هل فيه من لقب بالجنازه غير الجنازه المعروف؟

[الصيرمي]

السلام عليكم:)

في موضوع يتكلم عن مشاهير فرسان الجزيره العربيه والي يظهر لي ان كاتبه مطيري:)

لانه مخلي مطير كلهم فرسان واذا عديتهم تجدهم اضعاف اضعاف فرسان القبايل الثانيه:)

الى هنا ومافيه مشكله

لكن المصيبه انه ذكر التالي،،،،،،

3 - عبدالعزيز ابن رشيد (( الجنازه )) من حاضرة شمر حاكم حائل ونجد بعد وفاة عمه محمد ابن عبدالله ابن رشيد كان عبدالعزيز شجاعا جبارا طاغيه اهتال الكتاب الاتراك الذين زاروه اثناء حكمه لنجد من درجة شجاعته وقارنوه بشجاعة على ابن ابي طالب وقالوا انه لو وضع قالب ثلج فوق راسه لذاب في خمس ثواني مبالغة في وصف شجاعته لكن رغم شجاعته فقد كان طاغيه ياخذ امور السياسه بالقوه والعنف والاذلال حكم نجد منذا عام 1315 الى عام 1324 هجري لما قتل في روضة مهنا قرب الزلفي وكان خصمه هو الملك عبدالعزيز رحمه الله الذي كان يسعى لاسترداد ملك ابائه من آل رشيد قيل فيه ان ابن رشيد هو ((اشجع الحضر )) رحمه الله .

4 - متعب ابن جبرين (( الجنازه )) فارس عظيم آخر حمل لقب الجنازه لشجاعته وفروسيته واقدامه في الحروب وهو امير العونه وكافة بني عبدالله من مطير قال فيه ابن بليهد في كتابه وابن بليهد كان معاصرا لتلك الاحداث (( متعب ابن جبرين افرس الناس في زمنه )) كان شاعرا مجيدا وشيخا وعقيدا يجر الجيوش ويسيرون جماعته العبادله خلفه حارب عتيبه وحرب وغيرها من القبائل ونزل بجماعته العبادله من الحجاز واستولى على كثيرا من املاك تلك القبائل , ومتعب ابن جبرين هو اخو الفارس تراحيب ابن شري ابن بصيص من الام امهم بنت فدغوش المريخي اعتقد انه قتل او توفي بين اعوام 1320 الى 1330 هجري لانه لم يردك الاخوان رحمه الله .

شوفوا كيف وصلت بهم الغيره انهم يقولون ماهو بس انتم ياشمر عندكم الجنازه حتى حنا

ههههههههههه

ايش رايكم يالاخوان بالكلام هاذا:)

واذا تبغون انزل لكم الموضوع كله الي يتكلم عن مشاهير فرسان الجزيره العربيه نزلته:)

بس خايف يجيكم الضغط من الكلام المكتوب فيه وعدد فرسان اياهم:)

تحياتي:)

[شريف روما]

تسلم عالموضوع
بس المعروف انوه محد لقب بالجنازة غير اخو رثعه - عبدالعزيز بن رشيد -
وصراحه انا ملاحظ على بعض المطران يزورون بالتاريخ
حتى معركة ام الجماجم واللي صار به ينكرونوه
لا وفوق هذا يقولون انهم انتصروا على شمر .... لا ومو بس هشكل يقولون شمر نحشوا من ارض المعركة :)
ويقولون بسالفه ثانية اثنين او سبعه من المطران وقفوا لجيش بن رشيد :)

يعني تزوير بتزوير بالتاريخ .... لكن كل شي معروف ومحد راد عليهم

محد ينكر ان مطير قبيلة كبيرة وله تاريخه وفرسانه
لكن مو للدرجة اللي متخيلينه هم

تسلم يالصيرمي على الموضوع المهم
يعطيك العافية ولاهنت

تحياتي

[الصيرمي]

شفت كيف الجماعه المطران وين وصلت بهم الدقاره:)

السناعيس يالزقروطي افعالهم ماحد يقوى لها:)

تحياتي:)

[مشــــعل]

وش نوحكم الله يهديك
عينوا خير واذكرو الله

موضوع ممتاز لكن تناولتوه بشيء من السخريه
الالقاب العزاوي تتشابه بين الرجال والقبايل
مع التفريق ان اللقب للذي يستحقوه
صحيح ان بن جبرين يلقب بالجنازه لكن مااظن راح يقارن ببن رشيد
الفعل يفرق

