المساعد الشخصي الرقمي

مشاهدة النسخة كاملة : ملحمة الظفير وحماية ال السويط.. الحثربي الشمري



الرسيمي
06-08-2004, 10:18
السلام عليكم

اخواني الاعزاء اعضاء منتدى قبيلة الظـــفير .. اسف اني تأخرت عليكم بالسوالف والقصيد ... لكني اليوم

بسولف عليكم سالفة مشهورة جدا وطبقت شهرتها الافاق وهذي السالفة معروفة للجميع ولكم لامانع من

ذكرها مرة ثانية هنا في منتدانا ... السالفة اليوم ابطالها هم ابناء قبيلة الظـفير وكما هم في كل زمان ومكان

يتسابقون الي الطيب ( ومثل مانقول يتزارقون على الطيب مزارق ) المهم يكفيك عزيزي القارئ ان تعرف من

شهرة هذه الحكاية انها اصبحت من اهم القصص والنوادر التي تحكى امام الملوك والسلاطين فقد قيلت امام

السلطان العثماني في الباب العالي بالاستانة وقيلت امام الملك عبدالعزيز وابآئه وابنائه الملوك من بعده

وكانت ردة فعلهم هي الانحناء احتراما لهذه البطولة الظـفيرية واعجابا بالشهامة الظـفيرية واكراما واعزازا

لابطالها الظـفير .. هذه القصة مرت على جميع اهل الشمال وداجت في جميع نواحي نجـد ووصلت الى اقصى

بوادي الجنوب ذكرت في بلاد اليمن ووصلت الى الشام وفلسطين ومصر وعمل لها مسلسلا تلفيزيونيا يمثلها

وذلك لكي تبقى خالدة في الذاكرة وباقية بالاعماق ومثالا حيا يعلم جميع العرب كيف تكون البطولة والشهامة

ودرسا لجميع القبايل كيف يكون حق الجار والدخيل ان التاريخ لو اردا ان يسطرها بسطور من ذهب وفضة

لعجز عن ذلك ولو اراد ان يخلدها في جنباته لعجز ايضا كيف لا والفخر يشتق اسمه منها والمروءة العربية

تستجديها العطاء والنبل... العالمي كله يسأل ابناء قبيلة الظـفير كيف يصاغ ويكون ...اسف على اطالة هذه

المقدمة ولكن كما قالوا قديما لكل مقام مقال.....

القصة هو قصة حماية الظفير لماجد الحثربي الشمري ...في احدى السنين كان الوقت دهر على العرب

والامطار قليلة جدا وكان الظـفير تحت قيادة الامير / دغيم بن ســويـط وكانت هناك خبرا او فيضة في الشمال

تقع الان غربي مدينة رفحا وكانت هذه الفيضة هي الوحيدة اللي بها ماء كثير فارادت قبايل الشمال

الثلاث ( الظـفير وشمر وعنزة ) انهم ينزلون على هالفيضة ويسمى قطين وكما هو معروف وكعادة العرب

كان بين هذه القبايل الثلاث العديد من المعارك والحروب والمغازي وكل قبيلة سالبتن من القبيلة الاخرى

العديد من الابل والحلال وكان بينهم دم وثارات قديمة ولكي ينزلوا جميعا على هالفيضة يجب ان يعقدوا

صلحا مؤقتا بينهم او عهدا خلال فترة نزولهم على الفيضة وبعد ذلك يرجعون الى ماكانوا عليه فاجتمع

رؤساء وزعماء القبايل الثلاث دغيم بن سـويط شيخ قبيلة الظـفير وجديع بن هذال راعي الحصان شيخ قبيلة

عنزة ومطلق الجربا شيخ قبيلة شمر اجتمعوا فيما بينهم وعقدوا صلح بينهم وبنود هذا الصلح انه تمنع

المعارك والمغازي بين القبايل الثلاث طول مدة بقائهم في هذا المكان (جدع السلاح وربط الخيل ) وكذلك انه

اذا حدث خلاف بين شخصين واعتدى احدهما على الاخر فان المعتدي لا يجيره اي شخص منهم ولكن يتم

ارجاعه الى شيخ قبيلته وهو يتصرف بامره . وافق الزعماء الثلاث على هذا الصلح وحلفوا (دين علينا اننا

مانخون هذا الصلح والخاين عليه الله) وسميت هذه الفيضة من ذلك اليوم ( ام الاديان) المهم كان هناك

رجلا اسمه ماجد الحثربي من الفضيل من عبدة من شمر وكان مولعا بالقنص فكان يذهب كل صباح ولايرجع

