمل بقيّة الأبيات على نفس اللحن والموسيقى وهذا هو البحر الذي ستعوم فيه ..





لكم منّي أطيب الأمنيات ، :thumb:

[ابن جشعم]

الله يوفّق الجميع

وإن شاء الله يسطرون لنا أجزل الابيات في هذا المحفل.


تحياتي للجميع ونحنُ من المتابعين.

[عجايب بنت الشايب]

http://maayaare.jeeran.com/منتدى/طراطيع%20احلى.gif

بالتــــــــــوفيق للجميـــــــع

http://maayaare.jeeran.com/منتدى/طراطيع%20احلى.gif



متابعيــــــن لكم بقلوبنا قبل عيونا :)


http://maayaare.jeeran.com/منتدى/طراطيع%20احلى.gif


أم نواف عســـــاك على القوه والله يعطيك العافيه الدافيه ..,,ياقلبي ..

http://maayaare.jeeran.com/منتدى/طراطيع%20احلى.gif

[ابو فارس]

تسلمين يا اخت ام نواف
والله يوفقكم جميعا
وأن شاء الله يمتعونا بما يكتبون

وفالهم النجاح والتوفيق

دمت بخير

[نافع بن طواله]

أووووووووووووووووووووليه أوووووووووووووووووووووليه



يالله ياشباب الجمهور متحمس شدوا الحيل

[ريال الفسحه]

مايصلح اهون:)
ههههههههههههههههه

ان شاء الله اسدح لكم بهذا معلقه:)

عجايب ابن جشعم <<ويلكم لو تشجعون غيري:)


لاهنتي ام نواف والله ييسر لنا اكماله ....


شاكر ومقدر

[صدى الشمال]

بعد قلبي ريال



ترى منافسيك جهابذه





فاحذر تسلم








الله يوفقك ويوفقنا
لك تحيتي

[صدى الشمال]

وزن البيت المشد


دام إتجاهك شمال مودعك حاجه
...............سلّم على حايل وسلّم على شمر





إن شاء الله هذا يساعدكم أكثر




تحية لمنافسيني


دمتم بخير.

[سلطان الشمري]

.
.

بالتوفيق للجميع .. وثقوا اننا معكم جميعاً .. حباً و إخاءاً ..


.
.

[مستر كشخه]

بسم الله وعلى بركته وهداه

اولا اشكر كل "الزقرت" اللي يشجعون ولايهونون البنوتات

وقول لاتغركم هيلمة ريال فسحه (حبيب البي) خلوكم معي
والله الله بالتصويت

وواجه رساله للشعراء المشاركين واقولهم اتركو عنكم الهياط ومدح القبايل حنا جيين نقدم شعر<<<وشعنده السكيبي ههههه

اقول لاخواني المشاركين عساكم على القوه وشدوا حيلكم



واشكر اختنا الكبيره ام نواف على جهدها

بس ياام نواف انتي اجبرتينا نستعجل بالقصايد !!!!!
بتقولين ليش؟
انا اقولك

لانك اوجبتي ان تكون القصائد ردود لهذا الموضوع
يعني لازم الواحد يستعجل بقصيدته عشان محد يسبقه بالفكره وايضا محد يسبقه بالقافيه
ولو اخفيتو القصايد الى نهاية المسابقه وبعدين اعلنتوها سوى كان افضل <<<مجرد راي <<<ياحبك للاعتراضات

الوكاد ان القصيده حضرت
وعساه تجملنا عندكم
وبعدين لاتكثرون نقد <<<اخوانكم مبتدئين وتوهم يتعلمون القصيد ههههههه

مو كنك كثرت السوالف

يقول مستر انا


الليل توه ونظم الشعر بي توه = وحبال الافكار ماترحم ولاتاوي
غيمٍ يمر الخيال وينهمل نوه = يعشوشب الفكر منه ويزهر الذاوي
شاعر مشاعر..وشاطح فكر..ومفوه= ولاكل عذرا تشوق العاشق الغاوي
بنت الفكر ظبي ريمٍ تسرح بجوه = ياصحصح البيد..ذيب عقولنا عاوي
ذيباان يوم الحصيني عاف مرجوه = "قص الرقيب" بشطيره واخرس الواوي
ياذيب شف كيف "ضادك"صار متشوه = كثير ماضيك ياذيبان متشاوي
حمامة السلم..قصت ريشه البوه="مليار ريشه"وجسم الطير متهاوي
ياطير قدامك المشراف والهوه = تكفى تفل الجناح..وتدحر الناوي
اقول قاوي..واشوف الحال..واتأوه =واقول يارب محدٍ غيرك القاوي
ياطول صبرك على ضيمك وياقوه = ياطير لاي الدروب المهلكه داوي
نجرع ضمانا كدر..من كف سعلوه=وتغص زفراتنا..بخشيت ..والهاوي

وسلامتكم جميييييييييييييييييييييييييع

طبعا هذي عشر ابيات لي زائد بيت للجنه

واي توضيح للالفاظ انا حاضر

[ريال الفسحه]

صح لسانك يابو كشخه:)


بس بالله اصبر اجيب قاموس ابوصعفق اترجم بوه:)


لاهنت وصح لسانك مليون والبارح راحت نومه :puzzled:

الله يستر بس...


