قصة الغزال المنكسر ومغزى جديع راعي الحصان واخو جوزة

[سناعيس الرسالين]

بسم الله الرحمن الرحيم
السلام عليكم ورحمه الله وبركاته
كان أحد أفراد قبيلة عنزة يبحث عن ناقة فقدت ويقال أنها غدت وراح يدور عليها وخذا أكثر من شهر ويوم نشد عنها بكل مكان قالوا له ترى ناقتك انذكرت انها عند شمر عند الجربان بالتحديد شيوخ شمر ويم نصى قبيلة شمر وصل يم مطلق بن الحميدي الجرباء الملقب ب (أخو جوزه) دخل على المضيف وتعشى عندهم وقال أريض الليلة وأنام والصبح أنشد عن حاجتي ويم جاء للنوم الا به شمري بجنبه والشمري نشد العنزي قاله بعمرك شفت أشجع واكرم من راعي البيت ، قال العنزي :
كل ديرة لها حقها ورجالها ، قال الشمري دامك قلت هالكلام : لازم تعلمن منهو اشجع منه ..
الوكاد ومطلق الجرباء هو يذعن لهم لانه مانام وسمع الكلام اللي بينهم ..
المهم ويرد العنزي ويقول للشمري اللي أشجع منه : راعي الحصان جديع بن هذال ..
ويم سمع مطلق هالكلام قال للعبد شب النار والوقت كان بآخر الليل
والعوايد أن شبة النار بها الوقت يعني به شين والكل لازم يجتمع ..
المهم تجمعوا حوله الربع وقال لهم مطلق الجرباء أبي أسولف عليكم سالفة قالوا قل وشو سالفته..

قال سنة من هالسنين تواجهت أنا وجديع بن هذال راعي الحصان يومنه نازلٍ بالعجاجه وخذا سبعة أشهر وهو غزاي ويم لفيت عليه قلت له يا جديع وش رايك نغزي على مطير أنا عقيد شمر وأنت عقيد عنزة اللي معك قال جديع الشور شورك يا بو مسلط وأنا لا قاله الله اني مصبحهم..
المهم ومطير كانوا على مارد سواج بالقصيم ويم وصل جديع واللي معه من عنزة ومطلق واللي معه من شمر والا يبحرون بعيونهم الا البل ماده اللي هي بل مطير وما حولها أحد وساقوا حلال مطير كله وأخذوه ويم أقفوا الا فريس مطير يحلقونهم وعنزة هي اللي متقدمه وشمر هي اللي توالي الفريس فقال مطلق الجربا أخو جوزه لجديع بن هذال راعي الحصان كلن يحط صابور من ربعه واليا قربوا الفريس الصابور يرد عليهم وباقي الغزو يروح بالحلال قاله جديع ما يخالف ، وحط الجرباء الصابور وعنزة ظعونهم متقدمه والا الجرباء يبحر أن جموع عنزة مقفيه وفريس مطير ذبحوا صابور شمر لانه قليل وكان مع مطير ابو شويربات والمريخي ومسعود حصان ابليس ، المهم قال مطلق الجربا وين صابور عنزة يا جديع قاله ما من صابور..
أنا وانا أخو بتلا صابور الويلان كلها وينتخي وانا راعي الحصان ويقول قبل ما يلكد ويحذف الفرس على مطير وفريسهم :

معلوم الصبيان وأنا أخو بتلا @@ ضراك بالصيد غزال منكسر

ويم بحروا به مطير لاو الله ويعرفون انه راعي الحصان جديع بن هذال ويم شافه مسعود حصان ابليس ويهج عنه ويرد عليهم جديع ويردون عنزة معه واذبح هاك اليوم منهم المريخي من مشايخ بريه وشتت الجبلان من مطير وهزمهم شر هزيمه..
المهم عقب ماقضى مطلق من سالفته اللي قصها على الربع هو مقصده أنه يسمع العنزي اللي جاء ينشد عن حاجته وعلمه أنه يقدر الرجال حقوقها من هالسالفة وعطاه اللي يبيه وأكرمه..