الا اذا اظلم الليل ومعه صيده ماجد ماله الا امه ابوه متوفي وماعنده اخوان وكان مفوز التجغيف من

التجاغفى من كبار العمود من الخرصه من شمر كان عنده اسير ببيته وفي يوم من الايان انحاش هالاسير

وزبن بيت ماجد بغيابه وماكان باليت الا ام ماجد قام مفوز ودخل البيت وقام يجر الاسير معه جته ام

ماجد وحاولت ان تثنيه وترده لكنه ماش عيا يطيع وقالت له خاف الله يامفوز هذا دخيل قال اليوم الحقوق

مرفوعه بين العرب ومامن دخيل دام حنا على هالفيضة المهم مفوز مارد على الحرمة وخذا معه اسيره اللي

زين على بيت ماجد قامت ام ماجد و كفت الدلال على النار واهدمت مقاديم البيت ويوم رجع ماجد واليا هو

يشوف شين يروع العقل الدلال منكفية والنار طافية والبيت مقاديمه مهدمة وجاك يركض واليا امه قدامه

باليت وتصيح وتطيح قال العلم وش اللي صار قالت العلم كذا وكذا والبيت اللي مايفك دخيله الواجب ان تطفى

ناره ةيهدم بيته لانه ماعاد له قدر بين الناس وكان هذي سواة العجز الاوله تحث عياله على الطيب والمرجلة

والعلوم اللي تبي تبيض الوجه المهم ماجد انغبن وخصوصا انه مهو قادر يسوي شوي وهو عارف ان الصلح

بين القبايل الثلاث مكتفه ولايقدر يحترك المهم من الغبن يقوم ماجد ويطوي بيته وياخذ امه ويرحلون يم خواله

الفوارية عمر وفهيد عيال عبيد الفواري وخواله كانوا اهل فروسية وشجاعة المهم رحبوبه خواله يوم جاهم

وماجد كان موصين امه انه ماتعلم احد باللي جرى مايبي يكدر خواله ويضايقهم المهم كان ماجد على عادته

الاولة كل صباح ياخذ طيره ويقنص لكن هالمرة لاحظوا خواله ان ماجد كل ماعود الا مامعه لون من الصيد

والديرة معروفه انها مليانه صيد ليه . ماجد كان يطلع الصباح وينحر ضلعن حول ديرة خواله ويرقاه ويقعد

يفكر بامره وش الحيلة وش الدبرة وش السواة يارب عاوني على مصيبتي هذي . استمر ماجد على هالامر

واجهة ايام فارد خواله ان يستطلعوا وش الامر قالوا اكيد انه عاشق وكان ماجد ولد مزيون ووسيم فارادوا

ان يختبروه فارسلوا بنتا عندهم وكانت على قدر كبير من الجمال وقالوله عرضي عليه وكانوا راعي عشق

فهو بيكلمك ويقصد بك المهم يوم جته البنت وقامت تعرض امامه قاله ماجد ( يابنت ماني من اللي بالك سلم

الله ارجالك) البنت يوم سمعت هالكلام وهي ترجع لاهله وقالتلهم ماجد موضوعه مهو موضوع عشق

الموضوع حاجة ثانية الله اعلم بها.المهم يوم جا الليل ويجيه خاله عمر وينشد ماجد عن حالته وعن قصته

ويوم كثر النشدة عليه ويقوم ماجد ويسحب الربابة وقام يقصد:


