المساعد الشخصي الرقمي

مشاهدة النسخة كاملة : استفسار موجه لشيبانا بمنتدى قصة وقصيده



الفلوجي
11-11-2007, 02:36
بسم الله الرحمن الرحيم
الحمدلله والصلاة والسلام على رسول الله وعلى آله وصحبه أجمعين

السلام عليكم ورحمة الله وبركاته
اما بعد ,,,,,

استفسار موجه لشيبانا بمنتدى قصة وقصيده من مشرفين الا اعضاء

اطلعت على قصيدة منصور بن سعدي الرمالي وهي القصيده الي رد به على هايف بن نعيم المطيري
صراحه واثرتني ببعض الامور من تاريخ شمر العريق والي مفروض نعلمه لاجيالنا واجيال اجيالنا لكي لاتضيع الحقائق من حروب ومعارك لشمر وانا باسمي وباسم كثير ( من عيال النيدو ) من ابناء هذي القبيله لاشك انه ودهم يعرفون القصص والقصايد الاحداث الي جرت بهالمعارك ودنا نكسب وجود اشخاص من العارفين بهالامور وعندهم معرفه واطلاع وحافضين امثال
خالد الشمري
وابوفهد فواز الغسلان
وراعي الوقيد
ولايهونون الربع والي عندهم معرفه بهالامور والله لايحرمنا من معلوماتكم.


والاستفسارت هي كالتالي بالرقام
الاول يقول الشاعر
ونوانا الشيخ ابن هندى بحايل
.......... وحنا من نوانا له نوينا

تحركنا ونزلنا له بعروى
.......... قصرنا عنوة الشيخ وعنينا

تقابلنا الضحى والشمس حيه
.......... وخسر فيها وحنا الرابحينا

ورجعنا للجبل معنا الغنايم
..........عوايدنا ليا منا غزينا


فهذي الابيات تدل على انوه حدثت معركه بين شمر وابن هندي ؟

والثاني يقول الشاعر
وفعلنا المعجزه فى كون بقعا
.......... ذبحنا كل طاغى ماطغينا

ثلاث آلاف من مات وتصوب
..........نهارٍ فيه شاب المرضعينا

نهارٍ فيه سوينا الهوايل
..........على اغلب جمعهم حنا قضينا

صفا بقعا عليها الدم غطا
.......... وكم راس شيخ له وطينا

شريدتهم حلف واقسم وطلق
..........فلا يغزا مداعمره يمينا

وهذي الابيات عن كون بقعا ؟
والثالث يقول الشاعر
وحاصرنا الكويت اشهور اربع
.......... وثلاث قلاع بالجهراء بنينا

ولاذوا فى حما الانجليزعنا
.......... وفعلنا المعجزات ولا انثنينا
وهذي تبين ان شمر غزت الكويت وهل هذي الغزوه هي نفسها الصريف ولا غيرها ؟
والرابع يقول الشاعر
ونخانا الشيخ ابن ثانى واجبنا
..........كما العاده ليا نخينا مشينا

امرنا الضيغمى نمشى وسرنا
..........لبني ياس وهل البحرين جينا

وصلنا لدار ابن ثانى واغرنا
..........على جمع الغزات الطامعينا

وهزمنا جمعهم والكل يشهد
.......... وشواهد ماذكرت القلعتينا

الى يومك باسم برزان تعرف
..........دلايل فعلنا لو مااحيكنا

وهذي الابيات تدل على انوه شمر غزت او فزعت للبحرين وقطر
والخامس يقول الشاعر
وغزينا الجوف يوم رويل زادوا
..........وهدمنا دونها الحصن الحصينا

وذبحنا بالهنادي كل خير
..........بقطع الراس للغادر جزينا

حصدناهم وابدناهم ابادة
..........هزمناهم واخنا البيرقينا

علينا يبتغون الزود لكن
..........تطيح الروس ماتعلا علينا

وهذي المعركه هل هي الي ذبح بها حطاب ولا غيرها ؟
والسادس يقول الشاعر
وغزينا المنتفق باطراف دجله
..........وهزمنا جمع خزعل و ارتكينا