تشاو

[هواوي نجد]

صح لسانك يا مستر كشخه

الى الامام دائماً

الاخت أم نواف

أضم صوتي لصوت أخوي مستر كشخه بخصوص موضوع النشر وكان ودي ان المشاركات تقدم قبل الموعد المحدد بيوم لان نشر القصايد يشوش على الشعراء المتبقين وانا عن نفسي لو اني ما كتبت القصيدة كان صعبت علي بعد قصيدة اخونا الكشخه وبما انا عرب وفينا هالطبع الاقشر ما نقدم الا اخر يوم فسوف اقدم مشاركتي يوم السبت القادم (( إن كنا من الحيين ))

والله يوفق الجميع

[تواق]

صح لسانك يابو كشخه:)


بس بالله اصبر اجيب قاموس ابوصعفق اترجم بوه:)


لاهنت وصح لسانك مليون والبارح راحت نومه :puzzled:

الله يستر بس...


تشاو





ريال فسحه





اترك عنك التنكيت الناس باختبار:thumb:



شد حيلك وجب لنا الكاس


ان ماجبته لاعاد تدخل المضايف



صاجنا ابشارك ابشارك:148r:



الميدان قدامك \ ياحميدان



ورنا شطارتك



ريال بشجعك :luvlove:



حتى لو مافزت



الله يوفقك




تواق

[عساف التومي]

الله يوفقكم ياشباب

وماشاء الله
اول شاعر مستواه اكثر من رائع ورد سريع

مستر كشخه

تدري انك تصلح بشاعر المليون من جد
خيالاتك جميله والفاظك اجمل
اما موضوع القصيده فهو الابداع بعينه
وعلى فكره انت جيد بالدفن لي دفنك مفضوح

عندي سؤال وحيد
وش معنى (وينمل) ؟؟


عموما جميل يامستر واذا كان البقيه بروعت قصيدنك اعتقد اننا بنغطي على المليون

بس انا اقول ان ريال فسحه يبي يجيب له سيلٍ عرمرم
وانا من مشجعي ريال افندي
لاتفشلنا ريالوه

[عجايب بنت الشايب]

http://maayaare.jeeran.com/منتدى/طراطيع%20احلى.gif

مستـــــر كشخه وبدايه ناريه

الله ينصرك الى الأمام


وننتظر البقيه الباقيه


الله أكبـــر


...................صوت الجمهور / ( عجايب .com )

[أم نــــــــــواف]

أهلا بكل الموجودين

من مشارك أو مشجّع أو شاكر

دعواتكم للمتسابقين مهمه وتشجيعكم لهم محفّز

فالله الله بالروح الأخوية الراقيه والمدعمّه بالتشجيع



بالنسبة للنشر فلم نقيّدكم بديناميكية معيّنه ، تركناها لكم كل وما يراه مناسبا له

فلتبكّر أو لتؤجل نشرك هذا عائد لك .. معك إلى صباح الأحد القادم بإذن الله ..


المهم أن تراجع قصيدتك مرارا وتكرارا قبل أن تنشرها


بالتوفيق للجميع ،

[المطنوخ]

مستر كشخه

وقصيده كشخه

بالتوفيق يابعدي


//


ريال فسحه

get lost loser

واسمح لي المبلغ اللي عرضته علي علشان اكتب عنك القصيده ماهو مغري

فلتسقط في وحل الفشل:)


ياحبي انت اذا كسروا مجاديفك الشعار
تعرف مأواك* وين تلقانن هناك اعمر لي بربوره:)




*=فلة الحجاج:)

[هايس الشمري]

كل الشكر ام نواف




















مستر كشخه..



مليوووون صح لساااانك..


راااائعه جدا..



ابدعت والله






انى اتجهت الى الاسلام في بلدٍ *** تجده كالطير مقصوصا جناحاه..

[فيصل اللويش]

متابع

[مستر كشخه]

ريال
هواوي
عساف
عجايب
مطنوخ
هايس "جميل ان تكتب وتجد من يقرأك كما تريد"

كل الشكر لكم

وبالنسبه لاستفسار اخوي عساف

عندي سؤال وحيد
وش معنى (وينمل) ؟؟
بالله ماتعرف معنى ينمل
ههههههههههههههههه

هذي ياطويل "ينهمل" بس للاسف حرف الهاء سقط سهوا
اتمنى من مشرفتنا ام نواف تعدله

م

[ريــــ تــــاج]

أنقى الأماني لكل المشاركين


متابعه وبشوق


تحية شكر لأم نوافroooose

[بتول آل علي]

بالله ماتعرف معنى ينمل
ههههههههههههههههه

هذي ياطويل "ينهمل" بس للاسف حرف الهاء سقط سهوا
اتمنى من مشرفتنا ام نواف تعدله

م


يعني ما يصير احنا نعدله ؟ :)

يعطيك العافية يا مستر كشخة

:thumb:

،


و بانتظار بقية المشاركات و المشاركين

roooose

[المهرة]