تعليق :
من هالسالفه عرفنا أن جديع بن هذال أخذ 7 شهور بمغزاه وكان هاك الوقت متزوج مويضي الدهلوية العجميه اللي قالت القصيدة يوم تتوجد عليه وتولهت ويم وصلها من المراسيل لانها كانت بالرس أن جديع بمغزاه كسر مطير وذبح المريخي وفزع مع مطلق بن الحميدي الجربا (أخو جوزه) بغزوة الغزال المنكسر


ياراكب حيل ابروسه لجاجــــه ::: امظريات للمســـــــــاري والادلاج
لا روحن بالدو كن إنزعاجــــه ::: سفنن حداها بالبحر بعض الامـــواج
تلفون شيخٍ نازلٍ بالعجاجــــه ::: اجديع اللي للمجاويخ زعـــــــاج
قل لابن وايل كان وده ايواجـه ::: القيض فات وباقي الوسم زعـــــاج
امي توصيني عن الانزلاجــــــه ::: وقلبي اليا جاء طاري البدو ينفاج
حطيت لك ريش النعامه أولاجــه ::: والبطن لك يامدبس الخيل مسهـــاج
أمي تقول أن التمني سماجـــه ::: وأقول أن بعض التمني به أفـــراج
مودع على المطران كدراً عجاجه ::: هجيجهم من بين أبانات وســـــواج
خلا المريخي طايحٍ في مداجـــه ::: والخيل بالجبلان راحن مـــــــراج



هالبيتين الاخيرة من قصيدها تثبت أن هالغزوة صحيحة وانه هجج مطير من أبانات وسواج وهذي كلها ديار بالقصيم والمريخي اهو من مشايخ بريه من مطير وخيل عنزة راحن بالجبلان اللي هم من مطير مراج...

وهالرواية اللي طريتها بالاول بخصوص منهو أِشجع الفرسان بالجزيرة العربية ذكرها المؤلف ثامر حامد بكتابه : تاريخ آل محمد الجربا وقبيلة شمر العربية في اقليم نجد والجزيرة ص 66...

ذكرها المؤلف أيضا بأن الامام عبدالعزيز بن سعود سأل منهو أشجع الشجعان فأجابه مطلق بن الحميدي الجربا(أخو جوزه ) بأن أشجع الشجعان هو جديع بن هذال راعي الحصان


تحياتى لكم
اخوكم يوسف الرسلاني

[* نجم سهيل *]

سلام ياسناعيس الرسالين

هالسالفه اللي تقوله معروفه ولكن ماهي بالكتاب مذكوره ومشهورة عند الرواه


الكتاب عندي وذكر أن أخو جوزه قال أن جديع بن هذال راعي الحصان ومانع بن ضويحي من أِجع شجعان زمانه وحبيت أوضح لك

والقصة التي ذكرتها معروفه وهذا طيب الجربان معروف ومحدن أخذ بالصيت مثلهم بالكرم
وبالذات الشيخ عبدالكريم الجربا أبو خوذه ..

وان دلت على شيء تدل على كرم الجربان وشجاعة وكرم الشيخ مطلق الجربا (أخو جوزه) والشيخ جديع بن هذال راعي الحصان

سلالالالالالالالالالام يالسنعوسي

[سناعيس الرسالين]

هلابك يالغالي وماتقصر للتعديل وهذا شي ء حلو انك تعدل لخوك خطاه مهو عيب وبعدين انا ناقلها من كتاب ماني جايبها من عندي يالغالي ومافي اي اختلاف انشاللة على الي تقولة يالغالي ولك اجمل تحياتي 00[SIZE=6@ [/S]@@ياليت نجم سهيل ياقف على الزيني@IZE]ولك اجمل تحياتي0 اخوك يوسف الرسلاني-;)

[راعي الكار]

تسلم يمناك اخوي سناعيس الرسالين على هالسالفه ويكفي راعي الحصان جديع ان اخو جوزه شهدله عى شجاعته




ياالله يامطلوب ياوالي الاقدار انت الذي مدات جودك لطيفه
اطلبك يامعبودعاون هل الكار وتحل شطات عليهم كليفه
اللي مجالسهم بها بن وبهار ونجر يصوت للنشامى رجيفه

[عيوووون باااكيه]

يعطيك الف عاافيه اخوي سنااعيس الرساالين

على القصه ولكن القصيده فيها بعض الاخطاء

واسمحلي اني اصححها

ولاااااهنت



ياراكب حيل ابروسه لجاجــــــــــه=امظريات للمســـــــــــــاري والادلاج
لا روحن بالدو كن إنزعاجـــــــــه=سفنن حداها بالبحر بعض الامـــواج
سفن البحر سود بروسه فجاجـــه = وارقابهن زعاج من يبس الامــواج
تلفون شيخٍ نازلٍ بالعجاجـــــــــــه = اجديع اللي للمجاويخ زعــــــــــــــاج
مودع على المطران كدراً عجاجه = هجيجهم من بين أبانات وســــــواج
خلا المريخي طايحٍ في مداجـــــــه = والخيل بالجبلان راحن مـــــــــــراج
سلم على اللي راح للحو ماجـــــه = وقله خويك ضايق الصدر واعـــلاج
وقل لابن وايل كان وده ايواجـــــه = القيض فات وباقي الوسم زعــــــاج
حطيت لك ريش النعامه أولاجــــه = والبطن لك يامدبس الخيل مسهـــاج
أامي توصيني عن الانزلاجــــــــه =وقلبي اليا جاء طاري البدو ينفـــــاج
مي تقول أن التمني سماجـــــــــه = وأقول أن بعض التمني به أفـــــراج

