المساعد الشخصي الرقمي

مشاهدة النسخة كاملة : الامير عبيد العلي الرشيد و والي من ولاة الترك



راكان العياده
21-03-2002, 02:17
مساكم عنبر................

هذي قصيدة الأمير الشاعر عبيد العلي الرشيد يخاطب فيها أحد ولاة الأتراك عندما طلب منه فرسه (كروش) يقول فيها:


بابيه أنا لكروش ما عطي ولابيع ***** قبلك طلبها فيصل1 وابن هادي2

بابيه لو كثرت بالقول ماطيع ***** هل كيف تبغيني اسلم جوادي

بابيه مايرهم على مثلها البيع ***** ولا يجي مثله بقوده امهادي

ما جمع اصله بالقراطس تجميع ***** اصله يعرفونه جميع البوادي

باغ الى من لقموا المصاريع ***** وصاح الصياح وثار عج الطرادي

انهج عليها وانعدي بالتراثيع ***** مثل الفحل لاصار وقت الهدادي

واصلها لعيون بيض مفاريع ***** فوق الحنايا والسبايا غوادي

هذاك بيعه والصبايا مفاريع ***** بين القنا ومخفرات الهنادي

هذاك بيعه كانك تفهم البيع ***** الى منهن جلبن بسوق المزادي

يابيه انا لاسمع جوابك ولاطيع***** هرجك بمقلة ناظري والفوادي

ياسابقي مانرخصك بالمطاميع*****حتم ولو قيل ارفعوا بالجوادي
n
ابغي الى ثار دخان الزعازيع***** وحطو على عجلاتهم العدادي

بيوم يشيب من حذاه المراضيع***** حدين وحاديهن من الخوف حادي

انطح ورا ربعي وجيه المداريع***** وافك عليها دينهم والعبادي

وانشد عني وعنها بعاد المفازيع***** هو هرجنا ذا كذب والا وكادي


حلفت ما يطري علينا بها البيع ***** الى الحشر مايفخت سواده سوادي

مادام راسي الارياح الذعاذيع ***** بالعون طالبها من الناس غادي

وصلو على محمد خير المشافيع ***** اللي لنا يشفع بيوم التنادي


1- فيصل الدويش
2- محمدبن هادي شيخ قحطان


اخوكم :

راكــان العيادة

غازي العلي
21-03-2002, 02:59
الاخ الغالي راكان العياده

هذا ما عودتنا عليه

الطيب الطيب ولاشيء غيره

الف شكر وتقدير لايراد هذه القصيده المرجع

للفارس الاشهر والامير عبيد الرشيد

تقبل تحياتي

راكان العياده
21-03-2002, 04:36
اخوي : محارب الخيال

مشكووووور على التعقيب.......


وايضاُ لاشكر على واجب .........لانه من واجبنا على لغتنا العربيه ان تبقى هذه القصائد خالده لانها رمز للابداع.




وانا اعتذر لك عن الفترة الماضيه بعدم الرد والمشاركة لاني كنت مشغول بالاختباراتز

واذا ممكن ودي اسألك سؤال شخصي؟

دام فضلك........

انتم بالاحساء والا بالخفجي والا وين؟



اخوك:
راكان اعيادة

al_3yadah@hotmail.com

أبو ليان
22-09-2008, 06:10
قصيدة جميلة تبين مدى أهمية الكروش لعبيد
صح لسان عبيد وعليه رحمة الله الواسعة
وصح راكان العيادة وجزاه الله خير وأرجوا أن يكون بصحة
وعافية الآن ودمتم على خير ...

نايف الصنيدح
23-09-2008, 01:51
اخوي راكان
هذه شخصية فارسنا الشهم عبيد الرشيد رحمه الله والمسلمين
عدم الخضوع لأي مخلوق
وله قصائد اخرى يتحدى فيها خصومه واعدائه
هذه صفات الرشيد شموخ وعزة
وأمراء شمر عامة
تحياتي لك استاذي الكريم
ونطلب المزيد

منيف الوبيري
23-09-2008, 03:10
تعيش والله ياراكان على النقل المتميز ...

الله يرحمك يالأمير ..

راعي الدليميه
13-10-2008, 22:41
الله لا يهينك يا راكان على القصيده الجميله والفارس الامير.

لكن عندي ملاحضه:

فيصل ,: ليس فيصل الدويش . كما سمعته من المؤرخ والراوي خالد الشمري.

وتقبل مروري ....