الغالية /

ام نواف


لكِ من الشُكر اجزله




ومن الورد أجمله




ومتابعة

[قلم شمر]

بسم الله الرحمن الرحيم

اولا ارحب بالشيخه ام نواف واعضاء التصويت والجمهور بالمضايف وعبر الشاشات

مدخل

ياما هجدني هزيع الليل وهدوه **** انا والأفكار مثل الذيب والشاوي
معهن اجالد وناري شاعمٍ ضوه**** حتى غدا الفجر مثل الخيط متساوي
وطلبت منهن اريد القرب والخوه**** رفيق درب لهن مطواع ومخاوي
وتلافتن لي وضاقت بيننا الهوه****وقالن نبي ننصحك لله ياقناوي
وبعد النصيحه بيني وبين الافكار والتي رفضن ااني افصح عن هذه النصيحه رديت على الافكار بهذا البيت
قلت العفو نجعل التفكير تلهوه**** ونقول له الهوجسه تعبير بداوي

ونظرا لعدم تواجدي بالمضايف خلال اليومين القادمه سأضع مشاركتي الان رغم اني تمنيت المراجعه اكثر لكي تكون بالمستوى الذي اتطلع اليه ... ولكن العفو
ولكن هذا ماجادت به نفسي واتمنى ان تنال استحسان الجميع والاهم هو المشاركه واليكم هي

المشاركه

الليل توه ونظم الشعر بي توه
.......................................وحبال الافكار ماترحم ولا تاوي
يمي تداعن حبال الفكر في قوه
...................................و بفضل ربي على تصريفهن قاوي
وبقن معي لين بان الصبح ضوه
..................................والفجر بان وتلاشى ليلي الداوي
وتركت باب الشعر مفتوح ومفوه
................................بيت معه خارج وبيت معه ضاوي
والحمدلله مزاجي صافي جوه
................................اخذ من الجزل واترك كل هزلاوي
واسجل اللي بهن نوماس ومروه
..............................واعلم اخوي عن اللي كنت له هاوي
واقول تر وقتنا مشبوه ومشوه
.............................واقدر اقول ان بعضه صار ماساوي
كثر به الكذب والتزوير والسوه
..............................وبيت الثقه والامانه يشبه الخاوي
ومحافظ الوقت بالنكسات مملوه
..............................ولايامن الوقت غير الغافل الغاوي
ووصيك ياخوي أعز النفس بعلوه
.............................أبيك دايم مع الممتاز متساوي

وسلامتكم

[اياد السخني]

تحية وبعد :

اولا احب ان اشكر الاخت ام نواف على الفكرة الرائعة

واشكر كل من ساهم وسيساهم بهذه الفكرة

وهذه هي مشاركتي وهي محاولة بسيطة وارجو ان تنال اعجابكم


الليل توه ونظم الشعر بي توه = وحبال الافكار ما ترحم ولا تاوي
هذا انا مثل صقر اليا طار بجوه = مع اني في نظم الشعر لازلت هاوي
خيالي يسبح بالافكار وعساه عالقوة = وشوقي لمحبوبتي وصفه بالشعر ناوي
يا شعر يخجل منها ياذيك اللبوة = وصار اسمي لاجلها العاشق الغاوي
بعدي عنها يألمني وقلبي يتأوه = وآهات قلبي مثل ذيب عاوي
اول مرة احس الشعر من غير جدوى= وما يقدر امامها لاشواقي يداوي
كيف ابصبر والألم كله من جوا = والله يعين كل قلبن للحب حاوي
ابنهي ابياتي بتحقيق الغاية المرجوة = واترك كل المجال للآراء والهقاوي

ودمتم بخير

[الشمـــ نور ــــري]

صح لسانك مستر كشخه
صح لسانك قلم شمر
صح لسانك اياد السخني
قصائد رائعه جدا
وابنتظار البقيه:thumb:

[الــوهــم]

صح لسانك مستر كشخه.......
بدايه قويه

[الــوهــم]

ريالنا
كشفني عبدالله الشيخ مزور ورقه
بس معليك زبنت بعمري وقطعته وجحدتهم

[الــوهــم]

الوهم يحاول يستفيد من اخطاء الغير
وان شاءالله مافي اخطاء
وصحت ألسنكم...........

[أم نــــــــــواف]

أهلا بكل من مرّ

سواء علّق أو شكر

دعائي بالتوفيق لكل من بالمشاركة قد فكّر

أو بالنشر قد بكّر


" الأحد آخر فرصه فلا تنسوا بارك الله فيكم "

roooose -

[صدى الشمال]