[سليم الشرعان]

بسم الله الرحمن الرحيم

السناعيس

شكرا لك على القصه

[الصيرمي]

السلام عليكم:)

انقل لكم عن هاذا الموضوع من منتدى مطير:)
(( هذي قصة معركة كير التي نسب النصر فيها لقبيلة مطير ولم تدرس اسبابها بالشكل الصحيح وتم إنكار دور الدهامشة الذي هو أساس المعركة ،،

المعركة بين الدهامشة ومعهم مطير وبين الحبلان من العمارات
والنتيجة انتصار الدهامشة ومن معهم ...

وهذي تفاصيلها :

معركة كير ليست مناخ أولا لان المناخ معروف عنه بالمدة الطويلة وفيها تكون اناخة الابل بالشهور هذا من ناحية ،،،

أسباب المعركة :

كان عند جديع بن هذال راعي من السويلمات من الدهامشة من عنزة يقال له الطناني يسرح بنياق جديع بن هذال وطبعا هذا الراعي صارت له نياق من شغله عند جديع بن هذال والنياق كلها أصلها لجديع ولكن نياقه المأخوذة كأجر له...وعندما كثرت النياق قام السويلمي يعزلها عن بعضها و جديع شاف أن النياق كثرت عند السويلمي ففكر أن السويلمي يسرقه فقام وطرد السويلمي. .
فرجع السويلمي يسترضي جديع فضربه جديع وطرده ,,

وراح السويلمي يشتكي لشيخه شيخ الدهامشة مجلاد ابن فوزان..
فأرسل مجلاد بن فوزان يعاتب جديع بن هذال ويقوله إنك ياجديع شيخ كبير وعطاياك كثيرة وما يصير انك تاخذ حلال راعي ضعيف ومسكين وأنت لست في حاجة نياقه...
ولكن كلام الشيخ مجلاد بن فوزان(راعي افريحه) أثار الشيخ جديع بن هذال (راعي الحصان ) وقال كيف الدهامشة وشيوخها تعارض كلامي وأنا شيخ الشيوخ..
ومعروف أن الدهامشة من العمارات وشيخ العمارات تلك الفترة هو الشيخ جديع بن هذال ,,والهذال شيوخ مشايخ عنزة..

ومن المعروف أيضا أن جديع كان اكبر شيوخ زمانه كما هو معروف ومن اشجع اهل عصره ويلقب براعي الحصان ، لأنه يتميز بركوبه لحصان اسود حتى يعرفونه اعدائه ويميز نفسه به , لذلك اعداءه لقبوه براعي الحصان وكل فارس يبتعد عنه وأيضا من صفات وطبع جديع انه طاغيه وظالم لاعدائه ومن يعارضه ولايقيم اعتباراً لاحد..

فقرر جديع أن يغزي الدهامشة فغزاهم بالمعركة الاولى وأخذ حلالهم بما فيها نياق مجلاد بن فوزان وجماعته ومن ثم غزاه غزوة ثانيه وبعدها اجتمع جديع بن هذال مع سعدون بن عريعر سنة 1195هـ وغزى عليهم مرة أخرى وذكر إبن بشر مانصه :

((وفي هذه السنة صال سعدون وبنو خالد مع جديع بن هذال ريس آل حبلان من عنزة على أعراب الدهامشة ورئيسهم مجلاد بن فواز (والصحيح فوزان) ، وتنازلوا وتقاتلوا وصارت الكرة على الدهامشة ، وأخذوا محلتهم..))انتهى... كلام ابن بشر

وبعد هذه الوقعة لم يبقى للدهامشة شيء وخسروا كل حلالهم فلتجاؤا على قبيلة مطير لعلمهم أن قبيلة مطير عدوها اللدود عنزة ، لان عنزة غزت عليهم في مغزى ((الغزال المنكسر)) وقصتها معروفة عندما غزو مع شيخ شمر وذبح الشيخ جديع بن هذال من مشايخهم المريخي وانتصروا على الجبلان وذلك مذكور في قصيدة مويضي الدهلوية العجمية في نفس قة المغزى..