اما كون مشذوبه اللي كان بوه عدد قليل من فرسان مطير يمكن لايتعدى العشره
وقفوا بوجه بن رشيد هذي حقيقه
لكن المطران سردوا القصه بشكل خاطي
ونسبوا به النصر للمطران بانهم كسروا بن رشيد
وهذا غير صحيح بن رشيد ماحضر المعركه وينسب النصر لهم لصمودهم امام خيل بن رشيد فقط وهذا فعل ماهو سهل
اما ام الجماجم مثبته

لكن ودي لو ماستهزيتوا

[خالد الشمري]

ابن العم الصيرمي والله انك تدخل بعض المنتديات فتقول انهم هم اللي حكمو ماهو حنا وعلى كلامهم تحسب انهم حاكمين البلاد العربيه :)
وعلى ذكر الفرسان اوّل مره نسمع ببعض الفرسان اللي يذكرونهم .....لكن خلّه على الله وعلى طاري الفرسان خذ نموذج بسيط لفرساننا وكلهم معروفين وليس مجهولين مثلهم :)

حبيّت اقول لك يالصيرمي والله مايحصون فريّس الاسلم لحاله ولا يعرف لهم عدد وهم يعتبرون اقل عدد من عبده وزوبع
اخيرا حنا مانقلل من اي قبيله لكن التاريخ يثبت ان الناس تتلانا مانتلاهم ويوم انه باليمنى خذينا اغلب مناطق العراق وكذالك سوريا والاردن وحكمنا نجد

اخيرا هذولا بعض واكرر بعض واكرر بعض فرساننا وكل اسم لحاله فارس معروف ماهو ...
يقول ونس بن حشم الجهيلي :


