المعانات من غلاء المهور وعوائد العروس بنجد

[متفاائل]

السلام عليكم

نحن على ابواب الاجازه والصيف وكلنا نعلم ان هذا الوقت تكثر العروس ويرتزق راع القصر والطباخ والصايغ وبائع الاقمشة من قده وبائع البشوت والعبي وراع العود الدخون والغذائيه الرز والسكر والشاي والقهوة والهيل وشريطية الغنم والابل وصاحب الاستيوهات لتأجير الطبول والطيران واخر من يأخذ نصيبه الطقاقات والكوفيره الكل يعين خير ماعداء المغرس يتخرج ابنه من الثانوي وهو يسدد بالسيارات اللي هو اخذ او قرض البنك الفلاني لا يادخل البيت يبي تأثيث من اللي مابعده وش يقصرنا عن غيرنا هذا من غير الكاش اللي يأخذه النسيب والنسيبه وتشريه اخوته وخواته وخالاته وجميع من يقرب له والجيران وزميلة الدراسه .
هذه قصيده تصف المعانات من هذا العمل من زمان لان الحال ضعف والريال غالي وله قيمته اي ان الف ريال يمكن تعادل عشرة الاف لان الذبيحة حسب قول الشيبان تلأخذه من 30-35-40ريال فقط يعني عشرة اضعاف لان سعر اليوم 400-500

لااطيل عليكم الشاعر عبد الرحمن الراضي

قال في غلاء المهور وعوائد العروس في وسط نجد



صحيح انا كبرت والعرس ملزوم= ويفز قلبي لاحكى واحد فيه
لاشك دون العرس عادات وسلوم=ومن يسمعه ماعاد نفسه تهقويه
الى طلبت البنت قالوا بها السوم=حق الابو سبعة الآف بتعطيه
وثلاثة للأم تدفع هاك اليوم =ياللي تجيهم ناوي العرس باغيه
واخوانها وعماتها وباقي القوم=كل يبي حقه ومجبور ترضيه
وطوايق وبشوت وأطياب وهدوم= اللي حضر والغايب الكل تكسيه
وخطيبتك شيـــه على جنب مفهوم= أربع آلاف للذهب شرط تشريه
اضافة هذا الى غرفة النوم= ودولابها من كل خرقه تمليه
وحق العشاء خمسة الآف ملزوم =تدفع تكاليفه ولو منت باغيه
وزيارت الحريم يوم ورى يوم=والبيت وأثاثه ترى حكيهن فيه
حب الشرافه طبعهن دايم الدوم = ويا ويل مطلوب لهن تعترض فيه
يمضى شهر ماذقت راحه ولا نوم =هذا يجي و ذاك تبلش توديه
سعادتك صارت غرابيل وهموم=الدين لحقك وانت من وين توفيه
خلاص ابا انهي باقي العمر بالصوم = مانيب قادر له ولا نيب قاويه
كم واحد مثلى مع الناس محروم= ودك تشوفه كيف ليله يمضيه
وكم بنت وسط الدار والباب مردوم= الظاهر ان اللي اعاني تعانيه
رسولنا زوج بأيات وختوم = سن الزواج وين من يقتدى فيه
عادات شيلوها ترى مالها لزوم= لو شيلة العادات كل شرع فيه

[راعي الوقيد]

متفاءل
قل لرفيدزك الشاعر ، بنات الناس ماهن ببلاش !!
واللي يبي الدح مايقول اح..
وتسان هو انت المعرس ابشر بالعانية
خخخخخخخخخ
نرجع لموضوعنا
عادة معاناة الشباب وغلا المهور الى السطح
مع اقتراب موسم الأفراح والليالي الملاح..
هي صحيح معاناة ولكنها ليست عائقاً امام
من اراد ان يكمل نصف دينه!!
والله سبحانه وتعالى يسهل على من اراد الزواج..
على العموم قصيدة جميلة وتكاد تلامس وجدان الكثير
من شبابنا غير المتزوجين ، والمقبلين على الزواج ..
تسلم صديقي على النقل
لاهنت وسلمت..

[مرزوق الشمري]

بسم اللة الرحمن الرحيم
والصلاة على رسول محمد والة وصحبة وسلم
والحمد للة ان جعل الناس عندنا في الاردن واقصد شمر الاردن وبعض القبائل الاخرى تنتبة الى هذا الموضوع
واصبح كثير من الناس يزوج بنتة فقط بما يقدر علية العريس اي تاثيث منزل وجهاز بسيط فقط
وهذة سهلة على الناس وعلى الشباب والبنات

[سلمان النبهان]

تسلم اخي متفاءل وصح لسانك ولسان الشاعر عبدالرحمن الراضي
وحقيقة ان كلامه في محله وصدق في كل بيت قاله ......