وعندما وصل الدهامشة الى مضارب قبيلة مطير جاوروهم وقال لهم شيخ مطير وهو الدويش الناقه اللي( ما راعيها بذيلها لكم)
أي الناقة التي بدون راعي فهي لكم...
وقال الدويش شيخ مطير لمجلاد بن فوزان شيخ الدهامشة : لك سعدى وزهابها..
وأصبحت هذه المقولة مثل بالشمال...
وسعدى هي اخت الدويش وتزوجها مجلاد بن فوزان..
وأنجب منها مجلاد عياله مقعد وجبر ومعروف ان الدوشان خوال المجلاد..
أما الدويش أكرمهم واعطاهم من اذواد مطير واغناهم وناسبهم..

ملاحظة : الدويش المذكور هنا هو أما وطبان الدويش أو غيره..

وقبل لجوء الدهامشه على مطير كان الفارس المشهور ظاهر الشليخي من الشلخان من المذاودة من المحلف من العلي من الدهامشة من العمارات من عنزة مجاوراً لمطير ويلقب براعي العشيّر.. ولقصة العشير هذا قصة أن العشير هو خيل مشهورة جدا وقد اعطاه ابن ربيعان شيخ الروقة من عتيبة لظاهرالشليخي ...
وثار بعض فرسان عتيبه وشيوخها على ابن ربيعان , وقالوا له : ليه تعطي هالعنزي
فقال عطيته له لانه خيّال يستاهل وفارس شجاع ...
ولظاهر هذا صديق عزيز عليه هو مسعود ويلقبونه ((حصان ابليس)) وهو أحد فرسان الجبلان من علوى من مطير وعلى مايقول الرواه لم يتفارقون عن بعضهم ..

وبعد أن تحسنت أوضاع الدهامشة من مجاورتهم لمطير أرادوا الانتقام من جديع بن هذال وسعدون بن عريعر ومعه بنوخالد..
وصارت معركة بين الدهامشة ومعهم مطير نتج عنها خسائر بين الطرفين ولكن من الواضح أن الرجال المقتولين من جماعة جديع و وسعدون أكثر من الدهامشة ومطير ، ويقول ابن بشر مانصه :

((ثم إن الدهامشة اجتمعوا ببوادي مطير وقصدوا عنزة وبني خالد ،فالتقت الجموع واقتتلوا قتالاً شديداً ، فقتل من قوم سعدون وجديع عدة رجال ثم رحل عنه سعدون ورجع...))..انتهى كلام ابن بشر

وبعد هذه الوقعة رحل سعدون بن عريعر عن جديع بن هذال ، وجديع يريد الانتقام من الدهامشة ومن معهم من مطير فحشد حشوده من قبائل الرحيل والمقصود بها شمر والظفير وأراد وقصد الدهامشة ومعهم مطير وعقيد الدهامشة ظاهر الشليخي وعقيد مطير مسعود حصان ابليس ، وكل مارمى ظاهر فارس قال لمسعود هذا الفارس اسمه كذا كذا وهو شيخ جماعته..
ويوم شاف ظاهر جديع فقال لمسعود هذا جديع بن هذال فرماه ظاهر الشليخي وأكمل عليه مسعود حصان ابليس وانذبح بهذه المعركة جديع وأخوه مزيد ومصيول التجغيف من شمر .....
وطبعا الفارس مسعود حصان ابليس كان ينوي أخذ الثأر من جديع بن هذال وكان يترقب الفرصة التي ينتقم فيها من جديع لان جديع كانت له معارك مع الجبلان انتصر فيها ومنها((مناخ الغزال المنكسر)) والشاهد ماذكرته الشاعرة مويضي الدهلوية العجمية من أهالي الرس وزوجة جديع بن هذال في قصيدتها :

ياراكب حيل ابروسه لجاجــــــــــه
ــــــــــــــــــــــــــــــــــ امظريات للمســـــــــــــاري والادلاج
لا روحن بالدو كن إنزعاجــــــــــه
ــــــــــــــــــــــــــــــــــ سفنن حداها بالبحر بعض الامــواج
سفن البحر سود بروسه فجاجــــه
ــــــــــــــــــــــــــــــــــ وارقابهن زعاج من يبس الامــواج
تلفون شيخٍ نازلٍ بالعجاجــــــــــــه
ــــــــــــــــــــــــــــــــــ اجديع اللي للمجاويخ زعـــــــــــــاج
مودع على المطران كدراً عجاجه
ــــــــــــــــــــــــــــــــــ هجيجهم من بين أبانات وســـــــواج
خلا المريخي طايحٍ في مداجـــــــه
ــــــــــــــــــــــــــــــــــ والخيل بالجبلان راحن مــــــــــــراج
سلم على اللي راح للحو ماجـــــه
ــــــــــــــــــــــــــــــــــ وقله خويك ضايق الصدر واعــــلاج
وقل لابن وايل كان وده ايواجـــــه
ــــــــــــــــــــــــــــــــــ القيض فات وباقي الوسم زعـــــــاج
حطيت لك ريش النعامه أولاجـــــه
ــــــــــــــــــــــــــــــــــ والبطن لك يامدبس الخيل مسهـــاج
امـي توصيني عن الانزلاجـــــــــه
ــــــــــــــــــــــــــــــــــ وقلبي اليا جاء طاري البدو ينفـــــاج
أمي تقول أن التمني سماجـــــــــه
ــــــــــــــــــــــــــــــــــ وأقول أن بعض التمني به أفــــــراج





