المساعد الشخصي الرقمي

مشاهدة النسخة كاملة : قصــــــــــــــــه القاضي وقصيدته



ابو راكــــــــان
23-02-2009, 11:39
بسم الله الرحمن الرحـــــــــــيم
السلام عليكم رحمة الله وبركاته


هذه قصه وقصيدة للشاعر المعروف {محمد بن عبد الله القاضي}


عنوانها //{{القاضي والقهوة}}



اما بعد......




هذي قصه وقصيدة مضحكه قليلا وتتألف القصيدة من اثنين وثلاثون بيتاً وهذه القصة والقصيدة قريتها في عدة كتب وهناك اختلاف بين الروايات وسوف نذكر لكم الأختلاف في اخر االقصة والقصيدة واترككم مع القصه


--___-___------___-___--


نبذه عن الشاعر {محمد بن عبد الله القاضي}


-_-_-_-_----_-_-_-_-


هذه قصيدة وسالفة والقصيده تدور حول القهوة والدلال وهي للشاعر المعروف {محمد بن عبد الله القاضي}من مواليد مدينة عنيزة ويرجح الرواة أن وفاته كانت في عام 1284هـــ وهو شاعر بليغ ومعروف له شعره في الغزل والحكمة والوصف


_-_-_-_-_-_-_-


القصة


_-_-_-_-_-_-_-


هذا الشاعر القاضي طول الله أعماركم كان هو وجيرانه كل ليله القهوة عند فلان المهم في يوم من الأيام وهم جالسين صار الرهن بينهم وبين القاضي على أنهم قالوا يا أبو عبد الله كل القصيد اللي نسمعه منك أكثره غزل هل أنت ما تقدر تجيب ؟ قال إلا اقدر أجيب؟ لكن وشو من عليه حتى إني أجيب؟ قالوا


ابدآ( يقول راعي البيت عشا الجماعة القابلة علي)أن جبت قصيده مافيها طاري غزل لا تقل عن ثلاثين بيتاً وإلا يصير عشاهم عليك إذا تعرضت للغزل قال تم ما يخالف اتفقوا على هالموضوع.قعد القاضي معه السبحه يومي بها ويونون بينه وبين روحه يتكلم ويومي بالسبحه


ويهو جس,عاد راعي البيت خاف ان القاضي ياكلهم في الرهن


المهم انه اخذ هاك الغضاره وخذها يبي يجيب فيها ماء من داخل الا يوم دخل وإلا البيت فيه الحريم الكبيرات في السن دائماً يصيرن في جهة منعزلين وفي جهة ثانيه البنات عاد تخبرون البنات لعوبات يدورن مكان يقعدن فيه يا أما في راس الدرجه والا في اسفل الدرجه يجتمعن, الحاصل يوم دخل هو وتلاقيه وحده من هالحريم الكبار والأوالله ان صوتهم طالع ,قالت سليمان كن حسكم طالع شوي قال : إيه والله عندنا القاضي وقاعدين نتجادل في كلام متراهنين حنا وياه انه يجيب قصيدة ما يجيب فيها طاري غزل وان حنا خايفين يا أم عبد الله انه ياكلنا بالرهن


قالت: لا ما ياكلكم


قال:وش لون


قالت:نشوف له دبره خل الماء ويسهل الله


قال: زين وراح.وتقوم وحده من هالحريم ودور وحده من هالبنات دورت أجملهن وقالت تعالي يا فلانه راسك خليه جديلتين وهي تقوم فعلاً تعمل الجديلتين وتخليهن يتلامعن عاد الشعر اسود وزين ولبسوها هاك الثوب وقالوا نبيك لآمن القاضي بدأ في القصيدة وجا في نص القصيدة ادخلي وعاد هي رافعة ثوبها ملبسينها حجول وشايله الغضاره في يدها وطبعاً متخيرين اجملهن الحمره والبياض يتهاوش فيها وعليهاعيون وجهه وهم القصد من هذا أنهم يبون يخلون القاضي (يطلع الرصيف) ولا يستمر في قصيدته هذا قصدهم حتى انه يخل بالرهن,عاد هي ماسكه الغضاره وموقفه عند الباب والحريم جنبها واقفات بس يبي يدخلونها ويخلونها تحط الغضاره وتمشي,جاء الرجال اللي هو راعي البيت وجلس وقعدوا يسولفون والجماعه قاعدين يقدعون وهذولا هم حاضبين من عنده وهو قاعد قال هاه


