قصة الهنوف

[غيمة غلا]

السلام عليكم ورحمة الله وبركاته

استبيحكم العذر في الغياب وقلة المشاركات .وكل عام وانتم بخير .

على الرغم من قلة متابعتي للشعر والشعراء وقلة اهتمامي به الى ان قصيدة الشاعر ضيدان بن قضعان "الهنوف " لفتت انتباهي ليس لجمالها فقط وإنما في قصة الهنوف التي ذكرها الشاعر في قصيدته .

وبما أن مضيف الدكه يهتم بالإجابه عن اسئلة الاعضاء فها هي العضوه غيمة غلا تبحث عن قصة" الهنوف " لديكم ومن هي الهنوف ؟؟؟؟؟

القصيده

الهنوف اللي سرت من نجد وأمست في الحويّه .........ضيقت صدر الرياض وسافر الطائف وجاها
وانثنى غيم الحجاز لخد نجد النرجسيّه ........يوم جاته من زعلها كنّها تقصر خطاها
زعلوها وإرحلت وأخلت قصور الفاخريّه .....والحقتني شرهة الزعلان وأخطاني رضاها
سافرت والله ماخبر الليّ يزعلها عليّه ......واستباحت لله الخيره سهر عيني وماها
ليتها يوم استباحت دمعة العين الشقيّه .....ماستباحت دم قلبي من خلاها في خلاها
سامح الله ظلمها وطعونها الخضر النديّه .....والله يسامح خناجرها ويعفو عن خطاها
عرضتني للهبايب والضما والمهمهيه ......وإتركتني للزعل والشوق والكبر وغلاها
والغلا ماهو في يديّها ولا هو في ايديّه ....الغلا شي من الله وأشهد ان الله عطاها
من غلاها لو توردني على حوض المنيّه .....كنها تسقيني الشهد المصفى من شفاها
ومن حلاها ماتوصفها الحروف الابجديه .....كيف توصف وردةيبري من العله شذاها
الورود تغار منها مزهريّه ..مزهريّه ......وان تباهت عذرها معها يحق لها تباها
ومايشابها شبيه ولا يحاليّها حليّه ......جل رب يوم صورها فرقها عن سواها
لقبلت هيجنت وإن اقفت جذبت السامريّه ......واعذابي إن عطتني وجهها والا قفاها
إن بدالي وجهها يسعد صباح اليوسفيّه ......وإن غشتني نفحة من ليلها يسعد مساها
درة بالموت محروسه وبالبحر محميّه ..........البحر من دونها والموت الأحمر من وراها
دونها انا اغليت وسم اهلي والاشداد المطيّه ....مرخص في القاع عمري والثريا في سماها
لايمي يبلى بحب الحضر في عيون بدويّه ......في ظروف مايقارن مستواه بمستواها
الله اقوى يافقير القلب ابو نفس غنيّه .......مالك الا الصبر والجنه لقاها من لقاها
والهوى اللي يطرح الرجال في إ يديّن اجنبيّه .....علة بالجوف لاتبرى ولايلقى دواها
والهنوف اللي ان رد الثأر تاخذها الحميه ......شفتها بالعين في قلبي وهي تاخذ قضاها
وشفتها تشتاق تطعني بلا ذنب وخطيّه .....كثر ماتشتاق لاأعماقي وأنا اشتاق لدفاها
كل ماعرقت بميسمها تحريت الخويّه .....والحقت بالميسم الميسم كذا على عماها
عاقبتني كل يوم تلحق الكيّه بكيّه .....واتعبتني وادركتني والحقت نفسي مداها
وان تمادت جهزوا قبري وانا بكتب وصيّه ......بكتب الله لايعاقبها ويرضا لي علاها
العمار تلف ها الايام والدنيا مديّه .....والسنين تلفني والنار تحرق من وطاها
علموها تلحق الباقي مدام الشمس حيّه .....وتغانم مابقى مني وماتطلب فداها
لاتمادى في جفاها والرياح الموسميّه .....ماتقدر وقفت الاشجار وتثمن عطاها
وعلوموها مابقالي غير ادن الهاشميّه .....كان ترضاها عليّ والا تهون من جفاها
وانصحوها لاتحمل نفسها نفس بريّه .....وذكروها بالقبر لعها والا عساها
وعلوموها علموها لاتطول في الحويّه .....ديرة ماهي بديرتها لو أعجبها هواها


غيمة غلا

[سلطان الشمري]

غيمة غلا




شكرا اختي الفاضله على ايرادك لهذه الفاتنه هنا....هذا اولاً



ثانياً:والله ان ضيدان راااااااايق بقوه...ومجنون وحريف



ثالثا: والله ماعندي خلفيه عنها ,,,,لكن اعجبتني وقلت اشكرك عليها


واتوقع والتوقع يا خايب ياصايب


ان القصيده ربما يعني بها حبيبته سواء زوجته او غيرها

ويمكن او بنته مع انه غير وارد هنا


ويمكن شيء معنوي مهو محسوس..

