.
.


قالوا حكوا بك قلت وش هم يقولون؟
وش قيل فينا يالوجيه الفليحه

شوفوا مرد الهرج وش هم يطرّون
حتى نعرف مزوّره من صحيحه

كان الكلام من المعادي على هون
بعض المسبّه بالمجالس مديحه

تجيه عربانٍ من الله يخافون
عن الظليمه ينصحونه نصيحه

لو كل خلق الله على الحق يمشون
كان القلوب من الخطا مستريحه

كم واحدٍ بعروض الأجواد مفتون
وهو سلومه يفضحنَّه فضيحه

وكم واحدٍ يطعن وهو فيه مطعون
يذم ريح الناس والشين ريحه

بعض كلام الناس تهمات وظنون
قولٍ تنميّه الوجيه الوكيحه

والظلم لو فازوا هله ما يدومون
راع الظليمه لاتباطا مطيحه

والناس هذا الناس من عصر ذا النون
كلٍ على دربه ركابه مشيحه

مقرود يا من بدّل اللون باللون
بعض الكلام يحرّفه عن صحيحه

والصدق هو والكذب ما هوب مقرون
كان إنها تدرس بلهجة فصيحه

ما يمدح الرجَّال بالشكل واللون
ابحث معه لينك تعرف القريحه

تراك تعرف عنه وأنتم تهرجون
يبين لك من كل جودٍ نضيحه

المستريح اللِّي من الشك مأمون
مع كل خلق الله علومه مليحه

حيٍ عليه الناس بالشكر يثنون
وإلا توفّى خله (الله يبيحه)

وكم واحدٍ لو هو بالألحاد مدفون
ذكراه عند الناس بيضا صفيحه

وكم واحدٍ يجمع ملايين وخزون
مالٍ تنميه اليدين الشحيحه

لا تشكره رملاء ولا فك مديون
ولا حل مشكلة النطيح ونطيحه

ولا له على جاره من الفضل ماعون
لو أن جيرانه تشوف الذبيحه

وكم واحدٍ جيران بيته يحمدون
للجار ريف وللجماعة منيحه

وكم واحدٍ منه العوادي يخافون
زبن المخيف اللِّي كثيرٍ فحيحه

ربعه نهار الضيق فيه يتذرّون
لاجا نهارٍ فيه لجّه وصيحه

وبعض الرجال بهم شريفون وعفون
كلٍ على ما قال يرجع لكيحه

وبعض الرجال بضحكهم يستغلون
يجيبها من نوع زلقه بطيحه

هذاك بيِّن له من الهرج مدفون
خلّه إلا شافك يزيّن سميحه

الهرج له نقَّاض والرد للشون
مزح الجزع يأثر بكبدك جريحه

هذا وأنا ماني من الناس ملسون
لاشك أنا أرفض من تزايد جميحه

قلته وكل الناس غيري يقولون
راعي الظليمه لاتباطا مطيحه

-
#شعر / مرشد البذال

.

الموضوع الأصلي: الظلم لو فازوا هله ما يدومون || الكاتب: رشيد العهد || المصدر: مضايف شمر

كلمات البحث

اسلام ، حوار ،شعر ، كمبيوتر ،تصاميم ، رياضة، معرض صور