وش اغلى هدية جتك <<< وحدة أفضى من الفاضي

[المهاة]

بما أن موضوعاتي ماتحمل مضمون كالعادة .. ;) حبيت أزعجكم شوي كل واحد و وحدة ينبش بغريضاته و يعلمنا وشي أغلى هدية وصلته .

صح أنا ملقوفة حيل <<<< شفاية بلغتكم .. :D بس مو هذا السبب الوحيد اللي خلاني أسأل .. لاني بهالعيد فكرت أقدم هدية لاخوي بس احترت وش أهديه .. :rolleyes: <<< لاحظوا فكرت بس يعني ماسويتها ..:D


فيمكن لو علمتونا وش الهدايا اللي جتكم نستفيد بانه الشباب يعرفون وش يناسب خواتهم أو زوجاتهم و البنات كمان يعرفون وش يناسب أخوانهمأو ازوجهم ..

يالله عاد علموني ترا بتذبحني الشفاية .:o

[الفاضي]

طاااااااااااااااااااط

الفاضي وصل


ههههههههههههههه
اما افضى من الفاضي :D هذي والله نص سالفه

اقول اذا حجه البقر على قرونه يمكن تصيرين افضى من الفاضي :D

واذا تبين تعرفين اغلى هديه
ماهو هالحين بعدين :D<<<<<<<ياحبه يقهر العالم :D

طاااااااو

[ابو مشاري الشمري]

المهاة

افضل هديه
حقيقة اللي عليها الكلام
ومعبره ولها مكانتها وقيمتها
أنزلي تحت
8
8
8
8
8
8
8
8
8
8
8
8
8
8
8
زي بالضبط اللي وده يقولوه الفاضي
اههههههههههههههههههههههه

[ابو غازي]

المهاة

انا شخصياً
لازلت إنتظر الهدية

من طااااااااااط قصدي الفاضي

إذا جتني اعلمك إن شاء الله

تحياتي لكي

[المهاة]

أفااا يذا العلم هذا و انتم أهل الكرم .. أجل شيقولون غيركم ..!!!



الفاضي شفت صارلك منافسين في الفضاوة يعني شوي و اسحب البساط من تحت أقدامك بس تمسك زين باذانك .. :D

الا متى تحج البقر على قرونها .. :rolleyes: <<<< طموحة :p


تراني انتظر تعلمني مو تطول عارفتك فاضي يعني مالك عذر .. :D


*******************************



ابو مشاري عادي اخوي قل ما أحد اهداك قبل لا تستحي ..:D

يمكن احد يرحمك و يهديك خاصة اللي رد قبلك .. :p


مشكور أخوي على مرورك بس تكفى ابو مشلري اول ماتوصلك هدية الفاضي تعلمنا وشي .. <<<< موب كني وهقت الفاضي .. :D


********************************


يالفاضي الله يصلحك مشغل كل الناس و انت فاضي اجل لو انت مشغول كان وش بتسوي بالمضايف .. :mad:

بسرعة طااااااااط عطي ابو غازي هديته خليه يرد على الموضوع عطلته ..


مشكور أخوي بو غازي و تراني انتظر ردتك تعلمنا وش هديتك طبعا أكيد الفاضي بتصير هداياه ذوق لانه فاضي و مختارها بروقان .. ;)



تسلمون شباب بس مو كنها صعبة شوي مافيه واحد منكم قد جته هدية .. :rolleyes:

[فيصل اللويش]

الغاليه

المهاه

او الفاضيه مثل ماودك

موضوع جدا رائع


اما بخصوص الهديه اللي وصلتني

( سفره لاحد الدول العربيه مجانا تذكره + مصروف لعشرة ايام )

بس للحين مارحت ومفتوح الوقت


اخوك000 فيصل اللويش

[شموخ]

الاخت المهاة

شكرا لك على طرح هذا الموضوع

بالنسبه لي انا اخر هديه وصلتني مبلغ بسيط من المال الفين ريال فقط لاغير هذه اخر

هديه من اخوي الكبير

تقبلي تحياتي

شموخ

[طارق الليل]

الأخت المهاة

اللي يبي يهدي ما يشاور

من شاور ماعطى

آخر هدية كانت من زوجتي

كانت زجاجة عطر

[فوفو]

اما افضى من الفاضي هذي والله نص سالفه

:D :D :D :D :D :D

اقطع شرك ....دميعاتي ناقزن من كثر ماضحكت:D

اممممممممممم

اغلى هدية جتن؟؟!!!