الشاهد البيتين الاخيرة لمويضي الدهلوية العجمية أن جديع غزى مطير وانتصر عليهم في معارك سابقة قبل معركة كير ..

وبعد ذلك رد جديع على مويضي الدهلوية العجمية بقصيدة أخرى وطلقها لسبب أنها تغزلت به ...وان قصيدها صار على كل رجال يقوله وهذي هي القصيدة :

يااركب حيل ٍ الى لجلجنـــــــي @@ عوص لهن مع نازح البيد مرمـال
الى مشن مديدهن ما يونــــي @@ لكن حاديهن مع الدو خيـــــــــــــال
مدن من الانجاج حين انهلني @@ والظهر عند صخيف اللون مقيـــال
والعصر عند صويحبي بركني @@ أبو ثمان كنهن در الاجهـــــــــــــال
لاجيت موضي يامناي ومظني @@ وصل سلامي لبنت ماضين الافعال
وقله تراها طالق الحبل منــي @@ اللي قصيده يلعبه كل رجــــــــــــال

وبعد طلاق جديع لزوجته مويضي تزوج مجلاد بن فوزان مويضي الدهلوية وأنجب منها أولاد لم يعيشوا وقالت قصيدة تتمنى أن يأتيها زوجها بالرس لانها لم تكن تألف حياة البادية و تمدح زوجها مجلاد بن فوزان وتثني عليه وعلى فعله في معركة كير وهذا دليل أن الدهامشة كانوا مع مطير :

ياراكب ملحا تكب الشــــــــــــــــدادي
ــــــــــــــــــــــــــــــــــ عميلة ماهي بتمشي على هــــــــــــــون
كنه ظليم جافل مع حمــــــــــــــــــادي
ــــــــــــــــــــــــــــــــــ اقفى وقـلبه حروة الدحو مشطـــــــــــون
تسهج بك "الجـبـلان" بلا بعـــــــادي
ــــــــــــــــــــــــــــــــــ والعصر وانتم عند عكاش تلفــــــــــــون
ياخو هوى يالقرم وين انت غــــــادي
ــــــــــــــــــــــــــــــــــ ودي على جال الرفايع اتبنــــــــــــــــون
بالحاجر المنقاد مع بطــــــــــن وادي
ــــــــــــــــــــــــــــــــــ فوقه دواويرن على العد يــــــــــــــردون
حزت طلوع الشمس وقت المقــــادي
ــــــــــــــــــــــــــــــــــ من حين رعيان البوادي يمــــــــــــــدون
تسمع لسبر القوم حسه ينـــــــــــادي
ــــــــــــــــــــــــــــــــــ عاين وهو بالرجم الى الجو مقطـــــــون
يقول شفت الطرش دونه نكـــــــــادي
ــــــــــــــــــــــــــــــــــ غوش على شهب النواصي يعنــــــــــون
تلقى بهم من قال كب الســــــــــوادي
ــــــــــــــــــــــــــــــــــ وارجي عساهم بالزماميل يلهــــــــــــون
وتلقى بهم من قال وجه المعـــــــادي
ــــــــــــــــــــــــــــــــــ ترى حلاة الغوش طاعن ومطعــــــــــون
عند الركايب صار هوش ونكـــــــادي
ــــــــــــــــــــــــــــــــــ (وراعي الحصان)المنتخي طاح مطعون
(وراعي فريحه) كن فيها قيــــــــادي
ــــــــــــــــــــــــــــــــــ يثني كما سبع الخلا لاتــذلــــــــــــــــــون

وراعي الحصان هو الشيخ جديع بن هذال شيخ العمارات وشيخ مشايخ قبيلة عنزة على وقته..
وراعي فريحة هو مجلاد بن فوزان شيخ الدهامشة..
أخو هوى : عزوة الشيخ مجلاد بن فوازن شيخ الدهامشة سابق الذكر
الجبلان : بطن من علوى من قبيلة مطير كان الدهامشة متحالفة مع هذا البطن برائسة شيخهم مجلاد ..