فعل الضياغم ليه ليه تجحدوني=ياحل يوم به تغيب الذهوني
وعبيد يجهجلكم وله تعرفوني =ومن ناشه (بصرخه) على القاع ماسار
عبيد وعبدالله صعوط المجانين = وطلال ومحمد على الحرب قاسين
وزامل وسعود بالملاقا ثقيلين =ومتعب ومشعل كان حس الرمي ثار
وعبدالعزيز اللي يسمّى الجنازه =الليث اخو رثعه نجح بإمتيازه
اللي كواك وزاد كيّك حزازه=عبدالعزيز اللي للأضداد قهار
نعم بأخو رثعه لاجاء مجاله=اللي تربّى بالفخر والشكاله
كم عزبةٍ دلّى يقسم حلاله =وكم عزبةٍ فاجاه مع وقت الافطار
زلازل محدن يداني حماها =بمصقلات الهند تعدم إعداها
ليا حل يوم به تسمع عداها =الكل منهم كنّه الزيز لازار
وش قال بن طوعان بالقيل ياشين=ياغنيم عندك هايس نطلبك دين
انحش وحنا لك بالاولاد قافين =كلام بن طوعان بالقيل تذكار
انحش وتر وراك جمع سديدي =ناصلك لو تنحاش عنا بعيدي
وعبيد لغنيم بصرخه يصيدي =غنيم بأثر هايس لاصرت دوار
وبقعا وش قال عبيد هاكالحين =اللي ذبحت بشذرة السيف تسعين
ايضا يقول اذا بغو مستعدين = هذا كلام عبيد ماهو معيار
وشنوح يوم انك تعذرب جملنا=وهذي فعول جدودنا هم واهلنا
ليا ثارت الهيجا ترانا نزلنا=ولا جاء النذر يرخي ضعنا على الدار
سبيّت يالملعون سعود وسبهان=وبندر لاصار المعاند كحيلان
ليصار يوم به تقل ضرب سدّان= يبين يشدا للبليهي إليثار
يانعم والله يوم قيل المحمد=جربان لامن العج بالجو عمّد
عدوّهم من فعلهم ماتحمّد =عقب الحرار ومن صواريم سنجار
الفين نعم يوم قالو بنيّه=وعبدالكريم القرم ذيب السريّه
مع احمد الياور مقر الحميّه= ومطلق الى دار النقا داس الاخطار
ونعمين بحرّوش وعيال حرّوش = تاريخهم في ابيض الطرس منقوش
لاصارت القالات يزيد بالهوش= شيخ ولد شيخ على الضد كسار
وصفوق لامنه حصل حزم كلاّب= قرم شجاع للمعادين ماهاب
لياحل يوم به ضربات الاطواب= يذوق ضدّه منه جرعات الامرار
والهادي المشهور وابن الصديدي=والذيب الاحمر للمعادي يصيدي
ودهام والعاصي نحاز الضديدي= عيال المحمد باللقاء تاخذ الثار
وهايس وابن فلاّج قرم شجيعي=وابن هذيل اللي لعمره يبيعي
ومفّوز التجغيف ساسه رفيعي=وابن عمود اللي على عداه دمار
ونعم بأخو سعدى يوم قيل سطام=ابن فنيدل للمعادين لطام
مقدم هلا العصلا بضربات الاسهام= حريبهم يبقى على الغبن صبار
ونعمين بكايد وبالفعل كايد = ابن فنيدل له فعول وعوايد
لياحل يوم به ضرب ونكايد =يفوز اخو سعدى على عداه بسطار
ونعم بمنزّل كل ماحل طاريه=وعبدالله المصطور يمشي مماشيه
ابراهيم و دخّيل بعاد المناويه=وصايل حكيم الراي ويعز للجار
ونعم بالمحمض نايف ونواف= ومحمد وملاقي فعلهم ناف
وشافي صليب الراي بالفعل ينشاف= نعم(ن) بهم لاصار للرمي دندار
ونعم ببسام وصامل وروسان=وفرز وابن القطعي وعيال المحيلان
وابن جروح والقنيعير شجعان= وابن الجهالا لك خزام ومسمار
فرايسه وبريك وابن العمودي=وعيال سيف اللي فعله يزودي
وعيال الجرباء هم كعام الحسودي =عقب الخريصي يوم ساجر وسّجار
ونعم(ن) بالغالب وعيال النويميس= وعيال المرمش كاسبين النواميس
لاجيت اهل موقق تضيع الهواجيس=ويرتاح بالك عندهم بن وبهار
ونعم بأخوة سلمى وبالشيخ مفتاح= كم راس شيخ عندهم باللقاء طاح
لاصار بأطراف الدبش ضرب وارماح=عيال الركيّب للعدو سور واسوار
نعم (ن) بطلال وبالشيخ فزاع=ورباح وابن الذيب لاصار مفزاع
وبنيّه وجميعان وافين الابواع=ونعمن بأخوة سلمى لاشبّت النار
ونعمين بشايع وبعيال شايع=اهل البيوت العاليات الرفايع
عدوّهم ذاق النكد والقطايع= وليا تناخو عند حثات الاوبار
يتلون ابو طلال الشيخ غضبان.= نعم(ن) بطلال ومصيخ وفرحان
ورميح وطعيسان وابن سحيمان=ريف النشاما لا لفو له بمسيار
ونعم(ن) بهتاش ونعم(ن) بمرعيد=وعيال مرعيد ابطال صناديد
وعيال هتاش كعام الاضاديد=وابن اللويمي والمشّنا لهم كار
ونعم بعبدالله ومتعب وجبرين=وعبدالكريم وبندر فعلهم زين
وسفاح مع سفاح وبندر عزيزين=عيال السنعوسي فعلهم يحصر إحصار
نعم (ن) بابن علي وببن بعيجان= وابن نهيّر وابن هباس اليا بان
والشيخ ابن سوقي وابن جدي شجعان=ونعم (ن) ليا قالو لنا جمع ويبار
ونعم (ن) بمطني وبندر والعيالي= ومطني على صفراه والعمر غالي
لياصار بوسط الخيل له إجتوالي=مطني ليا حل الضيق له فعل واذكار