يا أبو عبد الله وش تقول في الرهن اللي بينا وبينك تبي تجيب قصيدة ما فيها طاري غزل قال:إيه أبجيب في معاميلكم ودلا لكم قالوا توكل على الله قال القاضي:


_-_-_-_-_-_-_-


وهذي هي القصيدة


_-_-_-_-_-_-_-


يامل قلب كل مالتم الأشفاق


منة عام الأول به دواكيك وخفوق


يجاهد جنود في سواهيج الأطراق


ويكشف له اسرار كتمها بصندوق


إلا عن له تذكار الأحباب واشتاق


باله وطاف بخاطره طاري الشوق


قربت له من صافي البن ما لاق


بالكف ناقيها من العذق منسوق


احمس ثلاث يانديمي على ساق


ريحه على جمر الغضا يفضح السوق


حذراك والنيه وبالك والأحراق


واصحا تصير بحمسة البن مطفوق


لا أصفر لونه ثم بشت بالأعراق


صفرا كما الياقوت يطرب له السوق


وعطت بريح فاخر فاضح فاق


ريحه كما العنبر بالأنفاس منشوق


دقه بنجر يسمعه كل مشتاق


راع الهوى يطرب إلا دق بخفوق


ولقم بدله مولع كنها ساق


مصـبــوبة مــربـوبة تـقـل غـــرنوق


خله تفوح وراعي الكيف يشتاق


إلا طفح له جوهر صح له ذوق


اصغر قموره كالزمرد بألا شعاق


وكبار هالطافح كما صافي الموق


وزله على وضحا بها خمسة ارناق


هيل ومسمار بألا سباب مسحوق


مع زعفران والشمطري إلا انساق


والعنبر الغالي على الطاق مطبوق


فالا اجتمع هذا وهذا بتيفاق


صبه كفيت العوق عن كل مخلوق


بفنجال صين زاهي عند الأرماق


يغضى بكرسيه كما اغضاي غرنوق


إلا انطلق من ثعبته تقل شبراق


رنق تصور بالحمامه على الطوق


شكل على الفنجال لونه إلا راق


دم الغزال إلا أنمزع منه معلوق


ذوقه الا منه تسلسل بالأرياق


عليه ماء من صافي الورد مذلوق


كاس الطرب وسرور من ذاق له ذوق


::وإلا يوم مرت الـــــبــــنــت:: قــــــال:


_-_-_-_-_


يحتاج من بيض العذرى الا فاق


غرو يمز شفاه والعنق مفهوق


عـبـث يعيل بحبته ما بعد ماق


وهو يضاهي زاهي البدر بشعوق


في وجنتيه إلا غنج ضوح براق


عجل رفيفه بالطها مــزنة طــبـوق


سحرً كتب من جبر عينيه بأوراق


خديه صادين ونونـــيــن من فوق


كن العرق بخدودها حص الأرناق


نشر على صفـــحات بـلـورة الشوق


إلا تبسم شع واشراق بالأفاق


نـوره يـفـوق البـدر سـحـر مـنـطـوق


بالعنق كن المسك والورس براق


ما مشخص في صدري الشاخ مدفوق


أبو دليق كن بأطرافه حــلا ق


حدر البريم وهافي الوسط مسروق


يمشي برفق خايف مدمج الساق


ويفصم حجول ضامها الثقل من فوق


اظن لو يمشـي بالا سـواقــ


من المـلا ما يمـطـخ الخمس مخلوق


إلا حصل لك ساعه وانت مـــشتاق


فاقطف زهر مالاق والعمر مـلـحـوق


فايلا حضر ماقلت عندي فالارزاق


في يد كريمً كافل كل مخلوق


هــذا وصلوا عـدد مانض براق


على النبي الهاشمي خـيـر مخـلـوق


وطبعاً يوم انتهت القصيدة قالوا عليك الرهن انت اللي اخليت به عليك يا أبو عبد الله


قال: لا وش علي


قالوا نعم


فقالوا احلف ماتحلف يقوله لراعي البيت


قال : لا أجل إلا صارت المسأله وعودت لحلف لا والله الحق علينا حنا انت كريم وتستاهل يا أبو عبد الله ذبيحتين الأولى عن هالقصيده العصماء والثانيه حنا اللي اخلينا بالرهن وسوينا الحركه هذي