[متفاائل]

راعي الوقيد

انا فلتله كلامك

تدرى وش قال

قالي قل لراعى الوقيد

عيال الناس ماهم لعبة

ههههههه

شكراً لمرورك الغالي

وشكراً لمشاركاتك بالردود
التي دائم تعطر وتلطف الجو
تحيااااااااااااااااااااااااااااااااااااا ااااااااتي

[متفاائل]

مرزوق الشمري

هذا هو الحق لان او الولد او البنت
كل من والديهما سوف يفرح بزواجه
وهذا السلوم الطيبه
هل هذا ينطبق على شمر من خارج الاردن لو تزوجوا من عندكم ;)
تحياتنا لكم ياابنا العمومه بالاردن وفي كل ارض وتحت اي سماء

[متفاائل]

تسلم اخي متفاءل وصح لسانك ولسان الشاعر عبدالرحمن الراضي
وحقيقة ان كلامه في محله وصدق في كل بيت قاله ......


سلمان النبهان

صح بدنك اصالة عن نفسي ونيابة عن الشاعر

اشكرك على مرورك الذي اعتبره منك ومن الاخوان امثالك
هو الدافع من ورى الابداع في هذه المضايف

تحيااااااااااااااااتي لــــــــــــك

[راعي المغاتير]

بسم الله الرحمن الرحيم
.
تسلم يمينك يا متفاءل وصح لسان شاعرها
عندي سؤال وش دخل عماتها وخالاتها
انا ابي اتزوجها هي والا عمتها وخالتها لهن
قناة تفضخ روسهن هذه والله الورطه
وان كنت تبي تنهج يم ابناء العمومه خذن معك
لا تنساني
.
.
.
.
.
.
.
.

[متفاائل]

راعي الخير

تفضخ روسهن شفت كلامي قبل يومين حول السالفة ههههههههههه
ابشر باللي يردلك اذا مشيت بس تاعدن انك ههههههه
اشكر مرورك الطيب

تحياتي لك

[راعي المغاتير]

بسم الله الرحمن الرحيم
.
.
ههههههههههههههههههه
يا ولد السالفه غير والطرقاعه السوداء هاي غير
من يبي يتقضى للعايله الكريمه(المصيبه اذا وغادينهم كثار )
اول انا اتفلت على العرس
والحين مار طاب خاطري

[متفاائل]

راعي الخير

هذا هو المطلوب بالموضوع

انت خذ نسخة من هذا وارسله لهم يطلعون عليه بس مهي لحاله حط معه مجموعه مواضيع تغطيه من شأن مايدرون عن هدفك وقل ابد عده مواضيع تثقيفيه وقصص ونكت وسعوا صدوركم به
يمكن اذا اطلعوا على النقد لهذا العادات يعلنوا انهم اول عائله تتكفل بكامل تكاليف زواج ابنتها . ثم طب على غفله وردلي كان فيه زود هههههههههههههههههه
ههههههه

تحياتيييي

[راعي المغاتير]

سم الله الرحمن الرحيم
.
المشكله ان العشقه ماتعرف تقرى
واخوانها مصيبه لو قروا الموضوع
ههههههههههههه اويطي رحنا ملح يا جدي
ماينتحارشون لله لله
حتى السلام ماودي اسلم لا يطرحونن
يقولون كل شوين وانت سلام سلام
وطرااااااااااااااخ وطررررررررررررررررررررررريخ يمار عين مورمه
لا والله ماني مودي شين لا والله فكن
هم على قولتهم(من عطرتس ــــــ)
ههههههههههههههههههه
واسمحوا على بعض الكلام
.
.
.
.
.
.
والسلام

[مرزوق الشمري]

الاخ المتفائل
تفائلوا بالخير تجدوة
قال رسول اللة علية الصلاة والسلام
من ترضون دينة وخلقة فزوجوة
الناس في الاردن سواء شمر او غيرهم لا يفرقوا بين هذا اردني او غير اردني المهم اخلاقة وبعدين الاردن ماهي بعيدة عن دول الجوار وكثير من الاردنيات في السعودية ودول الخليج والكويت ولايكلف اللة نفسا الا وسعها ليش احمل نفسي ديون كثيرة من اجل الزواج مادام اللة سبحانة وتعالى يسر لي الزواج من بلد عربي وبا قل التكاليف
وهذة الروابط الزواجية تقوي الروابط بين الدول العربية

[متفاائل]

الاخ مرزوق الشمري
اشكرك على اهتمامك بالرد . وعندي استفسار بسيط انت قلت انه .
الناس في الاردن سواء شمر او غيرهم لا يفرقوا بين هذا اردني او غير اردني المهم اخلاقة.
تقصد من القبائل والعوايل المعروفه بالاردن اوغير صحيح .
اشكرك على وجهة النظر الطيبه بالفعل والله.
يعني عندكم حدود التكلفه كم من شأن يتضح الامر لمن
ينوى مثل هذا وان كنت اظنهم كثيرون في حال استمر حال غلاء المهور الحالي

الاخ مرزوق الله يستر علينا انا وانت من بنات المضايف لكن عسى مايقرنه .