ونعم (ن) بابن عجل وفي ابن هباس=وابن عجل على المعادين مدباس
ليا صار به يوم مثل ضرب نّحاس=ضرب الفشق مثل هماليل الامطار
ونعم(ن) بعدوان وبالشيخ ضاري=وبدر وابن الوجعان قولي ٍ جهاري
ومشل وسالم ناطحين الخطاري= وابن الجنفاء الشيخ هو راع الجوار
ومحمد الضاري علىالفعل ضاري= ونعم (ن) بضاري باللقاء مايداري
وعدوان زيزوم السرب بالمساري =ليا ثارت الهيجاء غدو مثل الازيار
اسالمه بالطيب ماهي بسيطه= كم واحد ٍ لووْ بحلقه شريطه
هل الحميّه ماخلطهم خليطه= اسالمه ليا قالو صغار وكبار
ونعم(ن) بابن سعدون وابن القليبي=والحمدي والهربيد سقم الحريبي
وابن العميم اللي لضدّه عطيبي=وابن سند قرم ٍ شجاع ٍ وغيار
ونعمين بابن قدور وابن الذنيبي= وبن جعاري باللقاء له تهيبي
وابن الفديغ للمعادي عطيبي =ونعم (ن) ببن طوعان نقول تكرار
ونعم ببن طوعان قال القصيدي= في مجلس الامير ابن الرشيدي
الفين نعم بكل عيال السويدي=بأولاد صقر قلتها سر وإجهار
نعم بدرزي هو ومتعب مع عبيد= ابن عردان اللي يحد ضدّه على الحيد
ياحل يوم فيه ضرب وتنكيد=ونعم (ن) بابن عردان مابه انكار
ياما جرى للنضى قبل امس= الجيش يحمس علينا حمس
يالبيض يامخضبات الخمس= شومن لبرجس هاك النهار
نعم(ن) بكاتب وعيال الصنخ= عدوّهم يفنخونه فنخ
ليا حل يوم يطنخ به طنخ=عنهم عداهم راحو فرار
نعم بابن خمسان وابن رخيصي=وابن نبهان ان حل فيها تخصيصي
وابن رخيص بالمعاني بخيصي=يبين بيوم تضيع فيه الانظار
نعم(ن) ليا قالو لنا عيال الدعوجي=عيال الدعوج اللي لعداها تعوجي
شلقان فازو بالفخر والبروجي=يتلون الكاسب فوق عدلات الازوار
نعم(ن) بالكاسب وابن الغريّب= قرم ٍ على حوش الصعيبات طيّب
فعل غريّب بالمعادي يهيّب= يبين في يوم ٍ به الدم نثار
والشيخ ابن ثنيان قرم ٍ شجيعي= على المعادي عاصي ٍ مايطيعي
يبين في يوم ٍ يضيق الوسيعي=حر ٍ يدّلي مخلبه عفر واطيار
ونعم(ن) بثنيان وابن ثنيان = اولاد الازمل يوم قديم الازمان
شيخ ٍ ويتلي بيرقه سبع سلفان= يتلون ابن ثنيان شيّال الاقطار
وابن زويمل يوم وقت الحروبي= هو راعي البيرق يدوج الدروبي
وليا اعتلو ذروات زان الركوبي=وابن زويمل للمعادين سبار
وابن الحدب وعيال كل العجرّش= وشويش من الشيخان ياما تفرّش
عينّت الباشا طش راسه يعرّش=بالسيف لارقاب الشريرين بتار
وعّراك يوم انه نخى للزقاريط= ماله شدي ياكود مطلق ابا العيط
قولي دليل وبالتماثيل تنقيط= عراك لجموع المعادين دمار
ونعم(ن) بمسلط شيخ كل المساعيد=ونعم بابن عايش له النعم ويزيد
ومشل لامنّه ورّد السيف توريد= يضرب بحد السيف قاطع وبتار
وابن وتيد وابن الربع = لامنّه نخوه الربع
سند الربع له طبع=العدو يجبره إجبار
واهل الملحا كاسبين المديحي = نعم بهم لاصار ضرب ٍ صحيحي
كم راس شيخ ٍبالملاقا يطيحي= يوم اللقاء ماله على الناس ديار
مدحت شمر مع فخوذ امراها= تفوز بالعلياء سواعد لحاها
لاجاء مجال الحرب منتم واياها =اسلم وتومان ٍ وعبده وسنجار
مدحت شمر صغيره مع كبيره= وفخوذها مع شيخها مع اميره
عشيرة ٍ أوي والله عشيره=عبيدها وصناعها مع الاحرار
شمر انتم وازيتوه في دياره=شمر نهار الكون تهدي عماره
ياحل يوم ٍ به تطيّر غباره=عاداتهم بالفوز وافين الاشبار
شمرهل االعلياغصبٍ ماهو طيب=وساع الطعون ومكدّرين المشاريب
شم هلا الردّات وساع المضاريب= ليا حل ضرب ٍ بأم خمس ٍ وكرار
شمر هلا الردات يوم الحرايب=وعادات غلبا يجدعون الضرايب
شومن لهم يالابسات العصايب=شمر هلا العلياء على الموت عبار
يقول العوني بالمثايل ماختفاء= نعم(ن) بشمر يوم ردّيت الثناء
والله يالولاهم فلا يذكر الوفاء=ولا للحميّه والعلا مدار
يقول العوني والمثل ضمن قيله=وضحّت معناها وهذا دليله
اما هلا العلياء فنعم القبيله=لاشك ماهد الجبال جدار
نعم(ن) بشمر يوم صارت كراره=صوابهم ماينضمد بالجباره
هل الحميّه كاسبين افتخاره=من دونهم كل الجبال قصار
امجاد شمر ماخذاها الكتابي= وساع الطعون مكللين الحرابي
شمر ليا صار الخطر ماتهابي= افعالهم تعرف وشيفت بالانظار
وين الطنايا وين شرابة الهيل=وين الرجال اللي تعدّي عن الميل
صبيان غلبا وين هاك الحلاحيل=اللي يسوقون العدو بأم شنكار
اولاد غلبا بالحرايب مزاهيف=كم ساعة ٍ به شللو شذرة السيف
حنا خزام اللي براسه زعانيف=اولاد غلبا فعلهم مابه انكار