يا عمر ياالمدلاة يـا نـازل الخـوف=اذهبتنـي وانـت تنشـد لـك أيــام

يا خو فهيد اللي بك الطيب ما صـوف=والكل منكـم يشبـع الطيـر لا حـام

يا اللي على كل الجماعة بكـم نـوف=عذبتنـي وانـت تنشـد لـك أيــام

ما تشوف حالي كنهـا حـال ملهـوف=والا العليل اللي علـى الـزاد صـوام

ولو قربوا عندي من الـزاد بصنـوف=وفوقـه فقـار وسيـح الـزاد بيـدام

ولو حنطة البلقا مـع تمـرة الجـوف=مـا تقبلـه نفـسٍ عليهـا الطنـا زام

ولو عرضولي لابس الخصر وشنوف=بارض الخلا عن دار كفر(ن) والاسلام

لو صوتو باللة وامانة عـن الخـوف=مابيه لو انـه علـى الـروح عـزام

شفي مفوز شمعـة الغـوش منقـوف=خيالهـن وان جـن بعثعـث ورضـام

خيالهن وان جن مع الحـزم زفـزوف=مثل الحباري عن شفا الطيـر خـرام

اللي كساني ثوب اسود وانـا اشـوف=خله يقع في سهر عينـي وانـا انـام

ومن عقب ماني قنب صرت انا صوف=اجـود للحضـر المقيمـيـن فـحـام

وان جيت لمجلس لابتي تقل ما شوف=اقلـط الغتـره علـى الوجـه قــدام

وحنا على حرب المعادي بنـا نـوف=امر من طعم الشـري عنـد الالـزام

شفي زبون اللي من الحصن مجلـوف=قرمٍ ويروي شـذرة السيـف لا هـام

اقطع عليه النزل طوف ورى طـوف=واقلـط عليـة بربعـة البيـت قـدام

ثـم الهبـه بمصقـلٍ يبـرد الجـوف=مـا صوغـه عنـد الصنانيـع بلحـام

اما عليـه البيـض يصفقـن بكفـوف=والا فلا يمشـي علـى كـل الاقـدام

وان ما سويـت فـي حـد مرهـوف=وجهي مـع الخفـرات دقـوه بوشـام

الرسيمي
06-08-2004, 10:23
يتبع ...


ويوم اصبح ماجد وهو يركب ذلوله ويرجع يم فيضة الاديان عند ربعه الاولين يبي يطلب مفوز التجغيف ويوم

وصلهم اليا الليل يوم اظلم عليهم وقام ماجد يتسحب تسحب حتى مايشوفه احد الين وصل بيت عمته ويم شافته

قالته وش اللي جابك ياماجد قال جابني حقي اللي خذاه مفوز وقص وجهي به قالت والله ان التجاغفى ربع

مفوز معتلمين انك بترجع ومتحرصين ولاانت بقاويهم لحالك قال الله يهون الامر ومن اصبح افلح ويوم جا

الصبح ويقوم ماجد ويقول لعمته لبسيني لبس حرمه ابي لي عباة وبرقع وغطوة وعقب مالبس ماجد لبس

الحرمة وهو ينحر الفيضة لان خابرن ان مفوز بهالحزة عند الخبرا يبي يسقي فرس له هناك المهم يوم وصل

ماجد اليا الاخوان الثلاثة كلهم متلايميينن حول الفرس واليا هذا فايز ومفوز وفواز المهم مفوز يوم شاف

المره ( اللي هو ماجد ) قال عدي يامرة واملي قربتك مدرى انه ماجد واليا ساق مفوز رافعن الثوب عنه

وماجد داسن سيفه تحت الثياب ويقوم ماجد ويسحب السيف ويضرب مفوز واليا هو كاسر ساقه وقاطعه

وينهزم ماجد وينحاش ويوم هو بحر اليا هكا المضيف . مضيف شيخ ووجه عليه المضيف هذا هو مضيف

جديع بن هذال شيخ عنزة راعي الحصان ويم طاح مفوز وقامت الناس اللي حول الفيضة تصيح وثارت العالم

واعتلمت شمر وخبروا الجربا مطلق وهي تقوم فرسان شمر ويقوم يطردون ماجد المهم زبن ماجد على بيت

بن هذال وهو يدخل على المحرم ( قسم النساء ) حريم الهذال ويربط نفسه بواسط البيت ( العمود الكبير اللي

وسط البيت ) وهذا دلالة عند العرب على انه دخيل فزع بن هذال وفزعت عنزة يوم شافوا خيل شمر جايتهم

ويوم اوصلوا واليا مطلق الجربا يقول سلمنا اللي عندك يابن هذال قال من تعوني يامطلق الجربا قال الدخيل

اللي زبن على محرمك ويوم ابتحل جديع بن هذال لكن وش يسوي مابيده حيله فيه صلح بينهم والبيوت

مفروشه يعني محد يدخل احد والجاني محد يزبنه واستخار جديع بن هذال وقام بيسلم ماجد لشمر وكانت بنت

جديع بن هذال بالمحرم وتسمع بالحكي اللي يدور بين ابوه بين شمر ويوم ايقنت ان ابوه يبي يسلم ماجد وهي

تقوم وتقرب اطيب خيل ابن هذال وقالت ياماجد ترا ابوي شيخ وراعي حظ وبخت وهو يبي يسلمك لشمر

مير قم واركب بنت الحصان اطيب خيل عنزة وانهزم عليه وانحر ابن سـويط والله ان مايفكك بعد الله الا هو

كان الله كاتبلك نجاة من الموت المهم ويقوم ماجد ويركب بنت الحصان ووجه على بيت الامير/ دغيم بن سـويط

ويوم شافوه الجربا وفرسان شمر وهم يلحقون باثره ولكن الفرس اللي راكبه ماجد من اطيب الاصايل