وتقصد البيت الاخير ان زوجها كان له قيادة ربعه من الدهامشة اللي معه..

وقيلت أيضا قصائد أخرى ومنها :



يالله ياللي ما حذاتك خيــــــــارا @@ ياللي غني وكل عين اتراعيـــــــه
تجعل لنا في جنة الخلــــــد دارا @@ وقصر حصين ونلتجي في مذاريه
وخلاف ذا شديت نابي الفقـــارا @@ كن الضواري تنهشه مع مقافيــه
الي مشيت الليل هو والنهــــارا @@ تلفي لبيت بينات مواريـــــــــــــــه
عبدالعزيز الشيخ مغني الفقـارا @@ زيزومنا كل السعد في نواصيــــه
قله فزعنا سربتين تبــــــــــــارا @@ والكل ينصب عند الأخر يماريــــه
صاح الصياح وفرعن العـــذارا @@ والمال هج وكثر الأزوال حاديـــه
خلو لنا حامي خدود المهــــــارا @@ جديع اللي دكلات الاسلاف تتليــه
يا حيف يا اللي ماضيله خـبــارا @@ وقع طريح ومجند الحرب راميـــه
ومصيول التجغيف مثل العفــارا @@ والشيخ صابه مطرق شق لاحيــه
هيلا عليكم يا ليهود النصـــــارا @@ هذي دروب البوق بانت مواريــــه

ويقول الرواة أن هذه القصيدة قالها ظاهر الشليخي للامام عبدالعزيز بن محمد بن سعود يخبر فيها ماحصل في معركة كير..وبعضهم نسبها لمسعود وهي خطأ انما هي لظاهر الشليخي..

والقصيدة الثانية :

صاح الصياح وهللن العـــــــــــذارا @@ والمال جانا وكثر الازوال حاديه
وركبوا عليهن غوش علوى سكارا @@ معاري واللبس ماشان راعيـــه
ركبوا عليهن سربيتين تبــــــــــــارا @@ الكل منهم عند الاخر يماريــــــه
وجدع لنا حماي خدر المهــــــــــارا @@ جديعٍ اللي كل الاسلاف تتليــــــه
ومصيول التجغيف مثل الحـــــــوارا @@ سيوف علوى شرعن بعلابيــــه
هيلا عليكم ياشباه النصــــــــــــــارا @@ بقتوا وراع البوق هذي تواليـــه
اللي يتيه الليل يرجي النهـــــــــــارا @@ واللي يتـيه القايله من يقديــــــه

ويقول الرواة أن هذه القصيدة نسبت لمويضي الدهلويه العجمية وبعضهم نسبها لمويضي البرازية المطيرية وأيضا كذلك نسبت لمسعود حصان البليس من فرسان الجبلان من علوى من مطير..وأرجح القولان أنها إما لمويضي العجمية أو مسعود حصان ابليس..لان مويضي البرازية لم تعاصر هذه الوقعة..

ويذكر مسعود أو مويضي العجمية في هذا البيت :

وجدع لنا حماي خدر المهـــارا @@ جديعٍ اللي كل الاسلاف تتليـــــه

المقصود في هذا البيت على ظاهر الشليخي وأنه هو الذي جدع جديع بن هذال وهنا توضيح على فعل ظاهر الشليخي ..بالقصيدة التي تنسب لمسعود أو مويضي العجمية..
وأما ذكر شمر: لم يرد ذكر شمر عند ابن بشر ولا غيره من المؤرخين وانما يستدل على أن شمر شاركت من هذا البيت الذي قاله مسعود أو مويضي العجمية :

ومصيول التجغيف مثل الحــوارا @@ سيوف علوى شرعن بعلابيــــــــه

والبيت الذي قاله ظاهر الشليخي في قصيدته :

ومصيول التجغيف مثل العفــارا @@ والشيخ صابه مطرق شق لاحيـــــه

ومصيول التجغيف احد فرسان شمر قتل في المعركة وهو من التجاغفة من العمود من زايدة من زوبع أحد أجذام شمر الرئيسية ,,,

أما مانسب من قصائد لمويضي البرازية المطيرية فهو خطأ لان مويضي متأخرة عن الوقعة وقد ورد لها قصائد في عصر الأمام فيصل بن تركي سنة 1259هـ ومنها قصيدتها بسلامة احد رجال الأمام فيصل بن تركي عندما منعها من التغني بالشعر ومنها هذا البيت :

عزي لعينك وان درا بك سلامه @@ خلاك مثلي ياحمامه تونين

وهي معروفة بأنها قصادة وراعية طرب وكانت تسمى المرهوصة ، وأرسل إليها الامام فيصل بن تركي الذي ضربها وجعلها تون كما في قصيدتها ..