[شريف روما]

لااله الا الله

والله يامشعل اني ماقاعد اضحك بس قاعد اقول حقائق
وانا ماخذ السالفه بجد وماخذيتها مزح

بس ممكن نعرف قصة العشر فرسان من مطير ؟؟
وتقول انوه ابن رشيد ماكان حاضر
يعني فرسان شمر بكثرتهم مابهم شجاعة الا بحضور بن رشيد
ومعقولة جيش بكبروه مايقدر لعشر فرسان نتمنى ذكر هالسالفة عشان يتضح الكلام الصح من الخطأ


...................
ابوفراج تسلم على القصيده الطيبة
(( وعّراك يـوم انـه نخـى للزقاريـط****ماله شدي ياكود مطلـق ابـا العيـط
قولـي دليـل وبالتماثـيـل تنقـيـط****عـراك لجمـوع المعاديـن دمــار ))

تكفى اذا تعرف تفسير هالبيتين قولي ... ويعطيك العافية مرة ثانية

وتحياتي

[مشــــعل]

هلابك يالزقروطي
الاوله انا معاكم باللي تقولون
بالفعل هناك قبايل يوم هي للسيف مالهم ذكر
واليوم بدوا ينسجون بطولات بالانترنت

بالنسبه لوقعة مشذوبه
المطران قالوا انه حوالي عشر فرسان من مطير وهم العوارض تواجهو مع بن رشيد بالميدان وكسروهم فرسان مطير
وهذا شي مايدخل بالعقل عشر فرسان ويكسرون جيش باكمله مع العلم اني سمعت ان بن رشيد قبل تلك المعركه كان توه راجع من البحرين بعد ان اخذ عليه الزكاه

الصحيح ياخوي
ان عند رجوع بن رشيد وشمر شافوهم العوارض وقالوا وكاد ان بن رشيد يبي يغزانا
تشاوروا وصار الراي انهم ينوخون الركايب ويكمنون للي يجي من خيل بن رشيد
الجنازه كان ناوي يغزي مطير ارسل مجموعة فرسان سنع حيافه
وكان عددهم قليل يوم وصلو للموقع كان العوارض كامنيين لهم
رموهم وذبحوهم
تأخروا المراسيل على بن رشيد وارسل مجموعه ثانيه ونفس الشي فاجأوهم العوارض ورموهم
جلسوا على هالحاله ياما اظلم الليل وهم يجون العوارض ويفكون الركايب ويهربون بالليل

الشاهد فيه بيت لحدى العوارض يقول بنصفوه
وقام يرسل علينا خيله ارسالي
بن رشيد دري ان سبب تاخر المراسيل ان العوارض كامنيين لهم
جاء يمهم لقاهم منهزمين
وسأل عنهم قالوا هذولا العوارض
عاد عقبه غزاهم بديارهم وذبح هذولا العوارض كلهم
وسميت المعركه "بأم الجماجم " لكثر القتلا من مطير
وفيه من يسميه "ذبحة هل العارض"

لكن المطران كبروا السالفه وحرفوا به وقالوا انهم تواجهو مع بن رشيد بالميدان
وهذا غير صحيح

وعافك الله يابو عراك
ام البيتين واضحات مثل الشمس لكن ماتعدى ابو فراج

[شريف روما]

ياملا العافية يامشعل
الف شكر لك على توضيح السالفة
والله ماعرفته الا تو
______________
وليه ماعلمتن بالبيتين يوم انك تعرف:)
يمكن ابوفراج نسى الموضوع

ماقصرت يامشعل

تحياتي

[راعي الوقيد]

إذا حضر الماء بطــل العفــــــــــــور:)

يالله حيهــم

مامن جديـــــــد يضاف عندي:)

مشعـــل وخالـــد وإضافات راااااااائعــــة لاهنتــوا

سلااااااااااااام ...
..