وماتنلحق المهم وهو ياصل لبيوت ال ســويط بيوت العز والكرم وحماية الدخيل واكرام الجار وماجد ماكان

يشوف قدامه الا الله ثم ابن سـويط والا ان شمر ليا مسكوه ذبحوه ويوم شاف مضيف ابن ســويط وهو يزبنه

ويفز الامير/ دغيم بن سـويط وكبار رجالات ال ســويط يوم شافوا الدخيل اللي زبن محرم البيت وهو يصيح

دخيلكم دخيلكم وصاحوا ال ســويط كلهم دخل الدخيل وسلم دخل الدخيل وسلم ..وبالحزة هذي كانت

ام الامير/ دغيم بن سويط وهي عجوز طاعنة بالسن كانت توه جايتن من الحج والعبيد يبنون بيته وهو بيت

صغير قطبة عمود واحد يسمونه البدو بويت تصغيرا لبيت والعبيد بنوه جنب المضيف حول ولده اللي كان يغليه

اشد الغلا المهم مافطنوا ال ســويط الا وعجة الخيل جايتن يمه وناصيتن المضيف ويفزعون ال ســويط

ويتسلحون العلم العلم ويوم وصلوا فرسان شمر ويتقدمهم مطلق الجربا قال له ابن سـويط يالله حيهم اقلطوا

ياشمر الله محييكم . قال مطلق ياابن ســويط حنا جيناك نبيك تسلم الدخيل اللي زبن عليك ويوم صار ابن سـويط

في حيرة من امره وش السواة ويوم الله الهمه الفكرة اللي سهلت الامر قال ابن سويط : اسمعوا ياشمر

والله ماجد زبن البويت والبويت هذا ماحضر العهد اللي بيننا ولايمشي عليه شروط العهد وهم يلجون شمر

مايصير مايصير وتقوم فرسان ال سويط والظـفير وهم يصكون على المضيف ويقول ابن سويط ياشمر تعوذوا

من بليس واقصروا الشر ويرد عليه الجربا وقاله يابن سويط حنا ماجينا ندور الشر جينا نبي الحق ونبي دخيلنا

ابن هذال مازبنه حسب العهد وانت الواجب انك تسلمه لنا قال ابن سويط مالك رجالن عندي الدخيل دخيل

البويت ودخل وسلم وهذا الحكي اللي عندي ويزعل الجربا ويقول وهو يتهدد ابن ســويط قال مطلق الجربا اجل

يابن ســويط ( عليك مردود النقا) يعني استعد للحرب والمعركة ورد عليه الامير/ دغيم بن ســويط وقاله

( على ظهور الخيل مبارين ) يعني حنا مستعدين للمناوخ والحرب كله لعيون الدخيل اللي زبنا ... الله اكبر قمة

العزة والشهامة والشجاعة والاباء والطيب والكرم والله ان الفخر ليقطر ويتصبب عرقا حياء من ابن ســويط

الذي قام بفعلن عجزت عنه امراء القبايل الاخرى اتي بمكرمة اصبحت مثلا يحتذى عند باقي القبايل الى يوم

الدين المهم يوم سمع ماجد الحثربي باللي حصل وهو يرتاح ويستبشر ويجيه ابن سويط قاله ياماجد ابشر

بالعز والله انك عندنا عزيز ومحدن يجيك وانا نحميك بارواحنا ولايقربك جميع واحد ... المهم يوم سمعت العالم

بالعلوم اللي صارت وهو يثورون وكل قبيلة ثارت من مكانه ودروا ان العلم فيه دم ومعارك وحروب وقامت

عنزة وتشد من مكانه وانتقض العهد وقامت شمر برجاله وفرسانه وشيوخه تجهز للمعركة وقامت الظــفير

بكل شيوخها وفرسانها وابطالها اللي مايرضون الضيم والذل لدخيلهم قاموا كلهم على قلب رجل واحد تلبية

لنداء ابن ســويط زعيمهم وشيخهم وقائدهم وصارت المعركة من صباح اليوم التالي الين الضحى وماتشوف

الا لمع السيوف وصهيل الخيل ورجف المعركة وسالت الكرام على الكرام واشتبكت فريس الظـفير مع فريس

شمر وصكت فرسان السـويط على ماجد وقام تذبح كل فارس شمري حاول انه يقرب على حول ماجد واشتغل

الذبح على شمر وسالت الدماء من الطرفين وكثرت الجنايز لدرجة انه اختلط الدم بمياه الفيضة حتى اصبح

لون الفيضة احمر وامتلت من الجثث وجنايز الرجال وصارت الهية على شمر وينصر الله الظـفير ويكسر لك

