الغايب الي كل مـا نذكره فاح ..
..... ريح المطر.. والعشب .. والعود .. والهيل !!
سيلٍ مشى نبله .. وطيبه .. بالأرواح..
...... ولو جف عنها .. باقيٍ مجرف السيل !!
يعني بقى ماراح .. ماراح .. ماراح ..
....... و( ما راح ) هذي بعدها " هدة الحيل " !!
.
.
http://www.shmmr.net/gallery//images...__________.gif
ليبقى الوفاء على ( قيده ) ..
لأنه وان لم يحضر هنا .. فلا حاجة في أن يحضر بعدها مطلقا !!
.
.
هذي ثلاث سنين .. من غاب .. ما غاب ..
........... فكوا رموز اللغز يا أهل الخطابه!!
ذكرى الرحيل الخالد .. أقلام وكتاب ..
.......تكتب سيَر .. وأقروا حروف الكتابه !!
" شوال " هذا ثالث العيد وش جاب؟! ..
.......نسأل حزن .. والدمع كل الاجابه !!
يوم بنى للحزن مرقى .. ومرقاب ..
...... لأرواحنا .. حتى خذاه ومشا به !!
طلاااال يا فوح العباير والأطياب ..
.........هذا حزن يوم الفراق وعذابه !!
يالي غيابك لاحشى ما هو غياب ..
.....وحتى الحزن بعدك كسيته مهابه !!
يا لابس غيم السما بشت وثياب ..
....– ويا قلّ من مثلك بياضه .. ثيابه !!- ..
من غيرك اليا فكوا لذكره أبواب ..
......تسبق (رحمه الله) قولة (هلا به )!!
طاريك يرفع روس .. ويبلل أهداب ..
..... ولو هي لغيرك .. كانت من الغرابه !!
أبشرك .. لو الجسد فرشه تراب ..
........ يا عل من فردوس ربي ترابه !!
ياما صعد من بين سجده ومحراب ..
..... دعوة .. ودعوة .. علها مستجابه !!
وأبشرك .. ياكثر مالك من أحباب ..
......وأسمك يا كثر الي رعى واعتنابه !!
تقولها من مر عيده بلا خضاب ..
....وقفة وفا .. عيت بنقشة خضابه !!
يالله .. لا تحرم هكالوجه من باب ..
.....جنتك .. يالي ما بقى غير بابه !!
هذي ثلاث سنين .. لو غاب ما غاب ..
....تافي له قلوب .. وعيون .. وكتابه !!
ولا تلحقونا شرهه .. ولوم .. و عتاب ..
.......لو زاد دمع عيوننا في غيابه !!
لأنه لبس غيم السما بشت وثياب ..
.....وأقفى .. وفك الما زرار السحابة !!
.
.
وللجرح بقية ..
.
.
أطـلال