تحياتي لك

[الجازي]

^
^
^
^
ماودي اني قريته ,, بس والله رحمتكم ,, خلاص سامحين لكم روحوا تزوجوا من شمريات الاردن :)

دامكم بتتزوجون شمريات مافيه مانع ان شاء الله لو تلقونهن في المريخ ,,

عاد لاتنسى تعزمني يامتفائل على عرسك ,,وأبشر بالفزعة :)

[متفاائل]

^
^
^
^
ماودي اني قريته ,, بس والله رحمتكم ,, خلاص سامحين لكم روحوا تزوجوا من شمريات الاردن :)

دامكم بتتزوجون شمريات مافيه مانع ان شاء الله لو تلقونهن في المريخ ,,

عاد لاتنسى تعزمني يامتفائل على عرسك ,,وأبشر بالفزعة :)


=============>

ى بالعكس الريم انتي انسانه حقانيه |510|:eek:والحق ماينزعل منه

يجب ان تسامحيننا|86| مجبر اخاك لابطر واللا حنا دون اقصور بالشمريات بنات عمنا بكل مكان ودنا ثوبنا رقعته منه وفيه وهذا مانتمناه ان يتعاون الجميع لتحقيق رغبات الشباب فمن كان له بنت اليوم يكسب وغداً بولده سوف يدفع اكثر .
انا ماني عجل على العرس
تستاهلين اذا ماعزمتك من اعزم ابشري :).

[الجازي]

اذا تبي الجِد ترى الغلا ماهو ببناتنا ,, أو على الأقل اللي أعرفهم من بنات شمر ماعندهم هالبلاوي ,,

وحدة من زميلاتي في الجامعة بنت المالكي ,,تقول لي ان مهورهم على ثلاثمية الف >>>>>>>هذي والله بي ام دبليو المالكي ماهي بنت المالكي :)

لها منها مية ألف تجهز بها نفسها ,,والميتين الباقية يعرس بها أخوها ,,يعني تاخذها بنت الناس اللي تعطيها اخوها وهلم جرا ,,

اللي متعارف عليه عندنا ان متوسط مهر البنت من أربعين الى خمسين ألف بس ,, ومسألة هدية الأم والأبو والأهل هذي ماهي موجودة ,,

يعني ممكن يعطي الأم طقم ذهب مايتعدى ألفين ويسمونه (( سلام )) يعني اذا جاء يسلم على أمها يمد لها هالهدية >>> الله لايعيده من سلام :)

والأبو ماله شيء >>>>> ياعمري ياابيي ,,

عاد اذا عندكم معلومات ثانية مافيه مانع نستفيد من خبرتكم :)

[المخاوي]

أخي متفاءل

موضوع جميل وصح لسان الشاعر
وانا اشوف ان بعض العادات في العروس تلاشت وهي اهداء الخام (القماش) الى اهل العروس
فالمعرس يتكفل بالقماش لا ويكون بعد خامٍ طيب مهو اي كلام ويرسله لاهل العروس وبدورهم يوزعونه على حريم الحاره يالله عاد وش يكفيهم :D وان اشوف صراحه ان ماله داعي وزين انهم
خلوه, والثانيه ( يكتال ) لاهل العروس من قهوه وهيل ورز وسكر وشاهي .........الخ هذي مازالت
موجوده ولكن بشكل بسيط ,هالحين المعرس بلشان بالذهب وتكاليف ثياب العروس والقصر وليه بعد يمون البيت , وكذلك اهداء البشوت والشمغ وغيره لابو واخوان العروس صدقوني ان بعضهن يدور عليهن الحول محدن لبسهن يعني مالهن داعي .
فيه واحد من الجماعه اعرس وكلفوه عرسوه اكثر من ميه وخمسين الف ريال قلتلوه ياولد انت وشبلاك وش مقضوبن عليك قال ليتهم قاضبين ولاقالوا هذي بنتكم وبكيفكم :D يقول بلشنا بالشرايا يوم شريناهن وديناهن لهم رجعوا ثلاث منهن يقولون هذلي ماهن كل هذا وبعدين خفاف
غيروهن , يقول دربين على ام عزيز يالله ملينا مطبخهم ودربن قماش للحريم ودربن شمغ وبشوت
للنشاما حتى وغدن لهم جبنالوه سيكل:D المهم نص التكاليف اللي دفعه مالها داعي .
وبعدين البلى ببعض الرجال اللي يخلي الحريم على كيفهن ويحسبنوه ماقضب شين يقول والله ماابي الا الرجل اللي يستر على البنت مار شوفوا البنت وامه وش يطلبن >> هذا البلى;)

عذراً للاطاله ولو ان احاديث العروس تجوز لي:) ...... لي رجعه!

[مرزوق الشمري]

الاخت الريم
اشكر مرورك وتعقيبك
اظنكي تتفقين معي ان الزواج مصلحه للبنت وللشاب
فمن مصلحة الطرفين تقليل المهر ليتناسب مع مقدرة الشاب وامكانيته الماديه وخاصه اختي الكريمه اننا نعيش في زمان كثرة فيه الفتن والزواج ستره وطمانينه للشاب وللبنت ولاهلهم ايضا
اكرر محبتي واحترامي لجميع الذين شاركوا بهذه المناقشه