[شموخ]

أهلين بالصيرمي

والله حتى أنا سمعت بلقب الجنازه قبل كذا وكنت مصره إنه للرشيد لأن المشهور واتوقع المتعارف عليه عند الاغلبيه إنه للرشيد والناس تقول إن عندهم جنازه:) ومابغيت أسأل هنا خفت تحصل إثارة مشاكل :)

أما بطولات مطير ماعندي أي خلفيه عنها وكل ديرة فيها خيرها من رجالها :)

بس ياخوي أنا حتى لاحظت العزاوي عند بعض شيوخ شمر ويمكن عزوة واحد منهم مثل عزوة أحد فرسان القبائل الأخرى بس ماهو مطيري :)


تحياتي لك
شموخ

[ابوالفيصل]

انا أشهد نك تقول الصحيح يالصيرمي

[أجا]

الصيرمي
الله يعطيك العافيه
وبالنسبه للجنازه فاخواني ماقصروا بس حبيت اضيف ان للقب
الجنازه لم يلقب من قبل شمر انما من لقبه هذا اللقب معروف ولقبه بهذا
بعدما شاف فعله وشجاعته
واللذي للقبه المورخين بانه أعظم فارس انجبته الجزيره العربيه في العصر
الحديث .
اما الجنازه الثاني فاني اول مره اسمع عنه فقد يكون هو من لقب نفسه بهذا اللقب
او ان احد من جماعته للقبه بهذا والله اعلم
وكلامي ليس احتقاراً للثاني بل انه لايقرن بفعل اخورثعه او شهرته
تحياتي
أجــــــــــــــا

[حويدر]

السلام عليكم يالربع ومساكم الله بالخير بالنسبه للموضوع المطروح أنا ما سمعت أحد لقب بالجنازة إلا ابن رشيد
أما مطير بهم فرسان واجد زيهم زي غيرهم من القبايل ويكفي أنهم حمران النواظر لكن ليييييييييييييه سموا حمران النواظر عاد هذا اللي ما أعرفه
هو صحيح أنهم يحرفون بالسوالف مثل هايف بن نعيم المطيري
بس أصابعك يالواحد مهي سوى

**********************

[الكاسح999]

الصيرمي يعطيك الف عافيه

الجنازه ماتزهى الا على اخو رثعه
وابن جبرين والله ونعمين ماهو ردي سلطه من السلط

على العموم نعم بالاجواد كلهم

[الصيرمي]

المنس999

حويدر

اجا

ابو الفيصل

شموخ

راعي الوقيد

مشعل الغفيلي

مشكورين على المرور والضافه:)

تحياتي:)

[123456]

أول شي السلام عليكم ورحمة الله وبركاته

جعل كل اوقاتكم طيبه دوم ياشمر يالطنايا

أنا سمعت من عوادتي يالربع يقولون ان شمر نقاده وماتلقى شي يعيبهم وانا اقوول كفوو والله والف كفووو بعد

انا بصراحه سائني كثيراً هالإستهزاء في مطير وكان ناقصهم امجاد وافعال واضن هذا مايخفا عوادتكم

فعلاً انت سويتو شي يصعب على اللي قبلكم واللي بعدكم لكن هذا مايخليكم تنغرون في أعماركم لدرجت انكم تستحقرون الناس

عموماً هذا الخطا اعتبره من شخص جاهل بمطير وماراح اعقب على هرجه

عموماً

فعلاً متعب بن جبرين يلقب بالجنازه وعلى فكره ياإخواني من شمر ان تشابه الألقاب وارد في كثير من الرجاء حتى العزاوي تتشابه عند العرب

فتعزوي بقولة ( انا اخو نوره ) هذي شملت الكثير من الرجال وحتى الألقاب

وإذا انكرتو لقب الجنازه عن متعب بن جبرين هذا مايغير في الامر شي لان الرجال اللي تعد الحق عارفه هالشي