هزمنا اللى مع مبارك يحامى
..........وعن الفزعات ياما له نهينا

ولكنه تمادى فى غروره
.......... تناسى فعلنا مادرى نسينا

دفع قيمه غروره نصف جيشه
.......... جزا للكبر واستهزاه فينا

وهذي الابيات تدل على ان شمر غزو المنتفق ؟

واتمنى كما غيري يتمنى اننا نجد المعلومات الوافيه والكافيه عن جميع الاستفسارات من قصايد واحداث وادري باني كثرت عليكم والله يعينكم على عيالنا



وتقبلو خالص تحياتي

اخوكم
خالد الزوبعي

راعي الوقيد
11-11-2007, 13:21
استفسار موجه لشيبانا بمنتدى قصة وقصيده
ايه اشوا احسبه موجه للشباب قلت اجاوب:)

مادام هيتس اجل اترك المجال للشيبان

ابن غسلان وابن رويتع:thumb:

ننتظر:puzzled:

الفلوجي
11-11-2007, 14:32
هلابك يراعي الوقيد :7ayyoh:
لا أبد انت مو من حسبة الشيبان
بس اذا الربع الباقين كلهم مثلك يبون يشردون من الشيب اجل ماعينا خير محد راح يرد علينا يبن العم


ومشكوووووووووووور على المرور الطيب
وتقبل تحياتي يبعدي:thumb:

الرعب
11-11-2007, 14:38
الاول يقول الشاعر
ونوانا الشيخ ابن هندى بحايل
.......... وحنا من نوانا له نوينا

تحركنا ونزلنا له بعروى
.......... قصرنا عنوة الشيخ وعنينا

تقابلنا الضحى والشمس حيه
.......... وخسر فيها وحنا الرابحينا

ورجعنا للجبل معنا الغنايم
..........عوايدنا ليا منا غزينا


فهذي الابيات تدل على انوه حدثت معركه بين شمر وابن هندي ؟

نعم حدثت معركة عروى المشهورة بين شمر وعتابه سنة 1301 للهجرة
والدليل القصيدة التالية
يقول الشاعر حمود العبيد الرشيد

ياليل سلم لي على الشيخ راكان = سلم على زيزوم يامن واميرة
وقل فعلنا شافة حزام وفاران = يوم على عروى تقطع غثيرة
وان كان ابن هندي نوانا ببرزان = حنا على عروى قصرنا مسيرة
واللي تمنى حربنا مع غزالان = ماحربنا باللي تمناة خيرة
والحرب مايحسب طراد بميدان = الحرب سل الصيرمي من جفيرة
هرج بلا فعل خراط بقيعان = وقول بلا فعل علينا معيرة
عاداتنا من مبطيٍ فرق الاقران = نفرق عشير عن ملامي عشيرة
واللي تمنا حربنا يم برزان = ناتية نقصر عنوتة عن مسيرة
وان كان هو من غارة العام زعلان = من الزعل والغيظ حنا نجيرة
برقطا لها مع فجة الصبح دندان = نتبع ملازيمة عقاب المغيرة
حصان الصميد اللي يسمى صنيتان = هرجة بلا فعل قليل البصيرة
اغواة عرضات الشيابين وفلان = وتجديعهم لهدومهم بالسعيرة

والشاهد قوله

وان كان ابن هندي نوانا ببرزان = حنا على عروى قصرنا مسيرة
ولو كتبت بالقوقل فوق ( عروى ) ستظهر لك النتائج عدة مواضيع ،،،،،،،،،،،،،،

وابوسلطان ماقصر كل شي جاهز بالقوقل انت ابحث وستجد مايسرك ،،،،،،،،،،،،،

دمت ،،،،،،،،،،
الرعــــــــــب

خالد الشمري
11-11-2007, 18:58
بالنسبه لاستفساراتك اخي الكريم فلبركه ان شاء الله بشيبان المنتدى اما نحن الشباب سوف نذكر مانعرفه
الاول معركه عروى على هذا الرابط
http://www.shmmr.net/vb/showthread.php?t=34314