تحية مني لكل الإخوه المشاركين













الليل توه ونظم الشعر بي توه
......................وحبال الأفكار ماترحم ولا تاوي
ذكرٍ سلبني وأخذني ودخّلن جوّه
.....................ذكرٍ يزيح الهموم وللحزن طاوي
البال به يعتلي ولايوصف علوّه
....................يعتلي باللي بوقت الشده مخاوي
الصاحب اللي يعزك راعي الخوه
....................لا نحيسٍ حقود ولاهو سواوي
الصاحب اللي لاشافك طايح بهوّه
.....................يشيل همك ولجرحك يصبح مداوي
ياقف معك بوقتٍ عنك الردي موّه
...................والدنـــيا دوّاره وكـلـه بلاوي
زمان به الردي زمانٍ مشوّه
....................يالله عسانا نشوفه بحال مأساوي
ياقاري(ن)شعري لابد إنك تـنَوّه
....................ترى الردي ماله بهالدنيا مخاوي
ياللي لك جل التقدير لازم الخوّه
....................لا تامن الدنيا وهي أم البلاوي
رفيقك اللي بوقت الظلمة لك ضوه
..................فرقاه كايد وفرقا الأحباب كاوي

[صدى الشمال]

ملاحظة أرجو أنها تؤخذ في مسابقة مقبله




#أرجو أن تكون المشاركة عباره عن رساله خاصة
من كل المشاركين إلى المشرف المنظّم
وفي آخر يوم تنزّل في الموضوع جميعها في وقت واحد من قبل المشرف المنظّم

[ريوف الشمري]

بالتوفيق للجميع

[سيف الدولة]

أم نواف

بالتوفيق إنشاء الله

أنا متابع ومشجع للفكرة

بس ودي أسأل

هل القصائد على قافية واحدة أم لا

وإن كان هذا أضن أنّه يضعف قوّة القصيدة وشكرا

[ريال الفسحه]

ريالنا
كشفني عبدالله الشيخ مزور ورقه
بس معليك زبنت بعمري وقطعته وجحدتهم


زين اللي الله فكك من ياسين:) والا ابو منذر( ابو لسان):)




ام نواف اعذرينن على التاخير وتوي جاي من سفر:)
وان شاء الله قريبا تنزل....


//


الف صح لسانك ياصدى وكل من نزل قصيده

[عجايب بنت الشايب]

قلم شمر

http://maayaare.jeeran.com/منتدى/طراطيع%20احلى.gif


رووووووح وفالك التوفيق



صدى الشمال .. ليتك راجعت شوي بس حلوووه



وللبقيـــــه موفقين ان شاء الله ... دوم مو يوم ..



طحياتي ....,,

( عجايب . com ) صوت الجمهور ..

[عساف التومي]

ام نواف


كل الشكر لكي

بصراحه اكتشفنا مواهب جديده وشعراء لايشق لهم غبار


صح لسانهم جميييع

ومتابعين حتى النهايه

[هايس الشمري]

قلم شمر..



اياد السخني..






صدى الشمال..





صحة السنتكم..




و لا هنتوا...





أخوووكم

[أم نــــــــــواف]

هلا بالجميع

وشكرا لمن شارك ومن مرّ ومن عقّب



برايفت للبعض :

1- أخي صدى الشمال .. بعض المشاركين لايملك إستخدام خاصية الرسائل الخاصة وهذا مامنعنا ..

ولكن لديك خيار وهو الإحتفاظ بقصيدتك إلى يوم السبت .. شكرا لك


2- أخي سيف الدولة .. نعم

ولكن يبقى على المشاركين مايلي :

- الإبداع بالفكرة .
- الإبداع بالتصوير .
- حسن إختيار الكلمات والقفلات .
- تدرّج مستوى القصيدة من تمهيد ثم القمّة أو العقدة وهي تحوي فكرة القصيدة وموضوعها ثم بعد ذلك ينزل إلى ختم القصيدة .. كالإبتهال أو الحمد أو ماشابه .
- الحفاظ على وزن وموسيقى القصيدة على طوووول الأبيات .

وشكرا لك ..


3- أخي عساف .. ماذكرته هو أحد أهداف هذه المسابقة ..

شكرا لك

والفال الطيّب للمشاركين ..


-

[عيد العنزي]

اخت ام نواف عندي طلب ممكن ؟

بخاطري اشارك كان به مجال ادري اني تأخرت بس والله توني جاي من البر

(( انا ابشارك اما تحسبوني مع المشاركين او تردوني خايب ))


اخوك / عيد العنزي

[مستر كشخه]

قلم شمر

صدى الشمال

راااااااااااااااااااااااائعين بكل ماتعنيه الكلمه

وقصايدكم جميله وجزله<<<< وين مدفنين هالمواهب من زمان

لا ويقولون مبتدئين
الا شكلي توهقت مع فطاحل شعر

الله يوفقكم

عيد العنزي
ياشيخ لو اني باللجنه لااقول دربك خضر وفالك التوفيق وهات قصيدتك
بس الامر بيد اللجنه

[عيد العنزي]

يماااال العافيه يالاجودي وان شاء الله انهم ماهم مقصرين

اخوك / عيد العنزي

[( النجــــــلا )]

الشعر توه ونظم الشعر بي توه=وحبال الافكار لاترحم ولاتاوي
عزاه ياخافقٍ مخلوق متأوه=مواله الآه متصدع ومتهاوي
ياصاحبي هذا انا واللي تبي سوه=يامبهذل احساسي .. ويرجونك تداوي
بشويش ان لمتني أو كان بالقوة=الوضع يانورها بالعين متساوي
ماتنفع أعذار مع مجنون ومفوه=محال يقنع!! وياحر الجفا كاوي
ياصاحبي هاك قلبي شوف من جوه=وحكم ضميرك بطفلٍ مرهق وذاوي
أقداره اللي رمته بـ واقع يتوه=وبـ أحضان حظٍ لـ أهوال الشقا حاوي
وكان الظنون استشاطت وأشتعل ضوه=سايرها لين ايتهاوى صرحنا الهاوي
متهالكٍ والعواصف أخلفت جوه=البخت مايل ..وأساس الحال مأساوي


وعساكم سالمين

مع ان اللي يشووف نصوص مستر كشخه وقلم شمر واياد وصدى الشمال يستحي
ينزل شيّ عقبهم والخافي اعظم !!