شمر كسرتن خيبت رجاهم وهذي حال العرب منول يومن لك ويومن عليك

المهم وتنتصر الظــفير ويفكون دخيلهم ويحمون ماجد الحثربي من عيال عمه بفعل طيب محدن سبقهم عليه

انهم منعوا جماعته وعيال عمه وقبيلته ان يسمونه بضر او شر ويوم انتهت المعركة وانكسرت شمر

وانسحبت من المعركة وهي مهزومة ورجع ابن سويط للمضيف وفرسان الظـفير يعرضون قدام ابن سـويط

من نشوة النصر وقاموا العبيد يغسلون يمنى الامير/ دغيم بن ســويط من الدمان اللي انتثرت عليه من قطع

ارقاب الرجال والعبيد يحاولون يفكون شلفا ابن سويط من الدم المتجد ويجي ماجد الحثربي لابن سويط

والظفير بالمضيف طاف ورا طاف قال الحثربي اسمحلي يابن ســويط ابقصد .. قال ابن ســويط اقصد ياماجد

ولكن انتبه لاتظلم ولاتسب احد بقصيدك ياشمري .. ابن سويط دارين ان ماجد يبي يذكر الهذال بقصيدته لان

الاولين عندهم سرعة بديهة .. ويقوم يقصد ماجد قصيدته المشهورة الى الان واللي غالبية الناس تحفظها

وترددها واللي اصبحت من اكبر مفاخر الظــفير اللي خذوها بحد الشيوف المصقلات وحدوا عدوانهم على

اقصاهم اللين طاعوا عقب ماهم معيين طاعوا غصب ماهو طيب .. والان اترككم مع القصيدة ...

يقول ماجد الحثربي بعد المعركة وانتصار الظـفير على شمر وحماية السـويط له:


ياراكب حمرا من الهجـن حايـل=مبرية الذرعـان حمـرا سجلـه

حمرا تشادي مبرمـات المحايـل=وان سل مخطرها مع البير ولـه

تلفي على الحبلان هـل النقايـل=عيون التيوس مرضعين الاسلـه

بالعون مـا فكونـي اولاد وايـل=ابشـر دخيـل بيوتهـم بالمذلـه

ما ظل لي غير السويطات ظايـل=دغيم ثنى بالسيف دونـي وسلـه

السويطات ماهم من هزال الحمايل=من ماكر يفرس من الصيد جلـه

السويطات يعطون المهار الاصايل=المعرقـه وعنانهـا تبعتـن لـه

واخو دغيما القرم ماضي الفعايل=دخيلهـم مـا يمشـي الحـق لله

ومانش ما لمـت عليـه القبايـل=ياكود ما رب المـلا كاتبـن لـه

واليوم احمد اللة بهـاك المسايـل=بايمن زرود ونازل عثعـثٍ لـه

وارعى بظل عصيل ولاني مسايل=عنـد المزينـي مطلـعٍ شذرتلـه

ولاسلت عن راس بة الزوم طايل=ياكود سعدون وانـا شاهـدن لـه

والقصيدة واضحة وابياتها تحكي عن مضمونها ..اخو دغيما هودغيم بن سـويط ...

وقاموا ال ســويط وحطوا في البويت شقة بيضاء(خرقة) واصبحت شعارن لهم من هكاليوم الى اليوم وهي دلالة على حماية الدخيل ...

وهذي قصة الحثربي اللي اصبحت ملحمة سطر فيها الظـفير اروع الامثلة بالحمية والشجاعة والاقدام والبطولة وبحماية الجار والدخيل..

وقد ذكر احد الشعراء الظـفير هذي القصة وقال:


والحثربي فكوه والجمع يردم=بمصقلات طلعت من خباهـا
عيوبه المرشد على كل من زم=ياسعد والله من لجا في حماها




والعلوم هذي ماهي بغريبة على قبيلة الظــفير ولا على شيوخهم اسرة ال ســويط الكرام ..

قبل كم سنة وصل واحدن من الجماعة يم الفيضة وكان وقت ربيع وخير ويوم جا الفيضة اليا هي مليانة من

الماء لكن سبحان الله العلي العظيم الديرة كله مربعة من الخيرات والامطار والعشب الا الفيضة مابه العود

الاخضر والشيبان يقولون ان الفيضة ماربعت ابد من عقب سالفة الحثربي .. وسبحان الله العلي العظيم

اسف على الاطالة وخصوصا المقدمة ولكن لكي نعطي الموضوع حقه

اسمحلو يالربع اذا ضاايقتكم بالكلام بس لازم الواحد يعرف عن تااريخه

تحيااتي لكم اخوكم : يوسف العجياان

العلجاني الظفيري
14-06-2006, 18:52
هذي السوالف اللي تجمد على الشارب

مشكور يالرسيمي على الإضافة الجميلة منك :)

