المساعد الشخصي الرقمي

مشاهدة النسخة كاملة : الرجاء الدخول والرد ضروري مره ..........


راعي الطيب
08-07-2005, 19:16
بسم الله الرحمن الرحيم
اخواني الاعضاء


السلام عليكم ورحمة الله وبركاته


لقد سمعت وقرات القصيده التاليه في اشكال مختلفة واريد منكم يا اخواني الصحيح منها:



d:/يا كليب شب النار
يا كليب شـب الـنار يا كـليب شبه=عـليـك شبه والحطب لك يجابي
وعــلـي انا ياكـلـيب هــيـله وحبه=وعــليك تـقـليط الدلال العــذابي
وادغث لها يا كليب من سمر جبه=وشـبـه الى مـنه غـفـا كـل هابي
بــاغ الـلــي شـبـيـتـهـا بالـمـشـبـه=تجـذب لـنـا ربـع سـرات غيابي
بـنـسـريـة يـاكـلـيـب صلـف مهبه=مـتـكـتـفـيـن وسـوقـهـم بالعـقابي
سـراة بـلـيـل ونـاطـحـيـن مـهـبـه=لـيـا نـسـنـسـت كـن به سـم دابي
خـطـو الـولـد لـو به زبون وجـبه=ياتي عـلـيهم من حساب الزهابي
لا باطـن الـهلبـاج خـطـو الجـلـبه=ياحـلـو خـبط اعـصيهم بالركابي
اطـمر لهـم وابـدي سـلام الـمحبه=ليا جـو عـلى هجن يديهم خرابي
مـع كـبش مـصلاح لـك الله نجـبه=لا دبـر الهـيـن مـتـيـن الـعـلابـي
والـوالـمه يـاكـلـيـب عـجل بصبه=والـرزق عند اللي ينش السحابي
احمد الهاجرى
08-07-2005, 19:31
الاخ عم محمد

هذي القصيده لدغيم الظلماوي وهو قول وفعل يرحمه الله تعالى

هذا الي اقدر افيدك


لكن فيه منهو افهم مني مثل

راعي الوقيد

والصيرمي

والمهره

وغيرهم الكثير الي ماتحضرني اسماهم


تقبل تحياتي
سلمان النبهان
08-07-2005, 19:54
بنسرية ياكليب صلف مهبه *** متكتفين وسوقهم بالعقابي
*******************************************
اهلا بالاخ عم محمد والقصيدة مثل ماتكرم اخي احمد الهاجري
فانها لللشاعر الكريم / دغيم الظلماوي رحمه الله بالقهوه
الا ان مطلع الشطر الثاني من البت اعلاه ( متكتفين )
نسمعه ونردده (( متلطمين وسوقهم بالعقابي )) .
وننتظر شعراء المضايف وهم اصحاب الشان بذلك ..
**************************************
عبدالله الجعيثن
09-07-2005, 08:12
عم محمد

تسلم يمينك

والشباب فيهم البركه
راعي الوقيد
09-07-2005, 16:55
^
^
ما يعطون من حيلهم:)

هلا بالعم محمد:)


