المساعد الشخصي الرقمي

مشاهدة النسخة كاملة : مبيريك التبيناوي



راكان العياده
25-12-2001, 20:05
مساكم الله بالخير .... في البدايه احب اشكركم
على هالموقع الناجح وبالذات هذا المنتدى..
الي نفتقده في كثير من مواقعنا العربيه...
ارجو ان تقبلوني عضوا في هذا المنتدى...
وارجو ان تقبلو هذه المشاركه .........
.............................................................
هذه قصيدة شاعر من شعراء شمر الكبار الا وهو مبيريك التبيناوي:

ابا الوقى يالبيض خضبن يمـناه **** وانا اشهد انه من يال الحمـايل
السيف من يمنى عقاب خذيناه **** والخيل بدل كدشـها بالاصـايل
هذي سلوم بيننا يالقـرابــاه **** يازين بيع المنسمح يابن وايل
وعقاب ما سبه ولا سب حــلياه **** ان جو على قب المهار الاصـايل
يركض على الصابورمابه مرواه **** شي تعرفه كل سمو القبـــايل
لاشك عندي له فهــود مغذاه **** عيال شمر فوق قب سلا يــل

ومناسبة هالقصيده انه بعد عدة غزوات وصولات وجولات بين شمر و ولد سليمان من عنزه التي يقودها سعدونالعواجي وعياله عقاب وحجاب , قامت شمر بصب فنجال قهوه وقالو هذا فنجال عقاب والي يشربه يتكفل بكسر عقاب في اول لقاء لنا به بعد هذا اليوم.......
فقام احد الفرسان الشباب يقال له (ابا الوقي)
وما كان من بيت مشهور بالفروسيه وشرب الفنجال .
وعندما التقت القبيلتان.....................
وكان في مقدمة ولد سليمان عقاب العواجي
فتقدم له ابا الوقي وتبارزا وصالا وجالا ثم تماسكا بالايادي
وسقطا عن جواديهما واشتد العراك...... .....
وهبت ولد سليمان لانقاذ عقاب وهبت شمر لمساعدة ابا الوقي .........
واختلطت القبيلتان وعلا الغبار وحمى الوطيس حتى لم يعد يقدر الفارس على تمييز
صاحبه من عدوه.
في هذا الوقت استطاع عقاب ان يفلت من يدين ابا الوقي
فاخذ السيف من الارض وامسك بالجواد........ وكذلك فعل ابا الوقي ....
فاذا بالجواد والسيف الي بيدين ابا الوقي هما لعقاب والجواد والسيف الي بيدين عقاب كانا لابا الوقي ....وبعد معركه داميه افترق الجمعان......
وفي تلك الليله لم ينم سعدون العواجي فقال له جماعته اذاكنت حزين على الفرس والسيف
فكلنا سيوف لعقاب وخيلنا خيل له فقال انا لست حزيناً على هذا ......
ولكن هناك بيت في بالي الان اخاف ان شاعر شمر مبيريك التبيناوي ان يقع عليه
قالو وش هالبيت قال :
السيف من يمنى عقاب خذيناه والخيل بدل كدشها بالاصايل
وبالفعل نظم التبيناوي القصيدة اللي ذكرناها في البدايه وكان هذا البيت هو البيت الثاني من القصيدة.
وختاماً اعذروني على الاطاله ومن كان له تعقيب او تصحيح فلا يبخل علي وشكراً لكم.

ابوعلي
25-12-2001, 20:33
الاخ راكان العياده

اولا اسمح لي بان ارحب بك في بيتك بين اخوانك و اصدقائك

ثانيا.. مشكور على هالموضوع الطيب

وبانتظار المزيد...

ابو يزيد
25-12-2001, 21:01
اخوي/راكان العيادة

السلام عليكم ورحمة الله

وكل عام وانت بخير

اولا:

حياك الله معنا والف مرحبا بانظمامك الينا ومراحب معنا في هذا المضيف الذي اعتبرك من الآن احد كتابه وياهلا بك مرة ثانيه:

ثانيا:

تشكر على هذه القصة وماقصرت وهذي سلوم الأولين وهم يشهدون بذلك:


هذي سلوم بيننا يالقـرابــاه **** يازين بيع المنسمح يابن وايل

وصدق توقع سعدون العواجي وحي والله من توقع .