ولها قصه ومنها قصيدتها مساجله لها مع حمود العبيد الرشيد..
يوم ردت عليه حيا الله شاربٍ جا من شاربها...


وقصيدتها بشيوخ عتيبة ومنها :

يفدى وليفي كل قرم تعيــــــــــــب @@ وشيوخ برقا كلهم من فدايــــــاه
ويفداه ابن هندي مجري الرعيب @@ ولو كان شيخ والمراكيب تنصاه

ومن الثابت تاريخيا ً ان تركي بن حميد توفي عام 1280هـ ثم عقاب ابن شبنان صار شيخ عتيبه بعده , ومحمد بن هندي اصبح شيخ لعتيبه 1301هـ بعد مقتل عقاب بن شبنان في معركة عروى بين ابن رشيد و عتيبه..
فلو انها هي التي قالت قصيدة معركة كير سنة 1195هـ وعمرها في ذلك الوقت عشرين سنه على سبيل المثال..
فليس من المعقول أن تقول الابيات السابقة بابن هندي ويكون عمرها 126 من معركة كير حتى تولي ابن هندي زعامة عتيبة ..أي يكون عمرها قرن و26سنة!!!!

أما قول أن جديع بن هذال هرب وإلتجأ الى المعركة فهو كلام خاطىء والشاهد قول الشاعرو مويضي الدهلوية العجمية في قصيدتها :

لومي على اللي يلبسون السراويل @@ ما عفَتوا لرقابهن يوم طاحي
أخذ حلاوتها جديع بن منديــــــــــل @@ خلاَ الغثا لرباعته و استراحي

ويفسر الرواة هذان البيتين أن الشاعرة هنا تلوم على جماعة جديع الحبلان ومن معهم أخوه مزيد وضري بن ختال أنهم ما عفتّو أي لم ينجو بأنفسهم عندما طاح جديع وقتل في ساحة الوغى وهذا دليل أن جديع لم يهرب ولمعرفة الشاعرة بأن جديع طاغية يقاوم لاخر لحظة حتى لو كانت النتيجة حياته وهذا دليل ..
وفي البيت الثاني تقول أخذ حلاوتها أي أنه مات وأستراح من هموم الدنيا ومتاعبها ،،وفي الشطر الثاني خلا الغثا أي جعل قومه في هموم وتسبب في قتلهم كلهم وجعل المشاكل بين الدهامشة والحبلان وتقصد أنه فرّق بين العمارات كلها وكل ما حدث لعنزة بسبته وتحكمه في رأيه واستراحي أي مات وش بيصر له عقب الموت من أمور الدنيا..


أما قول ابن بشر :
( فقام جديع و استنجد جميع قبائل الرحيل و غيرهم من قبائل عنزه , و صال بهم على مطير و استعدوا للمناوخه و الملاقاة غدا , فحصل بينهم آخر نهارهم ذلك مجاولة قتال على غير منازله ولا استعداد للحرب , فأدال الله خيل مطير على عنزه , فهزموهم و قتل من رؤساء عنزه و فرسانهم عدة رجال منهم جديع بن هذال و أخاه مزيد و ضري بن ختال و غيرهم)

وش فهمنا من ابن بشر؟؟
كلام ابن بشر لايفسر الحقيقة كاملة ولكنه يحتاج الى ايضاحات أخرى ؟؟
لانه همّش دور الدهامشة ..كما أنه لم ينفي ذكرهم ،،

وابن بشر وغيره لم يذكروا أن الدهامشة تركوا مطير ..
وأيضا ذكر شمر لم يرد الا في القصيدتين قصيدة ظاهر ومسعود..