مادري تقصدين اغلى معنوياً ولاحسياً:rolleyes:

اما اخوتس اذا كانه يدرس ...لسى بالمدرسة قطي عليه كم فلس مايبي هدايا:)

اما اذا انه اخوتس الكبيييير او ابوتس اشتريله قلم ماركة ...كبك....سبحة ....ساعة بس يمكن الساعة صعبة شوي لان لازم تكون احسن من ساعته واذا ساعته من ام 5 وفوق وش تعملين وقته:D

وتشكراتي :)

http://hosting.webimpulse.net/fofo/8a.jpg

[الكتراز]

:D :D :D
يازين هالموضوع جاء على طبت الرجل اليمين <<<يبي يضحك ابوسلطان اذا قراها :D
اغلى هديه هاه :mad:
مو بغيت أخذ لي عيديه صبح العيد اتسميها على عدوك
في تمام الساعه الثامنه من يوم الخميس كشخ الكتراز له كشخه مدري وشلون هي جايه الوكاد أحس أن طاح من وزني 10 كيلو <<<الله من الفنايل بهالظهر :D
واول ماطلعت من باب البيت ابي اعايد المسلمين
ومايمدي امشي لي اربع خطوات ابي جيراني يالشيء اللي له ونيين وييييييييييييييييييط طع ( صاروخ )
يالثاني يتليه واحد ضربن بجنبي اح يافخذي والثاني اشوى جاء بالثوب من قدام :(
غدى ثوبي وتسن عاثيتن بوه معزى معلوتس الله لا يربح من يبيع هالصواريخ
زين اللي ما صك عيني ...... انا زعلت وانا امسك العقال وانا احوم على الوغدان وكلن يقول مو انا :mad: .............. خربوا علي عيدي|8|
مالتس بها طويله غيرت ثوبي ....... وعايدة مع المسلمين :D

[البدر الساهر]

المهاة ركضك حلو


اما عيديتي وانا اخوكي

اشغال يوم عيديه شاقه ومؤبده


وبعدين قبل العيديه مو باللحين

بذيك الاعياد كان الواحد من النجمه وهو صاحي

ويله لان الدعوه فيها هات


الحين الدعوه فيها خذ

الحين الوضع اتغير الواحد فينا صار يتغيب عن اخوانه

فمابالك اذا صاروا كثار ماشاء الله


بس لله


موضوعك حلو


وفتح مواضيع الواحد صار يشوف نفسه فيهن


يعني استعراض للمؤهلات

ولا من باب الجمله على وزن فاعلوني

وزي ماقال الرجال


افتح لي باب بسسسسسسسسسسسسسسسس

وسرد مميزات


والمسكين مسكين

وحتى ولو

اعطوه من الملايين ستين


حتى احنا

فيه فرق لما نروح للمستشفى مرضى

وفيه فرق لما نروح زوار

المهاة مادام الدعوه فيها شفايه

انا مااخذت عيديه بس متامل خير انتي بتجيبيها لي

[ريم شمر]

.هلا بالفاضيه :D
كنا في مصيبه صرنا في مصيبتين

يااااالله سترك :(

انا اتوقع نهايه السنه

مضايف شمر كلها بتكون فاضيه :D :D :D

موضوع حلو يالمهاة

بس انا وعن سبق الاصرار والترصد منيب معلمه
بهديتي :o ....


صراحه ماتنطرى ولاتنقال

مابوه مثلها ابد

اخاف اقولها تغشونها مني :D :D

والا تجيني عين :rolleyes:




المهاة اول احلفي علي ........واعلم :D :D




تسني سمعتس تحلفين :o




طيب بقولها


هذا االله مير يسلمتس

طول رمضان وانا متبرعه اسوي الفطور لاهلي

وطبعا حصلت بعض الخساير ....في الارواح نتيجه لذلك:(

كنت احط عينه من الاكل للقطوة قبل احطه لهلي

احتياط :(

وتقريبا الحي اللي حنا فيه نظف من القطاوة :D :D

عطوني البلديه شهادة شكر :confused:

المهم ان واحد من اخواني كان يضحي ويذوق الاكل اللي اسويه
وحصل له مضاعفات خطيره .....وسوى اشتراك بالمستوصف
كل يوم وهو عندهم يسوي غسيل للمعده :( :(


بعد ماخلص رمضان

بعد عمري الله يخليه لي اخوي محمد

جاب لي هديه كتاب

( دعي الطبخ وابتسمي للحياة ):D :D :D :D


وش رايكم بهديتي :o




الريم .

[صقر الشمال]

احسن هدية جتن هي شريط قرآن بصوت الشيخ عبدالله السالم

من واحد عزيز علي وغالي الله يسلموه







..