الثاني معركه بقعاء على هذا الرابط
http://www.shmmr.net/vb/showthread.php?t=34544

الثالث معارك الجوف على هذا الرابط
http://www.shmmr.net/vb/showthread.php?t=27553

الرابع كون الخميسيه بين ابن رشيد والمنتفق على هذا الرابط
http://www.shmmr.net/vb/showthread.php?t=40712

الخامس
بالنسبه للمغازي على الكويت قبل الصريف نعم توجد مغازي كثيره بوقت الامير محمد العبدالله الرشيد (المهاد) ولا ادل على ذالك من هذه القصيده العظيمه على هذا الرابط
http://www.shmmr.net/vb/showthread.php?t=30456
وكذالك هذه القصه القصيده والمفخره العظيمه على هذا الرابط
http://www.shmmr.net/vb/showthread.php?t=23819

كل هالشي يبين ان ابن صباح خاف من غزوات الرشيد وطلب الحمايه البريطانيه سنه 1315 للهجره لكن للاسف لااملك معلومات عن حصار الكويت


السادس بالنسبه لعلاقه اماره حائل بقطر فهي قويه جدا وتتضح كليا خلال حرب الصريف علىالرغم من قطع المؤن المتجهه من قطر الى جيش حائل لكن للاسف لاامتلك معلومات عن اللذي تحدث عنه الشاعر رغم معرفتي بوجود قصر تاريخي في قطر اسمه برزان
وهناك خاطره كتبها الاخ الفاضل عواد الخريصي بعلاقه اماره حائل وقطر وهي على هذا الرابط
http://www.shmmr.net/vb/showthread.php?t=45745

اتمنى اني لبيّت بعض الواجب

فواز الغسلان
12-11-2007, 00:05
هلا وغلا اخوي العزيز وانا كنت انتظر احد الاخوه

يدلونك على روابط المواضيع لانني متاكد من وجودهن هنا علشان ارتاح من الكتابه لان صبعي وارمه من

الكتب 00 اما من ناحيه قاسم بن ثاني بقطر فقد ارسل الشيخ قاسم بن ثاني قصيده ينخى فيها محمد

العبدالله الرشيد عام 1304للهجره للوقوف معه وحمايته من الاعداء الذين اتوا بايعاز من الحكومه البريطانيه

بالكويت ومشى محمد بجيش اثار ضجه كبيره وكتبت عنه الجرائد في الغرب وعند وصوله الى الزلفي اتاه

الخبر ان اعداء قاسم قد تراجعوا عندما علموا بمسيره لهم فرجع محمد ابن رشيد وارسل حاميه هناك في

قصر برزان الذي لايزال هذا اسمه هناك وهو اثري تهتم به قطر وقد دخلته انا قبل سبعة اشهر وسوف اورد

لكم قصيدة قاسم هاليومين انشالله وله عدة قصائد بعد ان تراجع الاعداء عنه مثل:




رفـعــت عـنها الـظيم لارغبةٍ بها= لاشك حـمّـايٍّ لكل مصاب

جنحت أنا للسلم ماهي مذله=ولاهيب من وهن الحروب هياب

وعاملت انا بالنصح والصدق والنقا=وترى الله علامٍ بكل كتاب

جمعناه من كسب حلاّلٍ يزكي=وأخرجناه في مايرضي الوهاب

مالٍ تودي منه جملة حـقــوقه= ونفوسنا بخروجهن طياب

حقٍ من الرحمن فرض نعده= ومكارمن سنّة نبي واصحاب



واما من ناحية الشيب فانا شباب والدليل اني يوم شفت الحنيش (الثعبان) قفزت عشر ابواع ولاتلقى واحد

يقدر يقفز هالمسافه وهذا الدليل:





لاسـقـى الـلـه لـيـالـي طـلـعـتــي بالـشـعـيب=مـارويـتــه ولـكـن ذقــتــهــا مــن شــقـــاي
قـصـتـن لـه بـقـايـا فـي حـــيـــاة الاديـــب=ابـي اصـيـد الـقـمـيـري واكـبـسـه فـي غـداي
فـي جـحـيـم الـقـوايـل والـهـبــايـب لـهـيــب=جـايـعـن عـقـب لـقـمـه ذقـتـهـــا فـي عـشـاي
وقـمـت اسوي طـعـامي عـنـد ظـلـعـن قريـب=وطـلـحـة الـشـوك صـارت عـن عجاجه قفاي
ويـوم زان الـقـمـيـري صار ريـقـي صبـيـب=قـلـت احـطـــه ولا احـدن راح يـاكـل مـعـاي
انـطـلـق لـي حـنـيـشـن مـن شـقـوق الشـطـيـب=والحـنـيـش الـمـنـقـط هـو سـبـايـب غـثــاي
اسـودن ســـم نـابـه مـايـفــيـــــده طـبـيـــب=وخـفـت مــن لـون عـيـنـه لاتـسـبــب عـمـاي
والـلـه ان الـجـدايـل مـن عــيــونـه تـشــيــب=ولاذكــرتــه بـوســط الـلـيــل جــانـي بـلاي
صار صـدري شـخـيـره بـالـحـنـايـا غـريــب=يـمـغـصـن وسـط بـطـنـي والـسـلامـه هـواي
وقـمـت اراعي طـعـامـي مـن ردات الـنـصـيـب=صـعـب اخـلـي طـيـوري بـالـخـلا مـن رداي
قـلـت لـه لـيـش زرتــن يـالـعـيــن الـصـلــيــب=لـو تـأخـرت سـاعـه كـان تـضـبـط مــعــاي
وقـمــت افـكـر بـذبـحـه في طـويـل الـعـسـيـب=وان حـصل فـضخ راسه بالـعـصى هـي مناي
لـو قـضـعـنـي بـنـابـه شـمـس عـمــري تـغـيـب=وتـفـقــد الـنـاس كـلـه طـيـبـتـي مــع حـلاي
اقـطــم الـذيـل هــذا نـهــشــتــه مـاتـخــيــب=ولـو يـنـوشــن بـنـابـه كــان امـوت بـضـحــاي
وقـمـت اراقـب عـيـونـه مـثـل عـيـن الحـريـب=وسـدرة الـشوك طولي راح تـشــعـط خــصـاي
صعـب اقــابـل بـخـيـلـن طــق بـابـي طـلـيـب=ومـن نـفـخ عـنــد وجـهـي ضـاع مـنـي رجــاي
وهـو يـجـيـنـي وانـا اقـمـز مـع طـريـقـن صعـيـب=طـايـرن يـاجـمــاعـه فــي غـبـايـب سـمـاي
اوجـس الـنــاس تـحـتـي والـخـوافــق حـطــيــب=عـقــب ماكـنـت قـاعــد سـاجــعـن فـي خـلاي
كـيـف عــديــت طـايـر مـاذكــرت الــقــلــيــب=ولـو تـهــلـفـيـت وسـطـه غـيـر يـقـطـع ضناي
خـطـوتـيـن وقـــمـزتـه كـالـحـصـان الـعـريـــب=ولو بـغـيــت الـمـبـارز كـان طـحـت بخـطـاي
صـار لــي مـن عـيـونـه بـالـشــغـايــا هــذيــب=وهـو خـسـيـسـن واخــبـره يـبـي يـلـعـن ثـواي
لـو بـغــيــت اتـعــدى لـلــهــلال الــخــصــيــب=سـرعـــتــي فـي زيــــاده لاذكــرتــــه وراي
الـكــتـاده وطـــيـــتـــه بـــس شــوكـه حــبـيـب=والــشــمـاغ بـيـمــيـنـي قـاضــبـه مـن ذكــاي
دام راسـه عـريـضـن تــقـل عـلـبـاء خـطــيــب=وش يـفــيــدن قــبـالـه يـاجـــمــاعـه عــصـاي
خـطـوتـي خـمـسـة اذرع بالـشـجـر والـكـثـيــب =وكـل صـوتـن يخـرفــش يـقـلــعـن عن مـــداي
واحــمـــد الـلـه لـحـالـي مـانـظــرنـي صـحـيــب=يـدخــل الـلــيــل وقــتــي مـاذكــرت اخـويــاي