:::مـــــــــــــلاحــــــــــظــــــــــ ــه:::


اختلفت الروايات في القصة ويقال ان البنت ليست بنتهم وإنما خادمتهم


وإنها لم تضع الغضاره وإنما مرت من أمامهم وكأنها لا تعلم بوجودهم هذا والله اعلم


والسلام عليكم ورحمة الله وبركاته


أرجو أنه حاز على إعجابكم ونال رضاكم

الحيمري
23-02-2009, 12:12
يمشي برفق خايف مدمج الساق
ويفصم حجول ضامها الثقل من فوق


ضيدان التومي تسلم والله
اما البنت فهي بنت سليمان المراهن للقاضي السالفه هم مسوينها عمد بالقاضي يوم القلوب نظيفه ويبون يتونسون وكلهم يعرفون بعضهم


مع اجمل تحيه

السنعوووسيه
23-02-2009, 19:46
قصده وقصيده قمه
ضيدان يعطيك العافيه
كل الشكر

عاطر ودي

السفاعي
24-02-2009, 04:33
مشكوور يا ابعدي حي على القصه الجميلة
وتقبل مروري

عبدالله الجعيثن
24-02-2009, 09:37
البنت بنت المراهن صحيح



واسمه "شقاق" ومعروفه بزينه



والله لو تمشي "شقاق" بالاسواق...من الملا مايبسط الخمس مخلوق

قمر اللــيل
24-02-2009, 23:36
تسلم يمناك

ابو راكــــــــان
25-02-2009, 00:59
يمشي برفق خايف مدمج الساق

ويفصم حجول ضامها الثقل من فوق


ضيدان التومي تسلم والله
اما البنت فهي بنت سليمان المراهن للقاضي السالفه هم مسوينها عمد بالقاضي يوم القلوب نظيفه ويبون يتونسون وكلهم يعرفون بعضهم



مع اجمل تحيه


اشكرك على الزياده من تنويهك يالغالي

ابو راكــــــــان
25-02-2009, 01:00
قصده وقصيده قمه
ضيدان يعطيك العافيه
كل الشكر

عاطر ودي

اشكرك يالـــــــــسنعوسيه
عز الله انك سنعوسيه حتى بردودك

ابو راكــــــــان
25-02-2009, 01:01
البنت بنت المراهن صحيح



واسمه "شقاق" ومعروفه بزينه



والله لو تمشي "شقاق" بالاسواق...من الملا مايبسط الخمس مخلوق


عجيب..........شكرا على المشاركه

ابو راكــــــــان
25-02-2009, 01:03
تسلم يمناك


اشكرك على المرور

شام
25-02-2009, 13:22
شـكــ وبارك الله فيك ـــرا لك ...
لك مني أجمل تحية .

ماجد علوان
27-02-2009, 10:31
ضيدآن آلتومي

لآهنت يآلغآلي

خوش سآلفه وقصيده

بيض آللـه وجهك

دمت بخير

.,:"زيزوم":,.
11-03-2009, 17:55
تسلم يمينكـ

يا راكب من عندنا فوق خفاق =-= عدل السنام ومورد الزور غرنوق


مدري هذا البيت ما


البلقيته مدري هو للقصيده او

وتوقع انوه هو المشد حق القصيده=البيت الاول


مدري قد اكون مخطي

::

:

دمت بود

..

سنجار
12-03-2009, 01:08
ضيدان

يعطيك العافيه

على إيراد هذه القصه والقصيده

الرائعه