وعذرا على القصور والتأخير ياام نواف

أطيب الأمنيات للزملاء

[هواوي نجد]

الاخوة الاعزاء

كما وعدتكم بان تكون مشاركتي يوم السبت بعد مشيئة الله هاهي تتحقق واتمنى ان تكون عند مستوى تطلعاتكم

وأحب ان اشكر اخواني الذين سبقوني في المشاركة على ما امتعونا به من شعر و إبداع واتمنى لإخواني المتبقين التوفيق والنجاح

اود ان اوضح ان البيت الاول لي حبيت ان اداعب الشاعر الذي قام بكتابة المشد و ليس انتقاص لأي منطقة وكل مناطق مملكتنا الحبيبة تاج على رؤوسنا اما كلمة ( إيـ...نوه) في البيت الاخير تعني (التنويه) ولذلك وجب التنبيه واترككم مع المشاركة على أمل ان تحوز على رضاكم







(الليل توه ونظم الشعر بي توه = واحبال الافكار لا ترحم ولا تاوي)

بيتٍ قريته يقوله شاعر امفوه = منشاه من نجد ما ظنيت مكاوي

يا ما حلا الشعر لا منه صدق نوه = يروي عطاش القلوب بـ .. سيله الحاوي

واطيور الاشواق ترقص في فضا جوه = تشرح وتفضح غموض الشاعر الهاوي

اللي ملكه الغرام وشب له ضوه = واحرق ضلوعه ثمن للمترف الغاوي

ضحى بعمره وقال اللي تبي سوه = راضي بحكمك مدامي صابر وقاوي

من دونها عالمه منقوص ومشوه = الحال مترديه و الوضع مأساوي

كلٍ درى بحالته بس وده (ايـ..نوه) = ما غير شوف الغضي للمغرم يداوي

فهد بن جذيان

[أعماق الشمري]

http://www.hailchat.com/vb/images/smilies/00600.gif
http://www.b7r1.com/vb/images/usersimages/6093_1141903280gif
أطلب من سماحتكم بعد سعادتكم بـ مساحتكم هذه
أستحسان القصيده رغم تواضعها
وأسعد الله المساء بوجيهكم ..
http://www.alshamsi.net/sh3r/talal_rasheed/font3.gif
ـ اللـ ي ـل .توّه. ونظم .الشعر. بي .توّه ـ
ـ وحبال. الأفكار. ماترحم .ولا .تاوي ـ

معذبي. قل. عسى. دايم. على. القوه
مسموح. دامك .لروحي. دايم .مخاوي

أشعل. قناديل .حبك .زيد. في .ضوه
يامولع(ن). فيك .روحي .بحب. ماياوي

يفداك. عمري. وأنا. طيرً. معك. جوه
هذي. القصايد. نصتكم. من .خفا .هاوي

عسى. مزونك. تصادق. معي .في. نوه
حيث. أن .وصلك .لقلبي .دايم .مداوي

لـو. الـفرح. يـ ن ـشرى .أشـريه. بالـقوه
أسعد .خفوقي. بشوفك. وال ع ـمر. ذاوي

ولـو .بالـتمنى. تــمنيتك .مـعي . منـوه
كل. الجوارح .تنـادي .وينـك (مـضاوي ).!؟
http://www.alshamsi.net/sh3r/talal_rasheed/font3.gif
http://www.mwaheb.net/free/aldou7sari/91.gif

[أم نــــــــــواف]

(( انا ابشارك اما تحسبوني مع المشاركين او تردوني خايب ))


8
8
8

أفـــــــــاااااااا عليك طال عمرك

والله لو حنّا بمجلس وزراء ماردّيناك


أخي :

المرونة مطلوبه ومحبّبه للنفس خصوصا هنا في مضايف العز


أبشر بسعدك أخوي ... وهات قصيدتك لاهنت :thumb:

لكن اسرع تراك مامعك وقت .. بكرى الظهر بنقفل الميدان بما فيه من مشاركات

همسه :

ترى أحيانا شيق الوقت عامل قوي للإبداع .. :thumb:


بالتوفيق إخوتي ،

[أم نــــــــــواف]

هلا بالمشاركين


ياعيني على إبداعاتكم ماشاء الله عليكم

بارك الله فيكم جميعا وفالكم التميّز بإذن الله



أختي النجلا هلا بك ممثلة لعالم حوّاء .. ولا مجال للإعتذار غاليتي


شكرا

[عجايب بنت الشايب]

http://maayaare.jeeran.com/منتدى/طراطيع%20احلى.gif

بالتوفيق للجميـــــع مبدعين




هواوي نجــد :thumb: روووووح

[نافع بن طواله]