.

[المهاة]

ياحبني لكم كلكم هنا و انا مدري ..ياربي تسلمهم و تكبر بواجبهم .. :o



أخوي فيصل اللويش .. ياهلا و غلا .. نورت الموضوع ..ماشاء الله ماودك تعرفنا على اللي هداياهم هالشكل .. شكلي ما أشوفهم الا بالصور ..:p

من جد هدية و لا أروع .. و أنت أكيد تستاهل كل خير ياوجه الخير .. بس بصراحة هذي ماقدر عليها .. :rolleyes:



و لو بغيت خوي ترا الفاضي دايم فاضي .. و علي تذكرته بس ذهاب فقط .. :D



حيا الله شموخ .. منورة عيوني ..

بس ليه الطمع شموختنا .. مبلغ بسيط و تقولين الفين أجل لو كبير كم بيصير .. :confused: شموخ شرايكم تتبنوني .. :D تستاهلين يالغالية و الله يخليلك أخوك يارب ..

مشكورة على المرور حبيبتي .. بس انتبهي يقرأ أخوك ردك ترا بيبطل يهديك .. :p

[المهاة]

حيا الله طارق الليل .. أكيد أخوي اللي يبي يهدي مايشاور .. بس أحنا هنا نشاور بعض بالانسب .. أنا ما شاورت اللي بهديه <<<<< يعني أفهموها ماراح أهديكم ..:p

و بصراحة زوجتك باين قمة في الذوق .. لانه في رايي أحلى هدية العطر خاصة انها تعبر عن ذوق من يقدمها .. و تظل رائحتها تذكرنا به في كل مرة تتسلل الي وجداننا لاني أرى العطور أسرع لغة تخاطب القلب


الله يخلي لك زوجتك ويديم عليكم المحبة ..
:)






حيا الله فوفو .. ياربي جعل الضحكة دوم مو يوم يارب .. و يكفينا من الموضوع ضحكتك يالغالية ..

بس فوفو مو ملاحظة انك تهربتي من الاجابة .. ;) بعدين فعلا الهدية مو بقيمتها المادية أحنا نبي أغلاها معنويا ..

مشكورة عيوني على اقتراحاتك بس أبي تعلمينا أنتي وش أغلى هدية جتك ..

بانتظر ردك فوفو و الا ترا ماعلمك وش أغلى هدية جتني .. :D

[حبها ذبحني]

هلا المهاة

بصراحة اغلى هدية جتني بهالدنيا هي بنتي اثير ما أعتقد فيه اغلى من كذا هدية

عقبال العزابية

لك تحياتي

[المهاة]

يا الله ان تحيي الكتراز .. أجل حصلت خوش هدية .. تعيش و تاكل غيرها .. <<<<<< عجبتها السالفة تحاول تتصور شكلك أنت وثوب العيد .. :D

بس الكتراز أخوي أنت ماقد جاك هدايا غير العيدية .. .؟؟:(

ياخي لا تخبي ماراح ننظلك .. قل اذكروا الله قبل تعلمنا وشي .. يالله عاد عن العجز أرجع علمنا أغلى هدية .. :mad: <<<<< مو كنها قامت تمون .. :rolleyes:





اخوي البدر الساهر .. الله يحييك و يحلي أيامك يارب ..

حظك يالبدر على الاقل قد خذيت عيدية .. مو مثلنا بس نسمع عن العيد و ماقد شفناه .. <<<< ماقد عيدها غير أبوها الله يرحمه .. |8|

الا أخوي البدر متأكد تبي الهدية مني ..؟؟ أبشر بالخير أخوي بس أصبر لين يردون كل الاعضاء عشان أختارك أنسب هدية و اللي اعتقد انها هدية الكتراز .. :D


تدري أخوي أني بعض ردك ما فهمته بس على رايك الشفاية مو زينة مو لازم أفهم كل شي .. مشكور على الطلة أخوي البدر .. بس ترا الهدايا مو شرط تكون عيديات .. :rolleyes: ;)

[المهاة]

يا حيا الله ريمنا <<<< تعلمك انها شمرية ..:cool: ياهلا و غلا حبيبتي .. تدرين ريم ترا الفضاوة معدية شكلها بتعم النت كله لازم ندور لقاح ضدها او نقضي على مصدر الوباء فيالله شدي حيلك في الحرب ريومة ..

أجل أشوى لقيت أحد يغلبني بالرفالة ياريم .. <<<< أهلها ماينادونها الا يالرفلا و متشققة تحسبها مدحة ..