راعي الوقيد
14-06-2006, 20:32
:goooood:

عبدالرحمن
15-06-2006, 01:02
اجتمعوا فيما بينهم وعقدوا صلح بينهم وبنود هذا الصلح انه تمنع

المعارك والمغازي بين القبايل الثلاث طول مدة بقائهم في هذا المكان (جدع السلاح وربط الخيل ) وكذلك انه

اذا حدث خلاف بين شخصين واعتدى احدهما على الاخر فان المعتدي لا يجيره اي شخص منهم ولكن يتم

ارجاعه الى شيخ قبيلته وهو يتصرف بامره . وافق الزعماء الثلاث على هذا الصلح وحلفوا (دين علينا اننا

مانخون هذا الصلح والخاين عليه الله) وسميت هذه الفيضة من ذلك اليوم ( ام الاديان)


اولا شكرا لك على ايراد هذه القصة وشواهدها

والف نعم بقبيلة الظفير وتاريخها المشرف.

ثانيا اسمح لي بهذه الوقفة معها.

حقيقة دائما ما اقف عند هذه القصة واقرأها بتمعن

لعلي اتفق مع من اخل بالاتفاق واصبح هو صاحب الموقف الصحيح!

كيف يتم تقدير من اخل بالاتفاق وتبويخ من التزم به ؟ !

حقيقة اننى ارى ان هناك خلل في ميزان هذه القصة!

دماء كثيرة سالت بسبب عدم التزام الظفير

بالاتفاق المبرم مع بقية الاطراف!

ومع كل هذا يعتبر موقفهم هو الموقف الحق!.

ابن هذيل
15-06-2006, 01:17
هل حصل معركه يا مشرف قصّه وقصيده والموروث الشعبي في قصة ماجد الحثربي
وهل ماجد يا مشرف قصّه وقصيده والموروث الشعبي الحثربي من الفضيل من عبدة من شمر وهل ذكر في قصيدة ماجد معركه او قصيدة الشاعر الظفيري اي بيت يدل على ان هناك معركه وذكروا انه سلت السيوف من دونه وهذا لايعني انه قامت معركه ...وهل كسرت شمر .......ارجوا الايضاح عن هذه الملحمه اللي كسرت بها شمر كسرتن خيبت رجاهم على ماقال الاخ......

ooo_75
15-06-2006, 02:24
اخي هذيل العزيز ماجد الحثربي من العليان من الخرصه وليس من الفضيل
احببت ان اعقب علي هالنقطه فقط

ابن هذيل
15-06-2006, 11:15
اخي 75_000 ا لعزيز اشكرك على التعقيب وانا اعرف انه من الخرصه لكني ابي اعرف كيف الناس تورد قصص وهي محرفه او ينقلونهن من ناس مايعرفون شي ...لم تقوم اي معركه في قصة ماجد الحثربي .ونعم بالظفير قبيله معروفه . ونسب ماجد الى عبده وهو خريصي وبعد مادخل ماجد على ابن سويط راح الى اباالميخ وبعدين راح الى ابن عريعر ومعروفه قصته وش صار له هناك وبعدين راح لاحدى القبائل وجلس عندهم حتى رجع الى خواله العامود وسامحه مفوز التجغيف.. ملاحظه" والفواريه من العامود من الخلف ومنهم الشيخ الفارس فهيد الفواري.والشيخ الفارس دندح الفواري.والشيخ عمر الفواري

ooo_75
15-06-2006, 13:22
شكرا اخي العزيز هذيل علي الافاده

لا اريد ان اعقب علي الموضوع لوجود من هم اعلم مني بالتاريخ

ولكن باختصار شديد ان السويط فكوا ماجد الحثربي وبعدها ذهب لفنيخ ابالميخ ومن ثم لابن عريعر ومن ثم رجع لجماعته والله اعلم