بيّض الله وجيهكم كلكم


كلكم رائعين

فالكم المليون كلكم

كلكم قصائدكم رائعه ( طبعا اقلبوا القاف غين ) <<<<<<<<<<<< وش فيه حمد السعيد

وبإنتظار اللي كان مسافر ومارجع

[مستر كشخه]

النجلا

ماشاء الله عليك


البخت مايل ..وأساس الحال مأساوي
روووووووووووووووووووووعه *رووووووووووووووعه


هواوي نجد

صحححححححححححححححح قلبك (قلبك الخضر ياهواوي)



وكلٍ درى بحالتـه بـس وده (اي..نـوه) ما غير شوف الغضي للمغـرم يـداوين
وتنويهك اكيد وصل
جمااااااال متناهي


اعماق


كل. الجوارح .تنـادي .وينـك (مـضاوي ).!؟

على الله تجاوبك الصوت مضاوي

جزل يااعماق


الله يوفقكم جميييييييييييييييييييييييييييييييييييييي يييييييييييييع

وفاااااااااااااااالكم المليون

[مستر كشخه]

أبشر بسعدك أخوي ... وهات قصيدتك لاهنت

ام نوف

انتي كذا (برفع الابهام)

والله يقويك يالعنزي ششششششششششششششششششد حيلك

[ميل عقاله2]

الله يمسيكم بالخير جميع


مسابقة حلوة وفعالة


وسجلوني وبالله التوفيق

[ميل عقاله2]

السلام عليكم ورحمة الله وبركاته


الله يمسيكم بالخير جميع


هذه مشاركة متواضعة أرجو قبولها

الليل توه ونظم الشعر لي توه
وحبال الافكار لا ترحم ولا تاوي
انحاول انا نخوض الحرب بالقوة
ما يوقف الغزو لا بارق ولا ناوي
الشعر مدحٍ وذم ومكسب وخوة
والزين فالشعر كنه عودة الجاوي
ومن يطلق اسبوق فكره في فضا جوه
قصايده شرط يسمعها من الراوي
ومن لا ظبطمركبه لا بدّه ايتوه
بالعون يذكر في العربان بالغاوي
كم واحدٍفي علومه طاح بالهوه
وكم من ضعيفٍ وقف مبناه متقاوي
شف للفَرَاش ايتهافت دايم بضوه
مع قل عزمه طمر بالنار متهاوي
ويالله دخيلك لساني اكفني سوه
يارب رحمتْك نارك مالها قاوي

وسلامتكم

[الاسم المستعار]

.. المعذرهـ على التأخير ...........




( الـلـيل توهـ ونـظـم الـشـعر بي توهـ ** وحـبـال الافـكـار مـاتـرحـم ولا تاوي)

تــراء هـدوئـي وراءهـ شاعـر مــفـوهـ ** يـلتـم عـقد القصيد بـليـلي الداوي

إن مـاحـصل بالـرضـاء تـاتـيـكـ بـالقوهـ ** كـله لـعيـن الغرير المترف الراوي

باعلمه عن خطية يدهـ ( وأنوهـ ) ** بإذن الله إني شديد وللصبر قاوي

( قاوي ) ولو الـزمن يبـلاني بـسوهـ ** واصبر على البعد لو هو بلوة الهاوي

( هاوي )عيون الغزيل بس (يالوهـ ) ** ينطق على العدل عند الحكم ويساوي

ماكـانت الكبد ذابت من سناء ضوهـ ** ولا طواني مـن اسباب الجفاء طاوي

ليلي فراق وعذاب ولا صفى جوهـ ** والشوق جمر ولا ادري ويش هو ناوي..؟




وسلامتكم roooose فيصل

[ريال الفسحه]

بسم الله الرحمن الرحيم


والله لا اعلم مااقول لكل من انتظر اني انزل قصيده واعطوني اكبر من حجمي بكثير
وانا اعلم اني بكلامهم خذيت اكبر من حجمي بكثير...كثير جدا...وما يقلقني ليس
اني اكتب او ما اعرف اكتب لكن اني أفشل كل من انتظرني بحيث ان تكون القصيده
او القصيّده لاتجد بين اضلعهم اي قبول ....لكن وش نسوي تورطنا وهايطنا وسجلنا:)


\\\


مدري الان اقول لكم الفكره او بالاصح مشهد تخيلته ونظمت عليه كم بيت والمشهد هو
مايحصل للاخوات الشريفات بالعراق وببلاد المسلمين كافه من [ اغتصــــابـــ..] فالمشهد
عباره عن تلك الشريفه التي تضم ركبتيها الى صدرها بعد مافعل [ النصرانــي&الرافــضي]
مافعل وهي تبكي ومن حولها اخوتها ذوي الــخمس والست سنوات وامها العجوز ويدخل
عليهم المغلوب على امره والدها [ كل ماسبق قدرة اصوره او اتصوره ] لكن ماردة فعله ومالذي
يستطيع ان يقوم به من اجل بنته ...والله لا اعلم اصلا لو نطق ذبحوه هذا باستثناء من ذبحوه قبل
ان يغتصبوا ابنته او زوجته...