ياكليب شب النار ياكليب شبه =عليك شبة والحطب لك يجابـي

وعلي أنا ياكليب هيله وحبه =وعليك تقليـط الـدلال العذابـي

وادغث لها ياكليب من سمر جبه =وشبة الي منه غفى كل هابـي

باغي ليا شبيتها ثـم قبـه =تجلـب لنـا ربع(ن) سـراة غيابـي

بنسريةٍ ياكليب صلف(ن) مهبه =لاهـب نسناسـه تقـل سـم دابـي

سراة بليـل وناطحيـن مهبـه =متكتفيـن وشوقهـم بالعذابـي

الوالمة ياكليب عجل بصبه =والرزق عند اللي ينشي السحابي

صبة لقرم(ن) صرفته ماحسبه =يوم البخيل مكنهب الوجـة هابـي

وصبة لمنعور(ن) ليا جات نبه =يرخص بعمره والدخن لها ضبابي

وعده عن اللي مايداري المسبه =اللي يدوّر بالقصيـر الغيابـي

عن الطيب عده نازل(ن) له بغبه =يضرب علي درب الخطا مايهابي

لا باطن الهلباج خطوا الجلبه =يا حلو خبط عصيهم بالركابـي

أطمر لهم وأبدي سلام المحبه =لا جو على هجن(ن) يديهم خرابـي

سلام أحلى من شخاليل جبه =وأحلى من السمن الجديد العرابي

مع كبش مصلاح راسه نجبه =لا أدبـر الهيـن متيـن العلابـي

خطو الولد يوم الملاقي نكبه =يأتي علينا من حسـاب الزهابـي

وحتيش لو يلبس وبينن وجبه =معيرة على غضير الشبابـي

أنا لقيت الصبر يازين غبه =يرقيك روس مشمرخات الهضابي

من لاصبر ياكليب في حكم ربه =هذاك يوم البعث مالـه ثوابـي

يقولها اللي ما حسب للمسبه= ولا عرقل الاجواد ببعض الهلابي

هذا هوى بالي وهذا مطبه =من قبل مايسفـح علينـا الترابـي

الــدايــــــــــم الله والفانــــي خلقه ،،،

دغيم الظلماوي الشمري

تحية وسلاااااااااااام ...
..
راعي الطيب
12-07-2005, 00:17
الخوة الاعزاء احمد الهاجري ، سلمان النبهان ، الغازي ، راعي الوقيد...
السلام عليكم ورحمة الله وبركاته.....
وما قصرتوا ومشكوووووووووووووووووورين الف مره على الردود بس فيه خلل فني منع من ظهور المقطع الصوتي او اني ما عرفت انزله .
انا سمعت القصيده بمقطع صوتي يختلف عن اللي مكتوب فوق ولا ادري ايهم اللي صح اعذروني وراح احاول انزل المقطع الصوتي بس تبون الصراحه مدري شلون شكلي ابي ارسل رساله للمشرف واساله واللي يعرف منكم لا يبخل .
على العموم مشكورين الف مره على الردود ويعطيكم الف عافيه .
ghosty
17-07-2005, 01:41
الخ عم محمد كلام الخوان فووق الصحيح
الا ان بعض الشعراء من اللي بوقت الضلماوي وبعد اللي بعده بنو بعض القصايد على هالقاف
للتمثيل لا للحصر السديري وضيغم بن ناصر بن ثويني وسعد بن مسعد اليدا ومحمد بن عيسى الهذال فهاذ يمكن يسبب بعض الاختلاف عند بعض السامعين
ايضا يقال ان الامير محمد المهاد ال رشيد رحمة الله عليه طلب حظور الضلماوي اما للزعل بسبب القصيده لان مواري الكرم به يعادل كرم حاكم (لو اني مستبعد الزعل ) او للسبب اخر
المهم حضر الضلماوي ونشد عن القصيدة قال للقصيدة للواحق وقصد::::

مده رهن لولاك ماقلت ياكليـــــب
ولاقلت عنـــــد النار صر موقــد له
ياطيرشلوى يابعيــــــد المراقيـب
لوتستحي ماتاخذ الطيـــــب كلـــــه
تملا محاليــــــب وتكفي محاليــب
وكبــــــد تيبسها وكبـــــــد تبلــــه
يابوالحرول والعمى والمحاديــــب
وابو لمن صــار العصـــــا ثالث له
وابو لمن يمشي قصر رجله العيب
ومن ضامته بقعــــــا صرت ولد له
يالجوهر الناريز يالعطر يالطيــب
ياعنبر من عاملـــــــه مــا يمـلــــه

ويقال ان الامير تكفل بمير قهوة الضلماوي بعد هالقصيدة

وكلامي هذا خذيته من كتاب القهوه العربيه للعبد الرحمن بن زيد السويدا


ارجو اني ماطولت عليكم

اخوكم g.h
راعي الوقيد
17-07-2005, 02:38
العم محمد !!

الله يعافيك يالعزوة ما سووا الشباب الا الواجب :)

اما بالنسبة لكلامك عن المقاطع الصوتية وانك سمعت القصيدة بمقطع

صوتـي يختلف في مضمونه عما قرأته من ابيات للقصيدة المذكورة .!؟

فإنه لا يفوتني ان اذكّر بأنه يوجد ايضا ً إختلاف في ابيات القصيدة

المكتوبة والمقروءة عوضا ً عن المسموعة اقل المصادر جودة !؟

ghosty !!