صلفيق
15-06-2006, 17:47
الرسيمي .. تسلم على إيراد مثل هالسوالف ، والقصة معروفة لدى جميع القبائل ، ومثل ماذكرت سمعوا فيها حتى العجم. وهي من القصص التي تحاكي حماية المستجير ، والظفير (والف نعم) لهم باع طويل في الشهامة والفروسية والكرم وحماية الجار والمستجير ، وتحسب لهم بقية القبائل الف حساب.. ولكن لم أسمع بأنه قامت معركة بين شمر والظفير بسبب هذه الحادثة. وأما القصة فهي صحيحة كما ذكرت ، الا أنه عندما وصلوا شمر يطاردون الحثربي .. وقف ابن سويط وقال: أسمعوا ياشمر ، الدخيل زبن البويت - والبويت ماحضر العهد ، ولكن والله يلي يقرب إن تطلع كبده قدامه. ولم يتجرأ أحد على الأقتراب من البويت.
أما إلصاق قيام المعركة وانتصار الظفير ، فلن ترفع من قدر الظفير ولن تحط من قدر شمر ، والحروب دائما فيها مهزوم ومنتصر ، حسب الظروف المحيطة (مع إنها لم تقم أصلا). والقبيلتين في غنى عن أي ايراد وهمي لتبيين الشجاعة.
أما القصيدة الثانية التي مطلعها:
ياراكب حمرا من الهجن حايل مبرية الذرعان حمرا سجله
فإنه قالها عندما لجأ لأبي الميخ ، حيث كان نازل الشامة ( شامة زرود )، وكان الأجدر بك أن تنتبه لذلك لسببين:
السبب الأول : لايمكن لماجد أن يسب قبيلة ويغضب ابن سويط وهو منبهه بعدم التعرض للسب .. حيث يقول ماجد:
بالعون مافكوني أولاد وايل بشر دخيل بيوتهم بالمذله
وهذا البيت لايمكن لماجد أن يقوله بحضرت ابن سويط.
أما البيت الآخر فهو يثبت أين كان ماجد عندما قال هذه القصيدة .. فهو يقول:
واليوم أحمد الله بهاك المسايل بأيمن زرود ونازلن عثعثن له
(وزرود هذه بين تربة والشعيبات) أي حوالي 300 كم من فيضة الأديان.

الأخ عبدالرحمن..
تساؤلك عن صاحب الموقف الصحيح ،، من وجهة نظري - ابن سويط هو صاحب الموقف الصحيح. وكان من الأجدر بالجربا أو شيوخ شمر حل المشكلة منذ إقدام مفوز التجغيف على إنتهاك حرمة بيت ماجد الحثربي وأخذ اللاجيء دون مراعات للجيرة.
ولكن شمر انتهكوا حرمة بيت الحثربي ، وجلسوا يتفرجون. ولو فيهم حكيم لما حصل ماحصل. ونستاهل مايقال عنا، والمراجل ماهي تفطن يابناخي.

شكرا لسعة صدوركم جميعا

بندر الشمري
16-06-2006, 14:35
حماية السويط للحثربي صارت ملحمه :a:
يالله دخيلك :)
..
.
عمومآ ياهلا بالرسيمي
وللمعلوميه فقط لك وللإخوان
الرسمه من الجحيش من الأسلم من قبيلة شمر
دخلوا حلف مع الظفير وإبن سويط منذو مبطي :)
..
.
وبالمستقبل القريب سوف نطرح موضوع عن ذلك
:7ayyoh:

العلجاني الظفيري
16-06-2006, 17:30
بالنيابة عن الرسيمي

شاكرلكم مروركم يا عيال العم

والله إني أغلي شمر مثل الظفير والباقي ما عليهم زود

........................................




اولا شكرا لك على ايراد هذه القصة وشواهدها

والف نعم بقبيلة الظفير وتاريخها المشرف.

ثانيا اسمح لي بهذه الوقفة معها.

حقيقة دائما ما اقف عند هذه القصة واقرأها بتمعن

لعلي اتفق مع من اخل بالاتفاق واصبح هو صاحب الموقف الصحيح!

كيف يتم تقدير من اخل بالاتفاق وتبويخ من التزم به ؟ !

حقيقة اننى ارى ان هناك خلل في ميزان هذه القصة!

دماء كثيرة سالت بسبب عدم التزام الظفير

بالاتفاق المبرم مع بقية الاطراف!

ومع كل هذا يعتبر موقفهم هو الموقف الحق!.

ويالغالي دغيم بن سويط رحمه الله لم يخل بالإتفاق

لأن دغيمه كانت رايحة للحج يوم الإتفاق ومعها بويتها

ولما ردت للعرب كانوا متعاهدين وخالصين وهي جت وحطة بويتها

ولما راح ماجد الحثربي لعنزة ( خصوصا بنت شيخهم ) وزبنهم وقالتله بنت الشيخ لبوها يبا الدخيل دخل علي وابوها رفض ان يدخله وكان يبي يسلمه

للجربا لما سمعة بنت الشيخ قالة للحثربي مالك إلا البويت بويت دغيمة السويط مي داشه بالعهد وعطة الحثربي خيل اصيلة من خيول ابوها للحثربي وراح طاير للسويط ودخل للبويت وفكوه يالغالي