ملاحظات :
يقال أن عنزة بعد معركة كير خسرت الكثير من حلالها ( وهي ليست مناخ انما معركة بسيطة) ولم تخسر عنزة التي شاركت في تلك المعركة الكثير بدليل في كتاب بنو خالد وعلاقته بنجد ص300:
كما يرد أثر وجود عنزة والظفير بزعامة محسن بن حلاف بن السعيد ودهام أبو ذراع من الصمدة وغيرهم على مورد مبايض قرب إقليم سدير مما أدى الى مسير
قوات الدرعية بقيادة سعود إليهم ولكنه تراجع عنهم الى بلد تمير بعد ما شعر بقوتهم وضخامة عددهم فقام باستنفار أهالي سدير فقدموا اليه سراعا ومشاة وركبانا ثم زحف بتلك القوات الى مبايض حيث دارتمعركة من اكبر المعارك التي خاضتها الدعوة كانت محصلتها نصر الدرعية ويتضح هذا من ضخامة عدد قتلاهم وما كسبه سعود من غنائم كبيرة ،،
والكلام هذا نقل عن ابن بشر وغيره من المؤرخين..
نستنج من هذا الكلام أن جماعة جديع الذين من العمارات لم يخسروا شيئا في كير ولم يكن مناخا هي معركة صغيرة وبسيطة وسبب تهويلها هو أن جديع قتل فيها وهذا هو السبب،ونستدل أن جيش عنزة والظفير كان كبيروان الامام تجنب المواجهة في البداية مع هذا الجيش لضخامته وان الامام سعود ربح غنائم كبيرة بعد ما استنفر اهالي سدير وساعدوه،،والسبب انه غزاهم لان قبيلة عنزة والظفير وبنو خالد لم يكونوا داخلين في حكم الطاعة عند الامام في ذلك الوقت ))

انتهى كلامه:)

احببت انكم تاخذون صوره عن الموضوع:)

تحياتي:)

[متعب الخريصي]

اولاً مشكور اخوي سناعيس الرسالين على القصه والقصيده

وابي اعلق على ماذكره اخوي الصيرمي
ياخوي الحين مطير يقولون انهم هم اللي ذبحوا ابن هذال
والصحيح ان اللي ذبح ابن هذال هو فارس سبيعي اسمه سلامه الأدغم

والقصه ياطويل العمر هي

أنتقل سلامه الادغم بجماعته الى قبيلة مطير فتره ليست بالطويله .

ذهب لعالية نجد عام 1195هـ و جاور مطير على وقت فيصل بن وطبان الدويش

اواخيه حسين وكانت مطير لم تمتلك أراضيها الحاليه (الصمان) الذي أمتلكتها

وكانت على حرب مستمره مع عنزه .

وفي ذات ليله الدويش دعاء مطير وصب فنجال وقال هذا فنجال راعي الحصان من يشربه
وصاروا المطران يتراعون ولا واحد قدر يشرب فنجال ابن هذال ويقوم سلامه الأغم وهو يشربه
المهم صاروا المطران يتغامزون ويضحكون ويقولون اكيد هذا مايعرف منهو ابن هذال
وكان سلامه له اخو اسمه ملفي وهو معاه جالس المهم قال الدويش خلاص انت واخوك عليكم ابن هذال
قال سلامه وشلون اعرف ابن هذال انا ماعمري شفته قال الدويش
مايحتاج توصيف هو راعي حصان اسود وراح تعرفه من شجاعته
المهم يوم بدت المعركه وهو يشوف سلامه ابن هذال وهو يطعنه ولاه طاح ابن هذال وهو ينزل سلامه يبي يذبحه وهو يجي مسعود البريعصي
وهو ياخذ حصان ابن هذال ويروح المهم يوم شافه ملفي اخو سلامه قال ياسلامه لاتذبح ابن هذال المهم ماذبحه بس كان ابن هذال صويب لأن سلامه طعنه
المهم ويروح مسعود للدويش ويقول انا اللي ذبحت ابن هذال وهذا حصانه دليل اني انا اللي ذبحته
ويوم جاء سلامه قال الدويش كيف ياسلامه تشرب فنجال ابن هذال ولا تذبحه اللي ذبحه مسعود
قال سلامه ابن هذال حي روحوا انشدوه وراحوا لأبن هذال وهو صويب وسألوه من اللي صوبك قال اللي صوبني واحداً اول مره اشوفه والظاهر انه غريب ماهو منكم يامطير
المهم يوم قالوا للدويش قال اجل منهو حصانه يامسعود ومارد مسعود
وهو يعيد السؤال منهو حصانه هذا
قال حصان ابليس
وعشان كذا سمي مسعود بحصان ابليس

وابن هذال ماابطي وتوفي من اثر الطعنه
طعنة سلامه الأدغم له
وهذي هي القصه
والله اعلم

[أجا]

سناعيس الرسالين

الله يعطيك العافيه

بس الصراحه ضعنا وماندري وين الصحيح

والاقرب التي يستدل بالقصايد

تحياتي

ذيب أجــــــــا

[سيدة القـــــلم]

يعطيكـ العافـــيه اخوي سناعيس الرساليــن على الأيــراد الجميلــ والممتع..

واضافات الأخوان ضيعتنـــا شوي..


ღ
ღ
ღ
تحياتي
عشـق القصـيد