ريم حظك باخوك باين عليه فري ماشاء الله عليه ما اشترى عقال مخصوص لتعليمك الطبخ ..<<<< ناوية تنظلك .. :D


تسلمين حبيبتي بس اكيد ريومة جاك هدية صدق .. فتشي بدواليبك و بتحصلين شي ناسيته بانتظر رجعتك تعلميني وش حصلتي .. بنت و ما عندها هدايا مستحيل التماسيح ممكن تصورها .. بس البنات نو وييييييي .. ;)







حياك الله أخوي صقر الشمال ... فعلا هدية و لا أروع .. أكيد مافيه أغلى من كلام الله سبحانة و تعالى ..

و الله يجزى صاحبك كل خير و يكثر من أمثاله يارب .. و يديم الغلا بينكم .. لان مثل هذا فعلا من يعتز الواحد بصحبته ..

تسلم على مرورك أخوي .. :)




أخوي حبها ذبحني .. حياك الله أخوي نورت المضايف .. و سلامتك من الذبح يارب .

الله يخلي لك أثير و يخليك لها . و يصلح دينها و يقرّ عينك بنظرتها و صلاحها .. و يرزقك شكر الواهب و برها يارب ..


فعلا هذي أغلى هدية لذلك أحنا نستبعدها لانه ما يقدر على منحها الا الله سبحانه و تعالى .. عشان كذا ننتظر الهدايا اللي بمقدور البشر فقط ..

فأكيد أنه أهدي لك شي مميز بقيمته المعنوية و مو شرط قيمته المادية .. فليت تشاركنا بمعرفته لو مايزعك الامر .. لان أخيتك بتذبحها الشفاية .. :rolleyes:

[حبها ذبحني]

طيب يا شفاية

بصراحة الهدايا كثيره والي يعزون على اكثر على العموم هي مسبحة فضة خالصة من شخص غالي وغالي جدا على اعتبرها من اغلى واعز الهدايا الي نفسي

لك تحياتي

[ريم شمر]

.هلا والله وغلا بمهاتنا <<<<< بتعلمك انها عرفت انك شمريه :D

ويلوموني ببنات شمر

مو بس سنعات ...وزينات ......لا......و بعد.... ذكيات

يعني انا حاولت اصرف الموضوع ومانفع معك

طيب ابشري والله مااردك بقول الصدق وماعلي من احد

طبعا جتني هدايا ...

بس احلى واهم واغلى هديه هي اقلهم قيمه ماديه
بس قيمتها المعنويه كبيره .....
تعالي بقولك لحالك .بعيد عن الملاقيف ......
اللي انتم تسموونهم الشفايين:)


































احلى هديه وصلتني .....






منديل معطر من اللي يوزعونهم في الطيارات :D







بس مو منديل عادي

مكتوب عليه اسمي .وبيتين شعر .......فيني طبعا:)





واللي كتبهم .....





كان بين السماء والارض في الطياره مسافر



وماكان في باله الا ريم


بالله عليك

مو هذي احلى هديه ....










عارفه بتقولين لي منهو؟؟؟





الحين بقولك


















هذي الله يسلمك شغالتنا
تموت علي الله يذكرها بالخير :D:D





باي مهيه :)

ريمو..

[أمـــيرة]

هلالا ومرحبا بك يالمهاوى








نورتينا







اما اغلى هديه جتنى









وهي







الدعوه اللي وصلتنى






لشبكة شمرررر



طبعا هي احلى واغلي هديه




تحياتى لك يالمهاوىىى


اميرة شمر

[المهاة]

حبها ذبحك مشكور أخوي انك قدرت ظروفي و اشبعت فظولي ..:D

وااااااااااااو سبحة فضة من جد روعه بصراحة عجبتني الهدية جدا .. :cool:

باين ان غاليك كله ذوق ;) و واضح كمان انه يغليك جدا و أكيد انت تستاهل اخوي .. الله يديم الغلا يارب






ريمنا ياربي يسلمك شفتي شلون احنا يالشمريات حلوات .. ريم الا عسى ماعندك كاشف .. :D

بصراحة ريومتنا الهدية رومانسييييييييييية حييييييييييل .. |15|


و زادت رومانسيتها يوم عرفت من هي منه .. |510|


شكل شغالاتكم اكتسبت بعض صفاتك ريومة ..

الا ريوم متى بتعلميني الصدق لازم يطق فيني عرق يعني .. |8|





هلا و غلا باميرتنا ..

بصراحة فعلا اروع هدية ..

مو مثلي الله يخلف جلست افحط سنة بهالنت لين حصلتكم ..

مشكورة امورتنا على الطلة و الف شكر لمن اهداك لنا حبيبتي ;)