والعلم عند الله وعند صاحب القصيده

..

شكرااا الف

[شموخ]

الاخت غيمة غلا

هلا فيك

ياليت لو كتبتيها في مضيف قصه وقصيده لانه يهتم بالبحث عن القصه والقصائد .

بالنسبه للقصه والله مااعرفها

اما سؤالك منهي الهنوف .

فسبق وان قلت لك و شئ اكيــــــــــــد ماهي الهنوف اللي في بالك ريحي ضميرك ، صحيح فيه تشابه كبير بين احداث هنوف ضيدان واحداث الهنوف الي في بالك لكن ماهي هي ، اكبر دليل ان هذه القصيده قديمه لضيدان يعنى انا سمعتها يمكن قبل خمس سنوات وكانت الهنوف بالمتوسط ولا سرت ولا امست بالحويه جالسه بالرياض حتى ماهو معقوله ان ضيدان بكبره بيتغزل بوحده صغيره .

على فكره اسم هنوف يستخدمونه الشعراء بكثره كنايه عن جمال المحبوبه والا تلاقين اسمها الحقيقي في الغالب مو الهنوف لان معروف الشاعر ء نادرا مايصرح باسم محبوبته دايما يرمزون لها برموز اما هنوف او ريم وماشابها .

واحتمال كبير تكون من نسج الخيال ومعروف اغلب قصائد الشعراء من نسج خيالهم، ويمكن تكون حقيقه ويكون فيه تشابه بالاحداث .

اتمنى تكون قد وصلت لك الفكره وياليت لو احد يعرف في اي عام كتبها ضيدان يخبرنا .
على فكره غيمه "غريبه سمعتي قصايد منتي دايما تقولين لي والشعراء يتبعهم الغاوون ":):)

تحياتي لك
اختك
شموخ

[المخاوي]

أخي نبرااس

رمعتن طيبه من وجهن طيب :cool:
حاول مرتن ثانيه وانشاء الله تصيب النيشان :D

أقول وشرايكم نحوله لمضيف الالغاز :p :)


درة بالموت محروسه وبالبحر محميّه =البحر من دونها والموت الأحمر من وراها
دونها انا اغليت وسم اهلي والاشداد المطيّه =مرخص في القاع عمري والثريا في سماها


يقولون المعنى ببطن الشاعر ;)

[غيمة غلا]

نبرااااس

شكرا لك على المرور .

غيمة غلا

[غيمة غلا]

الغاليه شموخ

كنت اعتقد أن هذا المضيف هو المكان المناسب لها :)

والقصة الحقيقيه لاأعلمها ولكن يتبيّن لي من الابيات وجود تشابه كبير بين هنوف ضيدان والهنوف الاخرى ويمكن ملاحظة ذلك من خلال هذه الابيات تأمليها عزيزتي

زعلوها وإرحلت وأخلت قصور الفاخريه .........والحقتني شرهة الزعلان وأخطاني رضاها .

كذلك هذا البيت

لايمي يبلى بحب الحضر في عيون بدوية ....... في ظروف مايقارن مستواه بمستواها .
وايضا هذا البيت الذي يدل دلاله كبيره على أصل الهنوف وأنها من نجد

علموها علموها لاتطول في الحويّه ....ديرة ماهي بديرتها لو اعجبها هواها .

عزيزتي فعلا هناك تشابه ولكن عندما سألت عن هنوف ضيدان لم اشك أنها الهنوف الاخرى وخاصة بعد توضيحك لي ان هذه القصيدة قديمه وكتبت قبل احداث الهنوف الاخرى ، ولكن قلت ربما تكون قصة هنوف ضيدان معروفه ونزود بها .
شموخ أحب اقول لك
والشعراء يتبعهم الغاوون :):)

غيمة غلا

[عبدالله الجعيثن]

غيمة غلا والله انه ذبحتن الشفايه|118|

منهي الهنوف الثانيه ووش قصته..

واذا ماهو ممكن ارسليلي خاص|513||513|.

[متفاائل]

غيمة غلاء

شكراً لك على ايراد هذه الرائعه

[شموخ]

كاتب الرسالة الأصلية : غيمة غلا

شموخ احب اقول لك
والشعراء يتبعهم الغاوون :):)

غيمة غلا

[HR]

الى الان معزمه والشعراء يتبعهم الغاوون :):) ذكرتيني بيت شعري اذا ماخانتني الذاكره انه لضيدان بعد

يارب انا شاعر واهيم بكل وادي من شتات

واقول ومانفعل ونا مؤمن ولي قلب وضمير
شاعر ويتبعني من الغاوين كثر الغاويات .

ماني مذكره باقي القصيده :):)

تحياتي لك
اختك
شموخ

[غيمة غلا]

المخاوي
الغازي
متفاءل

شكرا لكم المرور .

شموخ

نعم انا على رائي عن الشعراء ،والشعراء يتبعهم الغاوون :):) والافضل لك مجالسة العلماء بدلاً من مجالسة الشاعرات ;);););).

غيمة غلا