انه الذل بام عينه انه الخسه ...نحن وصلنا مرحلة الخسه لا اعلم هل نوقف سرا ونتظر الدور
الى ان يحل على اعراضنا وعلينا...لا اعلم ...


\\\


اللـــيل توّه...ونظم الشعــــر بـــي توّهــ..=وحبال ألأفكار ماترحم ولا تـــــاوي..!!
شــاعرن شمــــري ...ومهتــــاض به جـوّهــ..=ينخـــى جزيلاتــــه...ويورد علــى ..آوي..!!
يذكـر لكم بنــــتن وعرضن لهـــــا مشـوّهـ..=والشايـــب اللــي لها عاجــــز ولا قــــــاوي..!!
يبكي على بنتـــه وبالحيل بـتــــــأوهــ..=يبكي على عرضــــه...ونـــار القهر ضــــــــاوي..!!
يــــــدخل على بنتــــــه وتنخار به قوّهـ..=يمسح علــــــــى خــادهـا والدمــــع متهـــاوي..!!
[ يــــابه ] ترا نــاري ...متوهجـــــن ضوّهـ..=أطــــف لـــي ناري ونار الغبـــن كـــــاوي..!!
والطفـــــل يبكـــي ودمـــع العين معلـــوّهــ.=والعجـــز تبكــــي ووضــــع العجز مـــآسآوي..!!
بغـــداد رحتـــي غـــدر من خالـــــي أمروّهــ.=راس الدنـــــائــه ووصف [ الفحش ] له حـاوي..!!
بغـــدا يامجدنــــا تبقــــــين محــــلـوّهـ..=مهـــــما العــــــــرب خانــــــــت ومهما الشقا طـــاوي..!!


اخيرا ...اعتذر...

للتأخيـــر وذلك والله لظروف كادت ان تعوقني عن هالمسابقه لكن ربكم ستر...

واعتذر لكل من ظن وظن وخاب ظنه:) ....




أمــــــــــل...

تكفــــى ابعدونا بقدر المستطاع عن المجاملات....


\\

الله يحفظ لنا اعراضنا وكل مسلم ....



شكرا ..

[سيف الدولة]

والطفـل يبكـي ودمـع العـيـن معـلـوّه.
........................................والعجز تبكي ووضـع العجـز مآسـآوي..!!

بيت في محلّه والقصيده كلها مختارة

رياااااال صح لسانك

والله لايحرمك من لقب شاعر المضايف

[ريال الفسحه]

8
8
من بوئك لباب السماء:)

لاهنت الغالي وشاكر لك هالتعقيب...

[سامي الشمري]

مدخل


يازيـن شطرٍ .. إذا مبداه في " أوّه " ..!= وأجمل بيوت الشعر . لا قفّل بـ " آوي " ..!

.....
...
..
.

السلام عليكم ورحمة الله وبركاته


أعذروني على التأخير ..

و ذلك بـسبب السفر ..!

و طال السفر .. و أم نواف ملّ صبره :) ..!


........

القصّة .. واقعيـه حصلت معي قبل 4 سنوات


سردتها لكم في الأبيات ..!



(( ضاوي الشاوي ))



الليل توّه .. و نظم الشعر بي توّه ..! = و حبال الأفكار .. ماترحم ولا تاوي ..!
,
دام القصيدة تجي في صدق .. و مروّه ..! = ماعدت أنا أهتم .. دامنّي لها قاوي ..!
,
البارحه .. ليلتي بالهمّ .. مكسوّه ..! = أعد الأيام .. و أذكر صاحبي " ضاوي "
,
الصاحب اللي كلامه داخلي نوّه ..! = اللي على الكذب .. و النكران لي ناوي
,
ياما حكى بي .. و ياما صرت متشوّه ..! = عند العرب صرت كنّي واحدٍ داوي ..!
,
لزمت صمتي .. و أقوله " ليته .. و لوّه = يسكت " .. و لكن لسانه للفتن غاوي ..!
,
مريت بحره .. على برّه .. على جوّه ..! = نفضت ريش النعــام .. و جيت له عاوي
,
دامه على غبن سامي مشعلٍ ضوّه ..! = أحسن لي أرحل .. ولا ويـّـاه متخاوي ..!
,
الحرّ .. حرّ .. و مكانه .. يكره البوّه ..! = و البوم بومٍ .. و مشيه ماهو متساوي
,
لكن نصيحه .. و أذكّر ناكر الخوّه..! = (( ماينفع الطيب .. دام الطيب " بالشـاوي " )) ..!


roooose

[أعماق الشمري]

مستر كشخه

لاهنت (( وووووو ))
خلها بيني وبينك مامن مضاوي ولا غيرها مير القصيده غزليه وورد الاسم
على حساب القافيه بس .!!