لكن يمكن لان الجنازه الشمري اشهر منه ولذالك غطى على إسمه فهذا اللي وارد بالنسبه لي


عموماً يالطنايا انا اود انكم ماتستحقرون الرجال وإعلموو إستحقاركم لأي شخص هذا مايزيد ولا ينقص

ودمتم ولكم مني خالص ودي وتقديري

أخوكم (( المطيري ))

[هايس الشمري]

هلا و غلا اخوي 123456 :) <<<<<<<<عليك اسم شيء :)



حياك الله


و نعم والله بمطير حمران النواظر

[راعي الوقيد]

السلام عليكم ورحمة الله وبركاته

ما طرا على بالي وهذي سوالفكم الا البيت اللي يقول:-

ترعد وتبرق سالفتكم جعل مافيها برد ** يالله عساها المزنه اللي ماتسيل سيولها

يا شباب !!!!

كل قبيلة لها تأريخها المجيد سطروهـ الأوائل ولكن للأسف حنا ياهالجيل التالي

خرّبنا وعفسنا كل ما أرّثوهـ لنا من مآثر !! بكل اسف !؟

يعني وش تبون تاصلون !!؟؟؟؟

مطير اشجع من شمر لأ .. شمر اشجع من مطير لأ .. عنزهـ اشجع من حرب لأ

وكلها لاااااااااااااااا والف لأ !!؟

المشكلة انكم وانا منكم ندري وش كان يقول كل فارس من اولئك الفرسان

عن الفرسان الآخرين !!؟

اكيد تدرون وش يقولون ؟؟

ما احد منهم يمدح نفسه ويقلل من قيمة الفرسان الآخرين !!؟

تدرون ليش !!!؟

لأنك إذا قللت من قيمة خصمك فإنك بذلك تقلل من قيمة نفسك اولا ً

وقبل كل شيء دون ان تدري !؟

فهم يمجِّدون ويمدحون الآخرين ويفضِّلونهم على انفسهم ويقللون

من قيمة انفسهم امام خصومهم عند الحديث عنهم .. وهم بذلك يرفعون من

قدر انفسهم بطريقة غير مباشرة ..؟

هكذا كان الأوائل يفعلون !!؟

فهل فعلنا مثل افعالهم << ماني قايل نخسى !!!!

بل اقول اننا نعجز عن فعل ذرة من افعال اولئك الأبطال

ابطال قبائل نجد والجزيرة العربية !!!

إهانات لأجدادنا ونحن نظن اننا نمجِّدهم !!!!!!!!!؟؟؟؟؟

دمت بخير اخي الفاضل 12345678:)

والمضايف مفتوحة للجميع

وارجو الإبتعاد عن المهاترات التي لا تقرِّب بل تبعد بين الآخرين .....

تحيتي لكم والتقديـــــــــر ،،،

[123456]

ماقول إلا بيض الله وجهك

[الغوج]

مشكور يالصيرمي على الموضوع ولاكل جنازه الجنازه ولاكلن يشادي أخو رثعه

شفت أنا الخليج وكل مابه =سفن وضعون وبدو(ن) راحليني

شفت عبدالعزيز اللي زهابه=قطعتن من حديدن فرقديني

يسبع الناس من زودج المهابه= كن داخل عيونه شعلتيني

يوم طوّح شماغه والعصابه =صاحت اجبال حايل يامعيني

أكثر الناس بالدنيا تشابه وهوماله شبيه إلا ثنيني

الرعد يوم يرزم بالسحابه= والصخر يوم عيا لايليني

[الغوج]

مشكور يالصيرمي على الموضوع حبيت اقول ماكل جنازه الجنازه ولاكلن يشادي اخورثعه

شفت أنا الخليج وكل مابه=سفن وضعون وبدو راحليني

شفت عبد العزيز اللي زهابه= قطعتن من حديدن الفرقديني

يسبع الناس من زود المهابه = كن داخل عيونه شعلتيني

يوم طوّح شماغه والعصابه = صاحت اجبال حايل يامعيني

أكثر النس بالدنيا تشابه = وهو مابه شبيه إلا ثنيني

الرعد يوم يرزم بالسحابه = واللصخر يوم عيا لايليني

[الصيرمي]

ايش الهرررررررجه:)