علشان تدرون ان كل كلام ماعليه برهان ماهو صحيح وهذي اكبر برهان00

ولايسويها غيري الا ابوعتيق بس00

الفلوجي
12-11-2007, 03:41
تسلم يخوي الرعب
وماقصرت ومشكور على المرور الطيب والمشاركه الاطيب

وتقبل تحياتي يبعدي

الفلوجي
12-11-2007, 03:51
:7ayyoh:هلابك اخ خالد:7ayyoh:

ومشكور وماقصرت يبعدي وتسلم على الروابط الي افادتني الكثير والله
ومشكور ثاني مره على الجهود الطيبه الي تقوم بها
وانا اشهد انك اديت فوق الواجب مو بس بعضه
لاخلى ولاعدم يبن العم


وتقبل تحياتي

الفلوجي
12-11-2007, 04:13
هلابك يبو فهد
وابد من بعد هالقصيده هذي شباب ورياضي بعد

ومشكور على القصايد
وماقصرت



تقبل تحياتي

راعي الوقيد
12-11-2007, 08:05
خطوتي خمسة اذرع بالشجـر والكثيـب
وكل صوتن يخرفش يقلعن عـن مـداي

ههههههههههههااااي:thumb:

الله يقطع شياطينك ههههههههه

صح لسانك ايه هذا الصدز:)

طرى علي العاجزة بسنة من السنين:)

يسلموووووو خيوووووووو

:goooood:

الفيتو
12-11-2007, 09:46
اصح لسانك يابو فهد

لاخوه كلكم تسلمو على الروابط والموضوع والردود

وبالنسبة لبو فهد شباب :surprised بس مانت بصغر مني :7ayyoh:

خلف الرويتع
12-11-2007, 13:43
هلا ابو فهد الحمد الله على السلامه

الكتـاده وطيتـه بـس شوكـه حبيـب
والشماغ بيمينـي قاضبـه مـن ذكـاي

عزالله انك شباب الي هذا فعلك. اشو اني ماني معك والله ماقد انحاش الله يكفينا شرك انت وديباً حائل يبعد حي خلك مثل على الساحل عند السمك وعلى الكرنيش وطلب من افضل مطعم ياصلك وانت تنتنت محمولك معك وكنكت مشبوك ماهو قمري وقدور ونفلونزا طيور


ابو فهد الى وايش صار على قدرك وغداك انت رجعت خذيته او بمكانه الى هالحين هههههههههه

فواز الغسلان
12-11-2007, 22:44
هلا ابو فهد الحمد الله على السلامه

الكتـاده وطيتـه بـس شوكـه حبيـب
والشماغ بيمينـي قاضبـه مـن ذكـاي

عزالله انك شباب الي هذا فعلك. اشو اني ماني معك والله ماقد انحاش الله يكفينا شرك انت وديباً حائل يبعد حي خلك مثل على الساحل عند السمك وعلى الكرنيش وطلب من افضل مطعم ياصلك وانت تنتنت محمولك معك وكنكت مشبوك ماهو قمري وقدور ونفلونزا طيور


ابو فهد الى وايش صار على قدرك وغداك انت رجعت خذيته او بمكانه الى هالحين هههههههههه





لاوالله الا قلت تنعاف انت وطيورك عساهن زنقبوط والعمر ياشامان00

ويمكن انه قعد ياكل من طيوري ومالحقن الداب هن اشغلنه000


لكن انا كم اقراها لام فهد علشان تشوف طول قمزتي وتهابن00