وماشاء الله عليكم جميعاً
كل قصائدكم مميزه وجزله


بأستثنائي أنا بأستيائي لقصيدتي

[صلفيق ابو قناة]

أأدخل؟

أنتم سكرتوا الباب ولا لياهلحين:)


وأخيراً وصل صلفيق ولكن ، بعملة للأسف مضروبة بفعل فاعل:(

صح الله لسان الأخوان الي سبقوني وبيض الله وجيههم

والله ياهم مجموعة مبدعين ما شاء الله عليهم وكلن يقول الزود عندي:goooood:



تفضلوا ومن أشكل عليه معنى صوري ولا حسي فلا يتردد بالسؤال :



الليل توه ونظم الشعر بي توه=وحبال الأفكار ما ترحم ولا تاوي
ياتي نتاجه خداج أحيان ومشوه=ان عاش ليلته بالمصباح..هو ثاوي
واحيان ياتي نشيط وكامل انموه=من رحم الأفكار علـ أقدام متساوي
هذاك منه شعوري يشتعل ضوه=وينشر شذا الشعر بالريحان والجاوي
ويزيح همي ويفتح للأمل كوَّه=ويروي عطاش الكبود ويشبع الطاوي
ان زان باغة زهر وليا اعتفس جوّه=يصير ثعبان كوبرا واصبح الحاوي
واليوم ابشعََبْه ضمن خيول مدعوّه=ان فاز! ولا عسى لقليط والهاوي
دامه تجاهل وجوده حضرة اسموّه=ما ينفعه مربطه لو قيل صقلاوي
زرعي بحاجة رشاش شوي من نوه=وتجاوزن وارتدم غيثه على الشاوي
والحمد لله سفيني ثابت رسوَّه=في بحر الأشعار لو سمِّيت بالهاوي
من كثر ما اقرا جزيل الشعر واتفوه=يعدني من عرفني شاعر وراوي

[مستر كشخه]

ميل عقاله


الشعر مدحٍ وذم ومكسب وخوة
والزين فالشعر كنه عودة الجاوي

وصف اكثر من رااااااااااااااااااااااااااائع للشعر

ماشاء الله عليك شااااااااعر وراعي جزاله


الاسم المستعار


إن مـاحـصل بالـرضـاء تـاتـيـكـ بـالقوهـ ** كـله لـعيـن الغرير المترف الراوي
الغرير
المترف
الرااااااااااااااااااوي

يستااااااااااااااااااااااااااهل

واتستاهل المدح يالمستعار

صحححححححححححححححححححح لسانك


ريال فسحه

تدري وش البيت اللي اعجبني بقصيدتك
بصراحه اعجبني بيت القصيد بعني موضوعك

مااقول الاصحححححححححححح لساااامك واكيد ماخيبت ضن محبيك
واللي عندي زي جمهورك مايهااااب

غربه

مريت بحره .. علـى بـرّه .. علـى جـوّه ..!
نفضت ريـش النعـام .. و جيـت لـه عـاوي

كفو كفو

واكيد مايليق بك الا القنيب
ولا ريش النعام خله للهدايف

صححححححححح لسانك


اعماق

ههههههههه هذولا انت يالشعار
اذا توازيتو قلتو حكي شعار ومانقصده

ابو قناه

ياتي نتاجه خـداج أحيـان ومشـوه * ان عاش ليلته بالمصباح..هو ثـاوي
ياسلام
وان جا منك خديج ولا مكمل
اكيييييد بيكون رااااااائع

صحححححح لسانك



ماشاء الله جميييع المشاركين اصحاب قصيييييييييد وشعار <<<<وش وهقن بينهم

فالكم المليووووووووووووووووووووووووووووووووووو وو.......

[اخيذه ضحى..!!]

الليل توة ونظم الشعر بي توه = وحبال الافكار ماترحم ولا تاوي

ولاياحصل مايجيني جيته مروه = وش عاد يقدر عليه ليا لقى هاوي

الله ياللي تحسب الوصل والخوه = ماقد سمعت بظلام الليل ماياوي

ماتدري ان الشعاع ليا بدى ضوه = يعد الايام عد(ن) وافي مساوي

جيتك وانا جمرتين وعاشق ونوه = ومودعك يوم انالك طيب يالشاوي

تروح ماتسئل عن اللي قالب جوه = ماتدري ان الجروح بحاجه مداوي

كان الغزل لو تجرأ..فيك يالوه = اجيك كلي.. أجيك الشاعر الهاوي

اسبلت لك كل هذا الكون بالقوه = وخليت لك كل عرق عامر خاوي

الليل توه معاي وشكلك مشوه = ماعدت انا شاعرك..ارجوك يا غاوي

[أم نــــــــــواف]

أهلا بالمبدعيـــــــن


أنتم بهذا الشكل تدخلونا في دائرة الحيرة بجمال قصائدكم


لله درّ كل منكم


وكل شكري وتقديري أقدمه لكم


وإلى ماتصبون إليه بإذن الله

أعتذر إن واجهتم أي جهد معنا

بالتوفيق،


( تمّ قفل المسابقة وأتمنى عدم الإحراج في تلقي المزيد )


شكرا لحسن تعاونكم

:thumb:
-