2030

لفاني واحدن ماهو بواشي..
يقول الناس والله جاهلينا

نمر اليوم بأحلام الفراشي..
مثل فرعون مصر اصحاب سينا

ولحدن يشرح الموضوع كاشي..
ولكن خذ مني قولن رزينا

تجي سبعن صدوقات المناشي..
وسبعن تاكل اللي ذاخرينا

عليكم بالزراعه والمواشي..
قبل عملاتنا تغلا علينا

ترو باتسر يبي يقل المعاشي..
سوى العسكر وناسن تاجرينا

سلمنا سلم اﻷردن وإنت ماشي..
ودخلنا بالتجاره عازمينا

وعقب الوسع جانا اﻹنكماشي..
وهذي سنة الله بالسنينا

ويجي لريالنا وقت إنتعاشي..
مثل وقتن قديمن خابرينا

مهو هالحين مياتك بلاشي..
يجي وقتن ريالك به ثمينا

بدا دعم التجاره والكلاشي..
ونفطك منخسف خسفن مبينا

خلص عهد المزاين والمحاشي..
ولايبقى على وجهه سمينا

تقشف واضح ومرشي وراشي..
عسى ختامه فلاح المسلمينا

سكت وثم قلت الوقت ماشي..
وبكرا تزهر الدنيا علينا

ودبي تصبح بجانبنا عشاشي..
ونقود الكون كله في يدينا

وننسى وقت كنا به قشاشي..
علينا مراقبين وآمرينا

تبسم قال فكرك ليه فاشي..
تراك آخرهم وهم سابقينا

تواضع واترك الحتسي البلاشي..
ترك توك وقبلك عالمينا

خذو درب التجاره والكلاشي..
وانتم بالتجاره مبتدينا

فلا تضحك على نفسك غباشي..
ترى ميزتكم النفط الحصينا

وغيره مالكم قوه ولاشي..
سوى مكه أمان الخايفينا

نهضت وقلت خلصنا النقاشي..
ولا ابي اسمع ولاحرفن لعينا

كفاني ماسمعت الفكر طاشي..
وهذي اضغاث حلم اصحاب سينا

#قصير_الخليوي