الله حيووووووووهـ بالمضايــف :)

وكلامك على متمّه يالغالـي . .

باغـي ليـا شبيتهـا ثـم قـبـه ** تجلب لنا ربع(ن) سـراة غيابـي

بنسريةٍ ياكليب صلـف(ن) مهبـه ** لاهب نسناسه تقـل سـم دابـي

سـراة بليـل وناطحيـن مهبـه ** متكتفيـن وشوقـهـم بالعـذابـي

الوالمـة ياكليـب عجـل بصبـه ** والرزق عند اللي ينشي السحابي

صبة لقرم(ن) صرفتـه ماحسبـه ** يوم البخيل مكنهب الوجة هابـي

وصبة لمنعور(ن) ليا جـات نبـه ** يرخص بعمره والدخن لها ضبابي

وعده عن اللي مايداري المسبـه ** اللـي يـدوّر بالقصيـر الغيابـي

هذي الابيات هي اللي خلت الامير محمد ابن رشيـد قال يبي يختبر

مدى صدق ما قاله الظلماوي وهل يوافقه الفعـل :)

ام جاء القـول بلا فعـــــــــل !؟

ولمى طب المهاد على قهوة الظلماوي بوقت غير مناسب لوجود القهوة !؟

ولما اتى الى الوجار لقى على الملة الدلة الوالمة اللي ذكر بالقصيدة ..!؟

سأله محمد ابن رشيد وقال له :

وش عندك به يا دغيم الظلماوي يوم تقول

ياكليب شب النار ياكليـب شبـه
عليك شبة والحطب لـك يجابـي

وعلي أنا ياكليـب هيلـه وحبـه
وعليك تقليـط الـدلال العذابـي

وادغث لها ياكليب من سمر جبـه
وشبة الي منه غفى كـل هابـي

وهو على طوووول يقول :-


مده رهن لولاك ماقلت ياكليـــــب
ولاقلت عنـــــد النار صر موقــد له
ياطيرشلوى يابعيــــــد المراقيـب
لوتستحي ماتاخذ الطيـــــب كلـــــه
تملا محاليــــــب وتكفي محاليــب
وكبــــــد تيبسها وكبـــــــد تبلــــه
يابوالحرول والعمى والمحاديــــب
وابو لمن صــار العصـــــا ثالث له
وابو لمن يمشي قصر رجله العيب
ومن ضامته بقعــــــا صرت ولد له
يالجوهر الناريز يالعطر يالطيــب
ياعنبر من عاملـــــــه مــا يمـلــــه

وسمعنا كما قال الاخ غوستي بأن الامير محمد العبدالله

قـد تكفل بمير قهوة الضلماوي بعد هالقصيدة !!؟

والله اعلـــــــــــــم ..!؟

والسلاااااااااااااام ...
..
ghosty
17-07-2005, 11:09
وش اقول الا:

لا أخلا ولا أعدم كل طيب

المعتزي، المعتزي ياراعي الوقيد
راع البل
24-07-2005, 04:40
يا حي الله عم محمد اما النسبه للقصيده ما قصرو العيال




اما الشاعر هو \ دغيم بن عيد بن بشير الظلماوي الشلاقي الشمري



رحمة الله عليه
راعي الطيب
26-07-2005, 00:02
اخي راع البل



الله يحييك وتشرفت بردك ومشكوووووووووووووووور من القلب والاعماق على التعقيب



بس فيه شغله ودي انك تسويه لي وهي البل عندي الوالد يروح صافي مع حليب النياق ياليت طاسة على الطاير



هههههههههههههههههههههههههه



اسف ويعطيك العافيه




اخوك / عم محمد
سيدة القـــــلم
27-07-2005, 12:38
يعطيكم الف عافـــيه ياخوان على أتزويدنــا بالمعلومات حول دغيم

وشكر خاص لصاحب الموضوع..

تحياتي
عشق القصيد
راعي الطيب
01-08-2005, 01:50
الف شكر لك اخوي عشق القصيد ويعطيك العافية



شباب اسف على التاخير واليكم المقطع الصوتي اللي مذكور بالاعلى


ولكم جزيل الشكر



اخوكم / عم محمد