وايش هوا 123456 هاذا عضو والا هاذا الي حافظ:)

مرررررررحبابك يالرررررررقم المميز:)

شرررررررفتنا بمروررررررك

تحياتي:)

[الصيرمي]

عفوا اخ الغوج:)

وش بها يوزراتكم كذا:)

شررررررفتنا بمروررررررك

ومشكور على القصيده الحلوه:)

تحياتي:)

[ابوعقيل]

انا احمد الله اني مسلم واحمد الله اني عربي واحمد الله اني بدوي والبدو هم المتمسكين للان بالعادات العربية الاصيلة من اكرام الضيف و اغاثة الملهوف واعانة المحتاج واجارة الخائف هم اهل المروؤة والبداوة عز لنا جميعا مهما كانت قبيلتك التي تنتمي اليها ان كنت شمري مطيري عنزي عتيبي سبيعي حربي وجميع القبايل افتخر بهم واعتز بهم وشمر اهل الكرم ولو سمي الكرم بغير اسمه لسمي شمر ولهذا ارحب بجميع ابناء القبائل هنا وانتم اهل الدار وحنا الظيوف

[الصيرمي]

وشمر اهل الكرم ولو سمي الكرم بغير اسمه لسمي شمر ولهذا ارحب بجميع ابناء القبائل هنا وانتم اهل الدار وحنا الظيوف

لاضيوف من اهل الدار:)

واذا بغيت تسمع كلامي يابو عقيل خذ لك فنجال عند ابو خليف وسرحان وتر بابهم مفتوح اررررربع وعشررررين ساعه << ياخساره:)

ابوعقيل حنا نتكلم عن الجنازه وهاذا هو زبده الموضوع :)

من هو الجنازه اذا قالك غزا الجنازه ...؟؟

تحياتي:)

[ابوعقيل]

اخي الصيرمي وجدت في موقع منتدى قبيلة مطير قصيدة في وصف الامير:عبدالعزيزبن متعب ال رشيد(الجنازه) وذكر قصائده وبطولاته والترحم عليه من ابناء قبيلة مطير في المنتدى وانت الله يسامحك تناولت الموضوع بالسخرية وهو موظوع عادي ولا يستحق السخريه مجرد سؤال وجواب وكنت اتمنى منك عدم التقليل من قدر القبائل الاخرى ولا نجزي الحسنة بالسيئة وذلك درء للفتنه ولمن يحب مطالعة الموظوع http://mutir.com/vbvv/showthread.php?t=32600


في وصف الامير:عبدالعزيزبن متعب ال رشيد(الجنازه)

للشاعر خلف الرقيبا الأسلمي الذي عاصر حكم الجنازه : -


شـفــت انـــا الخـلـيـج وكـــل مــابــه
....................... سفن وضعـون وبـدوٍ راحلينـي

شـفــت عبـدالـعـزيـز الــلــي زهــابــه
........................ قطعـةٍ مـن حديـد الفرقدينـي

يـسـبـع الــنــاس مــــن زود الـمـهـابـه
........................ كـن داخـل عيونـه شعلتينـي

يـــوم طــــوّح شـمـاغــه والـعـصـابـه
..................... صاحـت أجبـال حايـل يامعينـي

اكــثــر الــنــاس بـالـدنـيـا تـشــابــه
........................ وهـو مالـه شبيـه إلا ثنينـي

الــرعــد يــــوم يــــرزم بالـسـحـابـه
........................... والصخر يوم عيّـا لا يلينـي



رحم الله الجنازه برحمته الواسعه وأسكنه فسيح جناتـه ..

اللهم آمـــــــــــيــــــــــــن ..

[المهاجر]

ذكرتمونا ايام الجلغم والعنزي


وبعدين تروا شمّر كلّهم جنايز ، ماخبر اللي عمره خلد بهالدنيا .


جيت ابي ارد بس ماعرفت وين وجه هالمويضيح من قفاه

http://www.shmmr.net/vb/showthread.php?t=6690

[الصيرمي]

ذكرتمونا ايام الجلغم والعنزي

هاذولا فررررررررررريس مطير وعنزه:)

جيت ابي ارد بس ماعرفت وين وجه هالمويضيع من قفاه

انا اقول لك ايش الحكايه:)

اضغط على الرابط (http://www.shmmr.net/vb/showthread.php?p=385113#post385113)ورايح تلاقي قفاه:)



تحياتي:)