إلـــجـــنآزه
19-06-2006, 10:26
شكرا لك على ايراد هذه القصة وشواهدها

والف نعم بقبيلة الظفير وتاريخها المشرف

العلجاني الظفيري
24-06-2006, 05:34
مــا عليك زود يالجنازة

تحياتي لك

نافع بن طواله
25-06-2006, 01:58
ألف ألف نعم بالطيبين


وألف شكر لرقيكم

خالد الشمري
25-06-2006, 03:01
الاخ الرسيمي ونعم بالظفير ونكرر ونعم بالظفير ويكفي اسم الظفير لتذكر الامجاد والقصص البطوليه
لكن
لكن
لكن
القصه معروفه فلماذا يتم تزييفها

1 ـ


كان هناك رجلا اسمه ماجد الحثربي من الفضيل من عبدة من شمر



الصحيح انه من العليان من الخرصه من زوبع من شمر







2 ـ


وصارت المعركة من صباح اليوم التالي الين الضحى وماتشوف الا لمع السيوف وصهيل الخيل ورجف المعركة وسالت الكرام على الكرام واشتبكت فريس الظـفير مع فريس شمر وصكت فرسان السـويط على ماجد وقام تذبح كل فارس شمري حاول انه يقرب على حول ماجد واشتغل الذبح على شمر وسالت الدماء من الطرفين وكثرت الجنايز لدرجة انه اختلط الدم بمياه الفيضة حتى اصبح لون الفيضة احمر وامتلت من الجثث وجنايز الرجال وصارت الهية على شمر وينصر الله الظـفير ويكسر لك شمر كسرتن خيبت رجاهم وهذي حال العرب منول يومن لك ويومن عليك
المهم وتنتصر الظــفير



من قال لك ان فيه معركه اصلا ..ابن سويط حمى دخيله بحيله تدل على ذكاؤه وهذا السبب ان جميع القبايل الثلاث انفضّن بعد هالحيله وما يحتاج تلصق للظفير انتصارات وهميه والظفير ليسو بحاجه الى الكذب القصه مفخره للظفير لكن دون تزويرها
واكبر دليل لم توجد قصيده وحده على وقوع معركه بين الطرفين واتحداك تجيب لي قصيده من الظفير انفسهم عن وجود معركه






3 ـ
[/QUOTE]
قال الحثربي اسمحلي يابن ســويط ابقصد .. قال ابن ســويط اقصد ياماجد
ولكن انتبه لاتظلم ولاتسب احد بقصيدك ياشمري .. ابن سويط دارين ان ماجد يبي يذكر الهذال بقصيدته [/QUOTE]

[size=3]ليس صحيحا ان الحثربي قصد هالقصيده قدام ابن سويط
والصحيح يوم يقصد ماجد الحثربي كان موجود عند الشيخ الفارس فنيخ ابا الميخ من شيوخ عبده من شمر الملّقب ب(عصيل ) وقصيده الحثربي نفسه تقول :
واليوم احمد اللة بهـاك المسايـل=بايمن زرود ونازل عثعـثٍ لـه
وارعى بظل عصيل ولاني مسايل=عنـد المزينـي مطلـعٍ شذرتلـه

فابن سويط كان بفيضه الاديان والشيخ فنيخ كان موجود بمكان يقال له زرود معروف بالشمال ووضّحه لك الاخ صلفيق[size=3]

[/QUOTE]وهذا البيت لايمكن لماجد أن يقوله بحضرت ابن سويط.
أما البيت الآخر فهو يثبت أين كان ماجد عندما قال هذه القصيدة .. فهو يقول:
واليوم أحمد الله بهاك المسايل بأيمن زرود ونازلن عثعثن له
(وزرود هذه بين تربة والشعيبات) أي حوالي 300 كم من فيضة الأديان.
[/QUOTE]

راكان الحمود
28-06-2006, 15:00
لايمكن لأي منصف أن يتجاهل دور الضفير في حادثة ماجدالحثربي ولكن يبقى الدور الأكبرللشيخ فنيخ اباالميخ "راعي عصيل"وعصيل اسم سيف فنيخ وليس اسما لفنيخ وأصبحت هذه الحادثة فخرا للضفيريقول أحدشعراءالضفيرفي الوقت الحاضر
من لابة بالضيق تنجي دخيلها في ساعة تجفاه كل القبايل
يفرح بها المضيوم وترهب مطارده يوم دورالخيل وضرب السلايل
وبيوتنا بهاعن الناس ميزه انظرلقطب البيت لياجيت سايل
شاكرا للجميع سعة صدورهم