شف مانام بس خاف من هذا البيت وان هالفارس اللي اخذ سيف عقاب


ماهو مشهور ولا كان اخف على النفس .

رحمكم الله جميعا ايها الأبطال


اخوي راكان

احيي فيك مرة اخرى وبانتظار مشاركاتك فانت صاحب محل فاتحفنا بما عندك


اخوك/ابو يزيد

غازي العلي
08-01-2002, 09:38
لك ولاسمك الغالي آل عياده كل الحب والتقدير
والله ان العلوم الغانمه عندكم وحولكم.........لله درك

اخي العزيز طالما لديك بعض قصائد التبيناوي

ساكون شاكرا لو كتبت لنا قصيدته في مدح محمد العبد الله آل رشيد

وتقبل تحياتي

راكان العياده
08-01-2002, 22:34
مسا الخير............
احب اشكر الاخوان غلى التعقيب
واقول لاخوي محارب خيال انشاء الله الخير باقبال وانتظرونا.

ولكم جزيل الشكر.........





اخوكم راكان العيادة

غازي العلي
09-01-2002, 00:25
وانا اقول لاخوي

راكان العياده دامك حولنا

فنحن في انتضار السيل القادم

منك يااخي العزيز ابن عياده

لك مني كل الحب والتقدير

خلف الرويتع
09-01-2002, 16:21
مشكور اخي راكان العياده على المجهود

تعرفون اكثر شي اعجبني في القصيد هذه الابيات وهيو



عقاب ما سبه ولا سب حــلياه **** ان جو على قب المهار الاصـايل
يركض على الصابورمابه مرواه **** شي تعرفه كل سمو القبـــايل



هذ كلام التبيناوي في عدوه انظرو كيف اظهار الحق وعدم الكذب لماذ لا نتعلم ايوم عندم تزعل على اي شخص باكلام فقط تقطع جلده وتجعله ما يساوي قرش وهورجال من خيره الرجال وهذ ما جعل القبايل يرتفع شانهم حيث انهم لايدفنوان حسب احد بل يقولون الصراحه
ياليت قومي يدرون

راكان العياده
11-01-2002, 18:33
اشكر اخوي ابن حيان على تعقيبه الرائع ..........
واحب اشاطره الراي واقول انه مع ان القصيده كلها من اولها الى اخرها اكثر من رائعة لكن هالبيتين الي انت ذكرت:


عقاب ما سبه ولا سب حــلياه **** ان جو على قب المهار الاصـايل
يركض على الصابورمابه مرواه **** شي تعرفه كل سمو القبـــايل

اعتبرهن من اجمل الابيات االتي مرت علينا
لانه للاسف بعض الناس هالايام ماهي صادقه مع اقرب قريب لها... فكيف تكون صادقه مع عدوها ... ....\n لكن صيت شمر ما جا عبث لكن جابته الافعال الي مثل افعال ابا الوقى والاقوال الي مثل شعر التبيناوي

اكرر شكري لك ولك الاخوان اللي بالمنتدى

والسلام ختام

راكان العيادة

طلال صعفق الحافظ
15-04-2002, 18:39
انت تتكلم عن شاعر من أشهر شعراء شمر..بل من الشعراء الخمسة الذهبيين.
على ذمة أخوي ساير الرماحي...

ابو يزيد
21-04-2002, 14:37
شكرا يااخ راكان العيادة

وفعلا قمة الوفاء لهذا الشاعر الذهبي كما قال اخي طلال صعفق

والذي كانت قصائده بمثابة الجريدة الرسمية التي لايعمل بتحريرها غيره

فهو فيها:

كاتبا

وشاعرا

وناقدا

ومخبرا بكل مايحدث

فلله دره فقد رفعت قصائده رؤؤسا وخفظت مثلها.

هذا وتقبل خالص

تحياتي

فلاح السعد
28-04-2002, 15:24
اخوي راكان


ماقصرت وننتظر منك المزيد

والف شكر

راكان العياده
30-04-2002, 17:55
اخوي فلاح السعد.....


مشكور على التعقيب .... وابشر بالخير انشاء الله




اخوكم:

راكان العيادة